الوسم: النطق

بنات تكفون ابي فزعتكم منه منكم معهاا طفل يعلموه النطق واشلون نظام التعليم عندهم
بليز ابيكم تتفاااعلون

اختي ممكن توضحين سؤالج مو فاهمته

حبيباتى عندى مشكله وهى بنتى
عمرها سنتين وشهرين تقريبا
لى الحيييين ماتتكلم , بس احسها تفهم وذكيه
شقدر اسوى
ساعدونى

وانا بعد ولدى سنتين ونص لين الحين
ما يتكلم عدل بس ذكى ويفهم الى نبيه منه
بس مشكلته عصبى وااااايد من كثر اعصابه
الاكزيما ماكلته اكل ويغار من الى اكبر منه
والى اصغر منه واى شى بايده يطق
ويحذف كلشى وشلنا عنه الادوات ولالعاب الحاده
ابى حل فيدونى مشكورين

وأنا بعد ولدي عمره الحين ثلاث سنوات وثلاثة شهور وما يتكلم وايد كلماته محدودة وضعيفة ويبدل الحروف

مثل الراء يقوله + نون ( ريم = نيم )
والقاف يقوله دال ( قوم = دوم )

وولد اختي بعمره يتكلم جمل طويلة وبطلاقة ….

وولدي ما يقول جمل كلش…

شرايكم ؟؟؟

والله على حسب قدرت الياهل انا بنتي البكر يننتني تأخرت على ماتكلمت اما الثانيه اسم الله عليها ماطولت يعني البكر ليش ابروحه

ماكو يهال يلعبون معاه ويشجعونه لاتقولون عيال خالتهم انا كانت بنتي يوميا عندهم ومافاد غير لما احد معاها بالبيت ويكلمها ويستفزها

عشان تتكلم وهم اذا ولد يتأخر بالكلام انا ولد اختي عمره 3 ونص كلامه مكسر مدخلته حضانه يفشل كلمي الياهل على طول وعلميه اسامي

الاشياء ولاتراقبينه وتقولين متى يتكلم ترا يصير عناد الله يخليه لك وتشوفينه منطلق بالكلام

انا بعد ولدي عمره سنتين و 5 شهور و ليلحين مايتكلم عدل جم كلمه بس و هم مايقولهم عدل

انا عمرة 3 سنوات وماتكلم الا يأشر ويفهم عدل وذكي بس ما يتكلم اخذت تحويل لمركز سالم العلي بالصباح وقاصوا الماي بالاذن وقالوا فيها وحولونه مستشفى زين وشافة الطبيب وقال مافي شي

وللحين ننطر

أخت دمثة شنو قالولج بالضبط وشنو هالمركز للسمع والنطق؟؟

وشنو يعني ماي بالأذن يمنع كلام الطفل؟؟

شنو سويتي بالضبط عشان بودي ولدي…

للرفع

للرفع

للرفع

شسالفه بنات جنه شي منتشر
انا نفس مشكلتكم ولدي بيكمل السنتين ومايتكلم
رحت مستشفى الهادي اليوم بالسرداب عندهم دكتور مخاطبه وقالولي لازم بهالسن الياهل يركب جمله بكلمتين ضاق خلقي ومادري شسوي عطتني موعد يجيكون على الاذن يسوون تخطيط بس انا ادري ولدي يسمع ويفهم ماشاءالله يعني مافي اعاقه الحمدالله قالت اذا تاكدنا ان كل شي سليم انسوي جلسات مخاطبه تقول في وايد اسباب حق تأخر النطق يمكن الاذن فيها ماي او ان مايقدر يركب الاحرف وينطقهم فا احنا نعالج هالمشكله … الصراحه انا رحت هناك من غير ما احد يقولي يعني مادري اذا صج ولدي راح يستفيد ولا لا ولما رحت شفت ناس تدش مع اعيالهم … اتمنى من اي ام واجهتها هالمشكله تفيدنا لان صج شي يضيق الخلق وخصوصا لما تشوفين اللي بسنه والاصغر يتكلمون واهوا لا .. ولا الكل يسأل شفي ماتكلم ويقعدون يعلقون او يطنزون انا ماحب اضايق والله

عاااااااااااااااااادي مو شرط يتكلم الياهل بسرعه

شوفوا انا بنتي ماتكلمت الا عمرها ثلاث سنين والحين ولدي نفس الحاله عمره سنتين وشهرين وما يقول الا ماما بابا دادا وبسسسسسسس مادري شالسالفه منتشر هالموضوع ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

