أنا صرت " بويـــــــة " :(

بنات حدي حدي متضايقة

واحاول أسوي نفسي عادي بس قلت يمكن لي كتبت الموضوع وتناقشت وياكم شوي أصير أحسن

الله يسلمكم اليوم كان عندي حصة سادسة.. دشيت الصف كالعادة وأول شي سويته خذيت الغياب

وانا قاعدة أسجل الغياب في الكشف. يتني وحدة من البنات جان تقولي. أبلة بقولج شي بس مابيج

تزفيني. كانت تكلمني كأنها قاعدة تساسرني ماتبي أحد يسمع. جان أقولها لا ماراح أزفج قولي.

جان تقولي. أبلة ترا طالبات سابع يعيبون عليج. جان تقول أبلة ترا… وتتلعثم بالكلام، قلتلها

قولي حبيبتي شفيج شنو يقولون عني؟ جان تقولي أبلة هما يقولون إن أبلة منال

" لما البنت تقلد الولد " >>> يعني قصدها بوية

بس اهي ماقالتها لي علشان ما تجرحني. المهم انا فورت حدي بس ما بينت، لان حصتي بدت

ومابي شي يخرب علي. جان اقولها منو الي قال جذي؟ جان تقولي مادري ابلة وايد بنات. جان

أقولها خلاص قعدي مكانج وانا بعدين اوريهم الشغل. المهم بنات عطيت حصتي عادي ومابينت

اني شوي وابجي وبعدها طلعت. بنات تخيلوا يعني انا أدرس سوادس وهالبنت مادري من منو

سامعة واااي تدرون شنو تحطمت نفسيتي من داخل؟ انا العادة لما يكون عندي حصص امر

صوب سوابع. ودايما خلال هال 5 دقايق لابد وتلقون طالبات يوقفون برا وينطرون الأبلة.

بنات الحمدلله انا عارفة نفسي. ومو شوية يهال قالوا شي أقعد واكبر السالفة بس مادري

شصار فيني من قالت هالبنت جذي. يعني استغربت من بنت عمرها 12 تقولي السالفة

بس تحاول ما تجرحني. واااي بنات حسيت ودي ما انحط بهالموقف.

المشكلة ان طالبة ثانية بعد من طالباتي قالت نفس الكلام لي لما خلصت الحصة

ان في طالبات بسابع يعيبون علي

انا الحمدلله ما أقلد شباب ولا ألبس ملابس شباب ولا أمشي بخشونة. بنات ترا انا حدي

عادية والحمدلله مافيني هالميول الخايسة. وحتى وحتى لو فيني شي من هالنوع ليش

اسويه بالمدرسة واخرب على نفسي واييب حق نفسي القيل والقال.

المشكلة بنات انا مادري منو الي متكلم ومطلع علي هالاشاعة الخايسة

هذيل شوية بنات يهال استغفر الله… وقسما بالله مال طق

علشان يعرفون شلون يتأدبون لما تمر يمهم مدرسة

مالقوا اهل يربونهم علشان جذي ماخذين راحتهم وينشرون اشاعات على الطالبات

====

قطيعة تقطع المجتمع الي انا عايشة فيه. استغفرالله حياتهم كلها شك وحسد وغيرة

من كثر ما يعيبون على الاجانب صاروا اخس منهم .يهالنا وكبارنا ومراهقينا كله بحلجهم سوالف

البويات والجنوس والفضايح والبلوتوث والتصوير. والتعييب على خلق الله ويفرفرون بالمجمعات

سواء بنات او اولاد وهم يتصيدون الفضايح. قطيعة احنا شلون بنرفع اسم

الكويت اذا هذي نمونة جيلنا الحالي؟ ما أقول الا الله يعين..

اخر همهم هالجيل الارتقاء بالعلم واحترام

المعلم والمعلمة.. انا اسفة على الي بقوله، بس مالت على هالجيل الي راح يكبر بعدين

ولا منه فود صج مالت عليه..

اسفة بنات حدي منقهرة …….طول اليوم سرحانة وافكر

الله ينصرني على كل من يبيني بسوء ويبعدهم عني

بنات عفية ادعولي الله يرد كيد بنحر اي شخص يفكر فيني تفكير موزين

بنات عفية ادعولي الله يبعد عني عيال وبنات الحرام..

