من جربت السفر مع ياهل عمره شهرين؟؟؟

السلام عليكم
بنات انا بسافر عقب باجر ومعاي ولدي عمره شهرين وشوي
وخايفه من الطيارة عليه .. اخاف يقعد يبجي طول الرحلة من الضغط
منو جربت هالشي وشلون تصرفت بالطيارة ؟
والمشكلة الثانيه اني ارضعه طبيعي من صدري واكيد ما راح اقدر ارضعه بالطيارة ..

قلبي اول شي لو هو ياخذ لهايه ( مصاصه ) عطيه وقت الاقلاع عشان الضغط لو ما ياخذ الرضاعه حطي فيها ماي يشربه وقت لاقلاع عشان الضغط

وفيه قطره عند دكتور لاطفال تطلبينها عشان الرحلات تخفف الضغط علي الطفل عشان ما يصيح ويبكي

لازم يكون الحفايض متوفره عندك الحليب والماي بالدله للياهل

مناديل معطره عشان تمشينه

غيار له عشان لو لاسمح الله استفرغ

والله يكتب لكم رحله ميسره وسهله

اذا ترضعينه طبيعي عادي وقت لمي يطفون اليتات بالطياره رضعيه من تحت العبايه

لو محجبه في بستي بلازا او تويز ار اس قسم البيبي زي الغطي تغطين فيه الياهل وهو يرضع

ونشالله ينام بالرحله ولا تتعذبين لان الطفل بالعمر ذا ينام

انا سافرت مع بنتي بالطيارة وكانت ترضع و انا ماالبس عباة كنت اروح حمام الطيارة و اقعد على المرحاض (تكرمون) بعد ما اسكره و ارضعها على راحتي لما تنام وبعدين ارجع الكرسي

انا كنت ارضع بنتي طبيعي بس حق الطيارة اخذت ممية، الماي متوفر بالطيارة ماتحتاجين تاخذين مطارة, و علشان ما تعوره اذنه خليه يرضع وقت الاقلاع و الهبوط علشان يعادل الضغط , اذا بترضعينه طبيعي ممكن تاخذين شي تغطين فيه روحج و ممكن تروحين اخر الطيارة مكان المضيفين ترضعينه لان هناك اقل ناس و لانه حرام تنطرين الناس بره الحمام اذا رضعتيه بالحمام مو من كثر الحمامات بالطيارة.
احسن لج حطي اغراضج في جنطة ظهر اريح لج و حطيلج قميص احتياط و كيس نايلون لو رجع او وصخ عليج و طبعا لا تنسين ماي غريب حق اذا عوره بطنه بالسفره.
لبسي ولدج ملابس مريحة سهل تبدلينها ما لا داعي تكشخينه.

الله يعينج
ويوفقج في رحلتج

اليهال الصغار مزعجين بالسفر عسى الله يعينج

وايد سافرت حتى أول ما طلعت من الأربعين وعادي مثل ما قالو البنات وقت الإقلاع رضعيه لو تعطينه ماي بالمميه

وهم عند الدكتور قطره نسيت حق الإذن جنه علشان ما تتسكر

وانا ما كنت أرضع فكنت استخدم المميه بس إنتي روحي الحمام ورضعي أو غطي نفسج بالعباة غذا كنتي تلبسين عباة وغذا ما تلبيسن في هناك بالطياره

شرشف أو كمبل خفيف غطي عمرج فيه حتى ويهج علشان تشوفين اليال لا ينقمت ( إسم الله عليه ) ورضعي بمكانج بالكرسي أحسن بدال الحمام .

تروحين وتردين بالسلامه … أنا سافرت مع بنتي وعمرها ثلاث شهور الحمدلله ماأذتني بس وقت الإقلاع والهبوط رضعيها وإنتي بكرسيج أريح عشان ماتحس بعوار الإذن وخلي معاج كلينكس معطر لوقت الحاجـــة ورحلــة موفقـــة

انا مره سافرت مع ولدي وعمره 3 شهور
ماجذب عليج ينني بس بالطياره اول ماطارت قام يبجي
بس عقب هدأ
حاولي تكونين مجهزه كل شي
ممياته حليب ماي جاي ميلوبا وووو
واخذي معاج مرطب عشان لما يبول تكرمين او …
وانتي قاعده تمشينه وتنظفينه بدل القومه والقعده لووووووويه
لاترضعينه من صدرج خلال الرحله بالمميه احسن
انا سويت جذي لان ماقدر ارضع فشله
فـ المميه هي الحل
تروحين وتردين بالسلامه

مشكورين ما قصرتوا بنات والله طمنتوني كنت حيل احاتي
طيارتي عليها تاخير المفروض 6 تطير بتتاخر لين 8 ونص هاذي سوالف الكويتيه
الله يسلمكم من كل شر

أنا سافرت بعمر شهرين معاي حق امريكا تخيلي وهم كنت ارضع بين الطبيعي والصناعي تصدقين ماكان وايد صعب مثل ما توقعت احسن شي طبعا انه ترضعين طبيعي وعادي وانت بكرسيج حطي شي ورضعي محد بيدري عنج خصوصا انه في اوقات يسكرون الليتات والكل تقريبا ينام ، وبعدين ما تتخيلين شلون الطاقم مال الطيارة متعاونين مع الاطفال الرضع اللي يعطيج ماي حار واللي كل ساع طال عليج تبين شي تخيلي انا خذه مني بطول بنتي غسلهم ويقول صب عليه ماي مغلي بعد عقب ما خلص ورجعهم لي .
وهناك هم سهالة على الحليبة وينام لاطحني اكل ولا شي بس شنو البجي اهو اكره شي تعرفين الياهل لازم عسارة أهم شي خلي معاج اعشاب ينسون تي باق وايد تريح الياهل

الله يوصلكم بالسلامة شوفي اذا ماتقدرين اترضعينه شفطي حليب في الشفاطة مالت مذركير دشي الحمام شفطيله ورضعيه