يا أمهااااااااااااااااااااااااااااااااااااااااااااااا ااااااااااااات
لاتحاتون عااااااااااااااااااااااااااااااااااااادي
ولاتضيق خلوقكم من حجي الاوادم
اخوي دش الروضه وطلع منها وابلاته مايفهمون كلامه وألحين تبارك الله ريال وتوظف وذكي وكلامه مفهوم ومنطقي بس ناقصه العروسه هههههه
منصجي هذي فوارق فرديه بين طفل وطفل أهم شي ان الأم لاتتحلطم على ولدها انه مايتكلم جدامه ترى الياهل من سنه خلاص يفهم ولازم تحاسبين بكلامج لأنج اذا ذميتيه وتطنزتي عليه راح تدقرينه ويفقد ثقته بنفسه ويحس انه مايعرف شي وماراح يتجرأ انه يتكلم اذا اقرب الناس حقه(أمه)تدقره شتتوقعون بيطلع عالدنيا بجرأه؟طبعا لأ
بالعكس شجعيه عالكلام انتي سولفي معاه على طول (وكلميه عدل كأنج تكلمين شخص كبير من سنج) أنا طفارتي الامهات اللي لي حاجو اعيالهم قالو :تبي أم؟ يعني تبي تاكل اي قوليها عدل من الاساس عشان يلقطها صح منج واذا كان مثلا اهو ينطق كلمه غلط لاتقلدينه لأ انتي قوليها صح مثلا لي قال لج:ابي ببح قوليله تبي تتسبح يلا امش أسبحك وهكذا
وديرو بااااااااااااااااااااااااااااااالكم من الخدم الياهل اللي كله مجابلته خدامته واحد من اثنين
اما انها تكلمه مكسر فياخذ الحجي منها ويصير كلامه مكسر مثلها
أو انها ماتسولف معاه ويصير مايتكلم لان محد يكلمه
وشغلو لهم قرآن تراه معجزه الرحمن ربكم يقول"ولقد يسرنا القرآن للذكر"وانتي اقري جدامه راح يقلدج مع الوقت
بس أهم شي لاتحاتون واذا أحد علق عالياهل جدامه دافعي عن ضناج على طول كلشي ولاكرامه الياهل ولاتجاملين الكبار على حساب شخصيه الصغار والله أعرف بنات صارت لهم مواقف من هالنوع واهمه يهال لي بس ألحين كبرو اللي تزوجت واللي توظفت بس للحين هالمواقف حازه بخاطرهم ومأثره على شخصياتهم
ديرو بالكم على عيالكم هذي وصيتي حق كل أم وهالله هالله بالقرآن
رفيجتي من يوم بنتها صغيره بالمهاد كله تحط لها قرآن والحين البنت بالروضه تبارك الله ذكيه وحجيها حجي كبار وقراءتها للقرآن حلوة تبارك الرحمن
آسفه عالاطاله بس انا أم حالي حالكم وما أرضى على عيالكم اللي ما أرضاه على عيالي انتو أهل ديرتي وعيالكم اعيالي
وسلامتكم

عادي انا عيالي نفس الطريقه

مشكوررررين حبايبى
تاخرت عليكم بالرد
صج الياهل بس يبى احد يكلمه
وانشاءالله بنتى واعيالكم ربى يقك عقده لسانهم

السلام عليكم

بنات قبل شهر وشي تقريبا كنت مشاركه معاكم اهني و كنت اشتكي مثلكم والحين الحمد الله تحسن النطق عند ولدي و السبب اني بلشت اقعد معاه و اتكلم معاه اكثر من قبل و صار لي تقريبا شهر و ماشالله تبارك الرحمن >>>> قولوا ماشالله >>>> ولدي بدي يتكلم احسن من قبل الكلام عنده تعدل شوي بدا يقول جم كلمه زياده عن اللي يعرفهم بدا يركب جمله من كلمتين او 3 بس شوي مخربطين بس هم ميخالف على الاقل احسن من قبل الحمد الله يارب طلعت العله فينا مو بعيالنا انا ما اقعد مع ولدي وايد كثر الحين بس من قبل شهر بلشت اجابله و اقعد معاه اكثر الحمد الله و الله لا يغير علي انشالله …

بنات جربوا خلوا قعدتكم مع عيالكم اكثر و سولفوا معاهم طفوا التلفزيون و لعبوا معاهم و هم صديقتي علمتني على شغله مفيده و اهي اني احط مسرحيات هدى حسين القديمه مثل ليلى و الذيب و تويتي و من هذول المسرحيات المهم فايدتهم اتعلم الياهل يتكلم بسرعه …

هذي تجربتي و انشالله تستفيدون منها و يتكلمون عيالكم بأسرع وقت انشالله ….

السلام عليكم

أخواتي العزيزات

ولدي عمره 2ونص وماينطق الابعض الكلمات فهل هذا شي عادي والا اوديه لعند الدكتور

حبيبتي انا ولدي صار 3 سنين وشي وليلحين نقه مو ذاك الزود
شافته اخصائية نفسية لمركز نطق وسمع ولما شافت انه يتكلم ولو بشوية خجل قالت مافي خوف عليه
حتى لو ما ينطق ولا كلمة لي عمر 3 ونص
عقبها تحاتين
لانه الطفل في هالسن يخزن المفردات وعقب يستخدمها
وطبعا الروضة والاحتكاك راح يساعده وايد

اتوقع ولدج البجر وما معاه يهال فعادي وللعلم البنات مقارنه بالصبيان يتحجون اسرع
فما لا توسين مقارنة ولا تتعبين نفسج مع الي يعلقون عليه

اتمنى افدتج وكنتج لاني كنت مهووسة

ما عليج أمر منو الاستشارية النفسية و وين المركز
ابني عمره سنتين و شهرين و ما ينطق غير 4-5 كلمات

حبيبتي لا تحاتين اذا حبيتي روحي لمركز الشيخ سالم العلي للسمع والنطق بمستشفى الصباح – يم مستشفى زين_ يسووله تقييم لغة ونطق ويقولولج اذا طبيعي- انشالله- او فيه تأخر و يقولولج شتسوين عشانه

اهم شئ متأكدة انه يسمع؟ لأن راح يسووله فحص سمع بعد.

