|
|
السلام عليكم
شخباركم بناااااااااات، اتولهت عليكم وايد وايد 
الحمدلله، حبيت ابلغكم اني ربيت ويبت احمد فديته يوم الاحد 11 اكتوبر، مع اني المفروض في نوفمبر بس الحمدلله على كل حال
طبعا انا مسويه عملية ربط عنق الرحم بحملي هذا من الشهر الرابع، واحمد فديته منعني من اشياء وايد اسويها، منعني من الدوام 3 شهور، منعني من الصيام، منعني من الطلعة من البيت، بس الواحد يوم يشوف ضناه في حضنه يقول الحمدلله على هالنعمة وينسى كل شي
طبعا انا يوم الاحد الصبح يتني الام متابعه كل 15 دقيق تقريبا، واوهمت نفسي ان هذا طلق كاذب، لاني ما اريد اولد بالثامن، طبعا كنت 34 اسبوع ويومين بالضبط، ويوم شفت الالام ورا بعض قلت لااا، السالفه جد 
خلني الحق على عمري قبل لا يطلع بالبيت خخخخخخخخ
المهم، كان يومها ريلي طبعا مسافر، ومحد عندي غير اختي المقرودة اللي ما ادري ليش يالسه عندي بالبيت، لا تعرف اتسوق ولا شي .gif "Eh S(16)")
، المهم، قلت ما بتصل باخوي لانه بالدوام وحرام اطلعه من دوامه، والثاني بعد اتصلت فيه وقالي بعد نص ساعه يمكن اييج، وانا ما فيني اتريه نص ساعه، لاني كنت واايد زايغه من الوضع كله
المهم قلت محد عندي غير ابويه وامايه، اتصلت في الوالدة وقلتلها وين انتي قالت انا جريب شقتج ب5 دقايق، سبحان الله 
معقولة قلب الام يحس جي؟؟؟ المهم قلتلها شو يايبنج عندي قالت حسيت انج محتايتني وقلت بييج
قلت لها لا تنزلين من السيارة انا يايتنج الحين خخخخخخخخ 
لاني اريد اروح المستشفى
المهم انا رحت المستشفى عشان اسوي تخطيط وادعي اني ما اولد حزتها، يوم وصلت المستشفى، الالام صارت اتي كل 10 دقايق، دخلت عند الدكتورة وفحصتني الله يغربل ابليسها الفحص اللي يلوع الجبد وقالت الخيط مكانه والعملية اوكي بس فيج الاك طلق، المهم قالتلي على طول عنبر الولادة، انا اهني سويتها بعمري خخخخخخخخ 
وبس دخلت عنبر الولادة صار الطلق اييني كل 7 دقايق ، وهذا كله من الخووووف
المهم، يوني 4 دكاترة وشافوني وقالوا لازم نفتح الخيط لانهم خايفين ان البيبي يضغط اكثر ويصير تمزق بعنق الرحم، وانا اتحرى ان فتح الخيط عملية سهله، ما ادري انها ولادة قبل الولادة، المهم قالولي يالله اخذي الكمام وحطيه ونحن بنفتح الخيط، عاااد انا اهني الف سؤال وسؤال، كيف بتفتحونه وشوو بتسووون وشو اسوي لين ما حسيت الدكاترة ودهم يصفعوني من كثر الاسئلة خخخخخخخخخخ
طبعا انا خذا الكمام من اهني وما حسيت الا جنها عملية ولادة اولى، الله المستعان، والله ان روحي كانت بتظهر مني، لااا وبعد هذا كله طلعوا الخيط ويقولونلي شوفيه، جنها مسرحية، مستانسين الحبايب اونهم عااد انجااز خخخخخخ
المهم، فتحوا الخيط من اهني وانا انفتح عندي عنق الرحم بسرعه من الصوب الثاني، وطبعا بدا الطلق يلعب معاي عدل وكل 5 دقايق ، وانا طبعا على راسي واقفين الوالدة واخواتي الثنتين، وشوي شوي اييني طلق كل دقيقتين، عااد انا اهني ما اشوف حد جدامي، لااا، وفي نص الطلق اقولهم خاطري بدوناااااات خخخخخخخخخخخخخخخ صدق متفيجة، ويضحكون علي وارد اصيح من الطلق مره ثانيه
طبعا الطلق هذا وايد غير عن حمالاتي القبلية، كل الويع احسه تحت وتكرمون من ورا، يعني ضاغط علي من ورا بشكل فظيع، والله ما كملت وايد الا وصار عنق الرحم 9 سنتيمتر حتى الدكتورة ما حست انه بيطلع البيبي فجأة، طبعا اول شي انفجر الماي بشكل فظيع مع صوت، انا اخترعت منه واتحريت الياهل طلع، ما كملت 10 دقايق الا والبيبي طلع وراه على طووول، والله انه ولادته اسهل من الخيط اللي طلعوه الله يغربل ابليسهم
طلع البيبي وطبعا اختي قصت الحبل السري، تتحرى حفلة الحبيبة خخخخخخخخخخ، وشلوا البيبي على طول الحضانه لانه يعتبر قاصر ، بس الحمدلله ما كان يحتاي اي نوع من الادوية، بس مجرد رعاية، وطبعا على اخر يومين طلعله بوصفار، وحطوه تحت الاضاءة الزرقة، بس الحمدلله، اليوم ظهرت من المستشفى ورديت لبيتي وعيالي مع حموووودي اللي طلعلي قرون فديته خخخخخخخخ
على قولة الوالدة واخواتي، والله اذا ولدج كبر وقالج بس كلمة "أف" او رفع صوته عليج بنضربه ضرب لين ما يقول بس، اونه هذا المفروض يحب ريولج وايدج على التعب اللي تعبج خخخخخخخخخخخخخ
وهذي كلها قصة ولادتي، واتمنى ان الكل تكون ولادته سهله يا رب، واخص تجمعنا تجمع نوفمبر، يارب تسهل على كل وحده ولادتها يا رب وتكون ولادتهم طبيعية يا رب
الحين حمووودي بخير فديته بس شوي صغيرووون، يعني الثياب اللي خذتها له ضايع فيها كلها خخخخخخخخ، ادعوا له بنات انه يكبر ويصير وزنه اوكي ويشرب عدل، لانه ينننني، كله يرضع شوي وينام واااايد، يعني شوي كسووول
الحمدلله على تمام النعمه وعلى هالرزقة يا رب
والله يخليلج ايااه ان شاءالله
اهم شي سلامتج انتي و احمداني ربي يبلغج فيه و يجعله من الذريه الصالحه
عاد عسى دعيتيلنا وقت الطلق
ويتربى بعزج انشالله والله يجعله من الابناء البارين الصالحين قولي امين