|
|
السلام عليكم
انا خريجة ادب انجليزي و عندي مقابله هالاسبوع
بعرف شنو نوع المقابله و شنو نوع الاسئله
قالت لي الموظفه انها بتكون شفوي و تحريري
يعني ابي تفيدوني شلون لحضر لها
اكسبوا فيني اجر .gif "Eh S(16)")
حياج الله اختي
في البدايه ترى مافيه شي معين لدراسة المقابلة ولكن يجب عليج أنج تكونين مُلمة باللغة من ناحية النطق _ القواعد _ التحدث السليم لمخارج الحروف _ الأمور التربوية _ كيفية تدريس اللغة الإنجليزية
هذا بشكل مختصر
حلو؟
شوفي هالروابط.. مشاركات سابقة راح تستفيدين منهاا
ودعواتج
معلمات الانجليزي خريجات الادااب بليز محتاجة خبرتكم
موجه معلمة اولى و معلمات كل المراحل و كل المواد بليز دشوا ضروري
نتمنى لج التوفيق والسداد بإذن الله
بمـا أن تخصصنا أدب إنجليزي فهذا يعني أنّ الطالب لما يتخرج يتخرج بعقلية قوية في جميع مجالات اللغة الإنجليزية
ولكن تنقصنا نحن طلاب الأدب الامور التربوية.. وطرق التدريس.. وسيكولوجيـة الطالب… الأهداف التربوية من التدريس.. الخ
هذه الشغلات يعرفها طالب الادب من خلال البحث والقراءة..
فممكن يكون عندنا نقص وحنا ماندري في الامور التربوية اللي لازم نقرأ عنها كثير..
عمومــاً.. بخصوص المقابلة..
اللي لاحظته أنه يبون متحدث ممتاز جداً للغة… يعني بالعربي يبونا نتكلم نفس البريطانين أو الامريكان على الأقل بنسبة 85
هذا اللي يعطونه الأولويـة.. لأن بعض الطلبة ممتازين جداً.. بس لما يسولفون يتكلمون عادي…
لدرجة بعضهم ينسى الفرق بيــن نطق P و B واللجنة من يشوفونج جذي على طوول يحطون تحت اسمك خط احمر حتى لو كنتي متخرجة إمتياز..إذاً.. لآزم نطور الــPronunciation ونعرف شلون نتكلم لغة بيسطة,سليمة,بمخارج حروف صحيحة
وشغلة ثانيه اسمها الـــIntonation اللي هي إرتفاع وإنخفاض طبقات الصوت,لازم نعرف متى نرفع الصوت.. متى نوطي.. ومتى ومتى.. هذا مهم..خصوصاً بالمقابلات… ونقطه أخرى… اللي قليل يركز عليهــا.. اللي هــي Body Language لغة الجسد لما تسولفين … تحركين ايدينج.. عيونج تكون بعيون اللي يسأل..تعابير الوجه… كل هذه الامور مهمه جداً.. عشان تساعدنا ان شاء الله نتغلب على كل الامور..فكثير من الطلبة يدرس يدرس يدرس.. ولكن ينسى الامور اللي قلنا عليها وهي الاولوية بالموضوع..
الحين نبي نركز على المقابلة أكثر..
أول سؤال غالباً Introduce yourself وللأسف اغلب الطلبة مايركز على هالنقطه
لان هذه اهم شيء في المقابلة اذا كانت مقدمتك ممتازة…= انتِ مدرسة ممتازة..
شلون نكتب مقدمه حلوة.. نخلي اللجنة تستانس عليها؟
أول شيء نبدأ بالبسملة
In the name of Allah,the most gracious,the most merciful
بعدين نتكلم عن كل شيء يخصناا… الاسم… الاقامة.. الجنسية.. العمر.. العائلة..السكن..التخرج.. سنة التخرج.. اي جامعه.. المعدل..الخبرات.. الشهادات الاخرى… الهوايات…
بالمتختصر.. سولفي لمــا يقاطعونج… وشيء مهم… اختاري لغة بسيطة جداً.. وسليمة
مثال
I graduated from …. with good estiamte. My major was English langauge and literature
وعلى هذا المنوال… المغزى من المثال لغة بسيطة وليست معقدة.. انتبهي تختارين كلمات صعبة
وأكتبي المقدمة وحضريها.. بورقة واحفظيها صم…
ممكن ثاني سؤال يكون
Why do you want to be English techer?
OR
Why do choose this place?
الاجابة.. بقوقل.. ويوتوب .. اعفسيه عفسسس
نجي للأمور التربوية راح اعطيج عناوين وانتي تبحثين عنهم
How to teache vocabularies
How to teach grammar
How to teache comprehension passage
How to teache compistion
How to creat effective classroom
what is classroom management
how to deal with disruptive students
what is a lesson paln
what are the characterstic of a good teacher?
(Who is a good teacher
Teaching aids اللي الوسائل التعليمية مثل السبوره والقلم والبروجتر والخ..
The characterstics of intermadiate school students
مميزات طلاب هالمرحلة.. وشلون نتعامل معهم؟
هذه باختصار شديد الامور التربوية اللي لازم تحليلينهم تحليل… عليج بالمواقع واليوتوب
نجي لنقطه ثانيه اللي هي يعطونج كتاب يقولون يله اقري..
خطأ كبير يقع فيه الطلاب.. انهم يقرون بسرعه عشان يبينون انهم مبدعين وهذا على طول اكس أحمر
ليش؟ هم يبون تقرأ كأنك تقرأ لطلاب يعني تخيلي اللي قدامك طلبة صغار وأنتي اللي تقرأين قدامهم
القراءة تكون شوووية شوية… بسيطة.. بصوت واضح بهدوء.. نستخدم فيها الــIntonation اللي ذكرناه فوق..
باقي القواعد…. عاد القواعد.. هذه مجهودج انتي ركزي على كل صغيرة وكبيرة في عالم القواعد…
ماقدر احدد لج شي.. معين…
قبل كل هذا كله ماننسى ان التوفيق كله بايد رب العالمين… عليج بالدعااء اخر الليل.. الدعاااء ثم الدعاء
كثرة الاستغفار… الصدقة… كل هالامور امور خير..
وكل شيء بيد رب العالمين.. اهم شي الثقة بالله أولا بعدين بذل الاسباب..
والسلام مسك الختام واي سؤال حاضرين.. وعسى الله يوفقكم جميعــا..
انصحج تقرين المقدمة
اذا لج معارف معلمات او روحي اقرب مدرسة من بيتكم واطلبي هالشغلة من معلمات قسم الانجليزي
وصوري المقدمة
اغلب الاسئلة تكون منها
BE CONFIDANT
LOOK CONFIDANT
and
ACT LIKE IT
that’s what i did
even though I didn’t know the answers of some question!