عادي انا بحالي بالمدرسة ومالي شغل بأحد واكثر ابلة بالمدرسة

بدون غرور اعطي ويه حق الطالبات وبشوشة وكله اضحك بخلقتهم لما اشوفهم..

اللهم من اراد با اختي الغاليه سوء اللهم اشغله بنفسه
لاتفكرين بخرابيط هالمجتمع الفاشل
حسبي الله ونعم الوكيل فيهم
روووووقي. ووسعي صدرج وانا اختج

حبيبتي والله تسلمين
ماقصرتي على هالدعوة..

لاحول ولا قوته الا بالله

انا مو مدرسه بس شفت الموضوع من برا

لا تهتمين لهم هذيل توهم في بدايه المراهقه اشكثر ايامنا

كانوا بنات شياطين والسانهم طويل واحنا طالبات معاهم يطلعون حجي على الابلات

اذكر كان في ابله حلوه ماشاءالله من النوع الي تحط الملفع منظر

مو حجاب وشعرها اشقر كله طالع برا هالبنات الي فيهم السان وشطانه كانوا يطلعون عليها كلام

مابقى قصه ما انسبوها لهاااااا واحنا نخليهم يولون نخاف من الحجي العود !

تذكري ايام الدراسه بالمتوسط وتذكري السوالف الي كانت تصير من البنات

هذيل يعتقدون بالطريقه هذي انهم كبار وانهم مصدر اهتمام واصحاب اسرار وخصوصيه

لو انا منج افرض عليهم عصبيتي ان شفت وحده برا اعصب عليها اقولها دخلي صفج ماكون حنونه معاهم

اما طالبات صفج هذيل خلج معاهم طبيعيه حنونه وطيبه راح يحبونج ويعصبون على الي يطلعون عليج حجي

فديتكم بنات اي اي عطوني معنويات وكلام داعم يرد فيني الروح

منوله حبيبتي من كلامج حسيت وايد حاره عمرج و معوره قلبج و هذا الشي بحد ذاته غلط
تدرين ليش
لانج وايد حساسه و تتأثرين بطالبات
و انا مثلج ترى بس غيرت من نفسي
لانه اذا كل كلمه بقولونها بتأثر فينه هذا الشي بيعفس حياتنه و يومنه
و انتي واثقه من نفسج و انتي قلتي يهالو يعني بتخلين يهال يتلاعبون بنفسيتج
انا مثلج الاسبوع الي طاف وحده بنت سادس يت قالتلي حجي و يابتلي اسم البنيه رحت شرشحتهم بس بطريقه غير مباشره عشان لا اسبب مشكله و الله ان الابله الي كانت واقفه عليهم احتياط خافت مني
لمن دشيت القسم قالتلي مسؤولتي انتي وايد تتأثرين بالبنات و هذا غلط و فعلن من كلمتها حسيت اني وايد مكبره السالفه
و رديت طبيعيه
فعشان خاطر نفسيتج انسي بس اذا عرفتي من و الي قايله روحي صفها و تكلمي وي الصف كله من غير ما تخصينها و عطيهم العين الحمره تلقينها تموت من الخرعه و طلعي راح تخترع و اتوب عن هطبع الوصخ
و الشره مو عليهم على اهلهم الي ماعرفوا يربون عيالهم على شي اسمه احترام و فعلن هلجيل قليل ماتلقين منه من يحترم الملعم
الشره مو عليهم الشره على الوزاره الي ماحطت قوانين صارمه تفرض فيها احترام المعلم و هيبته
قبل احنه من تمر المدرسه يمنه نرجف بمكانه من هيبتها و الحين وين جيلنه من هجيل الفاشل
اذا انتي سووج بويه
انا سووني هتلر
هههههههههههههه
حسسوني اني امشيهم مسير بالطابور
ههههههههههههههههههههه
مالج شغل فيهم ففشي و انتي ماشالله عليج متميزه و المتميز طول عمره عرضه لحجي عذاله و حساده ولاكن بنهاية انتي فوق و اهمه تحت
و عااااااشت منوووووووووووله

