|
|
السلام عليكم ورحمة الله وبركاته
شنو ادخل ادبي ولا علمي ؟؟
القرار قراركم انتوا !! لحد يأثر عليكم او تسئلون ناس ما تعرف ويخربون عليكم.. انتوا اللي راح تدرسون وتتوظفون .. لازم تعرفون الشي اللي تحبونه.. لأنكم اذا دخلتوا شي ما تحبونه راح تتوهقون
· لازم تفكرون فيه عدل قبل فترة لأنكم اذا دخلتوه عندكم فرصة بس اسبوعين بأول السنة عشان تحولون . وعقبها لا يمكن !!
· كل واحد وله سلبياته وايجابياته .
· العلمي يعتمد على التفكير والفهم وهم فيه جزء حفظ ، والأدبي أكثر شي حفظ بس لازم تفهمون شنو تحفظون قبل .
· الكلية اللي تحبونها ووظيفة المستقبل اللي تتمنونها هم لها دور كبير عشان تقدرون تقررون
ملاحظة مهمة :
1- العلمي يفتح كل المجالات الأدبية والعلمية .. اما الأدبي بس الأدبية .
مثال: العلمي يقدر يدخل كلية الهندسة والطب والعلوم الادارية والعلوم الطبيعة والحقوق والآداب والعلوم الاجتماعية الخ ( كلهم)
بينما الأدبي .. بس حقوق وعلوم ادارية وأداب وعلوم اجتماعية الخ ( محدودة )
2- نسبة قبول الطالب العلمي بالجامعة أقل من نسبة قبول الطالب الأدبي
مثال: لو طالب علمي ياب بالتخرج نسبة 72% ينقبل بالجامعة بس لو كان ادبي وياب نفس هالنسبة ما ينقبل بالجامعة .
· انتوا شوفوا شنو درجاتكم احسن فيه .. الاجتماعيات والاسلامية ؟؟ ولا الرياضيات والعلوم (فيزياء- كيمياء – احياء)؟؟ والأحسن دشوه .. ولو مثلا بعطيكم بكتاب شكبره شنو اسهل لكم وتقدرون عليه.. تحفظونه صم ؟؟ ولا بس فهم ؟؟ اذا حفظ ادبي .. واذا فهم علمي
· ترى والله كل واحد فيهم حلو .. وكل واحد بحسب ميوله .. وبخبرتي ترى العلمي سهالات لا يخرعونكم فيه ولا يغركم انه كتاب الكيميا كبير اغلبه بس فهم وحلو
نصائح حلوة وخفيفة:
*حل الواجبات جميعها واستغلال البونس
* الانتباه والتركيز الكامل بالحصة .. لاحقين على السوالف والضحك بالفرصة او برة الثانوية .
* في حال عدم فهم أي نقطة لا تتردد بسؤال المدرس او زيارته في مكتبه لا تأجلونه حق يوم الامتحان
* التخطيط على الأشياء المهمة مع المدرس اثناء الشرح وكتابة أي ملاحظة يقولها على الكتاب بالهامش
* اثناء الحصة حاول انك تشارك وتفكر ومو عيب انه الواحد يغلط .. العيب انه ساكت على الأقل لي غلطت راح تعرف الصح وتتعلم وما تغلط فيه .. والأستاذ راح يعطيك درجة على مشاركتك حتى لو غلط .. لأنك حاولت
* مهم حفظ الآيات والقصايد لا تقولون عليها درجات شوية ..بالموحد كل درجة مهمة والحفظ يساعد على الفهم وحل الأسئلة
* خلصوا مشاريعكم وتقاريركم مبجر عشان لا يتكودون عليكم ويضايقونكم بحزة الامتحانات
* بعض الأحيان المدرس الخصوصي مهم بس أحسن شي ايي قبل الامتحان بفترة ويعطي الملخصات والأشياء المفيدة .
* النظام الموحد تراكمي لازم اشد حيلي من أول سنة .
*ضروري أبدي دراستي بالتسمية والتوكل على الله .. واصلي صلاتي بوقتها واعتمد على ربي وما انسى الدعاء عشان ربي يوفقني.
