عفوا لسنا السبب في القروض !

السلام عليكم ورحمة الله وبركاته

عفوا لسنا السبب في القروض..!

المتابع لما يحدث في الساحه الكويتيه من تزايد المطالبات في اسقاط القروض التي اهلكت المواطن الكويتي و"كسرت ضهره" يصدم في تعالي الاصوات المندده لهذه المطالبات ..! وكأن المواطن الكويتي ليس ابن هذا البلد وكانه لايستحق المبادرات الحكوميه في التخفيف عنه .لا بل المتابع لاقوالهم يرى في مضمونها ان المواطن غلط ولازم يتعاقب وماندلعه ونلعن خيره لين يموت ويشيل الاارث واحد من عياله

لا والاقبح لما تتعالى الاصوات ويقولون والله من قاله يقترض ..!!

اللي قالنا نقترض ان التجار اهم اللي قاعدين يلعبون بالديرة من اكبر تاجر الا اصغرهم من هالسوريين والزلمات اللي قاعدين يربحون من ورانا!!

التجارة نايمه وتوها ماصحت!!!

التاجر من كيفه يزيد بالسعر وينزل لاحسيب ولارقيب..!!

يغشون بالبضايع…وفيك خير روح اشتكي مو لان التاجر مسنود لان حماية المستهلك نايمه!!

شوفوا وقت التنزيلات واللعب بالاسعار وين المراقبه على الاسعار ماكو نايمين بالعسل..!!

والبنوك وماادراك ماالبنوك!! من كيفها ترفع بالفايده وتنزلها..!

تنصدم بعد عشر سنين وانته ماكل تبن من ورا هالقسط انك طول هالمده تسدد الفايده مو القرض نفسه!!!
روحوا للمطاعم وانواع الحشرات اللي مرت على معدة المواطن شي يدري عنه وشي مايدري!!

مابقى صرصور وذبانه مادخلت بطنه من ورا هالمطاعم وين البلديه هم نايمه بالعسل ..!!

غير الاسعار الخياليه للوجبات السريعه وغيرها..!

وشوفوا العقار خير مثال على المسخرة بالكويت ..!

العقار يا من الحكومه يا تشتريه

ات نطرت الحكومه مو اقل من 15 سنه عاد اقعد انت وعيالك وتحاشروا بالشقق او في بيت ابوك مع باجي اخوانك المتزوجين او العزابي وهات ياحشره وهواش مع الكل لين يكرهونك وتطلع من عندهم واهم لايدانوك ولايدانون مرتك وعيالك ..!!<<ويقولون ليش ماكو صلة ارحام بالكويت

اذا تبي تشتري وطبعا لانك يالمواطن المسكين مليت من الحنه والرنه والهواش اليومي مرتك متهاوشه مع اختك والا مرت اخوك

فتضطر تروح تاخذ قرض تزيد السبعين اللي ماتيبلك الا بيت في الجليب..!

اللي يشوف العقار بالكويت شلون مشلع!!! ينصدم جنه الكويت كلها خضار وانهار ومناضر طبيعيه مايدري انه صحرا زين لي لقيت عرفجه يتمه بالشارع منخشه عن فريق الازاله اللي كله الاخضر واليابس!!

وين الحكومه عن الزياده اللامتناهيه باسعار العقار ..ليش مافي لجنه تحكم السوق تحكم ااسعار وتضبطها

كل واحد يحط سعر من كيفه !!ترا اسعار العقار بالكويت الاغلى بالعالم بعد مدينة طوكيو اليابانيه!!!مادري على شنو والله!!

لامن مساحه ولا مناضر طبيعيه!!

غير اسعار المواد الاوليه من حديد واسمنت وطابوق ليش ماكو رقابه عليها !!

وشوفوا اسعار السيارات ليش اسعار السيارات بالكويت الاغلى بالعالم

تخيلوا المرسيدس فرق بين الكويت عن السعوديه الفين لي 3 الالاف!!

وغير الماركات اللي اييبونها من الصين ويبطلون لها بوتيك بالمجمعات ويقولون بضاعه اصليه واهيا تقليد درجه عاشره!!

غير الملابس اللي تنباع بسوق الجليب على 5 دنانير وبالمجمعات تنباع على 30 و50!!!

والجناط اللي على 5 تنباع ب30!!!

عشان جذي لاتقولون ليش المواطن يقترض

المواطن يبي الحمايه من الحكومه من جشع هالتجار

يبي قوانين تضبط السوق والبضايع يبي مراقبه على جوده البضاعه

يبي مراقبه على الاسعار

يبي ناس تهتم فيه..!

ليش يدفع دبلات سعر البضاعه واهيا تنباع باقل الاسعار بالدول المجاوره..!

عشان جذي مو احنا سبب القروض احنا ضحايا نبي من ينقذنا من غلاء الاسعار الفاحش

نبي الحكومه تتدخل نبي النواب يبطلون ارتشاء ويتحملون الامانه ويسنون قوانين تحمي المواطن

يبا حتى التجار السوريين لاعبين فينا ينهبون الكويتي ولايقدر يشتكي عليهم..!!!

