مشكلة عظيمة مع مرت حماي النفسية

بسم الله الرحمن الرحيم وبه نستعين

عندي مرت حمى مدري من اي كوكب ! مدري من اي فصيلة؟ مدري من ايش مخلوقة استغفر الله

بقول لكم سالفاتها وقولولي شاتصرف وياها لاني انا ماعندي خوات ولا عندي خبرة فالموضوع

انا تزوجت وعمري 20 انا احلى منها واكشخ و انا متواضعة مانيب شايفة روحي على احد اول ماتزوجت قربت مني كثير وصارت مثل الاخت لي ماتتصورون شقد اول ماتزوجت عزمتنا اهي وحماي بمطعم و فرشت لي الارض ورد وكانت لي الاخت الحنونة الناصحة

الناصحة (اللي تقول لي انتبهي من ام ازواجنا ومن خواته تراهم تحش وتحش وتحش وتحذرني منهم لين انا خفت وصرت جدا رسمية وياهم ولااحتكيت الا فيها )

الزبدة
كرهتني بالبداية فيهم كلهم
ومرة دقت علي 5 الفجر تبجي تقول شفتي شلون امه شيشت ولدها علي والمهم انا هديتها وجذي وانتبه لي رجلي وقلت له لانني مابي اجذب عليه واحنا ببداية زواجنا

اهو راح بيت اهله بياخذ غرض من هناك وجايني وهو يقول لي انا اضحك مقهور قلت له شفيك يقول مرت حماك تتملحس عند امي تحت وموديه وياها حلا وسوالف وضحك

هنا انا فكيت فمي واستفاهمات فوق راسي

المهم مرت السالفة و لا قلت لها بس فجأة اتفاجى بانها تحش فيني من وراي
وانا تقول عني كلام موب طيب

الزبدة انا هنا مسكت بريك وصرت ما ارد عليها ولا على اتصالاتها و لا شى وحست ايه وترسل لي شفيج قلبتي علي وانا ارد عليها ببرود انه مافيني شئ
بعدين قررت اني اقعد مع اهله واتعرف عليهم اكثر
شفت كل طيبة منهم وانهم عكس الكلام اللي اهي قالته
وتقربت منهم وسحبت عليها

وفجاة تروح تحش فيني عندهم وترسل لي بجوالي رسايل بمعنى لاتفكرين اذا صارت علاقتك فيهم قوية انا بنقهر لا يا حبيبتي مانيب منقهرة ومرة ارسلت لي مالك حق تقلبين علي انا شسويت فيك ومرة ارسلت لي ليه تتكلمين عني من وراي (انا ماجبت سيرتها عند احد غيركم) وليه وليه الزبدة كله اسحب عليها وما ارد , ارسل لها تبريكات رمضان والاعياد وترسل لي كلام يغثني ولمن اروح بيت اهل رجلي تغثني وانا اسكت وما ابيها تفهم سكوتي اني ضعيفة انا هذا اللي اخاف منه انها تفكرني ضعيفة ما اقدر ارد لانها حتى رفعة الصوت ترفعه علي وانا اشاور رجلي يقول لي اذا صرخ عليج ياهل ماراح تردين حالها حال اليهال و المهم اخر مرة يوم انها رفعت صوتها من القهر بجيت ورحت افضفض لامه ولاحظت ان امه تقول لي خفضي صوتج لاتسمعج لانها اهي فوق ساكنة عندهم وتتصيوخ والام تقول لي ترا اهي كذا اسلوبها انتي طنشيهاوانها قالت عنك كلام بس انا ماحبيت اكون نقالة كلام (تقول للام ترا مرت حماي اللي هي انا اكرههم و ابي احسن صورتي لهم على حسابها ) (بالعلم ان الام عسل معها )يعني مدري ليه مرت حماي تسوي فيني كذا ودايم تقول حق ريلها خواتك حبوها اكثر مني و اهلك ومدري وشو (اهي شايفة روحها عليهم بقووووة وانا كنت وايد متواضعة وياهم ) واسلوبي حلو مع الكل اهي فجاة صارت زينة معهم بعد ماكانت شايفة روحها يوم شافت اسلوبي قامت تقلدني وزوجها اللي اهو حماي خروووووف لها يقلب على اهله عشانها مدري ليه مدري ليه اهي تسوي فيني كذا ومسوين قروبات بالوتس اب اهلهم وهي ماغير تقط علي نقزات وانا اسكت بخاطري ما ابي ابرد قلبها وانزل مستواي لمستوى تفكيرها المنحط ! و