* قال رسول الله صلى الله عليه وسلم " من غشنا فليس منا "
يا جماعة مو زين الغش عشان ربي يبارك لكم بدرجاتكم ومو حلوة على سؤال تافه تنحرمون من الامتحان وتاخذون صفر ويروح عليكم . وصارت وايد عندنا وبعضهم خذوا دور ثاني بالفاينل ودرسوا الكتابين .. وأعرف بنات شطار ويغشون .. بس ربي ما بارك لهم بدرجاتهم ونزلت !! وبعدين ترضون وظايفكم ان شاء الله بالمستقبل … انه تاخذون فلوس حرام ؟؟ الله ما يرضى
*لا تأجلون الامتحان وتاخذون طبية مهما كان صعب اذا ما كنتوا مرضى صج ..أول شي حرام .. ثاني شي دايما المؤجل أصعب .. وممكن ينحط مع مادة ثانية بنفس اليوم وتتوهقون (المؤجل لا يؤجل ) ودرسوا قبل الامتحان بفترة وان شاء الله ربي يسهلها
* حاولوا انكم ما تغيبون وايد الا للضرورة وخصوصا العلمي .. عشان لا يفوتكم الشرح
* لا تكودون كمية الدراسة للامتحان بيوم واحد !!! مو لعب هذا امتحان ..وراح تتعبون .. لا تسوون روحكم رامبو.. ثانوية هاذي مو لعب .. عشان انتوا ترتاحون
شلون أتعامل مع المدرس ؟؟
اعتبر المدرس اخوك او رفيجك (العكس للبنات) اضحك معاه وسلم عليه و أسأل عنه .بس حزة الجد جد .. وبالحصة كأنه مدرسك واسمع نصايحه وكلامه لأنه وايد راح يفيدك واهوه مطالب انه يفهمك كل حرف ولو تبي اكثر من مرة .. لا تتهاوش معاه وعقب يحقد عليك .. اذا في غلط .. كل شي حلو بالتفاهم .. وحقك ما يضيع .
كيفية الدراسة لبعض المواد الصعبة :
· العربي : مادة وايد مهمة لعلمكم اهم من المواد كلها لأنه لها أعلى وزن نسبي وللأسف اصعبهم .. ترى اهيه وايد راح تصير سهلة اذا درستوا من قبل .. قبل يوم الدراسة للامتحان لازم تكونون خالصين من الحفظ + البلاغة + تاريخ الأدب + قواعد .. وبيوم الامتحان بس اراجعهم وأقرى الدروس ماله داعي احفظهم صم . بس احفظ المعلومات المهمة فيه وافهمه .. لا تستهينون فيه !!! وايد بنات اعرفهم نزلت معدلاتهم بسبته !!
· الرياضيات : لازم احل كل اسئلة الكتاب والتدريبات والتمارين العامة .. وأراجع الأمثلة المحلولة وافهمها .. ترى الرياضيات ما يطلع خارج الكتاب .. واذا طلع يكون نفس الفكرة .. او شوي غير .. وهذا نادرا
· المواد العلمية :
· 1– كل شي مهم .. صور + تعاريف + تجارب + رسمات + شرح + مسائل
· 2- التقويم وايد مهم .. ووايد ايبون منه لدرجة نفس الاجابات بالضبط ساعات نفس ترتيبها ونفس الارقام .. وأغلب افكار الامتحان من التقويم
· 3- ما يصير ادرس الكتاب واهد الدفتر . او ادرس الدفتر واهد الكتاب .. لازم اثنينهم مع بعض
· 4- لا تنسون الوحدات والتحويل سواء بالمسائل او اكملي الفراغ .. لأن ينقصوني مني نص .. ومناك ربع .. ونص هني .. يتكودون ويطلعون درجات وايد !! فحرام
قبل فترة الامتحانات او الفاينل:
أحسن شي اخلص دراسة المواد كلهم واسوي لي جدول .. واحط لي فيه ايام راحة .. عشان بيوم الامتحان بس اراجع واكون مرتاحة … عن تجربة شخصية وايد فادتني هالطريقة.. أشبع نوم ومرتاحة لا أسهر ولا شي وابشركم .. ساعات اطلع شوي .. لووول …لان الامتحانات ورا بعض وصعبة أسهر واخرب علي اليوم اللي وراه واللي مفروض أدرس مادة ثانية.