عاااادي من صجج انا ما استغرب منهم اي شي

وطنش تعش تنتعش

ترا الطالبات تافهات طبعا مو كلهم هع

الله يكون بعونج حببتي وعسئ ربي يشغل الي يمسج بسو بنفسه ويرد كيده بنحره ان شالله الله يهداهم بس

من صجج منوووله اصلا انا ادش هالقسم علشان اتطمش على مواضيعج وردودج وااايد احب اسلوبج وطريقتج بالكلام وحتى مواضيعج تهبل هذووول يهالو لا يهزون فيج شي اقصااهم امهات 11 وض12 سنه من صجج تاخذين بكلامهم وتضيقين خلقج انتي اكبر من جذي لا ترمى الا الشجره المثمره ولا ينتقد الا النااجح

يَ حبيبتي ،
دآمجْ وآثقة من نفسجْ وتدرينْ
آنْ انتي مبْ ل.هالسوآلفْ لآيهمجْ
كلآمهمْ ، ولاينقص من ثقتجْ بنفسجْ
ترآ مايطلع ه الاشاعاتْ الا اللي تفكيرهْ خآيسْ!
يهالْنآ آلحينْ مب مثلْ آولْ ، عيونهمْ مفتحة على كلْ
شيْ ، وآكيدْ من بينهمْ تلآقينْ آللي تفكيرهمْ [ بويآتْ
وليدياتْ و .. من ه الافكار المقززةْ ! ] ،

" وآذآ اتتكَ مذمتي من نآقصٍ ، فهي الشهآدة ليْ بآنيْ كآملُ "
لآيغرجْ كلآمْ ه اليهآلْ ، تراه لايودي ولاييبْ ،
خلي كل شي ورا ظهرجْ وكوني وآثقة من نفسجْ ولاتنقصين من قدرهاْ ،
يعني لو حدْ يآ عندي وقآلي انتي بويهْ ولآ.. ، بقتنعْ بكلأآمه ؟
لآ ، لآني وآثقه من عمري ان مآعندي ه السوالفْ ، وآنْ آللي يقول
ه الشي آنسآنْ نآقصْ مآعندهْ غير تحبيط النآسْ وتثبيط عزآيمهمْ !

،

لآيهمجْ كلآمهمْ ، تعوذي من ابليسْ
مآفيج الا العافية

بعد جبدي بنات كل رد فيكم اعتبره رد اعتبار لي

صح المفروض اكبر عقلي ولا التفت حق كلام اليهال..

الي مستغربة منه ان لما تصير مشكلة مع ادارة المدرسة او مع القسم ما اتنرفز واتضايق

بالعكس اتضايق من شغلات تافهة

فديتكم بنات والله يبعد عنكم السوء والبلاء ويبعده عني آمين آمين آمين

معليــــك منهم حبيبتي البنـــآآآت كــــذا يحبون الكلام الكثير
مدام واثقه بنفسج لاتفكرين بكلامهم

منوووول للكبااار نسوووي أكبرر طااااااااااااااف للي ماايعجبنااا من كلام هالدور بتتضاايقين من يهالوه !!!!!
مااعليج منهم ولا كأنج سمعتِ شيء أصلااً أناا مااراح اقوولج بسهوله السالفه بتمر ع نفسيتج
لأني أدري الحجي مو هين لكن بقووولج أشغلي عقليتج بأشياااء وقعدي سوويهاا
سوااء للمدرسه للبيت بالنت أي شيء أي شيء لماا تمر فتره بتلاقين نفسج تضحكين ع هالسخافه
بعدين بووضح لج نقطه ترى الطالبات خيالهم وااااسع يعني اللهم لك الحمد والشكر
يفسروون ويشوفووون اشيااء من رؤوسهم مالهاا علاقه بالوااقع
ومسااكين هم مااكو شغل بحياتهم إلا هالمدرسه والأبلات سووت أبله فلانه وقالت أبله فلانه
نصيحتي لج لاتعطينهم ووووجه بزيااده خليج ذوووق بس بحدوود لأن هذي تاليتهاا يخربوون
ويشوهووون ….~
ربي يسعد لي قلبج منوووووول …~