|
|
عشان ماتنغشين عند شراء او بيع الذهب !!
حبيت انزل هذا الموضوع كله بصفحه واحده عشان تعم الفائده ..
السؤال اللي يطرح نفسه ، على شنو تعتمد اسعار الذهب ؟؟؟!!!
1- تعتمد اسعار الذهب على اسعار النفط فكل ما زاد سعر النفط كل ما زاد سعر الذهب .
2- تعتمد على سعر الدولار فكل ما زاد سعر الدولار كل ما انخفض سعر الذهب ( واسعار الدولار تنخفض كل ما زادت الحروب مع امريكا يعني بحرب الخليج الاولى ارتفع الذهب لمستويات عاليه جدا وذلك بسبب انخفاض الدولار وارتفاع سعر النفط … كل ما زادت التوترات السياسيه بالمنطقه كل ما ارتفع سعر الذهب ( حرب افغانستان ثم العراق ثم لبنان ) و اذا زادت التوترات السياسيه يعني عندما اعلنت ايران عن مشروعها النووي زاد سعر الذهب ويعتمد كل هذا على توقعاتج للوضع السياسي والاقتصادي .
3- يعتمد تقلب اسعار النفط وزيادته وبذلك زيادة اسعار الذهب على الاسباب السابقه ذكرها وايضا ترتفع اسعار النفط عند ارتفاع الشركات والمصانع الكبرى بالعالم
فلقد فتحت شركات الطيران جديده السنه الحاليه ادى ذلك الى ارتفاع اسعار النفط .
4- عندما تحرق انابيب نفط او يتوقف عمل احدى مصافي النفط الكبيره تزيد اسعار الذهب .
انا حاليا انصح اللي معاه ذهب لا يبيعه ابدا ابدا والي ما عنده ذهب يشتري بس شنو افضل شي ممكن الوحده تشتريه وتربح فيه ارباح خياليه وما تخسر فيه ابدا لما تبيعه؟؟؟
انا اقول لكم اهم شي اذا حبيتي انج تشترين ذهب حاولي انج تبتعدين عن الذهب المشغول وايد والذهب الملون هم ابتعدي عنه .
واذا تبين نصيحتي لا تشترين الا الاونصات واليرات والدولار فهذه لا تخسرين فيها ولا شي لان الشغل فيها صفر وهي المتداوله عالميا اما الذهب المشغول وايد راح تخسرين بمقدار الشغل فيه وما راح تربحين الا قليل يعني اذا اشتريتي ذهب 1000 د.ك بحساب الغرام ب 10 د.ك مثلا وكان الذهب الي اشترتيه مشغول — انتبهي لهذه النقطه عدل عشان ما ينضحك عليج ، اسألي الصايغ قبل ما تشترين الذهب جم مصنعية الذهب اليوم؟؟ (يعني جم دفعت يا ايها الصايغ لليد الي اشتغلت هذا الذهب؟ (فيقول لج مثلا ال1000 د.ك عليهم مصنعيه 100د.ك ) الحين لما تين تبيعين الذهب اللي بـ 1000 د.ك لازم تخصمين منه ال100 د.ك وحتى لو صار سعر الذهب 12د.ك للغرام فراح ينقص مصنعيته .
———————–
اشلون تعرفين سعر الذهب قبل ما تدخلين !! على الصايغ عندج اكثر من طريقه :
الاولى : من هذا الموقع :
https://kuwait.gold-price-today.com/
وهذا خوش موقع وايد انصح فيه .
الثانيه : من الجرايد والتلفزيون .
والثالثه: انج تحتفظين بارقام عدد من محلات الذهب الثقه وكل شوي تتصلين تسالين جم وصل الذهب اليوم ؟؟
الرابعه: تفرين محلات الذهب قبل ماتشترين او تبيعين وتسالين عن اسعار الذهب ، والمصنعيه وتقارنين اي احسن ثم تشترين او تبيعين .
واذا حددتي اي عيار راح تشترين*وتحسبين مصنعيتة عشان احنا قلنا ان المصنعيه اذا عرفتيها ( وهي الاهم ) راح تعرفين جم راح تخسرين لما تين تبيعين الذهب الي اشتريتيه
*وحطي فبالج ! امر مهم مهم مهم انه كل ما زادت المصنعيه كل ما خسارتج بتزيد يعني لو نبي نعرف المصنعيه راح نقول اهيا مقدار الربح اللي راح يربحه الصايغ منج ! ( كل سلعه بالعالم لها سعر تكلفه والتاجر يزيد اي مبلغ يرغب بربحه على سعر التكلفه والذهب سلعه مثل كل السلع ) .
الحين نبدأ بأهم الامور اللي من الواجب انج تراعينها عشان ما تنغشين عند شراء الذهب :
1- قبل ماتدخلين للصايغ اعرفي جم غرام الذهب اليوم .
