اللي ماخذه اجازة من المجلس الطبي تفيدني؟؟

*خطوات المجلس الطبي للمعلمة الحامل*

١- تقرير طبي من مستشفى الخاص مختوم ومكتوب فيه كل شي. ( تاخذها من مستشفى المواساة – بعد فحوصات بـ ١١ دينار مختوم والاستلام بعده بـ ٣ ايام )

اليوم الأول في المنطقة التعليمية ( شغلك كله ساعه تقريبًا)

٢- في حال اذا المدرسه معطله : تروح مراقب المتوسطه بالمنطقه الاحمدي التعليمية، تأخذ منه ورقة نموذج رقم (١) و توقعهه منه ومختومه .

[ في حال اذا المدرسه مداومين :
تاخذ النموذج من المديره و تكتب الحاله و توقع .
( المراقب يوقع بدال مديرة المدرسه يعني ) ]

٣ – تروح قسم الاجازات والدوام بالمنطقة التعليمية يعطونك ورقه تحويل للمجلس الطبي . ومن ثم تروح الصادر ويحطون عليه رقم واخيراً تروح لسكرتارية المجلس الطبي .( راح يدزونها إلكترونيًا وراح يقولون لك احجز موعد عند المجلس الطبي عن طريق موعد وزارة الصحه تحط
رقم الكتاب بالموقع موجود بالورقه) .

اليوم الثاني في المجلس الطبي و مستشفى العدان.
المجلس الطبي لاااازم حجز موعد بالموقع
٤- تروح للمجلس الطبي . يطلبون بطاقة الزوج والزوجه .
( شغلك كله ساعه ونص ) افضل تجي مبكراً الساعه ٧ الصبح لان بالعاده زحمة قويه عندهم .

اولاً تاخذ رقم عند دريشه مسجل عليها الملفات ثم تسوي ختم ١٨ غرفة البريد – قسم الوارد – لان عندك نسخه انت مو الاصل .

٥- ترجع لدريشة الملفات ، يفتحون ملف جديد وتسوي الاجراءات . ( مطلوب البطاقة المدنيه للزوج والزوجه )

٦- يعطونك الملف ثم تروح غرفه ١١ او ١٢ للدكتور يكتب عليه
مستشفى العدان ، لجنه من أطباء النساء والولاده ، تقرير + توصيه .
٧ – تروح غرفه ٢ – طباعة اللجان الطبيه . يعطيك اورقه لمستشفى العدان .

٨-ترجع غرفه ١١ او ١٢ اللي دشيتهه للدكتور يختم عليه ويعطيك الورقه تروح فيهه للعدان

٩ – مستشفى العدان ( شغلك بالعدان ١٠ دقايق بس ) – تروح عند قاعة اللجان الطبيه- قسم النساء والولاده يبون صوره من التقرير و البطاقة المدنيه للحامل وايضاً يبون طابع دينارين ( فيه مصور بالعدان عند الباب الرئيسي ) راح يعطونك موعد بعد اسبوع .

يوم اللجنه الطبيه ( موعد اللجنه ) :
لازم يكون معاك سونار
١٠- تدش الحامل اللجنه و يقول له تعال بعد ١٠ تستلم قرار
صادر ( طبعًا ماشافوا التقرير و لا السونار ) .

مستشفى العدان ( فقط لاستلام رقم الصادر ) :
١١- جيت ادارة مستشفى العدان بعد ١١ يوم وقالو لي عطيناك ٨ اسابيع و ما اخلصت ورقة ? الصادر ، تعال لنا بعد يومين ، دقو علي بنفس اليوم و قالو لي رقم الصادر : 999

المجلس الطبي ( لازم حجز موعد عن طريق الموقع ):
زحمه المجلس الطبي يفضل تجي مبكراً
١٢- تروح المجلس الطبي وتاخذ رقم عند دريشة الملفات اولاً
ثم تروح عند الوارد دريشه رقم ١٨ تقول لهم عندي قرار صادر ، راح يعطونك اورقه مسجل فيه ( العدان / ولاده تاريخ /2/2 )
١٣- تروح للملفات وانت عندك رقمك معاك ، راح يعطونك ملفك و اورقه فييه نتيجة اللجنه مكتوب عليه اجازه مرضية ٨ اسابيع
١٤- تروح فييه الدكتور – غرفه رقم ١١ يكتب عليه الدكتور .
١٥- ثم تروح فييه طباعة اللجان الطبيه – غرفه رقم ٢
راح يعطونك اورقه حق اللجنه الجايه
١٦- تروح فييه عند الدكتور – غرفه ١١ راح يوقع علييه
١٧- ترجع للطباعة – غرفه ٢ يعطونك ورقة اللجنه الجايه وتسلم لهم الملف ، تروح للعدان – قاعد اللجان النساء قسم النساء والولاده ومعاك ورقة اللجنه الجايه وتاخذ موعد . وتكون خالص الان .

ادعو لي و لزوجتي بالتوفيق والله يرزقنا ويرزقكم يارب العالمين.
اخوكم / محمد العازمي

* تنويه مهم : لازم تحجز موعد قبل انتهاء مدة المجلس الطبي ، بحيث تكون لجنه الجديده بعد انتهاء اللجنه القديمه مباشرة