واله يطمنج عليه

الله يعطيكم الف عافيه ماقصرتو

مرحباااااااااااااااااااااا يا أمهاااااااااااااات
أسمعوا أول ساااااالفتي أدري بتطقوني بس عشششششان يوضح كل شيء أنا يبت ولدي الله يصلحه وكان طبيعي الحمدلله بس لما صار عمره سنه مااااااااافيه كلاااااااام ولاحتى ماما بابا اي شي قو بو يبه ابي اي شيء قلت ننطر شوي ونشوف سنتين وهمن لا ماما ولا بابا عرضته على طبيب قااااااال الحمدلله يسمع يعني عادي دكتور قال لحظه فيه شيء غريب ولدج لاصق لسانه بس شكثر يمروني فيهم هالمشكله وعادي يتحجون قاااااال نقص اللسان مو يقصه قصدي يقصون اللي لازق الموهيييم سوينا العمليه ونطرنا ومافيه فايده وأنا الدموع اربع اربع يااااارب ولدي بيطلع مايتكلم شلون بيتعامل مع الناس شلون يفهمونه وبعد نص سنه يعني على سنتين ونص وأنا ناااااايمه الاهاللي ناط لي بالسرييير ويقول ماما شفت الا ولدي حبيبي قعدت ابكي واحمد ربي هو قبل ياعمري بس يصيح ويأشر المهم بدأ ينطق ماما بابا ماي يعني أشياء بسيطه بس يوم صار أبو أربع بدأ يتكلم بس فيه حروف ماتطلع يعني الخا حا والكاف والقاف والغين والظا مايقولها واليهال كله يضحكون عليه اقول لأبوه نروح وحدة السمع والنطق ولا يقول حمدي ربج قبل ولدج مايتكلم الحين كاهو يحجي قلت ولو الكل يضحك عليه مابي ولدي يتعقد الموهم لقيت وحده مره بالطبيب وسمعت ولدي يقول حاتم يعني خاتم قالت ليه ماتدقين على دكتوره فيفي من سمعت فيفي قلت الله يستر مين فيفي ذي راااااااح ظني بعيد قالت دكتورة متخصصة كانت تداوم في مدارس خاصة بالنطق وحييييل زينه ولا الأحلى تيج للبيت قلت الله زين ودقيت عليها وتقول اوكي وتيني يوم دخلت علي انصدمت ولا هالفيفي مره كبيرة ومستترة وخفت بس من قعدت مع ولدي وأنا واقفه معه شوي شوي الا ماشاء الله اسلوبها روعه والله يابنااااااااات بعد جلستين بس ولدي قاعد ينطق الحروف اللي ماكان ينطقها مابقى الا هالكاف مسويه له أزمه واحنا اللحين بس اربع جلساااااات وترى هي أساسا دكتورة نفسيه .ولدي ياقلبي اللحين عمره ست سنوات
المهم اللي يبي رقمها يدز خاااااااص أخاف مو مسموح أحط رقمها

عسى ربي يخليلج ولدج ويفرحج فيه وتشوفينه معرس قولي آميييييين
والله يتمم عليه إن شاء الله
لو ماعليج أمر أبي رقمها لأن بنتي عمرها أربع سنوات وماتكلم عدل

ماشاء الله تبارك الرحمن
الله يتمم عليه ياااااااااارب ويخليه لج
انا عندي بنوته باولى ابتدائي نفس الحروف اللي قلتيها ماتنطقها صح بس اسم الله عليها مو اثره عليها واثقه من نفسها حيييييييييييييييل .. رحت مدرستها وبلغت الاخصائيه النفسيه قالت محد من مدرساتها اشتكى منها ولما سالت مدرساتها قالوا احلى شي فيها كلامها تيييييينن فديتها يااارب

بس مرات يهال العائله يحرجونها
تكفين عطيني رقمها ماعليج امر …واظن عادي تحطينه عام للافاده…

تسلمييييييييين حبيبتي

97961096 دا رقم فيفى وشغلها كويس مع الاولاد ان شاء الله

يعطيك العافية ماريي كان ودي احطه على العام بس خفت الأدارة ماتسمح

مشكورة علي نقل تجربتج
بس باي مركز تشتغل

السلام عليكم

انا اول مرة بهالقسم

وربي يعافي عيالكم كلكم ويصلحهم ويحنن قلوبهم عليكم

انا عندي سؤال واحد

هل في علاقة بين بيض الحمام والنطق ؟؟

انا بنتي ماتتكلم عمرها سنتين بس تقول دادا …

ونصحوني في بيض الحمام ؟؟

وياليت اللي تعرف شئ تفيدني ومشكورين مقدماا

والله مادري

نطري عليها انشالله تتكلم

لا سولفي معاها واااايد وحطيلها بباي ختشوف وااايد لما تتعلم وطول ما انتي قاعده معاها سولفي معاها وخليها اتقلدج واتقول مثلج

ام جوري الله يسمع منج ..

ان سامعه بعد عن القهوه العربيه وحده بدويه قالتلي تقول شربيها قهوه عربيه وهم سامعه بالبيض بس لازم يكون ني يعني مو مطبوخ وما ادري اذا صج ولا لا

:

اول شئ مشكورة على الرد

انااا ما اخليها كلش.. واسولف معاها واعيد لها الكلام مرتين و3 و4 بس ماكو فايدة ..

انا بشوف مستشفى الصباح عندهم مكان متخصص بالنطق ..