2- لازم انج تنتبهين لعيار الذهب اللي راح تشترينه ، اولا راح أعرف لج شنو يعني عيار ذهب ؟ والعيار هو (مقدار نقاوة الذهب ) لان فيه هناك انواع ذهب يحتوي على شوائب والذهب له اربعة اعيره مرتبه بحسب الافضل والاغلى و الانقى من الشوائب وهي كالاتي :
1- عيار 24 وهو الفضل والنقى ولا يأتي منه الا السبايك والليرات والجنيهات .
2-عيار 22 وسيكون مكتوب على قطعة الذهب رقم 22 او رقم 0.9167 وهي مقدار نقاوة عيار ال22 .
3- عيار 21 وايضا سيكون مكتوب 21 او رقم 0.875 .
4- عيار 18 وهو اسوء شي لانه نسبة الشوائب فيه كثيره وسيكون الختم مكتوب فيه اما 18 او 0.75 .
** عيار 22 وعيار 21 وعيار 18 هو عيار للذهب المشغول ( ذكرت لك سابقا ان الذهب المشغول هو كل الذهب ما عدا السبايك والجنيهات والليرات لان هذه عيارها 24 )*
………… وافضل عيار للذهب المشغول هو عيار 22 وهو مطلوب بكثره بالهند …………. اما عيار 21 هو الاكثر طلبا بالنسبه للعرب والشرق الاوسط !!
*********** ولا تفكري ان عيار الذهب مو مهم الا هو مهم و مهم ومهم بل هو اهم شي وهو اللي لازم تنتبهين عليه قبل كل شي … انتبهي هو اهم شي …
لان الصايغ ممكن يعطيج قطعه عيار 18 وتكون اثقل من قطعه ثانيه ويبيعج اياها غاليه على اساس انها ثقيله و بجذي تكونين انخدعتي احلى خدعه بحياتج لان هذي القطعه الي غرتج بثقلها عيارها 18 ولما تين تبعينها راح تبعينها بتراب الفلوس لان عيارها خرده …. وبالمقابل لو كان هناك قطعه عيارها 22( وهو الافضل للذهب المشغول ) وكانت القطعه التي عيارها 22 اخف من هذه الي عيارها 18 واجيتي تبيعي القطعه الي عيارها 22 راح تلقين انج ربحتي فيها ثلاث اضعاف القطعه التي عيارها 18 واثقل من هذيج !
خلصنا من العيارات والحين نروح لكيفية معرفة اسعار المصنعيه وهي تأتي بالمرتبه الثانيه بالاهميه بعد العيار وها انتي انتبهتي على عيار قطعه حبيتيها واعجبتج وودج تشترينها فشراح تسوين عشان لا ينضحك عليج ؟؟ راح تقومين بعمليه حسابيه وانا انصحج تاخذي اله حاسبه معاج اومن موبايلج اوتحسبي ولاتستحين انج تطلبين الة الصايغ .
الصايغ يقولج سعر جرام الذهب عيار 24.
*لنفرض ان اليوم عرفتي ان سعر شراء جرام الذهب 16 د.ك وبغيتي تشترين قطعه وزنها 30جرام وعيارها 21 فالمفروض انج تسوين *الاتي :
بما ان سعر شراء الذهب عيار24=16د.ك فأول شي ودنا نحسبه اهوا: جم سعر شراء الذهب عيار 21 ؟ فنقوم بضرب 16× 0,875
( هذا الرقم نقاوة عيار21 وهو ثابت وكتبت ارقام النقاوه لكل عيار فوق ) 16×0,875=14 د.ك*
( 14سعر غرام عيار21 ) …. والقطعه مالتج الي اخترتيها جم قلنا وزنهاا ؟؟ وزنها 30 غرام وهي من عيار 21 فنضرب 30 غرام×14د.ك = 420 د.ك
الحين اهم جزء الصايغ ما راح يقول لج*ان سعر القطعه 420د.ك!! بل راح يزيد مبلغ عليها وهذا المبلغ ( المصنعيه) يعتمد على امانته وجم حاب هو يربح منج وبجذي انتي راح تعرفين جم انتي راح تربحين من هذا الصايغ ولازم تعرفين ان الربح هذا كل ما زاد كل ما انتي خسرتي لانج لما تين تبيعين هذي القطعه مره ثانيه راح يخصم الصايغ اللي راح يشتريها منج ، المصنعيه التي حسبها البايع الاول !
واتمنى اني افدتكم ،،،
وافدت كل العرايس ،،،
الموضوع منقول مع بعض التعديلات…
خووووش موضوع وبوقته ،،، الحين اقدر اروح اشتري الذهب لاني فهمت سالفه المصنعيه ،،،،
.gif "Eh S(7)")
يعطيج العافيه
..
عرفنا راسنا من كرياسنا
بس لاتنسون تسيفون الموقع عندكم بالمفضله ،،،!
ان شاء الله بيفيدكم وااااايد ،،،،
الله يكون بعونا
أنا لو أمي وأبوي جان قااصين علي هههههه. ما أعرف شي بالذهب!
وتوني ادري ان عيار 24 ما يسوون منه قلايد وسبحات وهالشغلات!
مآقصصرتي
..•*