الوسم: الإنهيار

[center]السلام عليكم ورحمة الله وبركاته
أول شي بنات ترددت وايد اني اكتب مشكلتي الي اعاني منهم من بداية زواجي يعني تقريبا سنتين
المشكلة طويلة عريضهة بختصرها لكم مع إنها صج ماتختصر
المشكلة زوجي واهلة وآنا واهلي
آنا تزوجت زوجي عن حب دام لمدة سنتين وصارت بينا اتفاقات ووعود أن زوجي بعيشني براحة بعوضني عن كل شي واكتشفت بعد الزواج ان كافل ابوه بقرض تخيلو من تزوجنا لي قبل 4 شهور زوجي شهر ياخذ معاش جم شهر المعاش ينسحب لأن الوالد مايدفع اقصاده مع العلم كنت ادرس وماشتغل ولا أسوق سيارة ولا شي اول ايام الملجة كنا نطلع ويوديني وييبني سينما ومطاعم اذا زعلت يراضيني الحين ولا شي اقعد اشهر بالبيت واهوة منظغط من اهله امه متسلطة فيها أطباع زينة والشين اهوة الي غالب دايم تنتقدني اقولها يمة لبسي مو عاجبها تصرفي ميعجبها آنا ساكنة معاهم آنا تعودت على العز والدلال عمري مادشيت طبخ ماكنت عيزانة عن خدمة ريلي بس خالتي تبي تسيطر علييي بشكلي ولبسي وحياتي عشت بهم في بداية حياتي الزوجية هذا غير تدخل الخالات خلات ريلي اقصد يشيشون خالتي انتي مدلعتها انتي كذا وكذا كرهت زوارتهم ولا احنا كلنا عايشين في بيت اجار عمي بايع البيت وعليه ديون الدنيا ساعات يكسرون خاطري وريلي شاي همهم وآنا من كثر الهم اقل شي قمت اتهاوش مع زوجي لأنه كله مخليني وطالع أقعد لي الفير بروحي كله رايح القهوة ولا بالدوام حتى لما كنت حامل كان يخليني لي الفير وآنا ماخش عليكم كنت أناجره وايد أبيه يحس فيني آنا احبه أول اشهر حملي قعدت في بيت اهلي بحجة النساة بعدين آخر 3 أشهر رديت زوجي أحس تغير علي من كثر الهواش وتدخل اهله واهلي بحياتنا آنا نفسيتي تعبت حتى آنا من كثر الهواش أحس حبي قل كل كلمة والثانية قتله طلقني خذا قرض عشان يسدد ديون أبوه ويكيش أقصادة وعشان أول بمستشفى خاص تخيلو مافرحت بهالقرض إلا بولادتي ومراجعاتي باعيادة الخاصة كان واعدني أييبلي خدامة قبل ماوالد عاندني ولي اليوم بنتي عمرها 3 شهور مايابلي آنا مو مقصرة عنه إذا صار عندي مبلغ وشفته معتاز عطيته حتى خالتي كل شي اشتريه حق نفسي اشتريلها وحق أمي بعد ريلي تغير علي بنات ودي أطلع بشقة بروحي أمكانيات زوجي ماتسمح بس آنا إنشالله عقب العيد راح أتوضف وآنا الحين قاعدة في بيت اهلي من ثاني يوم رمضان والسبب تهاوشت مع حماتي الصغيرة عمرها 15 سنة طولت لسانها علي جدام بنات عم ريلي إلي من سنها ويابت طاري أهلي وأول مرة اعصب وهديت عليها وخذيت بنتي وصعدت شقتي وفيني شي غلط كل ماصار شي علمت ريلي بس مو مني من الحرة الي فيني تدرون خالتي طلعتني غلطانة وتمننت علي عشانها قايمة في بنتي وتغسلها وتسبحها مع إني والله مو مقصرة فيهم شنو يت على المطبخ والله كان بطني شكبره جدامي وعندهم زوارة أدش معاهم واشيل واحط بس لما شفت تسلطهم وحماتي اعطيها من لبسي وكل شي أسويلها حتى تقارير حق المدرسة آنا أدري إني غلطانة بس ريلني مخليني على طول ولا يفكر يطلعني لا بنفاسي تذكرني لا بعيد ميلادي لا بنجاحي وتخرجي وآنا كل مناسبة حلوة اتذكره كل شي متكل فيه على الناس يبي الناس يبوني ويودوني أدري طولت لساني عليه واااايد والله يا بنتا غصبن علي ودي أحافظ على بيتي بس مادري شلون تكفون ساعدوني آنا متحطمة مادري شالحل ونسيت أقولكم خالتي اتصلت فيني عشان ريلي كان نايم عندي في بيت اهلي وآنا مو عندهم تقولي حسبي الله عليج صديتي ولدي عني وجم لها مواقف معاي الله يسامحها وألحين زوجي حتى لو أبجي مايهتم يقولي ابجي مني لي باجر ماتهميني يقولي مثل ماتعانديني أعاندج آنا ودي يقعد عندي على طول ويكون جدام عيوني مابي بنتنا تحس بشي لما تكبر زوجي تغير علي وادري السبب آنا عشان طلباتي قتله آنا زوجتك ولي حق عليك يعطي اهله أكثر مايعطيني واهله إذا ماعطاهم ولا سوالهم صار عندهم ولد عاق وامه ماتكلمه وتشتكي منه واهوة أكبر أخوانه مادري شالحل
:'(

