# تجربتي مع الاغراض الي جهزتها حق ولدي #

السلام عليكم ورحمه الله وبركاته

شخباركم بنات ^_^

موضوعي هذا كتبته عن تجربه

ويتكلم بإختصار عن اهم الاغراض الي فادتني حق البيبي والاغراض الي ماكان منها فايده

هالموضوع اوجهه بالخصوص حق الامهات اليدد << كوني انا ام يديده صارلي جريب الاربع شهور والده

وانا اجهز كنت دايما ً اسأل هالشي ضروري ؟ احتاج هذا ولا لا ؟ طبعا ً كل وحده كانت ترد علي بشي والي تقولي لا تنسين تشترين هذا ويطلع اخر شي ما منه فايده

زبده الحجي اني راح احط اهم المنتجات الي حبيتها وفعلا ً استفدت منها وجم شغله ماستفدت منها

(ملاحظه: طبعا ً في اغراض تعتمد على نوع البيبي وطبيعته وفي شغلات انا ارتحت لها غيري مايرتاح لها, يعني مسأله ذوق شخصي وراي

اخليكم مع الموضوع

:::::::

(1)

أول غرض بتكلم عنه يتعلق سبوح البيبي

هذا الغرض ياني هديه ومافتحه الا اليوم << واهوا الي عطاني فكرة الموضوع لوول

عباره عن نايلون محشي بكور فلين صغار جدا ً مريح وناعم ع الطفل
طبعا ً تحطين الطفل فيه وتسبحينه وتغسلينه
وهذي صورته

صورة توضيحيه

ماعجبني كلش

ليش؟
لانه بختصار بطلته اليوم بجربه بعد ماصغر حوض السبوح على ولدي
اول شي كنت مستانسه فيه بعدين قلت لحظه وين احطه واسبحه؟؟! لوول
اول شي دخلته داخل حوض السبوح طلع صغير عليه
جان اييب طشت عود الي نغسل فيه الهدوم هم طلع صغير!
جان اقول ماكو الا احطه بالحنفيه لوول
مع انه حنفيتنا عوووده بس هم طلع صغير
يعني بالله وين احطه بالقاع واتلف الارض ماي!
جان ارده بجيسه واقطه فوق الكبت الي اجل غير مسمى
والي اتعرف تستخدمه تقولي لانه عاجبني لوول
على فكره قريت ع الجيس قلت يمكن مكتوب شي
مكتوب: Can be use in sink or tub
عاد على ما ألقى هالحوض او الحنفيه الي اتكفيه راح انزله من فوق الكبت *_^

______________________

(2)

الغرض الثاني: اسفنجه السبوح

هالاسفنجه حيل حيل فادتني
اخذتها من مذركير
طريقتها ببساطه اتحطينها بحوض السبوح واتنومين البيبي حتى لو عمره بو يوم
انا سبحت فيها ولدي من اول اسبوع
جدا ً مريحه وعملية ومرسومه على شكل البيبي
بدال لا تشيلينه واهوا صغير ولا سمح الله يزلق منج واهوا رطب خو شيلة الياهل تخرع واهوا صغير
نوميه وسبحيه وفركيه على راحتج وبس شيليه نشفيه
وغسليها بماي عن الصابون
وشريها بالمنشر << حتى اذا بتلاحظون معفسه من تحت كنت معلقتها ع المنشر
صراحه انصح فيها حيييل خاصة ً للأمهات اليدد *_^
اي صج تذكرت شغله لما شريتها امي قالتلي مامنها فايده تكووود اغراض ع الفاضي
بس لما جربتها وسبحت ولدي
قالت صراحه ياريت كانت موجوده يوم ولدتكم وايد زينه
تقول قبل كنت اشيلكم بيدي واسبحكم وجتفي يطيح
^_^

_________________________________

(3)