والله يشفيها

انا ولدي سنتين ولايقول شئ بس باااه ماااه حتىمايقولها عدل مثل الاطفال ماما بابا ويقول دادا بس هذا كل اللي يقوله

كل ماقلت لاي احد يقولون لي عادي عادي

ان شاءالله مافي الا كل خير

هلا حبوبه انااا سمعت بعد بالقهوة راح اجربها باجر معاها

اما بيض الحمام بحثت عنه بالنت ووااايد يمدحووووونة بس الطريقة محد كتبهااااا

ومشكورة ياقلبي

دام ربج موجود ماراح يصير الا كل خير

حبيبتي في مركز سالم العلي لعلاج السمع والنطق بمستشفى الصباح
بس ياخذون من عمر 3 سنين وطالع لان الياهل المفروض يبدأ يتكلم بشكل صحيح بهالعمر
بس مايمنع تعرضينها على اختصاصي يقيم مستوى نطقها ولغتها
وبنفس الوقت حرصي انج تسولفين معاها وتلعبين معاها وحتى وانتي تسوين الاشياء الروتينيه معاها
سولفي وتكلمي عن الي تسووينه مو الا تتجاوب معاج المهم انج تعطينها لغه استقباليه على قد ماتقدرين
بنفس الوقت اللغه التعبيريه راح تنمو بأذن الله

انا سامعه بعد بالبيض بس نطري عليها عادي بنت اخوي جذي كانت طرمه ماتقول غير اداااه

والحين اسمالله عليها ملسونه شيفكج من السانها تقولين بالعه مسجل

اختي حاولي تبعدين عنها الخادمه عشان لا تسمع البنت عده لغات لان راح يصير تشابك والبنت ماراح تتكلم ..

هذي شغله وشغله ثانيه سويلها فحص سمع ..

وان شاء الله ماكو الا الخير

منوووووووورة

وبردانة

وهمس ورد

مشكورين وربي يريح بالكم وراح اسوي اللي قلتوووة

انا اقول نطري خل تكمل 3 سنين لاتستعيلين عليها وانشالله تتكلم وتزعجج وتاذيج واتقولللللللين واااااااااااااااااااااااااااااااااي متى تسكتين اذيتيني من قرقتج

الله يفرح قلبج فيها ويا رب تتكلم قريبا

بس مثل ما نصحوج الخوات غير انج تكلمينها خليها تخالط اطفال بكثرة
يعني اذا انتي بشقة بروحج اجتمعي باحدى خواتج او حمواتج المهم تجتمع مع مجموعه اطفال وانشالله بتلقط منهم اسرع

واذا بتراجعين سوي فحص سمع احتياااااط
بس لا تحاتين

وادعي لها على طووووووول

ولدي البجر سنه ونص وللحينه ما يتكلم حتى ماما بابا بس يصرخ او يطلع اصوات مثل ااه يعني ايي واذا لا ااه بس بصراخ …
وايد يحب التلفزيون حتى اذا بنام لازم يطالع تلفزيون لين يدوخ حاولت اوخره عنه بس مااشلله يقعد طول اليوم يحن ويعفس الدنيا يعني التلفزيون اهو اللي مخليه هادي شوي

لاحظت اغلب الردود لمشكله تأخر النطق عند الاطفال الاغلبيه تقول كثره الجلوس امام التلفزيون موزينه ؟؟

الحين انا قمت اوسوس ابي اعرف صج التلفزيون مو زين حق الاطفال وتأخر نطقه؟؟

انا ولدي كان يقول بابا ودادا بس من يبت ولدي الثاني صار فيه ردة فعل ومنو يومهم بس يصرخ

يمكن التلفزيون والغيره تلعب دور كبير اكبر من التلفزيون

ضاعفي اهتمامج فيه

لمييييه وبوووسيييه وايد

كله حطيه بحظنج والياهل لا تشيلينه الا اذا بترضعينه او تغيريله

سولفي معاااه وقوليله قصص

يبيله الوان واوراق وخليه يلون

يبيله حمام سباحه وكور وخليه يسبح ويطبش

مشكووره

بس انا كنت ابي اعرف يعني التلفزيون في مشكله اذا كان ولدي طول الوقت مجابله..؟
انا اشوفه يندمج مع بارني ويقلدهم بالاصوات والحركات احسه قاعد يتعلم اشياء بس مادري ليش اشوف اغلب الردود يقولون وخريه عن التلفزيون!!

لا بالعكس التلفزيون يعلم اليهال كلمات وايد و خاصة القنوات التعليمية
انتي سولفي معاه عادي يعني لا تسولفين معاه لغة اطفال
و خليه يلعب مع يهال اكبر منه
او وديه حضانة الصبح راح يرد يسولف