أفا يا بنات 6 داشين محد رضى يرد على مشكلتي ويساعدنس ماتوقعت منكم جذيه

اول شي الله يعينج ويصبرج ان شاء الله

ثاني شي من خلال مشكلتج عرفت ان ابو ريلج يمر بظروف مادريه صعبه ! فشي اكيد من واجب ولده انه يساعده ..هذا حق الابو على ولده ..ولا يضيق خلقج اختي لانها فترة وتعدي

انا اعرف وحده تقريبا نفس حالتج ..كانو ساكنين بشقه بروحهم وبعدين اطلعوا على أساس صاحب البيت يبي يتوسع.. فاضطر انه يسكن عند اهله وبشنو؟ بغرفه وحماااااام وانتو بكرامه…تخيلي الوضع .مساكين ترى ليلحين والابو مو راضي يخليهم يطلعون..الله يساعدهم ان شاء الله

وللعلم انه الولد مديوووووون وغير جذيه الابو مو مقدر حالة ولده ..كل ما تم قاله عطني ..ويعطيه مبلغ مو شويه ..وعلى اتفه الاسباب البنت وزوجها قاعدين يتهاوشون

نصيحتي لج :
دام انج ساكنة عند حمولتج تحملي اللي يطلع منهم..صدي عنهم انا ادري انها صعبه بس شتسوين هذا مكتوب ومقدر
ريلج لما يخليج ويطلع ترى يبي ينفس عن اللي ابقلبه يبي ينسى..حاولي اتنسينه اوقفي وياه..لا اتييبين طاري شقه هدايا، هذي هم يبيلها ميزانية وانتي ادرى بحالة ريلج الماديه
وانتي ان شاء الله اذا توظفتي اكيييد ماراح اتقصرين ابعمرج ، اشتري كل اللي بخاطرج فيه .وكل اللي ودج فيه

وبصراحه لا تهدمين حياتج عشان الفلوس..ترى واااااايد حلات طلاق اتصير سببها الظروف المادية

واخر كلامي لج: اخذي هالادعية وردديها[u] عشان ترتاح نفسيتج

لقضاء الديْن: اللهم اكفني بحلالك عن حرامك واغنني بفضلك عمن سواك.
لتفريج الهم والحزن والكرب: 1-اللهم رحمتك ارجو،فلا تكلني الى نفسي طرفة عين،واصلح لي شأني كله
2- حسبي الله لا اله الا هو ،عليه توكلت وهو رب العرش العظيم
3- اللهم اني اعوذ بك من الهم والحزن ،والعجز والكسل ،والبخل والجبن،وضَلَعِ الديْن وغلبة الرِّجالِ…

اصبري يا اختي ترى اخر الضيق مخرج …

والله يعينج ..ونصيحتي لج فكري زييين قبل لاتهدمين حياتج.. وترى مشكلتج اهون من غيرج لو بتلاحظين
وانشالله بتنحل باذن الله

واسفه على الاطاله

اختي مشكلتج كانت من البدايه مافي شي او لماتزوج اسكن عند اهلك وتالي اطلع بيت بروحي
لا المفروض من البدايه تستقلين بحياتج علي العموم السالفه يبلها تدخل ابوج ولازم يكلم ريلج وابو ريلج
ولازم يحطون النقط علي الحروف

الله يفرجها عليج انشالله

السلام عليكم

أختي العزيزة نصيحتي لج أصبـــــــــــــــري
وإن شاء الله كل شي بيتغير مع الوقت
وبتصير هالسوالف كلها ذكريات ويمكن تنسينها أصلا
صبري ولا تخربين بيتج وتضيعين بنتج
بعدين عندنا مقولة دايم نرددها أحنا الكويتيين

ألي مافيه خير لأهله مافيه خير أبد ( ولج طبعا )

