الرضاعة الطبيعية و الشغل

بنات انا ارضع بنتي طبيعي (ما شاء الله عمرها 9 شهور) .. و ما تاكل غير فواكه و بسكوت و تشرب شاي بابونج (ماركة ميلوبا) و تكره الحليب الصناعي ،، آنا برجع الدوام إن شاء الله بعد شهرين و دوامي تقريباً 6 ساعات و آنا ناويه أدخلها حضانة ..
سؤالي بنات .. عادي لو بنتي ظلت بالحضانه بدون حليب وقت دوامي ؟

سؤالي الثاني .. شلون اقدر اقطع الرضاعة الطبيعية بس بدون ما بنتي تبجي ؟ لأني جربت وايد أشياء مثلاً شفطت لها بس ما حبته
جربت أغير نوع الحليب الصناعي (S26 و Nan ) ،، بس ما حبتهم
جربت لما كان عمرها 4 شهور اقطع الرضاعة الطبيعية مره وحدة بس بجت وايد و ظلت تقريبا 7 ساعات بدون ما تشرب حليب ! كانت تبجي و تنام و انا تعبت نفسيتي و رجعت رضعتها

يا ريت تساعدوني بنات و الله يعطيكم العافية

ما اعتقد ينفع تتركيها 6 ساعات بدون رضاعة وأكيد البنات بيفيدوكي اكثر

ياقلبي …….الله يعينج ويعيني نفس الوضع

والخطا منااااااا ماعودناهم ع الرضاعة الصناعية لوقت الدوام والشغل

انا بنتي عمرها 3 شهوووور وبادية ترفض الصناعي الله يستر …

ان شاء الله البنات يفيدوناااااا

حبيبتي

اخذي من دوامج ساعتين للرضاعه ..؟

حبيبتي انتي مو غلطانه انج علمتيها علي الحليب الطبيعي بالعكس الله يعطيج العافيه ويجزاج خير واذا علي الدوام أخذي ساعة رضاعه من حقج محد راح يعرضها عليج انتي طالبي فيها وشي ثاني بنتج عندج تتدلع بس بالحضانه راح تجوع وتشرب اما شفطي لها او خليهم يعطونها صناعي أنا ولدي كان يأكل وهو يلعب ما يأكل عادي اول شي اشتكوا منه الحضانه مو راضي يأكل وبعدين هم علموه علي طريقتهم مع الوقت .

حبيبتي احسن شي الرضاعه الطبيعيه والله راح يجزاكي خير عليها انا ما اشوف ان الام تصير حق ام غير لما ترضع ابنها وشوفي حبيبتي الطريقه هي تجيبي شفاط من الصيدليه اما اليدوي او الكهربا واليدوي رخيص وسهل استخدامه ما اشاء الله بنتك كبيره من 6 شهور ممكن تستخدم الكوب اذا ما كانت تاخد البيبرونه عطيها بالكوب وطريقه حفظ اللبن سهل شوفي عصري صدرك قبل لا تنامي وحطيه في الثلاجه في الرف الي تحطين فيه الماي وبنتك اول ما تصحين الصبح رضعيها من صدرك ولما تروح الحضانه علمي الي راح ترافجها هناك ان لما تجوع تجيب ماي سخنه في طبق وتحط فيها الكوب او الببرونه وتعطيها ولازم شوي تزودين الاكل يعني وين الدجاج واللحم والخضار وما تفطميها غير بعد السنه ونص حرام عليج حليب الام يفضل في عظم الانسان لين يصير شايب هو الي ينفعه في موضوع انا كتبته عن الاكل عنوانه اكلات منوعه للطفال من 6 شهور لسنه اخدي وصفات وطبقيها وسويلها هاي الوجبات مع الحليب وخليهم يوكلونها بالحضانه الله يحفظها لك

مشكورين بنات على ردودكم اللي تبرد القلب
ان شاء الله بقدم على ساعة الرضاعة
و ان شاء الله بنتي ما تتدلع بالحضانة و تشرب الحليب

شي وايد حلو انج ماعلمتيها عالصناعي

انتي قبل لا تودينها الحضانه رضعيها

واسم الله عليها 9 شهور يعني تاكل و اكيد رضعاتها اقل من البيبي الصغير

يعني بالحضانه اكيد بتاكل

واذا تبين توقفين الرضاعه خليها ترضع بس حزت النوم و الاوقات العاديه عطيها اكل

ترا الحين جسمها يحتاج العناصر الغذائيه اللي بالاكل لانه حليبج مو كافي انه يمدها بكل شي

انا ولدي رضعته سنه ونص بس من كمل 6 شهور بديت اوكله و خليت الرضاعه تقل شوي شوي و بعدين خليتها بس حزه النوم ..

لين خلاص صار ينام بدون رضعه