قوه بنات
اللي يدرسون بالطب او انقبلو بمركز العلوم الطبية تدش لاني ابي استفسر عن شغلات وعن المواد والدكاتره احس اني ضايعه اليوم سجلت موادي واحس اني ضايعه حدي
هلا والله بدكتورتنا .. اولا مبروك القبول والتسجيل وعقبال التخرج انشالله
امري تدللي انشالله اساعدج باللي اقدر عليه
تسلمين ياقلبي والله يبارك فيج
بكتب لج موادي والله احس اني ضايعه:// سهلين ولا لا
اختياري مبادىء اقتصاد عند اقبال الرحماني
الفيزياء الحيويه
الكيميا للعلوم الصحيه
الحاسوب في الطب
اللغه الانجليزيه
شوفي بمركز العلوم الطبية كل الطلبة نفس المواد يعني انتي وكل دفعتج نفس الشي الفرق الوحيد بالمادة الاختيارية اللي ماخذتها
احنا اذكر قسمونا قروبين قروب a وقروب b .. قروب اي 100 بنية ..قروب بي تقريبا 30 بنية و70 صبي هذا بس حق الكيميا والفيزيا يعني مثلا اذا قروب خذوا كلاس الاثنين القروب الثاني ياخذ الكلاس يوم الاربعا جذي وهذا اهما يقسمونكم عليه
مبادئ الاقتصاد انا كنت ماخذتها بس دكتورتنا كانت غير وما ادري عن دكتورتكم والمنهج والدرجات كل شي يختلف بين دكاترة يعني انا كنت ماخذتها وطلعت فيها b بلس الكورس اللي وراه رفيجاتي خذوه عند دكتور غير طلعت ب a معنى دكتورهم كان كارفهم
الزبده شيدي حيلج بس على ايامي احسن مادة اختياري كانت منطق عند محمود سيد او سيد محمود كله اخربط باسمه
حاولي تاخذينها حق الكورس الثاني
الفيزيا والكيميا سهلين حق اللي يدرسون
يعني بليز لا تغلطين غلطتي
حق الكوزات والامتحانات باول كورس كنت كله ادرس قبلها بيوم او يومين يعني نفس الثانوي وكله ازفت
والناس وي يدرسون قبلها باسبوع ..بعدين عرفت السر والحمدلله تعدلت الدرجات
الانجليزي زين والله مو صعب اللي يدربونكم عليه بالكلاس ايي بالامتحان
اليسنغ والريدنغ مافي دراسة انتي وفهمج
وعلى فكرة اهم شي الانجليزي عليه خمس وحدات
الحاسوب ماي مايوه حده سهل
انا كان عندي الكورس الثاني اسهل من الكورس الاول لان بالاول ما ادري شالسالفه مو فاهمه الوضع عدل واني لازم ادرس على طوول
بس معدل الكورس الاول وايد مهم فشدي حيلج
يعني اذا مافهمتي شي بالمحاضره عادي لا تحاتين ردي البيت بطلي النوته ودرسيها والشي اللي ما تفهمينه روحي حق الدكتور يفهمج ترى مايقولون شي وسهالات انشالله
وبس اي استفسار ثاني انا بالخدمه
يسلموووووووو فديتكم طمنتوني
دودي انتي اي سنه الحين وشنو تخصصج طب ولا طب اسنان ولا صيدله؟
طب اسنان وانشالله بروح رابعة (لا تخترعين تقولين هذي عيوز ..احس جني امس متخرجة من الثانوي )
انتي ناويه على شنو؟؟
تذكرت شغلة راح تساعدج بما ان كل المواد بالانجليزي ومادة الانجليزي نفسها تكون كلمات طبية فانصحج ان تشترين مترجم الكتروني يعني شغلة حيل مهمة باول سنتين وانصحج باللي انا شريته وايد حلو من اطلس وحتى قلتله ابي يكون في مصطلحات طبية بس عاد انا اذكر اخذته ب 70 وذاك اليوم حاطينه بالجريدة ب 35 فحيل حلو وانا شريته قبل ثلاث سنين ولي الحين عندي شزينه