ترى كلنا مرينا بهالسوالف وجتنا لحظات فكرنا ماراح تغير أحوالنا بس الحمدلله تغيرت
على فكرة ألي أصبرت نالت بيت مستقل واستقرار وعيالها حواليها
وألي استعجلت وماحكمت عقلها تطلقت وضيعت عيالها والحين تمنى ترد وتحمل بس خلاص
( لي فات الفوت ماينفع الصوت )
والله أكلمج من تجارب شفتها جدامي

اختي انا رايي بعد تمسكين بيتج وريلج
على كلامج ان كل المشاكل مادية فقط يعني الحمدلله اخلاقه تمام وكل شي بس الظروف ماثرة عليه
الصراحة الله يلوم اللي يلومه معاه حق
مو شوية ديون وعماة عين تلاقينه ما ينام الليل
حسسيه انج على قلبه خليه يرتاح معاج علشان يقدر يريحج
وكثرة المشاكل تكبر الفجوة بين الازواج
بيعوها على الله وربج ما يقصر
وحطي روحج مكانه ترتاحين
لو اهلج محتاجينج مو بتعطينهم عيونج؟؟
عيل عاملي اهله مثل اهلج
ولو مصخوها هذولا امه وابوه
وسالفة حماتج تستاهل وقلعتها زين سويتي فيها منتي ملزومة برضاها بس جان صرتي فطينة ورحتي على طول وعلمتي خالتج ولميتيها وبستيها وقلتي لها والله خالتي طلعتني من طوري واحرجتني
بس مهما كان اهي مثل اختي الصغيرة واذا غلطت انا بسامحها ومهما كان هذي اختي
وعطيها من الكلام اللي تبيه علشان لا تقلب عليج

بالأول الله يعينج على المشاكل..برأي لازم أبوج أو أخوانج يتدخلون عشان يعرف وراج حمولة ويخاف عليج..ويسوي أحترام لأهلج ولج.. زوجج حاولي بقدر المستطاع أنج ماتزعلينه ولاتتشكين قدامه وخليه يوقف معاج حاولي تضغطين على روحج عشان تكسبينه ومادام أنتي قاعدة عند أهلج خليج عندهم لحد ماتتوظفين وتتعدل أحوالكم المادية وإن شاء الله إذا توظفتي أكيد ماراح تقصرين مع زوجج ولاعلى نفسج .. أطلعي بشقة وساعديه ترا مو عيب ولاحرام يمكن المسكين صج متورط مع أبوه ومابيده حيله…والصبر مفتاح الفرج حرام تخريين بيتج عشان فلوس وتحاريش ترى كلنا مرينا بالمواقف هذي والحين نتذكرها ونضحك عليها بعد..والله يسخرلج زوجج ويهديه أميييييييييييييييييييييييين…..

حبيبتي عسا الله يفرج لج
أول شي نصيييييييحتي لج لا تحنييييييييييييييييييييييييين ترا ريلج مسكين وشكله اللي فيه كافيه والله كسؤ خاطري لانه الحمدلله فيه خير لاهله فانشالله في خر لج بس انتي اللي قاعدة تظيعييين هالخير

انا امي دايم تقولنا السعادة مو بالمكان والترف الي الانسان يكون فيه، لا! السعادة تجي من الانسان نفسه، يعني تقول لو في اثنين يحبون بعض وعايشين بكوخ مايمنع انهم يكونوون اسعد ناس بهادنيا دام الحب موجود والقناااااااااااااااااااااااااااااااااااعة

انا ما الومج لان احنا حريم وكل وحدة تبي ريلها يونسها ويطلعها ويهديها ويسفرها، بس حاولي تشوفين محاسن ريلج اكيد فيه اشيااااااء وايد زينه انتي ناسيتها ومركزة على عيوبه، والله يا برونزية اقولها عن تجربة حاولي تسعدين نفسج باللي عندج لا تفكرين باشياء مو عندج او تقارنين نفسج باحد ثاني، وشوفي حياتج بنظرة متفائلة، انا ادري شنو حالتج حاسة باحباط؟؟ كلنا مرينا بهالسوالف ونتمنى منزل بروحنا واحلام وردية وااااااااااااااااااااااااااااايد بس مثل ما قتلج (ونسي نفسج باللي عندج)

حاولي تبينيين حق ريلج انج اسعد وحدة بالدنا وانج محظوظة فيه وان اهو فيه كذا وكذ وكذا احسن من اللي عنده كذا وكذا ويابختي فيك لانه انتي الحين هدمتي الثقة اللي عنده خليتيه يحس انه مو قادر يونسج ولا يعيشج العيشة المطلوبة، رديله هذي الثقة وهالشي طبعا يبيله صببببببببببببببببببببر! كبري بعينه خليه يحس انج ناضجة مو مني والطريج رادة بيت اهلج ومو مستانسة وياه كبري عقلج وصبري ومالج الا كل خير ورا هالصبر واحتسبي الاجر

وخالتج واهلج عامليهم زين وحاولي تطوفين وخليج رسمية وادعيييييييييييييييييييييييييييييييييييييييييييييي ي لهم بهالليالي انه الله يسخرهم لج ويهديهم ويهدي زوجج ويرزقج المنزل المنفصل ويرزقج القناعة ويوفقج لاسعاد زوجج

والله العظيم مثل ما قتلج شددديييييييييييييييييييي حيلج بالدعاء ثم الصبر!!!!

