وزني بالحمل وتغذيتي وكل حامل يهمها هالشيء

السلام عليكم ورحمه الله وبركاته

قوه كويتيات

انا حامل بالشهر الرابع الله يتمم علي وعلى كل حامل يارب ويرزقنا الذريه الصالحه يارب ياكريم

انا من حملت وانا صرت اكره الاكل ولا اطيق اشم ريحته وليمن الحين ووزني ثابت على ماهو عليه 68 او ينزل كيلو واصير 67 وعلى هالحال بس هالكيلو ازيده وانقصه

وبطني صغير وجبدي كله لايعه علي وحموضه وانا اساسا معاي قرحه وزادت مع الوحام

ولا ادري شاسوي ابي اغذي البيبي اللي في بطني واغصب نفسي ولا اقدر كلش احس برجع وريحت الاكل كلش مادانيها

شنو تنصحوني يابنات ومنو ضعف جذي بحمالها وهل الحمل بولد جذي يتعب الام لان انا فيني ولد الله يحفظه لي ويتمه على خير ويعافيه ويرزقني اياه في اتم خلقته وعافيته وصحته دون زياده او نقصان وكل حامل يارب

ابي نصايحكم الله يجزاكم خير ومنو صار لها نفسي وشلون تغلبت على هالمشكله

حبيبتي عادي انا الحين بالشهر التاسع وللحين ارجع تصدقين بس توني عرفت طريقه توني استوعبت متاخر لووول انه معدتج لازم ماتكون فاضيه اكلي كل وقت وع كميات صغيره واذا ع الشهوه الشهوه تحت الضرس ع قولتهم حطي الاكل بحلجج وتشتهينه واذا ع بطنج طبيعي يكون صغير انا بالثامن يالله طلع لي بطن بس اللي مطمني انه وزن البيبي زين واني ماشيه ع الفيتامينات بريجنال بلان وكالسيوم مع فيتامين دال ولاتنسين الحليب والتمر واذا ماتحبين الحليب جربي المراعي لذيييذ والله يهوون عليج يارب

كلامج عين العقل وحاولت اكثر من مره اسوي جذي بس الحلو اللي اكل فواكه باستمرار هي الشيء الوحيد اللي اتقبله

والحليب كلش مااطيقه اول مااشربه ارجع كل شيء اكلته
بس اشرب لبن المراعي والتمر اكله بين فتره وفتره مع لبن المراعي بس تلوع جبدي منه حالي حيل واللبن مايرقعه

الله كريم انشالله عاد انتي تقولين استمرت معاج لي الثامن امبيه وانا على بالي بس ادش الخامس بتروح اثارينا مجبلين على الشقى الحمدلله على كل شيء

اهم شيء ربي يتمم علينا حمالنا يارب ويرزقنا الذريه الصالحه يارب ياكريم

تصدقين انا مااتحمل اللبن ثقييل ع معدتي ع طوول ارجعه تكرمين اللي تحملته حليب المراعي خفيييييف ولذييذ مع التمر واذا اكلتي حطي فبالج انج ماراح ترجعين واخذي نفس عميييق اذا حسيتي جبدج تلووع واكلي دايما سلطه عاديه خيار وجزر وطماط وبقدوونس وفوقها زيت زيتون وليموون ترى حييل مغذيه وكافي انج ماتلووع جبدج منهاا والاهم مثل ماقلت لج لاتخلين معدتج فاضيه وديربالج من الكاكاو والحلويات خصوصا انه اكلج مو زين لايجيج سكر حمل والله يهون عليج يارب عادي حبيبتي انا بالتاسع وللحين اعاني من سالفة الاكل واحاول اغذي نفسي غصب

ايه لا اذا على الكاكاو والحلويات انا ما اشتهيهم خير شر اشتهي الموالح بس
وانشالله اقدر اسوي اللي قلتيلي عليه واستمر عليه انا اهم شيء عندي تغذيه البيبي ابيها يتغذى عدل فديته واذا على السلطه مقدور عليها تنوكل حلوه ومفيده

