استفتــــــــــاء يا أبلات : ايهم افضل تدريس البنات او الاولاد ؟ تجاربكم ؟

صباح الخير ابلاتي العزيزات >>>> عبالها ناظره

عندي استفسار واستفتاء عن الفرق بين تدريس البنات وتدريس الصبيان ""المرحلة الابتدائية طبعا"""

ايهم احسن من ناحية :

التدريس…

التقادير….

"الاعمال الاضافية" .. يعني ايهما المتعب اكثر من الآخر ….

شاركونا تجاربكم … واللي جربت البنات والصبيان هم تقول لنا شنو الفرق

فـــــد يــــــتكــــــم

انا ما جربت الصبيان ولا افكر اجربهم , احنا البنات ويالله نقدر عليهم وانا اصوت للبنات الطف الكائنات

ماعندي فكره >>>بس رفيجتي بمدرسه اصبيااان تقول راحه ووناسه احسن من البنات اللي فيها تشدد لان اهيا قبل كانت بمدرسه بنات بس جربت وشافت الفرق

ماجربت الصبيان .. بس يقولون مدارسهم افضل ,, يعني مافيها ذاك التشدد. بس بس البنات غير طبعا

من ناحية الانضباط والالتزام بالدراسه والهدوء اكيد البنات

ومن ناحية عدم التشدد على امور التوجيه والاداره اكيد الصبيان فانتي شنو اهم عندج منضبطه بالاداره وتفتنق بالوسائل والتوجيه متشدد

ولا مرتاحه من هالناحيه نوعا ما بس مستوى الطلاب مش ولابد ومو اي شي تطلبينه يسوونه وشطااااانه وددوخة راس على حسب اختيارج انتي

انا ادرس صبيان و اقولج اذا عندج القدرات الي تؤهلج لتدريس الجنس الدفش و الخشن
انضمي لنا و اذا ما عندج خلج على البنات

و اللي ايده بالنار زي حلاتي اقولج البنات ابرك بمليون مره

فقدت انوووثتي من الصبيااان

بس صراحه الصبيان يهبلووون فيهم ذكاااء وأونس من البنات الحصه تمر بسرعه

مو نفس البنات بليدات

هذا بالنسبه للطلبه والطالبات نفسهم

اما الاداره والتوجيه

توجيه الصبيااان مو متشدد ويمشووون ويطوفوون وكل ما يجي الموجه يقعد بس يشكر فيج لانج زين ادرسينهم وبالج طويل معاهم

والا توجيه البناااات يدقق على كل شي ومتشدد وينقد من وإلى

وبالنهايه يعتمد على شخصية المعلمه وطريقة تعاملها
الصبيان يحتاجووون حركه وشغل اكثر من البنات والسبه ازعاجهم ودووختهم

والبنت بس اتخزينها تسكت من الخووف

والا الولد لو عيونج اطيح بحضنه من كثر ما تخزين ما يسكت ولا همه

بدوره:

اي والله البنات ماكو احلا منهم

عجينه

اي والله الصبيان اريح ماكو كراف

ذا دول

اي والله البنات افضل

طواني الهم

التشدد منو يبيه ؟؟ والله البنات توجيههم غثيث وادارتهم متشدده هذا غير الطلبات والحفلات والمعارض والدروس وورش العمل اللي ماتخلص

اما الصبيان يقولو حصتج وبس

رشيقه

الله يعينكم على الصبيان بس نار وحده ابرك من نارين يعني انتو نار التدريس بس لان الصبيان التعامل معاهم صعب … اما البنات نارين نار التدريس والتعب وكل حصه لازم تكون نموذجية … وونار التشدد والتدقيق اللي عالطاله والنازله … ونار الكراف اللي ماله علاقه بتطوير التدريس مثل الحفلات والمعارض والدروس النموذجية وورش العمل والمسابقات و و و و … الله يعين

نماري

والله كلامج ميه ميه … كفيتي ووفيتي ….

مروركم شرفني يا احلا كويتيات

مدارس الصبيان ما فيها ذاك التشدد لان المعلمة تطلع روحها من الصبيان غير الالفاظ البذيئة اللي تسمعينها من الاولاد او الابلات واهم يسبون الصبيان
يعني شي والله مو طبيعي
لاتنسي المشاكل اللي يسببونها الاولاد على طول اليوم
يعني انا من الابلات اللي حاشني طق من الصبيان من غير قصد يعني اثنين يتهاوشون لما تحاولين انك تفكين التشابك اكيد راح يحوشك طق:
بس الشي الحلو ان الادارة تكون متسامحه طبعا يختلف من مدرسة لاخرى

ميمو

والله انج صاااااجه

ومشكووووره حبيبتي على تواجدك الكريم

مس قولدن

شكوووو داشه بين الهوشه ؟؟ الله يستر عليج اليوم زرار قميصج باجر مايندرا شنو ….

لا خليج بعيده وعندي اقتراح اذا صارت هوشه خلي صبيان خامس او الصبيان اللي بالصف يتدخلون انتي خليج بعيييييييييييييييييييييييد

ماجربت الصبيان .. بس البنات وايد أحسن لأنهم أهدى ويسمعون الكلام ويحبون الدراسة وحريصين على الواجبات

انا جربت الاثنين ..

الراحه في الحصه والهدوء طبعا مع البنات ..
بس البنات دلع .. واذا هاوشتيها باي شي تشيل في قلبها ..
ويمكن تكرهج ..
التوجيه أصعب .. ويحتاج ابداع اكثر .. ويوقفلج على كل شي

الصبيان ..
أنوثتج ترووح
صوتج .. اعصابج .. طاقتج ..
بس الصبيان أذكى .. وشقرديه .. ويبيضون وجهج اذا حضر لج زائر ..
يعني من النوع اللي ما يستحون ..
بعدين الصبي عمره ما يشيل بقلبه عليج ..
يعني مرات تعصبين عليه .. وتهاوشينه بالحصه ..
اخر الحصه يجي يركض يبي يساعدج .. ويشيل معاج ..
بعدين التوجيه والاداره أخف .. يعني مافيه تدقيق .. واي مجهود تشكرين عليه ..
لان فرق واضح بين تدريس الصبيان والبنات ..
حتى الموجهين يعرفون عدل ..

مرة كنا في اجتماع التوجيه ..
والموجه الاول قاعد يشرح شغله .. فـ قامت الابله .. وقالت هذه شي سهل الطلبه يسوونه في يوم
قالها انتي في اي مدرسه .. قالت مدرسه ….. بنات ..
قالها لما تصيرين في مدرسه صبيان أتحداج تقدرين تسوينه في اسبوع
يعني هم نفسهم عارفين ومقدرين ..

بس انا احب الصبيان أساسا ..
شقرديه .. واذكياء .. وأشطر ..
وحاليا ما افكر انقل .. حتى لو أنقل .. أنقل لـ صبيان ..
تعودت خلاص ..