وعسا الله يفرجلج يارب

مشكورين يابنات اتمنى إن الله يلهمني الصبر وتكون إرادتي قوية عشان أتحمل كله عشان زوجي يرضى عني
الله يفرجها………..

اصبري يالغاليه

وراسلين عالخاص

الله يفرج همومكم انشالله

باجر انشالله اذا توظفتي ..راح تشيلين عنه شويه

وترى مافيها شي اذا المره ساعدت ريلها

وانشالله فتره وتعدي

لا تصيرين انتي والزمن واهله عليه

ديري بالج عليه وقدري ظروفه … واكيد ماراح ينسى هالشي

الله يهدي سركم

الله يسلمج أختي جولي ويسمع منج ربي
مع التحية……..

برونزيه

اله يصبرج علي مابتلاج ويساعدج
شوفي حبيتي
انتي تزوجتي ريلج عن حب ليش ترخصين فيه الحين
حطي نفسج مكانه وبضضروفه لو تنحطين بين اهلج وبينه وبضروف صعبه جدا وانتي مسؤوله عن البيت وكل شي وكل شي بويهج وريلج لاصغر سبب زعل وتهاوش وسوا سالفه (هم اهو مضغوط) شنو بتسوين
عليج الله ماراح تهجين من البيت والل فيه
وعقب فتره من كثر الهم ماراح شي ياثر فيج؟
هذا اللي حاصل حق ريلج
حبيتبي اهو مايقدر يعصي اهله لان ان عصاهم لاراح يتوفق لادنيا ولا اخره اهو ملزم بامه حتا لو كانت مو نسره الا ام النسوره وملزم بطاعه ابوه وان رفض الله يعاقبه هذا شي فرض علينا من ربنا طاعه الوالدين وان تافف صار عاق
فتخيلي المسؤوليه اللي عليه وانتي موقاعدهتهونين
بالنسبه لج وةوله
والله ترا بالكلمه الطيبه تملكين الانسان
انتي تبينه؟ شاريته؟ تبين تعيشين وياه؟
غمضي عينج كللللللللللللللش وريحي قلبج
انتي تحددين جان حياتج مشاكل او حياتج راحه
خلي لسانج مدهون بزبده وياعمري وياحياتي وياقلبي ويانور عيني ومن هالحجي حيل حليج بهالحجي وان صارت مشكله حتا لو كنتي محتره قولي ويييييييييييييييييييييييييييييييييييه وشحقا شايل او احر عمر يالزم ماعلي راحتي وغيري الموضوع سيدا ورحي حطي سيادتج واقري وادعي
حمولتج اهم عندهم مشاكل ومبين ان بيئتهم غير مستقره لاتخلينهم ياثرون علي حياتج
هذي التين ايج ام لسان حقريها مو تسوين فيها دقات وشغلات اهي تبي تثبت نفسها وسنها صعب واهي ممو مستقره وتبي تناجر هدومها نصيحه حقريها مو تحاربينها شغل يهال لا كبري عقلج لو تكلمت او قالت شي ماعجبج حقري حقري ورفعي الجام او قلبي الموضوع قشمره
ام ريلج كله ضحكي وياها وسوي عمرج ماسمعتي حجيها
مثلي ماتعرفين اتكمثلين ريلج مايستاهل انج اتحاولين علشانه؟ اللي بينكم رخيص لهالدرجه؟؟؟؟؟
مثلي وضحكي ودهني لسانج بزبده
واهم من نفسهم نارهم تاكل حطبهم وريلج يردلج وتكسبينه
لين الله يفرجها ويتتعدل الامور

الله يعينج اختي والله كسرتي خاطري
صبري وانشالله تفرج

تسلمين أختي دانسنج كوين واختي أم ناصر الدلوعه
مع تحياااااااااااااتي……..

