خبراتكم في الزواج بين البدو والحضر والشيعه والسنه للافاده

تجيني استشارات بخصوص هالمواضيع على الخاص

وما عندي رد كافي لنقصي بالمعلومات

ودي اعرف السني اذا تزوج شيعية

والسنية اذا تزوجت شيعي

****

اشلون حياتهم بعد الزواج؟؟؟

هل في تقبل لدخول احد الطرفين للحسينية ؟؟؟

هل في تقبل للموافقة على صلاة العيال مثل ابوهم على الطريقة السنية او الشيعية ؟؟؟

موضوع 2

الحضري اذا تزوج بدوية ………والبدوية اذا تزوجت الحضري

هل عند الحضرية استعداد تتأقلم مع ظروف وبيئة زوجها البدوي ؟؟؟؟

وهل عند الحضري استعداد للاندماج مع نسايبة البدو في عاداتهم وعزايمهم ؟؟؟

هل ممكن الحضرية تتحول الى البدوية مع عشرة السنين وتتغير لجتها من الياء الى الجيم وطريقة لبسها

هل من الممكن البدوي يتحضر اذا عاشر فتره طويله الحضرية ؟؟؟

****************

اجاباتكم وخبراتكم الكل سوف يستفيد منها

فوفو

اكيد مع العشره يتغيرون مثلا اشوف وايد مصريات وكلامهم كويتي وبعد فتره اكتشف انها مصريه او سوريه ماخذه كويتي

نو نو نو عزيزتي فهمتيني غلط

انا ما اقصد اختلاف الجنسيات

انا اقصد اختلاف المذاهب والنسب بين الحضر والبدو

فوفو

والله على حسب الشخصيه اذا تقدر اتكيف نفسها مع المحيط
واذا كان بينهم حب و تفاهم راح بتغلبون على كل العوائق

وحده تصير لي ماخذه واحد ذهبه بس غير عن مذهبنا

اشوف انها شوي حساسه لما يصير موضوع وساعات تسألنا اسئله ما ادري شلون

بالنهايه انا ما ادري عن خصوصياتهم بس الظاهر انهم ماشاء الله تمام مع بعض

امممم حلو الموضوع ودي اشوف الردود,,,

انا اللي اشوفه السنه اللي مناسبين شيعه

يا ان الطرفين مايكونون متشددين حيل

يعني مثلا اذا سني خذا شيعيه او العكس مو ذاك الزود مع الحسينيات و سوالف عاشورا و اهوا بعد مايكون متشدد بمذهبه كل واحد يرخي من صوب و يمشون

حتى الصلاه تلقين المره ماتجمع عادي تصلي كل صلاه بوقتها

او

واحد منهم يبدا يسحب الثاني شوي شوي على مذهبه لما واحد منهم يصير على مذهب الثاني رسمي

هذول اللي انا شايفتهم

بس بدو وحظر ما مر علي

حبيبتي فوفو آنا أتكلم عن نفسي ما أدري عن وجهة نظر الأخوات ……….

آنا سنية مع سبق الإصرار والترصد ، بس لو في يوم من الأيام حدني الزمن وتزوجت شيعي لي حلين

إما إني أتقبل حياته كشيعي أهو وعياله أو أقنعه يتحول سني

إذا استمر بمذهبه وآنا بمذهبي العيال راح يضيعون بالطوشة شي منهم سني وشي منهم شيعي

وفي هالحالة راح يضيع البيت بالنسبة للمذاهب !!!!!!!!!!!

وطالما إني رضيت وتزوجت شيعي لازم أتقبل تحول عياله للمذهب الشيعي بدون زعل لأني وافقت بالأول

لازم أوافق بالآخر !!!!!

أما في الحالة الثانية آنا حضرية ولو حدني الزمن أتزوج بدوي راح أحط في بالي إنه راح يتزوج علي

بدوية في يوم من الأيام إما إنها تكون بنت عمه أو بنت خالته أو أي واحدة من أهله المهم تكون من نفس قبيلتهم

أو يمكن أعيش بسعادة وياه بدون زوجة ثانية !!!!!!!!!!!

وإذا بدوية مع حضري ما أتوقع في خوف بحياتها من ناحية زواج ثاني أو اختلاف العادات والتقاليد

هالزمن مافي شي اسمه بدوي ولا حضري كلهم بالهوى سوى

وإذا على النسايب حضر وبدو الحين كل الدواوين فيها البدوي والحضري والسني والشيعي

وكل واحد محترم الثاني عالآخر بدون حزازات أو جرح للمشاعر

والله يهني سعيد بسعيدة

اعتقد القصة المختلفة بين السنة والشيعة اكثر من البدو والحضر ليش ؟
لان الحين البدوي والحضري بدوا ياخذون نفس الطباع بحكم المعايشة والظروف المحيطة يعني الاثنين عايشين بفلل محد ساكن في خيام او بيوت طين الاثنين يداومون بوزارات او مؤسسات ما في الحين احد يروح الغوص والثاني يرعى اغنامه الاثنين وايد منهم ينطقون الياء جيم وهمن الاثنين وايد منهم ينطقون الجيم ياء الاثنين منهم مراكز علمية ودرجات وشهادات عالية وهمن الاثنين يلبسون تقريبا نفس اللبس فيهم المحجبات وفيهم المنقبات وانا متاكدة وايد منا صادفوا بنات كنت تظنونهم من طريقة اللبس والكلام حضر وطلعوا بدو والعكس صحيح ويا حلوهم الاثنين
نجي الحين عند الشيعة والسنة ولا هانوا كلهم اعتقد السؤال : شلون يتعايشون كازواج في البيت وخصوصا الاختلاف هنيه مذهب وتصديق
(انا مو قاعدة اسب اي مذهب رجاءا ) بس الاثنين يختلفون حتي في الصلاة والاذان اذا ماني غلطانة
شلون يربون عيالهم ؟ شلون يتعاملون مع حمولتهم ؟