الشي ان زاد عن حده انقلب ضده << التلفزيون طووووول الوقت موشي

ييبي له قاري صيغرون

وألعاب تركيب والوان اصابع

والله يحفظه

حبيبتي انا من قريت عنوان المشاركة وانا عارفة السبب عدل

التلفزيووووووووووون موووووووو زين للصغاااااااااار

تدرين ليش

لان يخلي الطفل

مستقبل فقط

يعني ماكو حوار بين التلفزيون والطفل

انا عندي اربع اطفال

والخامس بالطريج

ماشالله

والله ولا واحد فيهم قعد عند التلفزيون

الا بعد سنتين

والله ان عيالي يتكلمون احسن مني

ههههههههههه

بس هذي حقيقة

التلفزيون يخلي الطفل بس يستقبل

يعني ما ياخذ ويعطي

وخريه عن التلفزيون

وانتي كلمية سولفي معاه

طلعي انتي وياه اماكن عامة

انا جذي مع عيالي

مايشوفون التلفزيون

الا وقت قليل جدا جدا

لان انا والله مو مخلية عندهم وقت فراغ

وحتى وقت العصر مدخلتهم نادي حق تحفيظ القرآن

وعلى فكرة عيالي مو كبار

اكبر وحدة بنتي عمرها 5 سنوات

وبعدين 4 سنوات

وبعدين 3 سنوات

والصغير سنتين

انا طولت عليج ادري

بس مثل ما قلت لج

اشغلي وقته

والمهم ان انتي وياه مو بروحة

بالتوفيييييييييييق انشااااااااااااالله

انشالله يتكلم

انا ولدي بعمر ولدج بالضبط توةةةة هاليومين بدا يحاول يصيد جم اسم
ولاواحد من عيالي يحب التلفزيووووووووووون ماكو شي يلهيييهم عنييي حاولت فيهم كثر مااقدر مااكو فايدة الا اذا خليتهم جدامة ورحت الدار وقفلت علي الباب ينجبرون يطالعون

خلي ولدج يطالع تلفزيون لانة بيتعلم بس مو24 ساعة انتي سولفي معاه قوليلة قصة موعبالج مايفهم بتشوفين عيونة متبعة معاج وطلعيه معاج بروحكم

انتي متاكده ان السمع عنده اوكي
مو شرط مايسمع بس مرات يكون السمع
عنده ضعيف في درجات حق السمع
انا ولدي معاه نقص اوكسجين وسبب له
تاخر في النمو والحين عمرة 3 سنين
يقول كلمات بسيطه واكثر شي يصااااارخ
لمن مانفهم عليه يعني الصراخ عنده
وسيله تعبير عن اللي بداخله
وانشالله مافيه الا العافيه

بنت الديره

مشكووره على نصيحتج
الزينه حبيبتي انا ولدي للحين ولا كلمه ودي اسمع يقول ماما

ام نونو
انتي كلامج يخرع انا متأكده ان يسمع ومافيه شي لان لما اطلب منه شي يسويه

تخيلو اليوم قعد الفير ساعه3ونص وراح الصاله قعد بالديرفه ويأشر على التلفزيون يبي بارني !! ورد نام

وحاولت ابعده عن التلفزيون بس ماكو يروح يأشر يعطيني الريموت والاشرطه يعني حطيلي بارني وانا قمت حتى احاتي نظره

انا عندي 3 يهال الكبير عنده تاخر نطق وصعوبه واهو الوحيد من اخوانه اللي يطالع التلفزيون ومدمن والباجي نطقهم سليم فانتي ولدي اذا تحسين من التلفزيون من الحين خففي عنه التلفزيون وشغليه باشياء ثانيه

لان بعده صغير انا ولدي الحين عمره 7 سنين وادمن على التلفزيون بس ولدج بعده صغير

وترا ممكن ما يكون عنده صعوبه او تاخر لان يمكن بجر وطبيعي هالشي بس انا ولدي ظل لي عمر الحضانه بدون حجي بس مجرد ماما بابا دادا يمكن لي عمر الثلاث سنين كلمات ثانيه شي بسيط مقارنه مع اخوانه من عمر سنتين جمل وكلمات وحوار عادي شي طبيعي بس الكبير انطلق شويه مع الحضانه والحين بالنسبه للي كان اقول الحمد الله

الكل يقولي عادي ووايد من عيال حمواني ماتكلموو الا بعد 3 سنيين

وااي بس انا شصبرني على الاقل يقول ماما

وان شلت عنه التلفزيون ما يقعد راح يضل طول الوقت يبجي يلعب شويه ويمل ومنا شغل التلفزيون حقي انا اييب لي شريط بارني شسويله

انا ولدى نفس ولدك بظبط

بس نصيحه شلى تلفزيون منه انا نصحتنى وحده كانت رايحه لدكتوره عبير وتقول شفت طفل عندهااا كان شكله هادى ولا يطالعه كله مدنق راسه تقول سألت أمه عنه وقالتلها نسبه توحد ليش وسبه تلفزيون لأنه تقوقع على نفسه فهمتى

علاطول شليت دفدى من ولدى بس انا ماقولك مره وحده تقطعينه من تلفزيون لا <<<يعنى شلى دفديه وخليه على ام بى سى 3 >>>>

يعنى شى يحبه وشى مايحبه فيروح يلعب انا والله ولدى نفس ولدك بظبط يقوم من عز نومه ويأشر ويبكى يبى تلفزيون يعنى وهو نايم يفكر فيه فهمتى والله أحتريت وخفت بنفس الوقت صدق بالبدايه صعبه بس خليك معه
وانا الحمدالله مريت من هالمرحله وصرت كله معاه والحمدالله تغير والمده تقريبا أربع شهور والله تعبت بس فيه نتيجه الحين ينطق أسامى الى حوله كلهم وهتى -فكى _مابى
حاليا عمره سنتين وثلاث شهوور
وسامحينى طولت عليك بس انتى ام مثل ماأنا ام قلت أريحك والله يخلى عيالنا لنا ياارب

حاولي انج تعطينه اهتمام ووقت اطول وطلعي معاج ودايم سولفي معاه
وولدج ترى عمره اصغير مو الحين يتكلم بس ان لازم عالاقل يقول ماما وبابا
انا ولدي بعد اسنتين تكلم بس كان يقول ماما وبابا والحين اسمالله عليه عمره 4 ويتكلم عادي