السلام عليكم بنات..
شلونكم؟ عسى لونكم أزين من لوني المچولح؟
تعبت يا بنات تعبببببت و أحس إني على وشك أنهار خلااااااااص ماعاد فيني..
وضعي كالآتي..
متزوجة و عندي طفلة عمرها سنتين إلا شوي و موظفة و ماعندي خادمة ومستقلة بسكن بروحي بعيد عن أهلي و أهل زوجي اللي ما حصلت من وراهم إلا التعب..ماعلينا مو هذا الموضوع..
الموضوع إني تعبت هلكت زهقت اكتئبت كل شي ردي بالدنيا صار فيني عسى ما تحوشني جلطة بس.
يعني أفز من الصبح أودي بنتي الحضانة و تالي اروح دوامي الغثيث و أخلص عقب وأروح آخذ بنتي و أرد البيت طبعاً زوجي اذا مو مداوم يكون نايم و اذا مداوم يرد و يحط راسه و ينام يعني ما طاح إلا انبطح..
أرد و أغدي بنتي من الموجود وعقبها أحطها بالكرسي و أدش الممطبخ أطبخ لأن الحبيب مستحييييييل ياكل أكل بايت يعني سالفة أطبخ بالليل حق ثاني يوم ما تدور عنده.
طبعاً أثناء ما انا بالمطبخ بنتي تحن و تصيح عشان أنزلها واخذ ازعاج ولوية واذا دخلت معاي المطبخ تظل تحوس تدور شنو الغلط وتسويه و أظل انا على أعصابي.
يقعد زوجي من النوم يتغدى و يقعد مع بنته شوي هالكلام يكون على 5 العصر يعني من أرد من الدوام واقفة على حيلي حتى غدا ما أتغدى..
الساعة 7 تبدي بنتي تحن موعد نومتها..يسبحها أبوها وتنام على 8..
طبعاً عقبها يصير موعدي مع التنظيف و غسيل الملابس و المواعين وأجهز شغل بنتي و جنطتها حق الحضانة تكون صارت الساعة 10 و أكون انا صرت حولة من التعب أتعشى أي لقمة موجودة و أحط راسي و أنام.
بالويكند أختي تمرني تاخذ بنتي ساعتين و تردها،بهالساعتين انا أنظف و أكرف طبعاً..
انزين و الحل؟؟؟؟ لي متى؟؟ انا مابي خادمة و مستحيل أدخل إنسانة غريبة بيتي..
شنو في طريقة ثانية أعيش حالي حال هالحريم المرتزين بالكافيهات و المجمعات و الويه منور جنه خبزة إيرانية اللهم لا حسد!!
ويهي انصفق من التعب..و زوجي الله خير لو الطوفة تساعدني ما ساعدني..
عطوني حل قبل لا أنهار..
قولولي كلمة تريحني..
زهقققققققت

الله يعينج والله
ماعرف شقول
ان شاء الله البنات يساعدونج

شوفي اهو في حل مادري اذا يناسبج
في الحريم الي يطبخون بالبيت ويبيعون
تتفقين معاها تطبخ لج من الاحد للخميس مثلا وتحاسبينها شهرياً وبس اتمرين عليهاعقب الداوم وتاخذين منها هذا البنات وقت اختبارات الفاينل يسون جذي
واهي عاد تسويلج كل يوم اوبشنز وجذي ويكون حق شخصين
وحل انه اتيبين خدامه بالساعة
وبالنسبة للاندري مو لازم يومياً خليه الخميس والاثنين مثلاً
ولاتشتطين وايد روقي والله العمر يخلص والشغل مايخلص خلج باردة الي ماسويتيه اليوم باجر يصير وخل ريلج يساعدج مثلاً يجيب البنت من الحضانه ا

هههه ضحكتيني تدور شنؤ الغلط وتسؤيه

اؤل شي الله يآجرج ع كل هآلتعب اللي تتعبينه

عندج حلين يآ تييبين خدامه تشتغل بالساعه

اؤ تفنشين من دوآمج

الله يعينج
ان شاء الله ازمة وتعدي

الله يكتب اجرك حبيبتي خلي غسيل الملابس يوم او يومين بالاسبوع والغدا مرات ساندويشات كودو او أي شيء خفيف وتقدرين تجهزين مقاديرك من بالليل متبلتها وبصينيتها بس تجين من الدوام حطيها بالفرن او على النار والسلطات من بالليل بدون تتبيل عشان تكون فرش وبعدين مو كل يوم كنس ومسح ماعندك احد ريحي لا تكدين عمرك لهدرجة

