إكتئاب الزواج

السلام عليكم

مادري ليش أحس ان حياتي تنتهي مع الزواج ..

دايم يراودني هالاحساس ، وأحس ان بعد العرس ماراح يبقى شي انتظره ..

راح أكبر فجأة ، راح أعجز فجأة ، وافقد الدهشة بحياتي ، وما يبقى شي انتظره ..

مادري ليش هالاحساس معاي ، كل يوم ابجي وحالتي حالة ،

احس بعد الوناسة مالت التجهيز ، وبعد وناسة اسبوع .. او شهر بعد العرس

تبدا المسؤوليات تقص ظهري ، وابدا اتعب من المشاكل ..

امانةً انا انخطبت وبعد جم يوم املج وللحين هالاحساس مأذيني ،

عزيزتي المتزوجة .. تحسين حياتج الحلوة انتهت ؟ تحسين ماكو شي يستاهل بعد ؟

تحسين انج كبرتي حيل من تزوجتي وصرتي ولا شي مجرد زوجة وبس ؟

ادري اني قاعدة اهذري .. هههه بس جد تعبت نفسياً من هالتفكير كأني باموت مو باتزوج

تعوذي من ابليس

السالفة كلها من مخج وانتي شلون تجوفين الموضوع

المسؤولية صعبة اي نعم وبتحسين بضيقة في البداية وبتحسين روحج ندمانة ومتحسفة بس هالكلام فترة بسيطة ..عليج انتي شلون تتعاملين مع الموضوع

إذا بتجوفين حياتج ما تسوى عقب الزواج ..متزوجة ليش؟؟!!!!!!

( الاكتئاب بعد الزواج ) مثل ما سميته ممكن يصير بس فترة وتعدي وانتي حطي في بالج الافكار الحلوة قولي حق روحج انا اسوي هالشي عشاني انا شخصيا لأني آبي

يعي في الأول وفي الأخير الموضوع في يدج انتي اللي تتحكمين فيه

انا كنت مثلج اقول حياتي بتنتهي بس اتزوج ومافي شي انتظره و بتبتدي المشاكل و عوار الراس و اليهال و طباخ و نفاخ
الحياة الزوجية رغم المشاكل و المسؤوليات و عوار الراس ماتقدرين تعيشين بدونها بيكون زوجج نصفج الثاني اللي ماتقدرين تستغنين عنه
حياة ثانية مملكتج بيتج ماتقدرين تبتعدين عنها عندج ريال تعيشين عشانه تسوين كل شي حلو و كل شي سنع عشان خاطر عيونه و عشان خاطرج خلج معتدلة بكل شي لا تظلمين روحج ولا تظلمين ريلج و الحياة الزوجية ترى حليوة فيها الدفئ فيها الحنان فيها الحب و فيها الدموع و فيها الصياح وفيها الهواش بس ترى كل شي سلبي ملح الحياة
حاولي قد ماتقدرين لا تقراين مشاكل المتزوجين ولا تتاثرين بمشاكل احد و اطبقينها عليج خلج مستقلة بتفكيرج و نفسج و روحج
ترى الحياة الزوجية حلوة بس انتي صيري شاطرة و ظبطيها و الله يوفقج حبيبتي و يبارك لج يعلها زواجة الدهر يارب

ياليتني اتزوج والله ماندم

تعوذي من ابليس

بالعكس الزواج ستر حق البنت
واذا انتي و ريلج متفاهمين ماراح المسؤولية تقص ظهرج ولا تحسين بشئ
الحياة الزوجية استقرار وراحة تحسين نفسج بظهر ريال مسؤول عنج يحميج

اللي ماتتزوج تقول اكتئبت كل البنات تزوجو وانا خست ببيتنا لاعت جبدي
بس تملج تقول مالي خلق مسؤوليات وعوار راس حدي مكتئبه مو مستعده
الله يعين الجميع

