تجمع للمصابات بمرض الروماتويد

السلام عليكم
مرض الروماتويد هو نوع من امراض الروماتيزم بدا معاى هالمرض من زمان وماكنت عارفة شنو لحد ماسويت تحليل دم وطلع بالنتيجه ان فينى هالمرض بأيدى اليمين ووقت الحر او المرض وايد تعورنى صوب الجتف واى مجهود على ايدى على طول يعورنى غير جذيه طلعتى العاديه لاى مكان مثل السوق او القعده الوايد تعورنى جتفى خذية مرة ابرة كرتزون بس ماحبيت اكمل العلاج والحين مو قاعده اخذ اي نوع من العلاجات وقالتلى الدكتورة ان مع الوقت المرض راح يوصل لى اطراف اصابعي ويتجمع ماى عند المفاصل غير ان اصابعي راح تنعكف ،حبيت اسوى هالتجمع علشان اشوف البنات وين راحوا ويتعالجون عند منو وشنو انواع العلاجات وفاد معاهم ياريت كل وحده فيها هالمرض تقول قصتها والله يشافي الجميع .

حبيبتي انا معاي روماتويد من سنتين تقريبا بلش فيني وكانت نسبة الروماتويد 96% وكنت حامل في الشهر الثالث وهذا المرض يزيد في الحمال وماقدر الدكتور يعطيني اي دوه الا ميدرول حبه وحده باليوم وكنت ما اقدر احرك مفاصلي كلها واتذكر اول مره عطاني 3 ابر وخلاني بالملاحظه وعقبه ارتحت اشوي وتميت اعالج عند الدكتور لمن ولدت وعقبها غيرلي الدوه ومع المراجعات الشهريه وكل شهر اسوي تحاليل يكتبها لي الدكتور علشان يجيك على نسبة الروماتويد يشوف قلت ولا لأ ومشيت على مدرول + موبك + فولك اسد + دوه بس ماني عارفه اسمه آخذ منه 3 حبات يوم الثلاثه و3 يوم الأربعه واكثر شي يزيد الروماتويد التعب والزعل بدرجه اولى وانصحج لاتخلين نفسج لأني شفت الموت والله من العوار والدكتور اللي اراجع عنده في مستشفى المواساة د/ سامر عبدالله اتمنالج الصحه والعافيه

حبيبتى ماتشوفين شر
بس اما خايفة من سالفة الحبوب لان مرة راجعة عند دكتور عادل العوضي وكانت في مريضة بنفس المرض جان تقولى انالادويه سوت فيها قرحه بالمعده ومن يومها وانا خايفة . انا يزيد معاى العوار لم اجهد نفسي اشيل شي وعندى بنتى اسم الله عليها صغيرة وكثر شيلها يعورنى لدرجة بعض المرات يتصلب عندى جتفى ومااقدر احرك ايدى وتصدقين حتى روحتى للسوق وايد اتعبنى ايدى يعنى حياتى الطبيعية مااقدر امارسها عادى وهذا الى مزعلنى ويضايقنى غير اذا سافرت ومشيت وايد يمه يالعوار وايد يضايقنى ، الله يشافينا يارب

ماتشوفين شر حبيبتي والله انا وامي يانا هالمرض امي طاحت قبلي ب6 شهور وانا وراها معني توني اول العشرينات والعلاج كان ميثروكسيت ودواء ابيض ما اعرف اسمه وحبوب صفر كبار وحده الصبح وحده بالليل وانا كان عندي نسبته 180 اول شي اصابعي عوروني بعدين كل جسمي ماكنت اتحرك وكله ابجي من العوار وحتى الدكتوره انصدمت مني وايد عالي والدوى ع حسب جسمج يتقبل الدوى انا دوى المثروكسيت ما اقدر عليه لان 6حبات بالاسبوع وكل ما اخذهم اتعب تعب مو طبيعي من معدتي ليما غيرته لي وترى هذا الدوى الدكتوره تقول هذا الدوى يأذي 1% الي ياخذونه وهي متعجبه مني وقلت لج قصت حياتي
وما لج الا العافيه

اهلين حبيبالتي انا معاي هالمرض من 4سنوات وآخذ ميثركسات 2 حبتي كل اسبوع وكرتزون 10 ملم يوميا وبلاكنويل
والحمد لله حالتي مستقره لكن اعاني من صعوبه في التعامل مع الاشياء..