السلام عليكم

حاولي تنظمين وقتج حطي جدول تمشين عليه للتنظيف وشغل البيت

و اخذي وقت لنفسج هذا شي ضررروري روحي صالون مساج و استرخاء حسي بالجمال والاسترخاء

حتى لو في البيت سوي شي تحبينه لما تنام بنتج بدل التنظيف و الكرف….لاحقه عليه

خلي البنت عند ابوها و طلعي رفهي عن نفسج لو مرة بالاسبوع

اختي كلنا ودنا نقوم بامور بيتنا من الالف الي الياء بسس الانسان له طاقه
وانتي بعد موظفه يعني الله يكون في عونج شغل برا وداخل البيت

حبيبتي حاوولي تخففين الشغل ع نفسج مثلا
– حددي يومين بالاسبوع لغسل الملابس
– التنظيف يوم وترك
– الطبخ ممكن تخلين بيت اهلج يجهزون لج الغدا ايام دوامج والويك اند انتي تجهزين لكم او تغدون برا
او ممكن تيبين لج خدامه بالساعات تنظف لج

اول شي الخبز الايراني مووووو منور ! تخيلت وحده ويها مثل الخبزه الايرانيه ههههه

شوفي حبيبتي اهوا حل واحد دامج ما تبين خدامه دايمه

1/غداج انتي وبنتج جاهز من الليل و حتى لو جهزتي الدياي او اللحم من الليله الي قبلها ما اعتقد زوجج بيصيدج ! جربي

2/ خدامه بالساعات ورا المغرب او العصاري حزت نوم زوجج تساعدج و تضبط شغلج و تتوكل ع الله

3/ غسيل الملابس اول باول لا تكدسين شي ابدا واذا غسالتج عاديه اشتري اتوماتيك واااايد تريح و الاوتي البخار بعد حلو و سريع

4/ لااااااااا تفكرين تحملين هههههه اسفه لقافه بس جد وضعج متعب و دوام و بدون خدامه

5/ حاولي تهيئين نفسيتج و تتقبلين فكرة الخدامه الدايمه لانها شر لابد منه خاصتا وانتي موظفه

الله يكون بعونج و يقويج و يفرج همج

1- في وايد طباخات يبيعون شغلات تقدرين اتفرزينها مثل سمبوسه و فطاير و انواع دياي ، اشتري منهم و فرزي عشان حق العشا او الغدا بس تقلينهم او بالفرن
٢- يبيلج خدامه اتيي ساعتين او ثلالث لمن زوجج نايم عشان تكوي و اتنظف معاج
٣ – قعدي مع زوجج علي يوم لمن يكون ريلاكس و هادي و كلميه و قوليله انج تحتاجين مساعده في البيت و لو معنويا، و قوليله بالضبط شنو تبينه يسوي لانه اكثر الرياييل مايعرفون شنو يسوون الا اذا قلتي لهم بالحرف الواحد، خلي مثلا يقره قصص او يلعب مع بنتج و يساعدج ابغسل الصحون بعد الغدا مثلا

خلي بعض ملابسكم عالمصبغة
حطي غساله صحون عجيبة
حطيلج نشافه ملابس امريكية تطلع الملابس ماتحتاج كوي
شوفي الاجانب شلون عايشين دشي بلوقاتهم و مواقعهم و اخذي منهم الافكار
و اكلكم تبليه و جهزيه من الليل يعني ما يكون مطبوخ
و اذا كارهه وظيفتج غيريها او استقيلي و جابلي بيتج و انتي مرتاحه
الله يوفقج

و بنتج و انتي تشتغليم خطيها بالحباسه او تلفزيون او تلون او قوليلها قصة تقعد ساكته

ضروري. خدامة. راح تتعبين. بدونها. او تخلين. الدوام

في زوجات اسبوع يطبخون واسبوع يطلبون من المطعم او باجازة الويكند ريحي من الطبخ لان من حقج تاخذين اجازة لنفسج لان الطبخ مو من واجبات الزوجه بس يعتمد على تفهم الزوج

حبيباتي تسلمولي كلكم لا خلا ولا عدم..
سبحان الله كل الأفكار اللي قلتوها انا قايلتها حق غيري من قبل بس من اللوية اللي انا فيها مو قادرة أركز..
الله يحفظكم جميعاً و ما قصرتوا عالأقل حسستوني إن فيه أحد فاهم وضعي.

الحل خدامه

, الإنهيار النفسي .. المرض غير المرئي ,

الانهيار النفسي ليس ظاهرة حديثة العهد فهو موجود من قديم الزمان، والدليل ما جاء
في بعض الأساطير والكتابات القديمة التي تحدثت عن أدواء مثل مرض الذبول،
أو مرض الفتور، أو الإحباط، وكلها تتصف بعوارض وعلامات تصب في خانة
الانهيار النفسي ..