السلام بنات انا ولد اخوي عمره اربع سنوات ونص وبعد ما يتكلم والله ما خلينا دكتور وما خذيناه ورحت مستشفى البنك الوطني وسويناله فحص دم وبول وسمع وتخطيط كهربا حق راسه بس الحمد لله كل شي تمام والكهربا واصله للراسه بس مشكلته ما ينطق وهو يفهم ترا كل ما تقلين سوي كذا يسوي يب هذا ييب ومره قالولنا عنده طيف توحد بس حله خلطه اطفال بس دائما يحب التلفزيون ويحب يطلع وايد بس يرد البيت يبشي يبي يطلع ودقيت على حضانات متخصصه اكو في جنوب السره ياخذون 150 عل الطفل وبعد 200 دينار وحدا غالي غير باص 15 دينار . ومره قالو خذوه حق دكتور نفساني اطفال متخصص ليقيس ذكائه سوينا في الاخير يقولون بس يبي اطفال كونه وحيد على اخت اكبر
اقول بس ربي لطقك وصبرك يا رب

اعتقد ان الولد يتاخر بالنطق كاطبيعه مو حاله مرضيه و بالنسبه لولدج صاحبة الموووضع ترى موزين شنو اتخلين ولدج يجابل التلفزيون 24 ساعه
انا يبتلج معلومات من خلال المستشفى اللى كنت فيه , طبعا المستشفى مو بس يطبب لكن يعالج اموور وقضايا كثيرة تهم اولياء الامور وينبهم
منها التلفزيون
حددى ساعه او 2 باليوم فقط
الباجى من اليوم " لابد ان يكون الطفل نشيط وحركى " عشان يكون وقت النوم مستغرق فيه وياخذ كفايته وينام بكير
لازم تتكلمين معاه اذا اهو مو فى حضانه ستخدمى الطين او الالوان واللوحات الكبار ,اقريله قصص , طلعى معاه وسولفى عن الاشياء واسمائها عشان اشوى اشوى يبدى مخه ينشط وتشجعينه على الكلام
مايشووف شر ياعمرى

ما هو النطق:

– النطق هى عملية عن طريقها تتكون الأصوات ويعبر عنها بمساعدة اللسان والفك والأسنان والشفتين وسقف الفم مع وجود تيار الهواء والأحبال الصوتية.

– ما هى مشاكل النطق:

إحساس الشخص عندما يقوم بنطق أصوات وجمل وعبارات أو كلمات لا يستطيع المستمع أن يقوم بفهمها أو أن تعطى جملة كاملة يستخلص منها شيئاً مفيداً.

ما هى مشاكل الصوت والكلام أو الأخطاء الصوتية والكلامية؟

تكون معظم الأخطاء علي ثلاث مستويات من الحروف:

1- حرف (الهاء) وتتمثل صعوبته فى إخراج الصوت الخاص به.
2- حرف (الراء) يتحول إلى حرف (الواو).
3- حرف (السين) إلى (الثاء) وكثيرا ما يجد الطفل صعوبة فى التعلم الفارق بينهما.

ما هى أسباب مشاكل النطق:

1- نتيجة إعاقة طبية (أو عجز) لأسباب مرضية مثل الشلل الدماغى أو عدم اكتمال عظام سقف الحلق أو الصمم.
2- أو لوجود مشاكل أخرى في الفم نفسه مثل مشاكل في الأسنان.
3- ممكن حدوث تأخر في النطق في غياب كل الأسباب السابق ذكرها وذلك يسمى مشكلة فى وظيفة النطق نفسها.
4- أواتباع الأسلوب الخاطىء فى تعليم التحدث والكلام والنطق .

"اللازمة" الكلامية تعتبر من مشاكل النطق:

لكل منطقة جغرافية لزماتها الكلامية ولهجتها الكلامية في نطق الحروف لذلك لن تكون مشكلة إلا إذا أثرت علي الشخص نفسه وعلي حياته.

هل الأذن أو مشاكل الأذن في الصغر تؤثر علي تأخر النطق والكلام:

إن الأطفال تتعلم الحديث ومخارج الحروف عن طريق الاستماع لمن حولهم وتقليدهم، وهذا يكون في بداية مرحلة الطفولة فإذا كان لهذا الطفل شكوى متكررة في الأذن في مرحلة سماع مخارج الحروف والأصوات فستؤثربالطبع علي نطقهم.

هل الطفل يستطيع التغلب على المشكلة الوظيفية للنطق:

عادة يستطيع الطفل أن يتفهم أكثر ويتغلب على المشاكل الوظيفية كلما نضج وكبر في السن، ولكن هناك بعض الأطفال التى تحتاج إلي التدريب المباشر عن طريق التخاطب (العلاج التخاطبى) وهذا يختلف من طفل لآخر والذى يحدد ذلك هو الطفل ذاته.

هل الطفل يتعلم الأصوات في وقت واحد:

يتعلم الطفل الأصوات والنطق بالتدريج فبعض الحروف يتعلمها الطفل في سن ثلاث سنوات مثل: حرفى (الميم و الباء).
والحروف الأخرى مثل: (الياء والراء والسين) يتعلمها جيدآ في أوائل حياته الدراسية ولكن لابد أن ينطق الطفل جميع الحروف سليمة تمامآ ويكتمل النطق عند سن 8 سنوات ولكن كثير من الأطفال تتعلم في مرحلة سنية مبكرة عن ذلك.