الغرض الثالث: جنطه البيبي

وانا حامل لاعت جبدي وانا اسأل الناس شنو احسن جنطه حق البيبي
وجم جنطه احتاج ؟
طبعا ً كنت القى اجابات مختلفة والي يقولي هذي تفيد وهذيج ماتفيد
المهم اخر شي خليت الكلام كله على صوب
وشريت جنطتين
الاولى: الجنطه الي ثلاث ترباع اليهال عندهم
البلاستيك من مذركير لووول
حطيت فيها هدوم البيبي من دلاغات وصدريات وفوط وهدوم ..الخ

مميزاتها عن تجربه:
حجمها حلو وتشيل اغراض وايد
والتقسيمه الي فوق احط فيها الصداري والدلاغات
من بلاستيك يعني اذا انكت فيها شي ماتحاتين
تتنظف بسهوله

عيوبها:
ساعات فتحتها الي فوق تنشلع اهيا تركيب خاصة ً اذا كودتي فيها اغراض واااااااايد
مليقة بالشيل ماقدر اعلقها على جتفي لووول

:::

والثانيه: اهيا جنطه المميات ومطاره الماي

وهذي من داخل

شريتها من سنتر بوينت

خامتها جدا ً حلوه
ومن داخل طبعا ً نااااايلون
عملية وتتعلق ع الجتف وخفيفه
واذا انكت فيها شي لا تحاتين تنظيفها من داخل بما انها نايلون

ملاحظه: عن تجربه اختاري الجناط الي داخلهم نايلون او جناط البلاستك احسن من لما من داخل يكون خام عشان تنظيفها يكون اسهل ومايطلع ريحه

___________________________

الغرض الرابع: طاولة التبديل
(4)

طاولة التبديل بكتب فيها شعر من كثر ماحبها
وحتى ولدي يحبها ويستانس ويضحك لما احطه فيها جنه يدري انه الحفاظه ماتتبطل الا على هالطاوله لوووووووووول
صراحه جدا ً مفيده بدال التجندس وعوار الظهر
امي شرتها لي وحق اختي
واختي ماجربتها الا بثالث بيبي ووايد ارتاحت عليها وظهرها ماعورها
صراحه انا الحين ماستغنى عنها
ولما ازور واضطر ابدل ولدي على السرير وعلى على قنفه ظهري بسررررررعه يعورني والاغراض تصير دثره ع السرير او القنفه
بس صراحه طاولة التبديل حيل فادتني والحلو فيها رف تحت اتحطين فيه الحفاظات والكريمات
وشريت معاها شغلتين علقتهم على يمينها ويسارها
الي ع اليمين وانتو بكرامه تقدرون تسوونها زباله حق الكلنكسات لي نظفتوا البيبي او البامبرز بس بصراحه ماستفدت منها لاني مو معقولة بقط البامبرز وبتسوي ريحه !
اما الستاند الثاني الي ع اليسار استفدت منه وحطيت فيه الكريمات والعطر .. الخ

_____________________________

(5)

الغرض الخامس : حامل البيبي

بصراحه توني شريتها
ومكتوب عليها ثلاث شهور وفوق
وولدي الحين اسم الله عليه بصك الاربع شهور وحطيتها فيه راسه دش داخل كبيره عليه لووول
صراحه انا كنت ابيها حق هالفتره لانه ولدي يحب الشيل والفرارررررره
فكنت بعلقه وافتر فيه بالشقه بدال لا اشيله بيدي
صراحه اذا كبر بعد ما منها فايده خلاص بيحبي وبيمشي بعدها
ما انصح فيها << حوبة ريلي كنا بسنتر بوينت ويقولي مامنها فايده لا تاخذينها وطبعا ً العناد لوووووول

____________

الغرض السادس: نبالة الدوا مادري اذا اسمها جذي او لا

صراحه جدا ً مفيده اذا بتعطينه دوا وسوالف ماي غريب وأدول
يوم كنت بالاربعين ماكنت شاريتها ولما اعطيه دوا حق بطنه اتوهق
مره اعطيه بقفشه الستكانه الصغيره
ومره اعطيه بمقطه الدوا اصب الدوا بحلجه
فيوم طلعت من الاربعين ررررركضه رحت بشتريها بس وانا احوس بالهدايا شفتها مع الهدايا
صراحه يزاها الله خير الي يابتها فكتني من الفراره

