الريال البارد بلييييز لاصحاب الخبره

شلونكم حبايبي انا عندي مشكله اعتبرها لانها تمثل اختلاف بالاطباع بيني وبين خطيبي طبعا اهو باااارد وعصبي داخليا وغيور ومثل ما انتو عارفين الريال الكويتي وحركاته النص كم المهم وانا هاديه وعصبيه بنفس الوقت واللي يزيدني اعصاب بروده يعني اتوقع منه الغير متوقع فاعصب عليه
انه هالريال لما يسوي شي غلط ولا كأنه مسوي شي يعني يكشت فيني ويدق عقب هلا حياتي هلا حبيبتي وانا طبعا اكون محترقه وبتهاوش معاه بس الاقيه شاق الحلج ويسولفولا جنه مسوي سواد وجهه والله ابي اعرف شلون يفكر ماني قادره لدرجة اني اقوله انت بتدخلني مصح نفسي

يعني اذا انا سويت غلط عصب وصرخ وحالته حاله لكن لما اهوا يسوي الغلط داايما يصغره ويعتبر نفسه مو مسوي شي ابدا ولا يقولي مثلا انا اسفه حبيبتي كان عندي ظرف او لهيت عنج يعني يقولي ادري مقصر معاج وجذيه لكن لما انا اقوله بطريقه دبلوماسيه انه مقصر معاي واهو طبعه مهمل بارد الشغل يخلصه عقب سنه عادي يعني دايما يسوف الامور وعاد اخذي من وعود بلفور اللي مالها نهاية احلام اليقظه ماشاءالله انا وصلت القمر ورديت من احلامه وكلها ماتحققت لووووول والله ماقدر ازعل منه ذكي مايخليلي مجال ازعل كله يقولي هدي اعصابج الدنيا ماتسوى شفيج علي ويسويني اني انا الغوله المفتريه واهو المظلوم بالله شسوي معاه قولولي اطنشه واعامله مثل مايعاملني؟؟؟ بس يا بنات والله الوحده تحتر يعني لازم تنفس شوي عن غضبها مو معقوله بس بكتم وبسكت وبتقولولي قولي باسلوب حلو قلت باسلوب حلو لكن دخل من هني ويطلع من هناك عااادي وانا بالنهايه اسكت لانه مايعطيني مجال اتهاوش بس اقعد اتحلطم بروحي وتالي اطخ احس اني عيوز مع اني احب الحياة والفرفشه والهدوء وماحب الزعل لكن الله يسامحه عفس مزاجي فوق تحت احس احد مسلطه علي بس والله انه اهو غرييييب شويه عليه يحس بغلطته بس مايبين لج عشان ماتاكلينه بقشوره يمه منهم هالرياييل كل يوم طالعين لنا بفنتق جديد

مادري انا ما اشوفها مشكله ولا شي ..عادي وايد رياييل جذيه ..فيهم برود ..انا ريلي قالب ثلج بكل امور حياته ومليت وانا احاول اعدله لين تعبت ومثل ما قلتي بالنهايه انا اللي نفسي خايسه ومو زينه وما اتحمل ..شنو بتسوين ؟؟ولا شي
ما راح تقدرين تغيرين طبعه ولا تحاولين ..والحل انك تاخذين الامور بهداوه وطوله بال وطنشي ..طنشي على قد ما تقدرين والا بتموتين من القهر وبتييك امراض نفسيه وضغط وقولون ..
والشغل اللي يسويه يسويه واللي ما يسويه بسبب بروده عطيه طاف ..ماكو حل مو سهل تغيرين اطباع الواحد عايش عليها سنيين طويله ..يوبا ارضي باللي عندك ..وان طاعك الزمن والا طيعه ..

صاجه والله حبيتبي الله يهدي بالج ويهديهم لنا يارب على قولتج ان طاعك الزمن مشكوووووووره قلبو

ما شفتي شي كلهم جذي يسوون البلوة ويردون يسولفون ولا جنه في شي يعني هذي طريقة المراضاة عندهم لووووول طاف عادي ياما بتشوفين

اهااااا يعني يدارون على سواد وجييهم انزين وانتو تسولفون عادي معاهم ؟ والا مادين البوز مثل حلاتي عاد انا لو اني اسكت بس لازم مزاح ورمي رماح الطشه بكلمة ابعص فيها مزاجه وتنقلب السالفه علي واهو اللي يزعل لووووووول النصاب

الله يعينج عليه

دانة الدنيا هذا وانم ليما الحين ما تزوجتوا عيل بعد الزواج شلون

نفس حالتج على قولة الهنود سيم سيم احس انه سااحرني بكلامه الحلو

انا اي شىء يقولي كلام حلو بسرعه اطخ حتى لووو كنت معصبه اتهااوش معاه بسرعه اطخ

الله يسخر قلبه لي يارب

الله يسخركم حق بعض