قووة
دودي حبيبتي أنا إنشالله بعد مافكرت عدل باقيلي سنة أخلص الثنوي
وإنشالله إذا الله كتب بدش طب أسنان
شلون الدراسة عندكم ؟ و جم سنة يبيله و أخلص ؟ وتنصحيني فيه
بليز قوليلي الأكيد يعني ماتحسفتي إنج دشيتي هالتخصص وتعبتي فيه ؟
الله يوفقكم يارب ^.^
مبروووك عالقبول ومنها للاعلى .. انا مو بالطب بس حبيت ابارك
هلا دشتيا
طب الاسنان ست سنين ونص ..وبالكويت اول ثلاث سنين ونص ندرس مع الطب ونروح مستشفيات معاهم وحالنا حالهم في ناخذ مواد بروحنا وفي سستمات ما ندرسها معاهم (يعني تقريبا مجموع اللي ما ندرسه معاهم سنة) الدراسة حلوة بس صعبة يعني تدرسين وتشدين حيلج والله تمشين وجنه العيد
وترا البارت اللي ندرس فيه مع البشري وناسة يعني تعيشين ER شوي بس الطب معروف دراسة دراسة دراسة
ساعات نحس انه مضغوطين لما ندرس مع البشري بس اذا خذينا مواد الاسنان لاتشوفينا مستانسين ومتشقيقين ومرتاحييييييييين حتى رفيجاتنا اللي بالبشري يقولون لنا ويوهكم مرتاحة وبالاخير نشوف a
وبالنسبة حق تحسفت .. بالبداية ايي لاني كنت من المتوسط ابي هندسة وبعدين غيرت رايي فطول الوقت لو دشيت هندسة ولو دشيت هندسة .. وبعدين كنت ضايعة واحنا كنا اول دفعة يطبقون عليها النظام اليديد فكنا فيران التجارب بس بعدين لأ وحسيت صج انه الاختيار الصح ما اوصيج اهم شي الاستخارة استخيري انا استخرت فاحس انه ربي وفقني
ولا تقولين ست سنين ولا سبع سنين ووايد والله والله جني امس تخرجت من الثانوي اقول حق رفيجاتي ثلاث سنين طارت
وبعدين لما اشوف الهندسة الحين مايتخرجون الا بخمس سنين ولا خمسة وونص .. عالاقل احنا سبعة سنين بس نعتبر خذينا بكلريوسين يعني ناخذ شهادتين وحده عقب رابعة ووحده لما نخلص
وعلى فكرة لما كنت بسنة ثانية وأحد يسالني شلون الطب ولاشرايج بندخل كنت اقولهم انحاشوا ولا يحوشك بس الحين تغير رايي
بس
انتي استخيري وشوفي شنو ودج وتقدرين ولا لأ وموفقه
الله يسهل امورنا ان شاء الله عاد انا قبل يقولون ان طب اسنان خمس سنين توني ادري ست ونص
تسلمين لولي الله يبارك فيج
طيب في وحده سولفت معاها تقول ان طب الاسنان طالبين مجموع كبير اعلى من البشري صح ولا لا؟وانا خاطري بالاسنان
بس حسافه يقبلون على حسب المعدل ويبون بس 27 طالب من دفعتنا
كم النسبه يا بنات
جادل بمصر خمس سنين .. بالكويت سته ونص وفي اشاعات يسوونها سبعة .. مافرقت على كورس
والقبول مو شرط اعلى من البشري على حسب دفعتج ورغباتهم يعني اذا كل الشطار (وانشالله انتي منهم 
) يبون اسنان راح يكون المعدل عالي .. احنا دفعتنا اقل شي قبلوا اسنان كان معدلهم 3 نقاط والبشري اقل شي 2.88 تقريبا واللي اقل قبلوهم صيدلية طبعا هذا حق البنات الصبيان شي ثاني
.gif "Eh S(22)")
.gif "Eh S(17)")