نبي حل نبي قوانين تضبط كافة الاسواق نبي عقوبات رادعه للي يغشون من التجار

نبي تحرك جدي من النواب والحكومه

ارحمونا ياناس والله المعاشات ماتلحق

اي والله صح لسانج بكل كلمه قلتيها

واتمنى هالكلام يوصل حق النواب وحق الحكومه

والله على الظالم

صح لسااااااااااااااااااااااااااااااااااانج …

نوعاما اتفق معاج

بس في ناااس ياخذوون قرووض مالها داعي قروض حق سفر

حق عررررس شماله ماخذين قرض كل واحد يمد ريووله على قد الحااافه

ويعطييييج العافيه

الملكه عشان الديرة نار قاعدين ياخذون قروض والا شوفي فساتين العراس ابيخ واحد على 300و400

غير المكياج والتسريحه

والله ناهبينا بديرتنا مع ان شريحة اللي يقترضون للكماليات ماتمثل 1%

اما الباجي ياقروض للبيوت او علاج

ولاتركزون بس على الي ياخذون قروض للكماليات في غيرهم محتاجين ومااقترضوا الا للحاجه ..!

والله صصصصصصصصصصصصح لسانج اوووووووووووووفي كلامج يبرد روح اوبو خال الجبد بس وييييين اللي يسمع وييين اللي يحس والاعضاء فلوسهم تااارسه البنوك علشان جذي مايحسون فينا ولاعمرهم بحسون انا ولدي بعيونه اصابه مليت وانا ادور واااسطه اعالجه بره ماكو ليش ما الدوله تتكفل فيه مو ولد هالديره ولا خيرنا لغيرنا ؟؟؟
وغييير السكن ماحطينا قرض الا لسبب الضيج والمعاش اللي يالله يكفي نبي نشتري بيت وكل بيت بالكويت اتفه بيت مو اقل من 90 الف وهالبيت 100% يبيله ترميم وتأثيث لو شي بسيط او او او شقول شخلي بس الله يرحم حالنا ان شالله والله كريم يفرجها ربج ……… خليجية

ماقول الا حسبي الله عليهم

موره حنين

اي والله صح لسانج بكل كلمه قلتيها

واتمنى هالكلام يوصل حق النواب وحق الحكومه

والله على الظالم

الله كريم

يعطيج العافية

حياكم

–

صاجة حسبي الله على الظالم

الظلم ظلمات يوم القيامة

انا ما اتفق معاج حبيبتي

انا وحده اشتغل ببنك واشوةف الاشكال الي تمر

اغلبهم شباب اعمارهم ما تتعدا ال24 سنه و 25 سنه ايي ياخذله قرض 20000 تدرين ليش علشان ياخذله سياره لما يطلع فيها الناس تقوله وااو

وبعد شهرين اييلج يقول والله بجدول قرضي

طيب انت عمرك خنقول ما تعدا 30 شلون تتزوج وتفتح بيت ؟؟

خلصنا من فئه

اييلج واحد بسرعه بسرعه ابي قرضي بالحساب هاليومين ويترجى تدرين ليش

لان ورا سفر يبي يسفر المدام بعد 3 ايام او 4

خلصنا منهم

ناس تييلج انا ابي وابي وابي ليش ابي الجنطه الفلانيه ولا الرنقات وغيره وغيره
انا ما انكر في ناس مظلومه

بس كل واحد قبل لا يسوي شي ايي يحسبها

مايصير تاخذون قروض بالالاف وعلى فكره محد يقص على احد علشان ياخذ قرض

لما تروحون البنك يقولون لكم قرضكم هالمبلغ على هالمده

ليش لما تصرفون الفلوس تقولون تعالي يا ديره دفعي لنا فوايدنا

احنا مو قد هالفوايد << محد احترامي حق الي ماخذ بيت او علاج هذا حاله خاصه

والله والله ماكو على الكويت

تقولين اسعار وجبات الكويت نار
الحمدلله شفتي صمونه الفلافل والمشكل الي ب100فلس بره على نص ودينار

شوفوا ديار بره يشتغلون حتى بالتكاسي
حمدوا النعمه

تقولون الحكومه ما تسوي لنا شي

فكروا فيها

منو يعطي 4000 عند الزواج
منو الديره الي تعطي زوجيه
منو الديره الي تعطي بدل اجار
منو الديره الي تعطي حق كل ياهل 50 دينار بره قاعدين يحدون النسل بس واحد او 2 واهني يعطونكم عالياهل
وغير 70000 دينار للبيت

شنو تسويلكم الحكومه

حمدوا النعمه والله ماكو عالكويت

وكل شي مو عاجبكم
حتى دعم العماله والاعانه حق الطلبع والمعاقين وغييييييييييره وغيره
والله والله لو وين تروحون ما تلاقون مثل الكويت وحكام الكويت وحتى الاعضاء

الحمدلله كل مواطن ماخذ حقه وزياده دبل الدبل

واذا الواحد حمد ربه ربه ييزيده وطول ما يقعد يحن بالفقر ربه يفقره

لو بجيبكم دينار الحمدلله احنا بالكويت كفايه الامان

وسامحوني طولت عليكم

احبكم والله بس الساكت عن الحق شيطان اخرس :>

اللي ماخذ قرض علشان بيت علشان علاج هذا من حقه يطالب باسقاط القروض او على الاقل اسقاط الفوائد

لكن اخذ قرض علشان سفره او عرس او سياره اللحين حتى حق الولادة وتجهيز الاستقبال قاموا ياخذون قرض

وبعدين انا استغرب ليش احنا مو قادرين نوفر ونعيش بوسط هالغلاء المرتفع وما شاء الله الوافدين عايشين عادي مع ان رواتبهم اقل مننا بواااااااايد، لا ويوفرون منها بعد

لو كل واحد اكتفى بالضروريات في حياته جان عشنا من غير قروض، لكن مشكلتنا وانا اولكم ان نحب يكون عندنا كل شي خليجية

اقتباس:

المشاركة الأصلية كتبت بواسطة teenaa