حقريها اهم شي عرفتي اهي شنو ماتحبج ولا تتمنالج الخير

انتي الغلطانه
انتي شخصيتج حيل ضعيفه
اشلون تصدقين باهل زوجج بمجرد كلام وانتي ماشفتي شي بعينج
هاذي اكبر غلطه
انتي لاتعرفين البنت ولاتعرفينهم
والحكم عليهم المفروض يكون بناء على العشره والمواقف مو على كلام حريم
الحين الي صار صار
وقفيها عند حدها
طلعي من القروب الي اهي فيه
اي مكان تكون متواجده انتي لاتحظرين
ولاتخلين الموضوع تحدي منو احسن ومنو يتقرب اكثر لاهل الزوج
لان ماراح ينفع هالشي حبهم ماراح يدخل الجنه
انتي اتصرفي بما يمليه عليج اصلج وظميرج وتربيتج
ان حبوج اهلا وسهلا وان فرت راسهم وصدقو فيج فلا تنسين انج انتي بعد صدقتي فيهم
لاتكبرين الموضوع ولاتحطينلها اهتمام لا اتابعين امورها اهي وزوجها
واذا مصخت السالفه خلي زوجج يكلم اخوه ويقوله خل مرته توخر عنج لانها مأذيتج
وغيري خطج ولاتعطينها رقم اليديد
او صكيها بلوك بالواتساب وافتكي

الحمدلله والشكر هاي موصاحيه والله ياحبيبتي اذا قطت عليج كلام يغث ردي لها الصاع صاعين الزم ماعلى الانسان كرامته

حقريها شوفي الحين حاقرتها وهي منقهره

هذي انسانه حقوده وماتحب الخير لحد.

الباب الي يجي منه ريح صكه وستريح

الله يهديها

طنشيها وخليج عاديه

هذي شكلها سوسه وخرابة بيوت
تخرب بينكم
وتنقل حجي

سوي لها بلوك .. خليها تولي

انتي عبالج لو حقرتيها بتطلعين ضعيفة بالعكككس بتنقهر بتموت
انتي خلوقة ومحترمة وما غلطتي عليها وهي عكسج تماماً

وهذا الشي راح يظل يحرقها ويقهرها لأنها حاولت تستفزج كثر ما تقدر وإنتي ما عطيتيها مجال ..

وعلاقتج مع أهل زوجج خليها حلوة ولا تسولفين فيها أبد وحتى لو تكلموا عليها بيحشون فيها غيري الموضوع
لا تسمعين منهم كلام ولا تسمعينهم كلام

خليهم يعرفون إنج مو راعية سوالف ولا تحبين هالخرابيط

وتعاملي معاهم بأصلج وبعد لا تطيحين الميانة معاهم حيل
خليج شبه رسمية معاهم ..

هي سوت مخطط ومشته عليك بعدتك عن اهل زوجك ونفس الوقت هي تتقرب لهم علشان تصير احسن منك وخلاص ياخذون عنك فكره سيئه وهي تصير الكنه الصالحه في نظرهم بس دايم الي نيته شينه الله مايوفقه شوفي الله كشفها لك وانتي من جدك تاخذين نصايح من زوجة حماك وتصدقين كذا من غير ماتشوفين كلامها صح ولا غلط

ياحبيبتي انتي .. حسيتك طيبه

ماعلييييك منهاااااااا …. انتبهي من اللي يحششش دايما ،، لان اللي يحش لك يحش عليك ..

