|
|
انا ام حايسة ولايصة مع ولدي
شنو همزة وصل وهمز قطع وهمزات كلهم
اشلون ادرس
كافي بس يقرأ الدرس ويكتب الواجب
او في شي ثاني
عسى ربي يوفقكم كلكم
همزة الوصل نكتبها ولا ننطقها مثا استمع انتظر
همزة القطع ننطقها ونكتبها مثل أكل أخذ أمر
يعني الوصل ماكو فوقها همزة صغيرة
بينما القطع فوقها همزة قطع
ونقدر نفرق بينهم بعد باضافة واو قبل الكلمة وانتظر
وأمر
ان شاءالله فهمتيهم
واحنا تحت امرج.
حليتي لي مشكله كبيرة
واذا انتي ابلة علميني اشلون ادرس ولدي مادة العربي
تراني صج ضايعة ومحتاسة
الله يخليه لج يا رب ويبلغج فيه
والله حبيبتي شوفي ما اقص عليج انا ادرس متوسط وبنتي توها 3 سنوات يعني ما اعرف شلون يدرسون الناس عيالهم هههههههههههه
بس حاولي بالنسخ والقراءة المستمرة
يعني خليه يكتب اي كلمات فيها مهارات املائية خذوها بالمدرسة
خليه يقرا لج سطرين ثلاث وصححي له الغلط شوي شوي
وعطيه املاء بسيط سهل عشان يتدرب عالكتابة ويسرع فيها ويفكر عدل قبل لا يكتب
عطيه كلمات بسيطة خليه اهو يركبها ولا يرتب حروفها عشان يكون كلمة مفيدة
الصراحة حتى المتوسط والله اقول للامهات هالطريقة
الله يخليه لج
وسامحيني عالقصور
أقولهم همزة القطع قوية وتلبس تاجها لأنها لا تخاف من الحروف وتكتب وتنطق
وهمزة الوصل جبانة تخاف من الحروف اذا سبقها حرف تكتب ولا تنطق وليس عليها تاج
بس وتلاميذي فاهمينها عدل حتى الضعاف منهم فاهمينها
اما كيف تدرسين ولدج ممكن تشترين تمارين مساعدة من المكتبة
وتخلينه يقرأ قصة ويستخرج مثلا منها كلمات تبدأ بهمزة وصل او قطع وكل المهارات راجعيها بهذا الشكل
هاتي قصص قصيرة وخليه يستخرج
اما بالنسبة لاسماء الاشارة مثلا او المذكر والمؤنث لازم يحفظ اسماء الاشارةواكتبي لهم جمل ينقصها اسم اشارة وهو يكتبه
مثلا حول الجملة الآتية من المذكر الى المؤنث :
هؤلاء العمال ينظفون ساحة المدرسة
هؤلاء العاملات ينظفن ساحة المدرسة
___________________________________
وعوديه يعبر عن صورة بثلاث جمل
يعني مثلا يحطون له صورة نحلة تمتص الرحيق من الزهرة
يعبر هو عن الصورة ويكتب : هذه نحلة تمتص الرحيق من الزهرة ، وتخرج لنا عسلا طمعه لذيد وفيه شفاء للناس .
__________________________________________________ ______________
يمكن تظنين ان هذا صعب عليه لكن تأكدي ان فيه تلاميذ يكتبون ويقرؤون ويعبرون ولا تظنين ان ولدج احسن من غيره دايما حطيه بمستوى الممتازين لا تطالعين باللي تحته علشان ما تعود انه زين ومو محتاج اكثر من جذي
والله اني استفدت منك كثير جزاك الله كل خير
ويا ليت تذكرين اي مدرسة انتي انقل ولدي لك فورا