زوجي والموت والعيال < والله تعبت

السالفه الله يسلمكم
انا متزوجه من 9 شهور وحملت في هالمده مره وسقطت.. والحين صارلي 7شهور من الاجهاض وما حملت ولامره

المشكله ريلي مستعجل بشككل مووو طبيعي عالعيال وكله يضايقني بهالخصوص ودايما على لسانه طاري الموت وانه يبي عيال قبل لا يموت وااااااايد يردد هالكلام وانه يبي عزوه تشيل اسمه من بعده !! والله صار يخوفني انه فيه شي جايد ومايبي يقول

وكل ما نفتح موضوع العيال على اساس نقاش ينتهي بمشكله كبيره ويطلعني اني انا مابي عيال منه وقاعده اماطل ويزعل ومادري شنو!!

المهم رحنا لدكتور نساء وعطانا فحوصات احنا الاثنين .. وطلعت عنده مشكله في الحيوانات المنويه انها ما تعيش اكثر من ساعه وتموت بسرعه وهالشي يخلي فرصة الحمل بنسبة 0.5% (اقل حد طبيعي 25%)
يعني وايد ضعييف فعطاه الدكتور حبوب مدة 3 شهور يلتزم فيها عشان ترتفع النسبه وتوصل على الاقل 20

المهم اقترح الدكتور اطفال انابيب يوم شاف استعجال ريلي عالموضوع ومن يومها وريلي ناشب لي الا نسوي اطفال انابيب
وانا مو مرتاحه للموضوع احس انه بدددرييي علينا نخطي بهالخطوه اولا تونا متزوجين من 9 شهور ثانيا انا عمري 22 واهوه 32 يعني للحين بدري انه نيأس من الحمل الطبيعي ونروح للأجراءات اللي جذي.. المفروض نصبر فتره للعلاج بس اهوه يقول ماقدر انطر اكثر من جذي

حاولت معاه بكذا طريقه اني اغير رايه وبعد الحننه والصداع اللي سوالي اياها قلت له اوكي موافقه بس بشرط نحط اجنه 2 بس عشان اذا صار في حمل بيكون طفل واحد.. وعيااا الا تحطين 4 عشان اذا طاح منهم يتم عندنا توم .. انا وين اجابل 3 توائم او 2 وانا وراي جامعه ولازم اهتم بمستقبلي بعد وفوق هذا بكريه يعني ماعرف لليهال واحد وبالغصب بتعلم عليه هالدور توم..

انا حيييل خايفه من الالم ومن تجارب الحريم اللي حملو انها اتعب وتسبب الالام فظيعه فالمبايض .. وطبعا هالموضوع لازم يكون بسريه يعني محد من اهلي او اهله بيدري بهالسالفه واذا سئلو بنقول حملت طبيعي وبنسافر الاردن وبنسويها هناك عشان الخصوصيه.. يعني فوق ما اهوه عوار فوق ما بكون بروحي

بنات شنو تشورون علي اضغط على نفسي واوافق عشان اريحه ولا ارد اقوله مابي وشلون اقنعه يغير رايه بدون لا يزعل لاني عيزت من كثرما احاول فيه وهو معند ومو راضي؟؟

بليييييز ادعووولي الله يكتب لي الخير وييسر لي اموري

اختكم
انعم