كيفية مساعدة الطفل لنطق ومخارج الحروف صحيحة:

1- عن طريق مقاطعة الآباء للطفل باستمرار فى حالة الخطأ.
2- لا تجعل الأصدقاء والأقارب يرددون الكلام بنفس الطريقة الخاطئة التى ينطق بها الطفل على سبيل الدعابة.
3- لابد من وجود مصحح مدرباً أو أى شخص يدرب الطفل على النطق إذا كانت المشكلة كبيرة.
4- إذا نطق الطفل كلمة خاطئة صححها أمامه وكررها في جمل أخرى وراء بعضها.

هل الكبار والذين لديهم مشكلة في النطق نستطيع مساعدتهم:

بشكل عام كل مشاكل النطق يمكن معالجتها بغض النظر عن عمر الشخص، ولكن كلما طالت مدة المشكلة كلما كان من الصعب حلها وعلاجها وتحسنها، فمثلآ إذا كانت المشكلة في العصب الذي يغذى عضلات النطق فالأمر يكون صعبا أكثر ويحتاج إلي وقت أطول من المشاكل الوظيفية هذا بالإضافة إلى اضطرابات في السمع نفسه أو مشكلة في الأسنان قد تحتاج إلى حلول أخرى، ويؤثرمعدل الذكاء ومدى تعاون الفرد بالضرورة علي كفاءة المساعدة المقدمة.

كيفية المساعدة:

لابد من اللجوء لمتخصص التخاطب لأنه مؤهل بدرجات علمية لكيفية مساعدة المرضى من الأطفال والكبار الذين لديهم مشكلة في النطق.
والنطق من المشاكل الكبيرة التى قد تؤثر على علاقة الشخص بمجتمعه وعلي نفسيته وتعليمه.
وتعتمد جودة حياة أى فرد علي جودة حديثه ونطقه.

ودمتم بسلام

اختكم الجازي248

مشكورة على الموضوع الراااااااائع

موضوع مفيد جداااااااااا اختى الجازي
جزاج الله كل خير

و بانتظاااااااااار جديدك

بنت الكويت..

يعطيك العافيه حبيبتي مرورج اسعدني

ملاك الروح انشاء الله اكون افدتكم

تسلمين حبيبتي على مرورك الطيب

انتظرو جديدي

اختكم الجازي

بارك الله فيج موضوع فعلا قييييييييييييم

يعطيج العافية

انا ولدي تأخر في الكلام بعد الفحوصات طلع عنده توحد الله كريم

ياحياتي الله يشفيه لج يارب
ويخليج له

السلام عليكم
يعطيج ألف عافية ياقلبي على هذة المعلومات ……. واحب أضيف ان دايما الاهل في حالات التأخر اللغوي يقومونبالمقارنة واستشارة بعضهم البعض وعدمالرجوع الى المتخصصون , وباللجوء الى المتخصصون الوقت والجهد الكثير في اكتشاف الامراض التي منالممكن تأثر على القدرة الكلامية والاستيعابية للطفل …

عندي مشكله مع بنتي عمرها سنتين الا جم يوم
الكلام متاخر عندها
يعني تقول كلمات بس مو الكلمه االاحظ انها تقول نغمه الكلمه بس شلون تنطقها
مرات اقول دلع
مرات اقول لا تحتاج استشاره ومحتاره فيها شسوي !
اهي حيل مدلعه مو شويه

بالنسبه حق الكلام اهي تعد من واحد لين سبعه بدون اي مشكله بالانجليزي
تنطق اول كلمه من الجمله واخرها او اول كلمتين بس
ماتحاول تبذل مجهود ان تقول الكلمات لازالت تستخدم البيبي توك للتخاطب
يعني كلام غير مفهوم مالتو قوقو قاقا وهالخرابيط
تحاول تلفظ لحن الكلمه يعني شيشي يعني شيلي
آتي يعني عطيني
وبش وخلاش ونو كلماتها المفضله
ووكاي يعني وخري
ليز ليز = بليز
تنطق اسامي خواتي باللحن مو بالكلمه
مرات تكسر خاطري تصير تبي تتكلم خصوصا لي تحجو خواتها اهي تبي تشارك بالكلام تدش بالنص غصب تحاول تتكلم بس ماكو حصيله
مرات تبي شي من صج تحاول تشرح بالبيبي توك ماتقدرتقوم تاخذ ايدي وتصولني لين الشغله اللي تبيها وتشرحلي

ماتحاول تربط جمل

من ناحيه الذكاءاسم الله عليها تبارك الرحمن لا البنت تمام تميز الارقام وتعرف تعد وماشاء الله عليها تفكر يعني شافت ابوها شلون يستخدم صندوق العده تنطره بس يمشي تروح لصندوقه وتسوي نفس اللي سواه
تشوفني احط مكياج تجابلني وتعرف الكحل فوق العين الفرشه العريضه للبلشرالصغيره للاي شيد
تلعب بالباربيات تمشط وتعدل (خخواتها بسنها مايعرفون يلعبون باربيات) بس الالعاب ماتشدها وايد (الا لي صارو بايد خواتها)
تحب بارني
تغني وياه لي طلب يرددون كلمات
مثلا اغنيه اف يو هابي اند يو نو كلاب يور هاندس
تسمعها كامله بالحركات وتسوي حركات الويهه
وتحفظ مرات تطبق الحركه قبل لاتنقال
يعني ستيب يور فيت اذا قاعده توقف قبلها علشان تستعد ان تسوي الحركه عارفه التسلسل صح ماشاءالله عليها
بس مشكلتها الكلام والنطق

