أسوق السياره أو أطنش

اشلونكم بنات كويتيات .. شخباركم …

في موضوع شاغلني من فترة وأبي رايكم فيه ..

ساكنه ببيت الحموله و فيه سايق واحد وخالتي وحمواتي ومرت حماي مقطعينه ومحللين معاشه ع دوامات ومشاويير وجمعيه وصيدليه..

فمافي مجال يكون لي دور بهالعفسه فقررت أسوق سياره عشان أشيل نفسي وما أسمع منه من أحد مع العلم ان وحده من البنات

متزوجه وتسوق سياره وكل ما تجي البيت سووها مطراش خالتي أو البنات (أمشي بنروح مشغل) – (بنروح السوق) –

(ودينا الصيدلية) واهي قامت تخفف من جياتها لأهلها من كثر ما لاعت جبدها.. !!!

بس قاعده أفكر لو سقت بيلوعون جبدي ما أفتك من حنتهم وينشبون فيني ع الطالعه والنازله وما أقدر أطلع ع راحتي

وان ماعطيتهم ريج حلو ع هالسالفه بيقولون اشفيها تغيرت بعد ما ساقت السياره … والله اني محتاره..

اشرايكم بنات يسوى أسوق أو أطنش وأتم مع المعمعه .. ؟؟؟

.

.

.

ساعديهم بالاشغال عادي ممم بس الزم ماعليج شغلج واهلج – اهم شي يعني

حبيبتي مالهم شغل فيج

خلاص هذي سيارتج مالهم حق يأمرون عليج اهم مو شارينج وبعدين اهم عندهم سايق يعني ماراح يحتاجونج

وما يمنع انج تساعدين بوقت الحاجه

سوقي وخلي نفسج طيبه عليهم وعطيهم ريج حلو

اذا كنتي بتروحين مكان واهم طلبو شغله تعذري باسلوب حلو >> اكيد بيقولون شدعوه شطالبين بس حطي مني وطلعي من الاذن الثانيه
ومره على مره ماراح يطلبون

بقولج سالفه بنت خالتي ما تبي تسوق تخاف تصير مطرااااش

وقعدت اربع سنين ما ساقت والسبه هالشغله معنا عندهم سايق وعقب هالاربع سنين قررت تسوق وتخيلي انحاش السايق

وصارت حالتها كسييييييفه

دايما خلي نيتج صافيه

حبيبتي سوووقي و لا تشلين همهم

انتي مهما كان مو بنتهم و ماراح يتحكمون فيج

والسواقة بتفكج من منة خلق الله

و قولي لهم من الول ان زوجج مانعج من التمشور و الطلعات اللي مو ضرورية … قطيها نغزة بس حتى لو مو صج

و بس

سوقي وقولي انا حدي من البيت للدوام اوبيت اهلي ماقدر اطلع في الشوارع زحمه واخاف ليما يملون منج لاتتعودين على السالفه هذي
انا بنت عمي تبهذلت اخر تبهذل من ام زوجها بسبة السواقه نصيحه لو يزعلون عادي اهم شي راحتج

معاها

من وجهه نظري ان السواقه مهمه
ساعات تحتاجين تروحين مكان ضروري وماتلقين احد يوديج
سوقي بس قوليلهم انج سايقه بس عشان تطلعين للضروريات
وساعديهم شوي اذا عندهم مشاوير ضروريه

خلي ريلج يطلب سايق ثاني للبيت اذا مو حابة تسوقين

لان صعبة شوي اذا طلبوا منج شي تقولين لهم لأ

بتدخلين بمشاكل معاهم

حبيبتي انتي شكو فيهم
قولي لهم زوجي مايرضى
انتي مو كل يوم فاضيتلهم

امممم حكمتي عليهم مبجر .. بس اهما مالهم شغل فيج وف هذا عندهم سايق
ما يمنع اوقات تساعدينهم و اوقات تعذري منهم باسلوب حلووو
و حبيبتي انصحج و بقوة سوقي ترى والله السوااقه متعه صرااحه كل ما اتضايق اطق السيارة سلف و اروح اي مكان المهم اسوق
خل الوناسه على جنب صراحه بهالوقت و بهالمشاغل و هاللويه راح تحتاجينها السياره بهالوقت صارت من الاساسيات خاصه اذا عندج دوام

حتى لو جابت سايق يمكن ينشبون بسايقهااا؟؟؟

يبه سوقي وفكيي عمرج

وعلى قولت اختي

قولي انا سواقتي من بيتي لدوامي لبيت اهلي بسسسسسسسسسسسسسسسسسسس وهم راح يفهمون

بعد انتي اذا سقتي يبيلج فتره على ماتعلمين مو على طول بتحطين رجلج خخخخخ وفي هالفتره اختبريهم واذا ما جاز لج الوضع

قولي انا حدي خوافه ويالله اروح لدوامي

والله يعينج صراحه حتى السواقه بتطلع من عيونتس خخخخخخخ

وبالتوفييييييييق قليبي

اشتري السيارة بهالوقت صارت شي ضروري وبالنسبة لهم ساعديهم باللي تقدرين عليه يعني لا اتضايقين عمرج عشانهم…

يا عمري سوقي السياره تعطيج قوة و تعتمدين على نفسج … حتى لو بيدزونج مشوار انتي بالاساس قاعده تخليصين مشاوريج و مشاوير اهلج وانا اختج … و هم تمشي

بنات اللي فهمت من كلامكم ان الكل يتدبس آخر شي وتصير الدعوه سايق لهم

أفضل أكون ما أسوق على اني أسوق وأخلص مشاويرهم واهم طلباتهم ما تخلص .. !!

سوقى مافيها شى
وطبعا فى سايق اذا قالو خل نروح قوليلهم فى سايق روحى معاه
او ليش حاطين سايق مو على شان يوديكم

وشى طبيعى تودينهم مره او مرتين بس مو كل شوى وكل مايطلبون

بعدين على التعود اذا عودتيهم بيطلبون وايد واذا من اول شى قلتى لا او مالى خلق راح يسكتون عنج