ليش زوجي عندي مكشر وعند الناس اراجوز

بنات ساعدوني انا طقت جبدي من هالريل اهو طبعه مرح وحبوب مع الناس بس وعندي انا يتصيد علي الكلمه ولو اقول اي شي او ابدي رايي بأي شي او اكلم عيالي يتنرفز ولا يطيق مني كلمه
احنا مانطلع الا يوم الخميس انا واهو واليهال وساعات حتى الخميس يروح فيه الحداق وما اقول لا بس اي موقف يصير او اي شي اقوله ما يطوف يعصب وينتفخ ويمد بوزه لي اخر اليوم ويقلب الطلعه كلها نكد وانا حريصه كل الحرص اني ما ازعله بس شسوي اذا اهو مايتحمل مني كلمه ولا يعاتب بنفس الوقت لا تلقينه منفس واذا كلمج ماتسمعين صوته جنه يكلم نفسه وانا ردت فعلي طبعا اتغيبه واسوي نفسي مانتبهت انه زعلان عشان ما نتعاتب وتنقلب الطلعه هواش ولا اكو فايده
والله بابنات ماتصدقون شكثر احرص على اليوم هذا لدرجة اذا انعزمت او خواتي تيمعو بالبيت او راحو مكان ما اروح اقولهم اليوم طلعتي مع زوجي الا اذا اهو رايح مكان اروحلهم بس اهو مادري ليش يعاملني جذي
بس مع الناس سواء اهلي ولا اهله تشوفينه بس يضحك ويتغشمر وتشوفين اللي قاعدين دموعهم تخر من الضحك اموت من القهر بيني وبين نفسي واذا احد طالع معانا نتعشى بمكان ونشرب شاي بمكان ونحلي بمكان وما عنده مانع لو نقعد لي الصبح بره الا معاي انا كله ماله خلق ودايخ ويبي يرد البيت بسرعه وكله ساكت واذا سولف يسولف سوالف عامه جنه طالع مع واحد مايعرفه
وانا طبعي من النوع المرح احب الغشمره والضحك وقلبي مايشيل عليه ودي اضحك معاه واكلمه حتى اذا نفس ما احقره احاول اسولف معاه يشيل نفسه اكثر شنوالحل ترى طقت جبدي

يا اغلى الناس يا حبوبه الحال من بعضه

اللي عندي مبدأه بالحياه الناس كلهم غلط وهو الوحيد اللي صح
وازيدك من الشعر بيت لما اسولف معاه تدرين شكثرياخذ وقت على مايرد حسبي نص ساعه بين كلمه والثانيه واحيانا اقطع السالفه من النص علشان اشوفه متابع والا لا اما بخصوص الطلعات انسي يمر اسبوع او شهر عادي مايطلعنا المهم وناسته
اللي ابي اوصله لك انا صار لي متزوجه من سنين واخذي نصيحتي انا كنت جذي مثلك مابي ازعله والشي اللي يضايقني كنت اكتمه ما اقوله علشان مايزعل والنتيجه حبيبتي معطيني طاف صار همه نفسه وبس
فالنصيحه ا اختي اذا في وضع موعاجبك تكلمي معاه وبيني له ان هالامور تضايقك وشغليه فيك وبعيالك
والمثل يقول كلمه تستحي منها بدها

والله ما ادري شنو اقولج حاولي تعرفين اهو ليش جذي معاج بالذات واجهيه اهو بحاول يسفه رايج او يقول انت ما عندج سالفة بس النتيجة انشالله تكون زينه يمكن بينه وبين نفسه يحاول يغير نفسه علشان يثبت لج انج غلطانه

صراحة مادري شقولج بس لازم تعرفين شنو سبب تصرفاته
الله يهديه ويسخره لج ولعياله
مع التحية……………..

والله العظيم نفس الحاله بالضبط اخا ف تتكلمين عني وانا مادري

نفس الحاله

شوفوا حبايبي الرياييل كلهم جذيه , مع الربع مستانس ومع المره ظارب عليها ثقل وامسوي شخصيه ما ادري ليش, انا لما سويت استفستاء بسيط لقيت ان الريال كله يضن بان المره سخيفه بسوالفها وانها ممله عشان جذيه ما يعطيها ويه ساعات.
الحل خلي طلعاتج معاه وناسه , لاتطلعين مع عيالج وياه طلعي بروحج جم مره معاه وسولفي واستانسي , لا تخلين طلعتج معاه بس يوم الخميس لا حدديلج يوم بس انتي وياه تطلعون بروحكم فيه, واذا عاليهال انتي طلعيهم. واذا تبينه يطلعهم اختاري يوم غير الخميس لان الخميس زحمه بكل مكان والريال يتضايق من الزحمه ويعصب واذا معاه اليهال زاد وخرب الطلعه عليكم .
انا كنت جذيه وبعدين طبقت هالكلام قمت اطلع معاه بروحي لما تعود علي وبعدين بين جم مرة ومرة اطلع معاه ومع اليهال ليما تعود, طبعا ساعات يكون متضايق ولا ماله خلق يطلعهم لا تودينهم بس انت طلعي وياه بروحكم هالشي يخليه يتعود عليج اكثر ويحس انكم جنكم معاريس.
وانشاء الله الله يفتحها على الكل والجميع.

الي عجبها كلامي تدعي حق ريلها بالهدايه وتدعي حق ريلي معاها.