اهيا بالاساس اتيي بسيت ومعاها مقياس حراره بوطقه مامنه فايده وقفشه دوا مامنها فايده بالوقت الحالي وشفاط الخشم ماعجبني يابس لما اضغطه ومقراضة الاظافر << عندي 3 منها لوول
يعني السيت بكبره مامنه فايده الا هذي القطارة
تحتاجوووونها جدا ً

بليز بناااااااات بكمل الموضوع لحد يرد

نكمل حبيباتي

:::::

الغرض السابع: شفاطه الخشم

جدا ً فايدتني خصوصا ً البيبي صغير ومسكين خشمه يتعبه ساعات من الوصخ
فبسهوله نظفي خشمه فيها
انا شاريتها من الصيدله بس تحصلونها بالجمعيات بقسم الاطفال
الحلو انه معاها مقطتها يعني اغسلها ووقت الا احتاجها ما اضطر ارد اغسلها
فختاروا النوع الي معاه المقطه << حتى مصاصات البيبي

________________

الغرض الثامن: مادري شسمها بس الزولية الي تحطين البيبي تحتها لوول

طبعا ً هذا الغرض يعتمد على طبيعة الطفل
انا طفلي هادي الحمدلله
بس مايحبها
يعني يسكت فيها شوي وبسرعه يتملل
مافادتني

_______________

الغرض التاسع: كرسي البيبي

فايدني شوي بس ولدي يتوتر من الالعاب لوووول
فأنزلهم واهزه
بس هم بسرعه يمل
مشكلته يحب الشيل والفراره
يعني الي نفس حالة ولدي ماراح يستفيدون حيل من الكرسي وزولية الالعاب

______________

الغرض العاشر: عربانة البيبي

فايدتني حيل وحتى بالشقة انزلها لانه ولدي يسكت فيها دام السالفة فيها فراره لووووول
مفيده بالسوق تعلقين فيها جنطتج والجياس والسلة الي تحت حق جنطه البيبي
بس مو مفيده حق الاطفال العسرييين والبجاااييين والحنانين والي مايعجبهم شي لوووووووول

________________________

الغرض الحادي عشر *_^: سلة هدوم البيبي

طبعا ً سلة الهدوم اشكال وانواع

لكني صراحه شريت نوع بلاستيك وعادي
وفي انواع اتييلج غاليه ومن داخلها خام << كلها سلة ماله داعي اتقطين عليها مبلغ وقدره وبعدين الي داخلها خام احتمال اطلع ريحة خاصة ً انه اليهال هدومهم حليب وترجيع وانتو بكرامه

________________

(12) صدريات البيبي

طبعا ً اكيد مهمه وماراح اقولكم اشتروها
لكن بسوي معاكم مقارنة
وانا حامل عندي الصدريات كلها نوع واحد
وماتكتشفين اغلاط الشي الا لما تجربينه
مثال: هذي صدريتين
ثنتينهم من مذركير

طبعا َ اشتروا هذي

ولا تشترون هذي

طبعا ً الفرق بالخامة
البرتقالية خامتها من ورا نايلون

اما الثانية خام عادي

فبتالي النايلون لما البسه ياي ويصب حليب عليها من الممية وانا ارضعه ماراح يبقع على هدومه
لكن الثانيه مامنها فايده اذا صب عليها حليب بسرعه تنتلف هدومه لانها خام يعني اضطر احط عليها فوطه صغيره
فمن البدايه اشتروا الي من ورا نايلون عشان تفتكون من العبااااله

