السلام عليكم بنات شلونكم ؟
عندي أسأله وياريت اللي تعرف تجاوبني …
1) الحمدلله ولدت طبيعي والحين صارلي 10 ايام بس بطني ماراح صاير رخو وفشل شسوي ؟؟ شتنصحوني فيه ؟ الحزام زين ؟ ولا في شي افضل ؟ وشنو افضل حزام ؟
2) شتاخذون بالنفاس غير اللهوم والحسو وشاي الأعشاب ؟
3) فيه وحده قالتلي عن بخور اتبخر فيه كل يوم بالليل قبل النوم تحت عزكم اللهسمعتو عنه ؟ احد مجربه؟
4)شتعطون البيبي يشرب غير الحليب ؟ مثلا ماي وشكر ؟ حبة حلوة ؟
اولا الحمدلله على السلامة
بالنسبة لسؤالج عن ربط البطن انصحج بالمشد الاندونيسي وايد زين ماشالله
اكل النفاس معروف اللي هو العصيدة اللهوم الحسو القبوط شورة دجاج بالخضار مرقوق او محروق صبعة
شربي ماي عشان لا يصير فيج التهابتا في البول
بالنسبة للبخور يسمون بخور الحرمل و هو عبارة عن مجموعة اعشاب
يعني مفعولة ان يسحب الهوى اللي فيج و ترتاحين
البيبي كافي عليه حليبج و بس لا تعطينه شي ثاني لان الحليب في كل العناصر اللي يحتاجة البيبي
اتمنى ان فدتج يا قلبي
مبرووووك ما ياج حبيبتي
ويتربى بعزكم وان شاءالله تشوفونه كبيرة ولا كبيرة مادري شنو يبتي هههههههههههههههههه
عموما حبيبتي
حليبج كافي هالعمر ولا تعطينه شي يتعسر منه ولا يلعب بمعدته توه بيبي وحليبج في كل الفايدة
بالنسبة لج اختي اللي قبلي ما قصرت
والله يوفقج
حبيبتي حمدالله على سلامتج .. انصحج بالحزام و تلقينه بالصيدليات و يمكن المشد مثل ما قالت اختي المبدعه يكون احسن..بالنسبه للاكل حرصي على الحسو و اللهوم وايد مفيد و اكلي
لحم و الدياي و الخضره عشان حليبج يكون مغذي للبيبي الله يخليه لج ..اما البخور بصراحه ما جربته..و و لا تنسين ادهنين بطنج و عموما جسمج كله خلي فترة النفاس فرصه عشان تعتنين بجسمج و في خلطات وايد مفيدة تلقينهابكتاب معروف اسمه اسرار المرأه…اما البيبي لا تعطينه غير حليبج لمدة 6 شهور اذا قدرتي اما اذا بتعطينه شي مساعد على الاقل على نهاية الشهر الثاني تمره وايد زينه و عندج بعد حبة حلوة مع حلبه و الله يوفقج
الحمدالله علا سلامتج حبوبة ومبروك ما ياج
ربط البطن حملتي الأولى ماربطت بس هالمرة شكلي راح أربط بس مادري شنو حزام مشد
والبيبي عطيه حليبج وماي وسكر نبات ين الرضعات
وانتي كثري بروتينات لحوم دياي بيض شوربات تدفي الرحم طبعا بالإضافة حق ادوية النفاس لهوم حسو إلخ
هذا الي اعرفه
مع التحية………………
مبرووووك ما ياج حبيبتي
الحمدلله على سلامتج
انا افضل شورت كورسيه تلبسينه طول اليوم بس لاتنامين فيه
واهتمي بالسوائل الدافية ولبسي دلاغ على طول ولاتخلين راسج مكشف دائما لبسي شيله خفيفة
أول الأيام شربي حليب حار مع قفشة صغيرة دارسين وحطيلج مطارة صغيرة زعتر وشربي منها على فترات
هذا بالاضافة للحسو اول 10-15 يوم فقط والعصيدة ابتداء من اليوم السابع تقريبا تاكلينها مع بيض بالفلفل حسب طريقتكم
اللهوم قفشة وسط الصبح وقبل النوم من 15-20 يوم تقريبا
لاتشربين ماء بارد خليه بدرجة الغرفة
وبالنسبة للطفل اخذي راي طبيب الاطفال أضمن وأحسن أتوقع ممكن شويه ماء مغلى ودافي بين الرضعات لان في ناس يقولون سكر النبات يسبب الم بطن لبعض المواليد والله اعلم فسئلي الطبيب احسن
اخر 30 يوم استعملي تحاميل بيتادين تنظف وتنشف
وطبعا شوفي والدتج اكيد عندها خبرة بالنفاس
الف مبـروك
والحمدلله على سلامتج
اذا عالبطن ربطيه بحزام البنات يمدحون المشد الاندونيسي في وحده تبيعه معانا بالمنتدى
اما عالبخور في بخور بالحواي اسمه بخور النفاس انا جربته وايـد زين او استعملي الخوا جوا هذا دوا موجود بالعطار عجيييب يسحب الهوا منج شبي فحمتين وحطي عليه الخوا جوا او بخور النفاس وقعدي كانج قاعده بحمام عربي وانتي بكرامه وخلي الدخان يدش مدة 10 دقايق او اكثـر
واذا عاللهووم كثري منه وكثري من العصيده بالتمر وحطي فيها فلفل اسود وايد وكثري من الزعتر والدارسين والحسو عشان تنظفين بسرعه
واذا عالبيبي
لازم تعطينه ماي مغلي مبرد بين الرضعات وعطيه ماي غريب يريح بطنه وعطيه ماي نبات وايد زين للبيبي وتقدرين تعطينه ماي نعناع ترا ماي النعناع عجيب حق الياهل بهالفتره وبس سلامتج
مشكووووووووووووووووووووووووورين والله ماقصرتوا حدكم
الحمدالله على السلامه والبنات ما قصروا
الله يسلمج
مشكوره
مبروك ماياج والحمدلله على سلامتج
.gif "Eh S(7)")