حياااتي انا بقولج من وحده عايشه بهالوضع امي حضريه شيعيه وابوي بدوي سني وللحين كل واحد على مذهبه محد سحب الثاني وثقي وامني اي شخص ياخذ غير عن مذهبه الا ويكون بداخله متسامح وصج صج ماعنده فرق يعني انا ابوي ما فرض علينا مذهب معين اهو فهمنا وامي فهمتنا وكل واحد يمشي على الي مقتنع فيه هذا الي صاير ياقلبي وطول ما ان الريال او المره رضت تاخذ واحد غير عن مذهبها لازم اتحط ابالها ان سواء الام او الابو ان بشوف اختلافات ببعض الامور ولازم يرضى فيها اما اذا حصل زواج من مذاهب مختلفه واحد الطرفين متشدد او حاط اباله ان بيسحب الثاني معااه من وجهة نظري وايد بتصير مشااكل واليهال بيضيعون لكن الحمدالله ياارب ابوي وااايد قلبه ابيض ومتسااامح ويحترم رااي غيره وصج ما يفرق لان بالنهايه كلنا مسلمين بس مثل ما قلتلج حيااتي اهو يوجه وامي نفس الشي والباجي على قناعتنا ماكو شي بالقوه والفرض..اما من ناحية عادات البدو والحضر عندج امي هذي اهي ما تغيرت وماتقدر تتغير ان تتطبع نفس اهل ابوي لان سبحان الله البيئه تختلف واهل ابوي عارفين هالشي بس فيه حضرياات عاادي مع السنين اتصير نفس الطبايع لكن بالنسبه للوالده الله يحفظها ماتغيرت ولا كلامها تغير …ابوووي متمسك بعوايدهم وماتخلى عن حرف الجيم بس اهو اساسا متحضر بافكاره ولا جان ما اخذ امي ولا ظل معها للحين من الاساس واهل امي عاااادي مع ابوي صج الكلام غير لوووووووووووول بس يحبونه ويعزونه وايد وترى حتى خالتي ماخذه بدوي سني ونفس طريقة حياتنااا ترى سهااالات والله واهل ابوي مع اهل امي مابينهم الا كل خير واحترام ماجذب عليج واقولج الكل متقبل امي لاااا فيه نااس مايحبونها عشان مذهبهاا لكن القراب علينا حيل مثل عماتي وعمامي وعيالهم يحبونها ويحترمونها واهي نفس الشي تحترمهم حييييل ..والي اتقول العيال يضيعون ومادري شنو اسمحيلي هالكلام خطا لان نفس ماقلتلج الام تنصح ونفس الشي الابو وانتي على قناعتج ..العيال يضيعون بحالة اذا الام والابو مو متفقين ومتعصبين وكل واحد بيفرض راايه اما غير جذي سهاالاااات ومااااكوو مشاكل ابدااا…وسوري طولت عليج واي سؤال اقدر افيدج فيه بهالخصوص من عيوني

انا خالي ماخذ شيعيه عن حب

بس عادي اهي مو متشدده ولا خالي متشدد

والصراحه بيني وبينكم ما ادري اهي تسننت ولا لليلحين شيعيه كله تقول تسننت وبعدين اكتشفنا انها رايحه حج مع حمله شيعيه !!!

بس العيال كلهم سنه يمكن كان اتفاق بينهم

وحياتهم مااااااشيه ولابد من ملح الحياة (الهوشات) بس الحمدلله حياتهم ماشيه وصارلهم الحين اكثر من عشرين سنه

اممم مشكوره اولا حبيبتي بس حابه اوضح نقطه مو كل احد نطق بحرف الجيم مثل جينا =يينا

يطلق عليه بدوي !!

بالعكس هذا نطقها الصحيح مثل ما نقرا حروف القران
بالجيييم ومو الياء

وتعليقي ع الموضوع

ممكن الحضري يتاقلم مع البدويه والعكس بعد

لكن الشيعي والسني صعبه جدا جدا

كلن له مذهبه واذا اختلافو ع صلاة الاطفال مستقبلا ماراح يكون لها حل هالمشكله لان كل واحد متمسك بمذهبه

والضيحه الاطفال )=

مشكوره مره ثااانيه الموضوع

اتوقع الحب وحده غير كافي لازاله العوائق

فوفو

كل تجارب اهلنا مع انها نااااااااااااااااااادره حيل
الحمدلله ناجحه

الله يتمم عليهم

فوفو

شكرا للمشاركه
فوفو