منو تعاني من خلل في الأذن الداخليه

السلام عليكم

اللي مرت بهالحاله ياليت تفيدني انا فجاه صرت ادوخ واحس اني فاقده التوازن ولما راجعت الدكتور قالي التهاب الاذن لوسطى وبعدها خذت علاج ومافدني ورحت اخصائي الانف والاذن وقالي هذا خلل في الاذن الداخليه وعطاني له علاج
ياليت تفيدوني اللي جربت تقولي جم استمرت على العلاج وتشافت يعني يطول وياخذ وقت
فيدوني جزاكم الله خير حاسه بخنقه من الحاله اللي انا فيها

شوفي رقبتج يمكن خشونه ترى اهي تسبب الدوره بعد وجنه الدنيا تدور فيج خاصه اذا حطيتي راسج على المخده بس لا تخلين دوا الطبيب استمري عليه اتمنى لج الشفاء العاجل وما تشوفين شر

يعطيج العافيه والشر مايجيج

أمي بعد عمري جذي ..نفس الاعراض ..

تفقد توازنها ..ولازم نقضبها بالوقفه ..قالوا لها بسبة الاذن …

والله اختي حاسه فيج بس لازم تقولين شنو العلاج اللي عطوج اياه .. انا هم فجاه بيوم من الايام قمت من النوم تعبانه وماكنت اقدر اقوم من السرير من الدوخه وحتى ماقدر اقعد ولمن اجرب اوقف كنت كله ادوخ لدرجه بس اقعد ارجع وكان عبالي نزلة برد بس لمن رحت المستوصف قالي الدكتور التهاب في اذونج وحولني مستشفى الصباح عياده الانف والاذن والحنجره ولمن رحت بصراحه الدكتور قهرني بس عطاني مضاد حيوي وحبوب توقف الترجيع وقالي اشتري قطره من برا .. وهم زفاني لانه يقولي اني وايد استخدم عود الاذون في التنظيف لانه اذوني حيل تعبانه ومتضرره من هالشي وقالي استخدميه بس من برا وانا بصراحه ماعرف احس اذوني تحكني اذا مانظفت من داخل عدل لول .. المهم القطره اللي شريتها اللي لونها اصفر هذي وايد يمدحونها بس بصراحه انا ماحسيت انها فادتني واتوقع لني استخدمتها بعد 3 ايام من مرضي لانها ماكانت موجوده باكثر من صيدليه بس اشوه الوالد لمن راح مراجعته بالمستشفى العسكري لقاها ويابها لي .. فيمكن لاني استخدمتها متاخر .. بس ترى لي الحين الدوخه معاي ومستمره بس مو مثل يوم طحت يعني تجي ايام ماقدر اوقف على حيلي من الدوخه وفي ايام لا عادي بس احس بلوعه من الدوخه ..

حبيبتي ديري بالج انا اول شي بدت فيني جذي وقالولي التهاب بالذن الوسطى وعطوني مضاد حيوي وماكو فايده
وبعدها رحت حق د عبدالمحسن جعفر وقالي ان هذا مرض اسمه دوار نتيجة خلل في الاذن الداخليه ومن اعراضه دوخه ولوعه وتحسين انج ماتشتهين الاكل والصوت العالي يعور الاذن يعني شي متعب وعطاني له علاج وقالي اته يطول يعني يبيله صبر

الله يعينك وأنا عندي إلتهاب بالأذن وأحس بمعاناتك الله يعينك، على الله وعلى المضادات (اذبحتنا)

الله يعين الجميع