والله العظيم جنج اتحجين عن بنتي نفس الحالة ونفس الاغنية اتسوي الحركات ماشاء الله عليها بس ولا كلمة انطقت غير ماما ونوو وهاج هالثلاث كلمات وسلامتج

السلام عليكم………لازم أعرف تفاصيل معينة عشان أساعدج بس المهم ان لاتدمجين اللغة الانجليزية مع العربية في الكلامخصوصا جدام طفل عندة تأخر لغوي او صعوبة بالنطق ………يعني لغتين في وقت واحد ممنوووع وأتمني ان اللغة تكون في البيت لغة مستخدمة وحدة وبالنسبة للاستشارة عندنا في مركز سالمالعلي لعلاج السمع والنطق لازم يكمل الطفل 3 سنوات مو أقل عشان الاختبارات ……وسامحيني عالقصور

يعطيج العافية

وعسى الله يشفي الجميع ….

متى يجب ان أبدأ في القلق من تأخر اللغة عند طفلي؟

مع العام الأول تظهر كلمات مثل بيبي أو نانا ومن ثم لم يعد هناك أي شيء مزعج، الا إذا كانت هناك لغة أخرى. هذه الكلمات في البداية تبدو مشوهة سيصحح الطفل لنفسه ويقترب بالتدريج من النطق السليم.

يجب ان ننتبه تماما إذا لم يبدأ الطفل الكلام بين الشهر الثاني عشر والثامن عشر الى أن هناك سببا طبيا او سيكولوجيا. اطلبي النصيحة من طبيب الاطفال الذي يمكنه أن يوجهه نحو الاخصائي او يقترح إجراء الفحوص الثانوية.

في نحو الشهر الثامن عشر يبدأ نطق بعض الكلمات البسيطة مثل بابا أو ماما، ومن النادر أن يكتشف اضطرابات..

بين سن سنتين او ثلاث سنوات يقوم بعمل جمل صغيرة تثري لغته بالحضانة او اختلاطه بالاطفال في عمره، عندما يتحدث مع أطفال آخرين او المحيطين به. وبين الرابعة والخامسة تزيد قدرته اللغوية ويحكي قصصا جيدة.

اذا كنت قلقة على تطور لغته فاستشيري طبيب الأطفال الذي سيحكم بضرورة إجراء فحص النطق. إن الهدف من وراء هذا الفحص هو كشف وعلاج الطفل في وقت مبكر جدا. يحدد الطبيب المعالج التاريخ الطبي والاسري للطفل، ويحاول ان يرى كيف تتطور اللغة والكلام والصعوبات التي يكشفها الوالدان، ثم يقدر من خلال الاختبارات المعملية المتنوعة قدرات اللغة وأوجه نقصها، وهذا ما يسمح له بالتشخيص والاعداد للتأهيل الشخصي

مشكوره جولي خوش موضوع

أنا وين ؟؟

تسلمين حبوبه على المرور

مشكورة جولي ويعطيج العافيه

^^بنت الكويت^^

العفو..حبوبه….

جزاج الله خير
ويعطيج العافيه

الغلاااااااكله

هلا وغلا..دايما رافعه معنوياتي

مشكوره أختى وقواج الله أعيالنا يسكتون سنتين ثلاث واذا انطقوا ما يسكتون

حواء صبوره

العفو حبيبتي …

وحياج الله

خوووش موضوع
الله يستر على عيالنا

مـــــــــــرحبا

عجبني الموضوع بس حبيت اوضح نقطه للبنات
انتبهوا لأطفالكم احيان المشكله ماتكون بالنطق

تكون بالسمع
ولد بنت جيراناا صار عمره سنتين و اهو مايتكلم وامه مانتبهت له الا متأخر طلع ولدها مايسمع من الاساس عشان يتكلم

يعطيج العافية جولي

يسلموووو

مشكوره والله يحفظ عيالنا ياكريم

نقل للفائدة وبصراحة التماريين دى كتير مهمة لاطفالنا ربنا المستعان ان شاء الله

</I>
</B></I>

السلام عليكم
بالنسية للاخوات اللي طلبوا اخصائية نطق
انا مستعدة لللمساعدة
عندي موافقة للعمل كمدربة نطق من المجلس الاعلي لشئون المعاقين2006
وعندي خبرة 3 سنوات وهذه هي السنة الرابعة
وشهادتي من مصر معتمدة وموثقة
وايضا من الكويت
واحب عملي جدا وايضا احب الاطفال
وهذا رقمي
99749198
بالمناسبه انا لست كويتيه

جزاج الله خير

جزاج الله خير بس انا ولدي مايقدر يحرك السانه حاولت معه
بس احس انه هوموقادر احس السانه حده ثقيل ودي اعرف اذا فيه دوا
اوشي يساعد على تخفيف السان

جزاج الله خير

السلام عليكم
جربى تدهنى الشفاه عسل نحل وتطلبى منه يلحسها بلسانه وكررى الموضوع ده وربنا يسهل
او العبى معاه امام مراه باخراج اللسان وادخاله بسرعات مختلفة مثلا وعرفينى النتيجة
وشكرا

رفع

جزاج الله خير

رفع

موضوع مفيد
قواج الله