بيوم الدراسة للامتحان:
1- عقب ما اخلص دراسة أحاول احل امتحان تجريبي أو اسئلة تدريبية .. ممكن تشترون كتاب جمعية المعلمين او ممكن أنزل اسئلة من النت او أخذهم من مكتبة الثانوية .. والسؤال اللي ما عرفته احط عليه علامة وأكمل حل .. وعقب ما اخلص أشوف الاجابة من كتابي الأساسي وأراجعها
2- وانا بحزة الدراسة للامتحان وحسيت انه في فقرة مو حافظتها عدل او مو فاهمتها عدل ما اعلق عليها واضيع وقتي .. احط عليها علامة وأكمل دراسة وعقب ما أخلص كل شي.. أراجع الأشياء هاذي .. بس مو تنسونها وتبلشوني !! لووول
3- قبل لا تنامون اذا في شي مو حافظينه عدل راجعوه .. وأقروا كل التعاريف والقوانين … وسبحان الله لما تقعدون من النوم راح تلاقون نفسكم حافظينها عدل ( وانا مجربتها )
يوم الامتحان :
1- لا تنسى تصلي الفير .. ولا تتوتر وتخصبق روحك .. انت سويت اللي عليك والباجي على رب العالمين .. وان شاء الله ماكو الا كل خير
2- الصبح .. ما يمديك تراجع الكتاب كله .. راجع بس رؤوس الأقلام والأشياء الأساسية والقوانين والتعاريف واللي مو حافظهم عدل والرسمات مهمة !! وعليها درجات وايد .. الا اذا تحب تقعد الفير وتراجع كل شي .. هذا راجع لك .. كل واحد وطريقته لوول
عند استلام الامتحان :
1- سموا باسم الله وتوكلوا عليه وقولوا الدعاء
2- اقروا الاسئلة عدل وبتركيز وحلوا .. لا تتأثرون باللي معاكم .. عيشوا الجو بروحكم واذا عندك سؤال لا تتردد وتسأل المراقب المٍسؤول .. واسمع نصايحه وملاحظاته
3- اللي ما عرفت تحله او مو متاكد منه لا تضيع وقتك عليه .. حط عليه علامة بالرصاص وخلص الامتحان كله .. وعقب رد عليهم وحلهم .
4- ساعات وقت الامتحان قصير .. فما يمدي تحل بالرصاص وبعدين تحبر .. ديروا بالكم .. لأنه الرصاص ما يتصلح !!! .. حلوا بالحبر اغلب الامتحان ..واذا الوقت يسمح حلوا بالرصاص جم شغلة بسيطة.. ولي خلصتوا تأكدتوا حبروه .. لكن بس اذا الوقت طويل ويسمح !!
امتحان القدرات للجامعة:
يبدي من الصف الحادي عشر .. وعندكم 6 فرص وانا اقول استغلوهم كلهم وحاولوا أكثر من مرة واهمه راح ياخذون أعلى درجة …
· ترى وايد ينزل من المعدل .. انا رفيجتي يابت 94% من الثانوية .. ومع المعدل المكافئ ودرجات اختبارها القدرات صار 81% !!!!!! وانا بعد ما قبلوني فوري ونزلت نسبتي وايد !!!!!
· دشوا دورات ويبوا مدرسين وشدوا حيلكم فيه .. لا تستهينون فيه
· يكون بثلاث مواد ( كيمياء – رياضيات – انجليزي) وكل كلية لها امتحان معين .. مو كل الكليات يبونهم كلهم .. وبعضهم يأثر على معدل الثانوية ويدخل بالمعدل المكافئ
· نظام الأسئلة بالامتحان يكون كله اختياري .. ماكو مقالي
هذي بعض الادعيه اللي راح تفيدكم فترة الامتحانات
دعاء قبل المذاكرة:
اللهم اني اسألك فهم النبيين وحفظ المرسلين والملائكة المقربين.