مشكوره غناتي عسى ربي يتمم لج حملج وحملي على خير يارب وتقر عيونا بشوفه ضنانا يارب ياكريم

العفووو ولوو ماسويت شي عزيزه وغاليه

انا مثلج مازاد وزني إلا بالسادس واكلي ماكان اوكي وكلا استفرغ بس دشيت السابع انفتحت شهيتي وزاد وزني
واهم شي لي قمتي من النوم فتحي ريجج ابسكوته ولا قطعة جبنه مالحه عشان تروح اللوعه واكلي وجبات خفيفه منفصله طول اليوم ولا تنسين فيتاميناتج

وصج انا بطني مابين إلا توه بأخر السابع لاني بجر يقولون البجر مايبين بطنها بسرعه لاتحاتين لاحقه على الكروشه

والله يتمم لج حملج ويتمم علينا يارب

احسلج لازيد لووووول
انا بطني مابين وباخر السابع وبالثامن صغر بعد والله حتى امي تقول روحي شوفي لايكون البيبي فيه شي يعني يدووووب مبين بس بالتاسع بين

اهي من تعدي فتره الوحام راح يزيد وزنج ..

انا ببجري يما وزني كان 62 انا قبل الحمال كان 67 ومن عديت السادس رد وزني مثل مااهو .. قمت اكل واغدي البيبي بس طلعت بالاخير نتفه 2 كيلو وشي

الله يعييييين الجميع

انااا ماقمت التزم بحزة الاكل … لاني ماقدر اتحمل ريحة الاكل خاصة الطبيخ
فصرت اكل على البركة … واقلل من حجم الوجبة
واهم شي اكل شي صحي ..

مثلا اكل قوطي روب .. او خيارة
او اشرب عصير برتقال …
ولاني ماا اطيق الحليب .. اشرب لبن او اكل برد
وين ووين اكل شي سنع ..

تقريبا نفس الحالة مو

الله يعينج حبيبتي انا من اول شهر بين عندي الوحام وماالي نفس الاكل

حياتي. الله يعينج نفس إلي جاني بداية وحامي صج كرهت الأكل وزني ينزل مؤ كيلو نزل 3 كيلو ويرد كيلو وينزل وجذية لين دخلت بنص الخامس بداة يزيد والحين أنا بالسابع مازدت غير 4 كيلو بس يعني بس تدخلين السادس يزيد الوزن. لاتحاتين إكلي الأشياء الخفيفة علشان مأتعورج معدتج بس

ماقصروا البنااات
الله يهون عليج
وتفرحين فيه

شوفي الرحم مكانه قريب من الامعاء.. ولما يكبر يضغط عليها.. فعملية الهضم تكون بطيئة حيل فالحامل بالفترة الثانية والثالثة صعبة تضعف..

الحموضة اتيي من كل شي.. مو بس من الحوامض والفلفل والمنبهات..

خلي اكلج يكون فيه كورن فليكس لان فيه فوليك اسيد.. وابتعدي عن منتجات الالبان ليما تروح الحموضة.. وخلي الخيار والخس اصدقائج.. والماي لاتشربينه مرة وحدة شربي كميات قليلة وبين فترات متباعدة لانج لو شربتيه دفعة وحدة بييبلج حموضة وبترجعين..

الثلج مفيد حيل للحموضة كسريلج مكعبين واكليهم حيييل يفرق مع اني شخصيا ما اكل ثلج وما احبه قبل لا احمل لكن ينفع للحموضة

اكلي بطاط مهروس.. صدر دياي.. خس مع خيار وطماط.. اكلي فواكه ماتكون حامضة.. رقي وبطيخ.. موز .. افوكادو.. عندج الاشياء اللي بسرعة تنهضم النشويات معكرونية وعيش بس اكليهم بشكل صحي بدون دهن علشان لايقعد على جبدج

وموووفقة يارب ماتشوفين شرر