هذا شعورج ايلج لانج بتعيشين حياة يديده بالعكس لما تتزوجين حياتج بتجدد

قعدتي عزوبيه طلعات وروحات وسهر انزين وبعدين !!؟؟؟

تتزوجين تعيشين حياتج تييبين عيال عيالج يكبرون هالشي حلووو وبتحسين بمتعنه

طبعا لما تتزوجين لازم تذوقين الحلو والمر طبيعي بس اهم شي تدعين بكل صلاتج بالتوفيق وان زوجج يكون رجل صالح وتيلج ذريه صالحه

شكراً خواتي كلامكم عطاني امل شوي

يعطيكم العافيه

انا وحدة متزوجة من سنة ونص

اول سنه كانت خياليه رومنسيه وحب وغزل حتي زوجي مايكون معاي الا ضامني

حبيت الزواج مرررره لوووول

بس الحين خلاص تعودنا علي بعض

وتعود علي

حتي الزوج يتعود علي جمال مرته وكشختها وريحتها وكل شي

في رومنسيه وفله ووناسه الحين بس مو وايد مثل اول سنه

وتبين الصراحه هالشي يعتمد عليج

الزوجه المفروض تصير فرفوشيه وتعطي زوجها المشاعر والحب والحنان

بصراحه انا اكتشفت اني ماقدر اعطيه الا اذا عطاني

وهذا عيب فيني

الله يصلح الاحوال

وتصيرين احسن مني

وترا الزواج حلو اذا كانت نظرتج للحياه حلوة

الف مبروك ياحلوه وهالافكار من الخوف بس انتي خايفه من بكرا
كلام كلي دلع حلو وفعلا الحياه مافيها راحه

فكري ب ايجابيه والحياه حلوه لاتقعدين تشوفين الحياه بطريقه سوداويه بالعكس حلو احساس الامومه حلو لما تحسين في شيء بالدنيا انتي سبب وجوده ترا هذي نعمه ولها لذه واحساس محد يحس فيه الا الي جربة

لايغرك سوالف المتزوجات فيه مشاكل بس اغلبهم تهول وقت الزعل وبعدين تلاقينها تمدددح فيه

لان هم روح وحده وقلب واحد ان تزاعلو بيوم تراضو ثاني يوم

مدامك فتره خطوبه استمتعي ب فترتك وتدلعي وانبسطي عيشي اللحظه ولا توسوسين

بالعكس الزواج بدايه حياه انتي تخططينها وتبنينها مع شريكك وهذا بحد ذاته شيء جميل

يلا ي ستي ربي يوفقك و يرزقنا من فضله ولاتنسين فرحينا لما يتم كل شيء

هذي سنة الحياة يعني بتقعدين لي متى ؟

الزواج إذا شلتي مسئولياتج و ارتبطتي برجال صالح وكفو بيكون تغيير للأحسن صح بتكونين مسئوله عن بيت وزوج وبتكون العين عليج حتى جدام حمولتج يعني مو مثل وضعج ببيت أهلج

بسم الله تـــــو مــــا تزوجـــتي تفكـــيرين
وبعدين ابـــفهم ليـــــش هالـخوف هـــذا؟؟؟؟
مو زيـــــن علــــــيج التشاؤم والهم بـــعدج عالمــــركب

اذا تفكيرك كذآ عن الزواج ، أجل كيف وافقتي على الرجال !!!

آصلا كيف تحسين بإكتئاب الزواج وانتي ماجربتيه ، كلمة ( إكتئاب الزواج ) تنقآل إذا تزوجتي وحسيتي بإكتئاب بعدهآ ..

حآولي مآتسمعين لـمشاكل آلي حولك ، لأن واضح أنك متأثره كثيير فيهم ..

و الزوآج حـلو و حيآة جديدة .. لاتكون نظرتك سوداوية ..

الله يبعد عنك الآكتئآب و يسهل أمورك ..