تعالي اعلمج فن طي الورق lesson:1 . The Butterfly

السلام عليــــكم .. \~

شلونكم يا احلى بنوتات شخباركم ..؟

اليوم حبيت افتح موضوع بهالقسم وهو اول موضوع لي بصراحه

حبيت اشاركم هوايتي اللي بديت فيها من سنتين و الحمدالله اللحين تطورت فيها

واللي هي هواية

الأورغامي

اكيد اللحين جم وحده فيكم تفكر شنو الاورغامي من وين ياي :

الله يسلمكم هو ..

الاوريجامي فن طي الورق ..
وهو فن ياباني قديم و اللفظ مشتق من اليابانية: أوري "طي"غامي أو جامي ورق..
تكون عملية الطي بأخذ ورقة مربعة الشكل وطيها عدة مرات فتنتج اشكال منوعة طبيعية
وهندسية في اوضاع رائعة تتصف بالبساطة والغرابة و الجمال ..

ومن القواعد الأساسية في هذا الفن أنه يجب عدم قص الورقة وقد بدأ فن تشكيل الورق
في ال 700م عندما قدم الورق إلى اليابان فكان يصنع منه ديكورات المراسم الدينية
وانتشر استخدام الورق في لف الرسائل و الهدايا بشكل جميل واستمر تعليم هذا الفن
فن تشكيل الورق أو كما يسمى في اليابان بأسم أوريجامي في المدارس حتى الآن
لأنه يعلم المفاهيم الهندسية..

ومن حبي لليابان قلت لاااازم اتعلمها لو شنو
بل بدايه كانت صعبه حييل بالنسبه لي لاني على طول انتقلت حق الاشكال اللي كانو يسوونها بعض الممثلين لول

فكان صعب قلت خل ابدا من الصفر و كان اول شكل تعلمته هو الفراشه فحبيت اعيد ذكرياتي معاكم واعلمكم درس درس

ليما تووصلون للابدااااع ..!!

خل اوريكم صوره تشوفون شكل تطبيقات فن الاورغامي ..

طبعا الصوره اللي توها و تعريف الاورجامي ماخذته من جم موقع

بس الدرس انا مسويته بنفسي يعني الشرح او الصور انا سويتهم يعني اللي بقوله

ما احلل اي وحده تاخذ الموضوع و تخليه تحت اسمها ..!!!

اول شي يبو لكم اوراق النوت المربعه بس انصحكم اللي ما فيها صمغ علشان ما تلصق وتأذيج

وانتي اطبقيين

1

نخلي ورقتنا هالشكل جهتها

2

نجفسها نصين تصير جنها مثلث

3

نفتحها ونخلي الخط اللي طلع من الجفسه بالنص مستقيم رأسي مو افقي ونجفسه مثل ما سوينا توه

4

نخليه على جفسته ما نبطله ونحاول نضغطه من الاجناب لما يطلع عندي جفستين من المثلث ونجفسهم

5

عقب ما جفسناه يطلع لنا مثلثين ورا وجدام المهم ناخذ من الجهه اليمين راح يكون في جفستين ناخذ الجفسه الاولى ونوديها

لليي النص

6

نسوي باليسار نفس الطريقه

7

بعدين نقلب الورقه

اللي محددته بالدائره رجعوه ورى شوي شوي وخلو طالع شوي بره

8

راح نضغط شوي شوي بكل طرف من هالشكل مثل هالطريقه

بعدين قلبوه وجفسو المثلث الصغير اللي توني قايله لكم طلعو منه شوي بره لانه راح يكون الراس

وردو فتحوه من جفسته المثلث الصغير مره ثانيه

9

بعدين نجفسه نصين بس لازم يكون اول جفسته من هالصوب

10

وبجذي نكون خلصنا الشكل وطلعت لنا الفراشه

ان شاء الله يكون عجبتكم الفراشه

و انطر ردودكم و تطبيقاتكم

ملاحظه :–

1 – اذا شفت ردود وايد راح اسوي لكم تطبيقات احلى و يكون شكل اوراقي احسن مو هذول لا اللي يكونون زخارف

ويبين عندكم الوجهه و الظهر لان حسيت اذا سويت وتعبت احتمال ما القى ردود وايد

2 – راح يتم تكريم احسن 2 بالتطبيقات من بين 3 دروس .

مو تنسون انطر تشجيعاتكم

ولأي وحده واجهتها صعوبه

وتكون مطبقه مالي هذا الفيديو يساعدها للعلم ان هذا الفيديو مو مالي من وحده باليوتيوب

https://www.youtube.com/watch?v=42RrvNxUaVA

انتظروني بدرسي القادم

ماشاااااء الله تبارك الرحمن ..

الله يعطيج العافيه حبيبتي

فنانه ماشاء الله تبارك الرحمن

وان شاء الله نطبق ^_^

واخييرا احد رد لول

ام احمد مشكوووره على ردج

ومشكوره على المديح الحلو

بانتظارج

شدعواا 30 مشاهده بس رد واحد

جنكم زعلتوني

تسلم الأيادي …..ماقصرتي

مشكوره وما قصرتي على ردج

بعد عمري الله يعطيج العافيه
انا سويت من الاورغامي قميص بربريز وكرفته وااايد طلعو حلوين في موضوع عندي عن الكروت للمعايده

ناطرين درسج اليديد
واايد تصويرج واضح ومرتب حبيبتي
مشكوووره

الله يعطيك العافية

مشكووووورة ^_^

عاد انا احب الاوروغامي

مشكورة ويزاج ربنا كل خير
ناطرين منج المزيد

مشكورة ويزاج ربنا كل خير
ناطرين منج المزيد

ونااااسه تسلم ايدج

ما شاء الله تبارك الله عليج

عسى الله مايضرج

عاد تصدقين

أموت على تصفط الأوراق

بس ماعرف أسوي شكل معين

وشكلي بتعلم هالفن منج

شاكرتلج أبله Ǥoldɛn ʝɛωɛL

وبميزان حسناتج

لأنج قاعده تعلمينا شي حلو ومفيد وراقي

جزاك الله خير على الافكار الحلوه

لما كنت صغيره ابوي كان يسوي لي بالورق مركب وارنب وكنت حيييييييل استانس عليهم

والفكره اليابانية تطوير للفكره نفسها مع الاتقان واشكال اصعب