وبحاول اخذ ابرة الهيوميرا يقولون تريح ماااره وحده اخذتها وصارت تطلع الدرج طبيعي..
الله يشفينا جميع يارب

بنات ليش ماتاخذون هيوميرا ؟؟ انا مافيني حمدالله روماتويد انا فيني زياده مناعه وتسببلي قرحه واخذ هيوميرا حمدالله ارتحت
وبامريكا قالولي انه الهيوميرا ياخذونها مرضى الروماتويد بعد ترى وايد احسن من الكرتزون لانه له سايد افكت واااااايد واهمها هشاشه العضام

السلام وعليكم ما هو دواء الهوميرا هل هو للمعدة لانني مصابة بمرض الذئبة الحمراء وهو نوع من انواع الروماتيزم والادوية تؤثر على معدتي خاصة برمضان وشكرا

فعلا الكرتزون ماوراه الا السمنه وهشاشة العظام وترهل الجسم والميثروكست صلعت بسبته …والله انا ودي بالهيوميرا بس خايفه يقولون ادوية تثبيط المناعه تسبب اورام

ولكن هذا توقع بنسبه قليييييييييله جدااااا .وكثير نصحوني فيها وان مالها اثار..اصلا تعتبر نقله بعالم علاج الروماتويد ..

اختي من متى تاخذينها وشلون كلمينا عن تجربتك الله يعافيك يارب لاني اتعب وودي ارتاح وشكلي ناويه عليها…

على فكره حتى الكرتزون يثبط المناعه والهيوميرا اي صح ينزلها لاكن مو مثل الكرتزون بس عيبه مفعوله مايبين الا بعد 3 الى 6 شهور على حسب الناس
انا توني باديه فيه تقريبا من 4 شهور بس ماقدر اقولج انه نفعني لان صار معاي التهاب بالمعده من شي خارجي الدوا ماله شغل بالعكس الطبيب قالي لم توقفين الكرتزون راح ترتاحين اكثر

ماله شغل بالمعده ولا يأثر عليها اهو ابره على اسبوعين بس في بدايه الجرعه تنوخد اربع ابر بعدها باسبوع ابرتين بعدها ابره وتستمرين على الابره والله يشفي المسلمين

امي فيها هالمرض وكل اسبوع ترجع دكتورتهاوتاخذ ابره وادويه بس هم تتعب بسرعه بس لازم تاخذين دوا والا راح تزيد نسبه المرض عندج ماتشوفون شر

بنات والله العظيم اعرف وحده طابت من هلمرض والحين متشافيه عقبالكم يارب والله اني كنت اشوفها يتقطع قلبي عليها والله شالت المراره وراحت وفي دكتور قالها بمستشفى العرف انه اول ما يصير يصي ر بلكتف لحقو سوو المراره وربي يشفيكم يارب والله يشيله هلمرض من اجسامكم لاني تقطع قلبي عليكم يارب يشفيكم

غريبه …. شسم الدكتور اللي راحت له ….
أنا أول ما طلع معاي المرض رحت سويت تحاليل بالعرف والدكتور شخصلي الحاله انها التهاب بسيط ( بسيط وانا ما أقدر أحرك ايديني ورجليني ) … رديت بعد كم يوم جسمي كله متيبس …. الدكتور وجهه قام يعطي ألوان … ودق على منصور العرف علشان يعطيه اسم الدكتور عادل العوضي …. وقالي روحي طيران على عيادته ….
لما رحت طلع معاي روماتويد والتهاب في الأوتار ….
الله يشافي الكل …

أنا أخذ ابر مثتركسيف وبلاكوينيل و فلك اسد بس اتجيني ايام اتعب

خواتي المصابات ودي اسألكم عن نسبة تشوه المفاصل عندكم ووضوحه ايضاا

لان اصابع اليدين عندي متغيره عن اول بكثييييير بس موشكل ملاحظ للناس

الله يشفيناجميع يارب ياكريم انت القادر على كل شي…آآآآمين