اللهم اجعل ألسنتنا عامرة بذكرك، وقلوبنا بخشيتك، انك على كل شيء قدير
وحسبنا الله ونعم الوكيل.
دعاء بعد المذاكرة:
اللهم اني استودعك ما قرأت وما حفظت وما تعلمت، فرده لي عند حاجتي إليه
انك على كل شيء قدير، وحسبنا الله ونعم الوكيل.
عند التوجه الى الامتحان:
اللهم اني توكلت عليك، وسلمت امري إليك، لا ملجأ ولا منجي منك الا إليك.
عند دخول لجنة الامتحان:
ربّ ادخلني مدخل صدق وأخرجني مخرج صدق واجعل لي من لدنك سلطاناً نصيرا.
عند بداية الإجابة:
ربّ اشرح لي صدري، ويسّر لي امري، واحلل عقدة من لساني يفقه قولي، باسم الله الفتاح،
اللهم لا سهل الا ما جعلته سهلا، فإنك ان شئت تجعل الصعب سهلا يا أرحم الراحمين.
عند تعسّر الإجابة:
لا اله الا انت سبحانك اني كنت من الظالمين، يا حي يا قيوم برحمتك استغيث، ربّ اني
مسني الضر وانت ارحم الراحمين.
عند النسيان:
اللهم يا جامع الناس ليوم لا ريب فيه اجمعني بضالتي.
عند الانتهاء من الامتحان:
الحمدلله الذي هدانا لهذا وما كنا لنهتدي لولا ان هدانا الله.
وبالختام .. احب أقولكم لا تخترعون من الثانوية .. ترى حلوة ووناسة .. احلى ايام العمر .. طريقتها ترى نفس المتوسط .. تقعد بالصف وايلك الأستاذ .. بس الفرق انك كبرت .. وعقلك كبر .. فاكيد المواد راح تصير اصعب على قد عقلك .. واذا درست واجتهدت ماكو شي اسمه صعب
وترى في فعاليات .. وناسة رحلات وبرامج ومسابقات .. كان عندنا كلورز داي ( يوم ما فيه مخالفات نلبس جواتي وجاكيتات وسكارفات ملونة على هدوم المدرسة ) ويوم مفتوح .. وانتخابات حده وناسة .. وحفلات عيد وطني .. ويوزعون مجلات حلوة علينا .. وعندنا قروبات وجماعات .. وندوات ..وحفلات تفوق .. صج صج وناااااااااسة.. اخ ذكرتوني …
وعسى الله يوفقكم ويكتب اللي فيه الخير لكم … واللي فيه عنده سؤال عن طبيعة المواد .. او يبيني اتكلم عن شغلة انا حاضرة .. ومثل ما عرفتوا انا علمي .. فسوري مادري عن الأدبي .. ان شاء الله باجي الأعضاء يقدرون يفيدونكم .. وبالنسبة لأسألتكم عن نظام الموحد نفسه .. اهوه وايد يتغير وكل يوم نظام يديد وقرارات يديدة .. فسوري اذا ما قدرت أفيدكم بهالشغلة
ثااااااانكس وان شاء الله استفدتوا
ترا منقوول حبايبي فادني وحبيت افيدكم :$
يعطيج العآفية على النقل الممتاز
و اتممنى البنات يقرون الموضوع بكل
جدية و يفهمون الغرض منه عدل
*
*
مشكوووووره فادني الموضوع حييييييييل
ونصيح لكل البنات لا تاثرين براي احد هذي المشكله كانت دايم تواجهني حطي هدفج قدام عينج وامشي ع الخطوات الصحيحه الى توصلج له انا تاثرت باراء وايد ناس وقطوني ورا الشمس هذي اهم نصيحه لازم تعرفينها
ومشكوووووووووره ع الموضوع
.gif "Eh S(7)")
:eh_s (7): يعطيج الف عاافيه ,,
موضووعج صج مميز ومفيد ,,,
جزآج الله خير ,,,
يسسلمووؤلي ع النقل