المعروف أن كل شخص يتعرض على مدار اليوم أو الأسبوع أو العام إلى تغيرات
تؤثر في وضعه المعنوي، وهذه التغيرات ظاهرة طبيعية تحصل نتيجة تصادم دائم
بين العوامل الكامنة في داخل كل شخص والعوامل الخارجية التي تتبدل في استمرار..

وأمام هذا التصادم تصدر عن الدماغ ردود فعل على ما يحصل في الخارج، وفي الحالة
الطبيعية تكون هذه الردود في المستوى المطلوب الذي يؤمن للشخص حل المشكلات
الحياتية التي تعترضه وتجعله في وضع يكون فيه أكثر قوة وصموداً من أجل
حل مشكلات أخرى تنتظره لاحقاً ..

أما إذا حاول الدماغ الهروب من المواجهة من أجل إصدار ردود الفعل الضرورية
في الظرف المناسب والوقت المناسب، فإن هذا قد يكون البذرة التي تمهد للإصابة
بالانهيار النفسي، وفي كل مرة يتم فيها التأجيل في الرد يزداد خطر التعرض له ..

وفي غمرة التأجيلات هذه يبدأ الشخص بالمعاناة من مظاهر عدة تسيطر عليها عوارض
القلق والتوتر والتشاؤم والكآبة والتبدل المفاجئ في نمط الحياة فكرياً واجتماعياً،

وهناك عوارض أخرى كثيرة قد تلوح في الأفق عند الذين يعانون من المرض ومنها:
– الشكوى المستمرة من التعب.
– صعوبة في التركيز والتذكر.
– الحذر والشك في كل شيء.
– الشعور بالعجز والفشل.
– الكوابيس واضطرابات النوم.
– إهمال النظافة والعناية بالهندام.
– التعنت في الرأي ورفض التراجع عن الخطأ.
– فقدان القدرة على تغيير الأمور وتوجيهها من جديد.
– البكاء الهستيري المفاجئ.
– التفكير في الموت والانتحار.

في البداية يعاني المصاب من إحساس ضاغط باللاجدوى، وينتابه شعور
بأنه غير مفيد، كما تتزعزع ثقته بنفسه وبالآخرين ..

ومع مرور الوقت يقود الإحساس باللاجدوى وعدم الفائدة الى الهوس الذي يجعله
ينطوي على نفسه، فيبكي بصمت، ويعاني من آلام نفسية لا تطاق، وفوق كل هذا
يرتسم في ذهنه شعور بأن لا شيء ولا أحد يستطيع مد يد العون له لإنقاذه من محنته
وهذا ما يزيد من آلامه ..

وعبثاً يحاول الآخرون مساعدته للخروج من محنته، لأنه يتولد لديه قناعة في أنهم
لا يملكون القدرة على ذلك، بل انه يسعى جاهداً في إيجاد الحجج لإيقاف محاولاتهم
وأن لا جدوى من ورائها..

وشيئاً فشيئاً، يتوقف المنهار نفسياً عن العناية بنفسه وعن القيام بأي نشاط،
ويدعي بأنه غير مفيد..

وفي ما بعد يهمل المصاب طعامه، ويبقى حبيس الفراش، وتبدأ فكرة الانتحار
بالحضور في الذهن، ويبرر المريض رغبته في الانتحار بأنها وسيلة للتحرر
من أعباء هذا العالم، وهنا يبدأ مشوار الانقطاع عن المحيطين به الذين لا يفقهون شيئاً
مما يدور في تضاريس مخه من أفكار، فيتأثرون ويرتبكون ولا يعرفون ماذا يفعلون ..

ان علاج الانهيار النفسي أمر مهم جداً لإخراج المريض من معاناته التي قد تقوده
إلى الهاوية، والعلاج ممكن شرط أن يعرف المصاب أنه مريض فعلاً
وبالتالي يقبل المساعدة، وإلا فإن كل التدابير يمكن أن تفشل ..

والمساعدة يجب أن تكون مدروسة بعناية فائقة على أن تقدم خطوة خطوة
وعلى مراحل متتابعة، ولا فائدة من حرق المراحل، مع الأخذ في الاعتبار
أن يكون المطلوب منه في حدود المعقول، خصوصاً في الوهلة الأولى للعلاج ..

ولعل أفضل شيء يمكن فعله مع المريض في الفترة الأولى من العلاج
هو دفعه للخروج من قوقعته التي هو فيها مع التركيز على إعادة تواصل المريض
مع المحيطين من أقارب وأصدقاء ومد جسور الثقة المقطوعة ..

ولا يجب نسيان الرياضة كالمشي والجري، فهي تحدث تغيرات كيماوية ونفسية
تساهم في تحسين وظائف الجهاز العصبي، خصوصاً الدماغية منها ..
كما تفيد في إبعاد شبح التوتر، وفي زرع الراحة والسكينة في أوصال الجسم ..