ويااكثر هالناااااااس

دواهااا الحقران عيشي حياتك واهم ماعليك ام زوجك خلي علاقتك معاهاا زينه واكيد هذي حماه تبي هي اللي تطلع بالزينه وانتي بالشينه بس نصيحه لاتصدقين اي شي بنقالك الا لين تسمعين وتشوفين بعينك وثقي تمامآ ان من حكالك حكى فيك وموفقه خير حبوبه

نصيحتي.. خليج قريبه اكثر من ام زوجج و خواته دام انج قلتي انهم وايد طيبين. و خليج صاده عنها و رسميه معاها علشان تعرف حدودها
اهي شكلها وحده تحب المشاكل فأحسن خليج بعيده عنها

بقولك شيء (من هرج لك هرج فيك )

يعني إي وحده تقول فلانه فيها وفيها وتوصل لك كلام ترى بيجي اليوم اللي تتكلم عنك

وإهي كانت تسب ام زوجك وإلحيين قلبت عليك !!

كل ماعلييك اهو الحقرااااان ,,الحقراااان يقطع المصراان

أنتي بنت مُحترمه وخلوقه ومتربيه ,لاتنزليين لمستواها ,,اذا شفتيها سويي نفسك كأنك مو شايفتها لاتعبرينها ابد ولاتفكريين فيها

وأطلعي من القرووب ,وسويي لها حضر وريحي رأسك

صلــــوا على أشرف الخلق مُحمد عليه افضل الصلاة والسلام _

شوفي

هي ما تبي حمولتها تصيرين انتي عندهم وبنظرهم احسن منها

معروف ترا الغيره بحريم الحموان

يقولون مركب الشرايك مشى ومركب حريم الحمى ما مشى

هي من اول غيرانه منج

احسن شي اصفقيها بلوك وامسحي رقمها وقولي لها لا عاد ترسلين لا اوري اهل زوجي وزوجي رسايلج اوكي

واحقريها وان صرخت عليج ردي عليها بالعقل ونقديها على نفسها

واهل زوجج وجبيهم وروحي لهم بحدود المعقول

وهذا انتي كشفتيها انها راعية سوالف وتنقل حجي

وحاشه فيج عندهم تبي تخرب علاقتج فيهم

خلتج رسميه معاهم وساكته عشان ان حشت فيج جذبتها تمشي على حمواتج وام زوجج

خليها تولي خلاص عرفتي مايها

وانا احذرج من حريم الحمى

ترا مافي احد غربلني كثر حريم حمواني

اللي غيرانه واللي ودها زوجي يطلقني وتحط بدالي وحده تقترحها على اهله

انا حتى قران يحلفن عليه حريم حمواني قبل زور اني سبيت ام رجلي ورحت جيران وخرابيط ويقولون صبيان الشارع علموهم

يعني اشكره السالفه جذب وكانوا يحلفون بس يبون يخربون علاقتي مع حمواتي وام زوجي

ووحده من حمواتي مبين كرهها لي غيره لاني ما غثيتها وام طليقي كانت تعترف اني طيبه

بس انا غير عنها طبعي غير بيئتي غير عنها وهي اساسا نوعها ما تقبل اللي مو مثلها

فاحترسي واقطعي علاقتج فيها من الحين ولاتجيبين سيرتها عند حمواتج وام رجلج حتى لو اسالوج عنها لاتردين

وان غلطت عليج لا والله ردي لانج ما رديتي راح تمادى عليج ام لسانين اللي ذابحتها الغيره منج وتستغل هالنقطه يعني شوفوا يا حمواتي ترا ما ردت لاني صح وهي غلط وكلامي وحشي عنها هو الصح

واصلي الحقران لين ماتنبط واذا تكلمت حسسيها انها ولاشي كأنه طوف ولا عليج