بليز بنات بكمل اخر جزء لحد يرد

اخر جزء بتكلم فيه عن منتجات العناية بالبيبي

هذي المجموعه الي استخدمها واستقريت عليها
طبعا ً منتجات البيبي ماشاء الله وايد خاصة ً جونسون مليون الف منتج لوول
اول شي البطل العود صابون شور جيل حق البيبي ريحته وايد حلوه وخفيف
طبعا ً بعدين الكريم والشامبو غني عن التعريف
وبعدين البيبي آويل وايد حلو وانا اخترت هالنوع
وطبعا ً عطر البيبي تعرفونه << لكن بتكلم عنه شوي
اول شي العطر يقمت حتى انا انقمت منه
ولما احطه حق ولدي يتمطق مسكين يدش بحلجه
مع اني احط شووووويه حيل وبس امسح على ريله مو من فوق بس هم قوية ريحته
حتى انا ادش بخشمي
فأفضل اعطر الهدوم اول بفتره بعدين البسه
واخر شي كريم البيبي عشان يحمي من التهابات الحفاظه
نصيحه بنات انا امي معودتنا عليه من اول يوم ينولد فيه البيبي
طبعا ً فيه انواع بس انا استخدم بالنسبه لي النوع الافضل هذا
حطوه على طول خاصة بالليل لما ينام الياهل وانتي نايمه, احيانا بطقها نومه 6 ساعات متواصله طبعا ً بهالفتره ماراح تقعدينه عشان تبدلين حفاظته
فدامج حاطه طبعا ً من الكريم لا تخافين عليه من الالتهابات
وفي ناس مايحطون الا لما يتلهب ويخلص ! شهالفايده منه مسكين احترق والتهب وخلص
فمن البداية اخذي احتياطاتج عن الالتهابات
احنا كبار مانتحمل الالتهابات شلون البيبي مسكين

______________

هذي السلة شاريتها من ايكيا شكلها ظريف وصففت فيها الكريمات

____________

بودرة البيبي

ويع ويع ويع ويع ويع ويع ماشتهيها
مع اني ادري وايد منكم يستخدمونها
بس اسمحولي مامنها فايده والبيبي صغير صدرة على طريف واحنا نحط هالغبره على صدره واباطه وبطنه !! << رايي الشخصي
ولما اختلاف الاذواق لبارت السلع
صراحه فايدته الوحيده حق البوزليقه لوووووووووووووووووووووووول

_
_____________

اخر شي بقول عنه

ماء النعناع من عسل العويد

جم نقطه مع حليب الياهل وبطلع الغازات الي ابطنه كله
وايد مفيد وتحصلونه بالجمعيات وحجمه اينن ينقط بالجنطه
وعملي ورخيص ومفيد << المنتج الافضل لووووول
خاصة ً لما تكونين زايره ويستعسر ولدج من بطنه ومافي مجال تسوين اعشاب وخرابيط
حطيله جم نقطه مع الحليييييب وان شاء الله الغازات كلها تطلع

^_^

هذي تجاربي البسيطه اتمنى اني افدتكم لو بشي بسيط
الي استفادت بس ابي دعوه حلوه بظهر الغيب
والي حابة تنقلة عليها بالعافيه بس تذكر اسم المنتدى << اصلا ذاكرتها ع الصور

شكرا ً على حسن المتابعه

الي اللقااااااااااااااااااااااااااااء

الله يجزاك خير

الله يخليلج اللي عندج ويحفظه لج

بصراحة شغلج حيل مرتب

وعجبتني حيل طاولة التبديل

يسلموووووووووووووووووووو

اجمعين يارب
تسلمين ع المرور حبوبه

مشكورة موضوع مفيد

الله يسلمج ويهون عليج ولادتج يارب

العفو حبوبه
الله يهون عليج

موضوووعج عجيب ومفيد خصوصن للبجريات اللي مثلي
استفدت من شغلات وايد وصاجه احنا بس نشري ونكود وبالاخير ما منهم فايده
بس بالاخير عقب ما يصير عندج تجارب تعرفين هالشي

يعطيج الف عافيه والله يوفقج ويخليلج وليدج *

يعطيج الف عافيه

يعطيج الف الف عاافيه ياقلبي

خوووش موضوع …

عسى الله يخليلج ما عطاج يارب العالمين

مع اني ام سابقه وعندي بنوته الله يحفظها والحين حامل الا اني اقوووولج

مااااااااقصرتي موضوووعج جداً مفيد 

الله يجزاج خير

استفدت وااايد

وماي النعناع اول مره اعرفه
مشكوره حبيبتي ع الموضوع الحلو وتسلم الايادي