بعد العسل

قوة بنات شلونكم؟
قاعدة اقرا المشاكل اللي بقسمكم وشلون بعض الرياييل يهينون حريمهم ويمسحون شخصيتهم وكرامتهم بالقاع
فأقول بيني وبين نفسي انا لي تزوجت ماراح اسمح يصير فيني جذي
بس بعدين اتوقع حتى البنات اللي صار فيهم جذي قالو نفس كلامي قبل ما يتزوجون
شلون جذي الزواج يضعف الحريم؟
يصير الريال اهو حياة المرة؟
واذا داسها تضحكله وتكمل المشوار
ليش اهما لهم اليد العليا؟
الحياة الزوجية شراكة مو ان واحد يستملك الثاني
وليش ليش اذا استحالت الحياة نسكت بس عشان العيال لا يعيشون مشتتين بين امهم وابوهم
مو حتى واهما مع بعض ترى كل يوم قاعد يمر عذاب
لو يفترقون احسن عالاقل ما يطيح من عينه ابوه ولا امه
روح بعيد ورد سالم
بنات مادري اذا قدرت اوضحلكم قصدي
بس ليش اول ما نتزوج كلنا احلام وردية واذا وعينا على الواقع خقينا ونسينا كل شي كنا نحلم فيه؟
يعطيكم العافية

up up

امممممممم مادري بس الوحده المفروض تحاول تحافظ على هيبتها وكلمتها واحترامها جدام زوجها
وماتخليه يغلط عليها اعتقد مبدأ العين بالعين والسن والسن والبادي اظلم زين
اذا غلط عليها تغلط عليه
ولازم اتبين له شخصيتها واحترامها من البدايه عشان يعرف حدوده

وصدقوني بنات الكلمه الطيبه والمعامله الحلوه تلين الحديد يعني لازم تكون بين البينين مره تشد ومره ترخي

و الله عجبني كلامج انا قمت ما ادش المنتدى و الله من كثر ما تلوع جبدي من هالبنات اللي ماكو شخصيه جدام الريال

و الله اهو على الوحده انها تحب نفسها و تحترم نفسها جذي الريال راح يحترمها

انا اقول لكل قاعده شواذ مثل مافي ناس جذي هم في ناس عايشين احلى عيشه محد دايس على راس الثاني
او في العكس تكون البنت اهي الي امشيته على كيفها كل واحد او شخصييييته
تقبلي مرووري

تبين الصج صح كلامج بكل اللي قلتية قبل الزواج كل وحدة تقول ما اسمح لزوجي يخوني او يغلط علي وعلى اهلي
يحترمني ويدلعي بس لما الوحدة تنصدم بالواقع سبحان الله ربي يعطيها صبر وخاصة عشان لعيال
بس المرة الشاطرة اهي اللي تقدر تمشية سييييييدة عقب وتصلح كل اللي مضايقها بدون طلاق ولا تشتيت لعيال وترد كرامتها وزيادة
واكيد سواء ريال او مرة في منهم الزين وفي الشين يعني ما نحط اللوم كلة عالريال ترى نفس الوقت في حريم مو زينين مع رياييلهم
والله يهدي كل رياييلنا قولوا امين

لا موكل الحريم جذي بس للاسف اغلبهم جذي سامحين لازواجهن بتخريب حياتهم بايدهم والريال مايحب المره الضعيفه عشان جذي يدوسها

بس انتي لاتحكمين من المنتدى كالكل في وايد ناس عايشين متفاهمين وباحلى مايمكن

حبيبتى احنا اللى يحركنا قبل التقاليد والمشاعر والاحلام هى العقيده دين الاسلامى يحث المراءه انها تطيع زوجها

واحنا نتبع الدين الاسلامى موقلبنا واحساسنا ومشاعرنا وكرامتنا

حلو الموضوع..
نفسج بعرف

لا والله مو الكل… الحمدالله انا وريلي متفاهمين وعارفين بعض ومن قبل الزواج محددين كل شي … مستحييييل اسمحله يجرحني او يمس كرامتي باسم الزواج !! لا والف لا لي شخصيتي لي احترامي ولي تربية اهلي فيني واهوا اكيد نفس الشي ..!! الله يخليه لي يارب ويرزقج باللي يستاهلج =)

اي صح ليش يسوون جذي؟

مادري انا بالنسبه الريال ماينزل روحه لو شنو اسمه ريال كرامته فوق كل شي حتى المره لها كرامه اكيد بس انا بنظري بين الزوجين ماكو كرامه مهما كان لازم واحد فيهم يضحي والاغلب المره واعليا علينا

كلامك صح
يعني كل وحده فينا تعرف طبعها عدل وتعرف شنو تحب وتكره
واكيد راسمين صوره لشريك حياتنا
لما تتزوج البنت وتشوف في شريكها عيوب تعتبر بالنسبه لها خط احمر
وتسكت !!!!!!
ليش!!!!
كلنا فينا عيوب ، بس في عيوب تغتفر وفي عيوب لأ ، صعب نمررها
ليش العيب اللي مايغتفر أمرره له مره واثنين وثلاث ؟؟؟؟
وبعدين اقعد ابكي وانطق واروح اراضيه؟؟؟؟؟

تدرين
كله بصوب ، ولما ينصحون لبسي له وكشخي له وتعطري له ؟؟؟؟؟؟
امبيه البنت تقول خايني ولا طاقني ويقولون لها اغريه !!!!!

المشاكل الزوجيه اكبر من أن نحلها بالأغراء والفراش
في حوار وفي عقل اناقشه

وبعدين ، يكون مطلع عيونها وسابها ويخونها علني
وفاضحته بالمنتدى وتقول شسوي انصحوني
مابي اتطلق عشان عيالي
ياحياتي اليهال افضل واحسن لهم يعيشون بجو هادي صحي طبيعي عند الام او الاب
احسن مايعيشون معاهم اثنينهم ويشوفون الاهانات
الطفل بيكبر يا يكره ابوه او كاره ضعف أمه
وطاعه الزوج واجب ومن الدين
بس الدين مايقول ذلوا نفسكم واهينوها عشان طاعه الزوج
الدين كرم المرأه
وجعل لها كيان ولها حقوق وعليها واجبات
معاشره بمعروف أو تسريح بإحسان

وتحياتي لك ولطرحك القيم

نفس الكلام .. يعطيكم العافية ..

عجبني وايد الموضوع والصراحه انا في بدايه زواجي قمت ارضخ لكلام زوجي او بالاصح اوامره وتعليماته بس كل مل انا اقول راي مايحترمها ولا يعطيه الاهتمام اللازم مثل ما انا اعطيه و الحمد لله اني ما عودته على انه يمسح شخصيتي قمت ابدي راي واذا ما اهتم اعامله بالمثل و شوي شوي تعدل معا والحين الحمد لله تغير وايد ، بس يمكنتغير لانه ما يحب الحنه والحنه عندي سلاح فتاك