حبيباتي كويتيات
لدي بنتين الأولى برابع والأخرى بخامس
مدرسة خاصة إنجليزية ( الله لا يبارك فيهم )
مدرسين المادتين العربي والدين وحسبي الله عليهم ألف مرة معاشاتهم مو محللينها
تصوروا مدرسة الدين تعطيها تحل واجب الكتاب لدرس ما شرحته
( جمع القرآن )
أقوم أنا من جديد وأشرحها لها بالتفصيل
والعربي حدث ولا حرج
البنات وصلوا سن المتوسط وهم للحين ما يعرفون
برجاء لا تقولون لي لابد متابعه منزلية ( بين فترة وفتره اتابعهم )
واشرح لهم وافصل لهم ( أنا كنت من أولى الأوليات ) فانقهر إذا شفتها ما تعرف
ورحمةً فيهم ما اشرف عليهم لأني أدخل في مرحلة من الجنون اللاوعي
كنت في سنهم أقرأ مجلدات وقصص عالمية واسوي وسائل صفي بنفسي ولا في احد متابعني في البيت
التلفزيون حاليا في بيتنا ما نشغله ، طلعات مافي خلال الأسبوع ، نزهات مافي إلا بنهايه الأسبوع ويوم واحد فقط
مخصصه لهم وحده تمسكهم من العصر للساعه ثمان لكن يا الله يمديها تحل واجبات الإنجليزي والدروس تراجعهم
وأنا وحده ما عاد فيني حيل ، وفيني عقدة نفسية من كتب المدارس ، ( صار لي فترة نيف في التعليم )
طاقتي استنزفتها على طلبتي في السابق وبدعت ، لكن يوم وصلوا بناتي لسن المتوسط ما يعرفون يفكون خط !!
بناتي ذكيات تبارك الله ويحبوني حيل ، وعندهم أخو أكبر منهم معتمد على نفسه صحيح مدرسه خاصه أيضا لكن عربية
وماشي حاله بالقراءة والدراسه
لكن هالبنتين حشاشة جوفي مالي غيرهم تعبت ،
لا تقولون لي حلبية وألا شامية حجي فاضي دخلتهم العام ما استفادوا شي
معلمات بدون ضمير وغير مخلصات بالعطاء
ولا تقولون لي مدرسات للبيت ، جربت وهمها الشاي والبسكوت وتسألهم أسئله شخصية ( لأنها تدري بوظيفتي)
أصلا ما عندهم وقت للدروس الخصوصية لأن المواد الإنجليزية الهوم ورك كثير فيها ( وحاليا معتمدين على اللي بتروح بعد كم شهر عنهم )
يا بنات أنا مصيبتي أني أحب الكمال وأنشد له وكنت ما أرضى إلا أكون متفوقة ( أموت باليوم ألف مره أشوفهم بالمستوى هذا)
والله كوابيس وأحلام ( خاصة إذا سافرت لعمل وتركتهم يومين أو ثلاث ) أغلب سفراتي أخذهم معاي وفرصه لتعليمهم
لكن شلحق وهم يقولون لي يما لا تذكرينا بالدراسه نبي بريك ..
يا بنات شنو الحل ، هل ألحقهم بجمعية الإصلاح كل نهايه اسبوع ، وألا اخذهم كل مغربية
العصر لازم أنام لأني اقوم الفجر
( نسيت لا أقولكم أنا عندي برنامجي اليومي التدريب والرياضه نفسيتي تتعب إذا ما لعبت ولا تمرنت )
واليوم بفراشي صار لي اربع ساعات ادرسها فقط درس واحد لمادة التربية الإسلامية
شسوي ؟؟ طردتها حبيبتي من الغرفة وصدري لا يسع للتدريس
راسي تصدع وصدعتكم معاي ..
عشرين قارئة لموضوعي ولا أحد حتى رد بجملة !
سبحان الله ، ما عمري كتبت موضوع إلا لخدمتكم يا معلمات
والحين أطلب منكم استشارة ما ميش !!
حبيبتس انتي….الغلط مو منج من المدرسهاللي دخلتهم لها….تأسيسهم مو شئ…اهم شئ التاسيس تعتبين اول وترتاحين ابد….انصحج اسيسيهم زين بالحروف والكتابه وراح ترتاحين…والقرآءة لازم يقرأون بالويكـ إند…..لازم تعطين لبناتج بعض اللي عطتيه لعيال النآس…ورابع وخامس مو صغآر اتعبي معهم شوي هالسنتين وترتاحين بالمتوسط
السلام عليكم ,,
الله يعينج حبووبه ,, أحسن شي أنج تروحين عند أبله أبله أو الناظره أو أحد مسؤول و تقولين لها الحجي الي كاتبته ! لأن مو معقووله أستاذه تخلي الطالبه تحل درس ماشرحته ! وأنتي تشرحين كل شي والله هذول يبيلهم لسان شطوله عشان يتسنعون ,, لا حكومي ولا خاص ينفعون كلهم عاهات ! الا البعض
+ أنتي ريحي نفسج مثل ماقلتي ماكانو أمهاتنا يتعبون علينا الا بالأبتدائيه ..!! يعني بناتج وصلو المتوسط خليهم يعتمدون علي أنفسهم شوي !
ترا بتكرهينهم بالدراسه أذا حياتهم كله دراسه !!
والله يووفقج أنتي وبناتج ^_^
تقبلي مروري
شوفي اختي انا معاج والله يلوم الي يلومج لكن اذا حال مدرسة بناتج مثل المدارس الي خبري لاتلومين المعلمات بنفس الوقت انا احملهم الذنب لكن ضغط على المعلمات مو طبيعي كلن يسحبها من صوب
الناظره تبي شغل
رئيسه القسم تبي شغل
الاشراف او المناوبة يبون شغل
يعني وين ماتروحين شغل شغل شغل ومحد راضي ولاقايل عفيه
المعلمه بعد الضغط هذا كله تتساوا عندها الامور وتمل
لكن اتمنى من كل معلمة انتي تعبانه تعبانه اتركي كل شي واهتمي بتلاميذج لان الله بيحاسبج عليهم واذا انتي ماحاسبتي ضميرج بشرحج صدقيني بيطلع على عيالج حتى لو حاطته باحسن المدارس بتقصرين معلمه ولدج او بنتج بتقصر معاها والله يعين الكل
تخيلي بنتي بتغيب وقلت لها لا
بعدين فكرت قلت انا االي اشرح وادرس وكل شي ليش تداوم وغيبتها
الله شاهد مايستوعبون الا عند الابله اللي عندها ضمير
تدرين ليش حنا خربنا على عيالنا والابلات يدرون ان الامهات مو مقصرين
تخيلي بنتي برابعه ابلتها شارحه لهم فصل كامل علوووووووووم بحصه شلون مادري
الله يهديهم ويسخرهم لعيالنا
بالمقابل ابله بنتي الثانيه مدخله المنهج غصب بعقولهم ضميرها حي ماشاء الله
والله ادعي لها كل ماتذكرتها يعني اللي ضميرها حي الناس بتدعي لها سنين
ندري ضغط عليكم وتعب بس صدقوني لما الوحده تحتسب الاجر يهون كل شي
الله يوفق الجميع ويوفق عيالنا