وقد تفيد الأدوية النفسية في التخفيف من وطأة المعاناة، ويوصف الدواء بجرعات
خفيفة ريثما يعتاد المريض عليه والتحسن على الأدوية يحتاج الى الصبر، ولكنه لا
يكون فعلياً إلا مع مرور أسابيع أو أشهر، والمهم في الأمر هو عدم تناول أي دواء من
دون استشارة الطبيب ..

ويجب أن يكون المريض على بينة من أن الأدوية المضادة للانهيار النفسي
لها تأثيرات ثانوية قد تكون مزعجة ..

وعلى صعيد الانهيار النفسي نسوق الملاحظات الآتية:

> هناك أسباب عدة تمهد للإصابة بالانهيار النفسي منها مثلاً الطلاق، فقدان عزيز
في شكل مفاجئ، الفشل في الامتحان، الفشل في العمل، الإفلاس، اكتشاف مرض
عضال، افتضاح أمر الشخص في ما يتعلق بموضوع ما، سيطرة الإفكار المتشائمة،
انفصال المحبين، اغتيال أو سجن أحد أفراد العائلة… وغيرها.

ولا يجب إغفال العامل الوراثي، فهناك دلائل تفيد بوجود عناصر جينية
تمهد للإصابة بالانهيار العصبي ..

> إن النساء أكثر قابلية من غيرهم للانهيار النفسي بسبب التقلبات الهورمونية
المرافقة لفترة ما بعد الولادة وما قبل مجيء العادة الشهرية وفترة سن اليأس،
أو نتيجة الضغوط التي تتعرض لها المرأة العاملة خارج المنزل ..

وحتى المرأة غير العاملة قد تقع فريسة الانهيار النفسي
بسبب عدم الاكتفاء العاطفي وأمور أخرى ..

> إن الانهيار النفسي متفش بين المتقدمين في السن، والطامة الكبرى أن الانتحار
قد يكون خاتمة هذا الانهيار، وتفيد التقارير الأوروبية أن هذه الظاهرة (الانتحار)
طاغية عند الرجال أكثر من النساء، فالذكور الذين تراودهم فكرة الانتحار، يذهبون
في تطبيقها إلى النهاية، في حين أن هناك بعض التردد عند النساء بحيث يمكن إنقاذ
واحدة من بين اثنتين من اللواتي حاولن الانتحار ..

> إن شبح الانهيار النفسي يطاول الجنود، وعلى هذا الصعيد تفيد تقارير الجيش
الأميركي أن الانهيار بات معضلة بين صفوف المحاربين في العراق وأفغانستان
نتيجة تعرضهم للضغوط المستمرة والى الخطر ليلاً ونهاراً، الأمر الذي يجعل الجندي
في وضع عقلي تتقاذفه أفكار تتأرجح بين القتل والانتحار ..

> هناك نسبة عالية من المصابين بالانهيار النفسي لا يتلقون علاجاً، إما لأنها
غير معروفة، أو لسوء تشخيصها ..

في المختصر، إن المصاب بالانهيار النفسي هو شخص يبكي بصمت،
وتكون أعصابه «مجروحة، ملتهبة»، ولكنها للأسف جروح غير مرئية
تستنجد بمن يداويها، والمهم أن تلقى الطبيب المداوي

مشكووووره عالموضوع الحلو …
وعلم النفس وايد حلووو…. وصج صج لازم الكل يتثقف بعلم النفس عشان ما يصير في انهيار ويخسر حياته كلها ….

بالنسبه لهالشي لازم نغير فكرتنا عن الطبيب النفسي ونروح نقعد معاه لو ساعه ..عشان يحدد هل احنا بحاجه الا مساعده طبيه و سلوكيه ولا لأ…
لان صدقوني المرض يتيمع يتيمع يتيمع وفجأه يطلع مره وحده وتوقف الحياة كلها ..

واللي تبي تتعمق معاي بالموضوع تتواصل معاي بالخاص

السلام عليكم إليكي العلاج السحري لكل مشاكل الانهيار النفسي:

عليكي بالقرآن ثم القرآن ثم القرآن.
أنا لم أكن ضد العلاج النفسي ولكن لا تتركي نفسك للوصول لهذا الحد لأن هذا المرض مرض الغرب وليس العرب المسلمين لأن ولله الحمد لم يترك لنا القرآن الكريم ولا السنة النبوية الشريف شيء من الأمراض البدنية أو النفسية بدون علاج فعلكي بي كتاب الله وسنة رسوله صلى الله عليه وسلم.