|
|
السلام عليكم و رحمة الله و بركاته
عزيزاتي بنات منتدى كويتيات حابه استفسر و اتاكد من شغله … اللي اهيا الدراسه و العمل في ان واحد
انا موظفه جديده حابه اني اكمل دراستي بجامعه خاصه داخل الكويت و على حسابي الخاص و توني متعينه , سمعت انه ممنوع اجمع بين الدراسه و العمل الا بعد سنتين من تعييني؟ انا مابي اجازه دراسيه اهم شي عندي اني ادرس و اشتغل و المشكله ان الجامعه دوامها العصر و على حسابي يعني مادري ليش ممنوع ؟! انا حاسه ان في شي غلط بالمعلومه اللي سمعتها !
عاد اذا في شي ثاني انا مادري عنه سالي انتي بعدين
انا توظفت بشهر 7
وسجلت بجامعه خاصه على حسابي و بدينا دوام عقب شهرين
مسؤولي بالدوام يدري اني ادرس لان عادي عنده دوامي مايعارض دراستي
بس ديوان الخدمه مايدرون لان بعدين لو تخرجت وانا لازلت موظفه بالحكومة فيها عقوبه لما اودي الشهاده هذا اللي سمعته
العقوبه شنو مادري
انا شسويت
خذيت مواد و رفعت معدلي و استقلت و حولت بعثه داخليه على حساب الحكومة
والحمدلله الحين ماباقيلي شي واتخرج
اقدر اشتغل بارت تايم بقطاع خاص بس بدون ما استلم دعم عماله
بس حكومه مايصير لاني حولت بعثه داخليه
اذا بتدرسين درسي عادي ماله داعي احد معاج بالدوام يدري لان ترى بيشتغل الحسد
مو ضروري يدرون دام دراستج ما تتعارض مع دوامج ليش تقولين
لا ييتي تتخرجين استقيلي قبلها واشتغلي بقطاع خاص لو بارت تايم اي شي مشي عمرج
ولما تتخرجين وتطلع شهادتج ردي قدمي عالديوان بالشهاده الجامعيه ما راح يحاسبونج
لان ما يبتي الشهاده وانتي للحين موظفه بالحكومة عرفتي؟
انا اللي قالي هالطريقه واحد كان معاي بالدوام ال قبل لا يتخرج بيستقيل ويرجع يقدم بعدين لاطلعت شهادته
بس هم استفسري عن كل شي قبل لا تستقيلين او هذا
اما مسألة شغل+ دراسه عادي يصير بس الديوان لايدري عنج
وماراح يدرون شكثر معاي بالدوام يدرسون محد حاجاهم
والله يوفقج يارب
انتي تقولين استقيل قبل لا اتخرج بشوي انزين لما ارد اقدم على الديوان راح تطلعلهم بياناتي و ان كنت موظفه و استقلت و استقالتي توه ماصارلها شي و ان هالشهاده يديده يعني امبين اني كنت ادرس و اشتغل بنفس الوقت !
و بنات اللي تعرف شنو عقوبة اللي يجمع بين الدراسه و العمل يقولنا .
و عساكم على القوه
أنا برفع الموضوع لأنى متفاجأة مثلج ليش ممنوع ؟؟؟؟؟
ياللة فيدونا بنات اللى تعرف لا تبخل علينا عفية لأنئ بكمل أخذ رابعة ثانوئ
وأنا تونى بشتعل قريب
لان حتى انا سمعت انه ممنوع !!!
بعرف شكوو يمنعوون دام ما يتعارض مع الدوام
بس انا من قريت كلامج عرفت انج مقدمة علي جامعة المفتوحة يا فرحتج ولا خايفة لاحد يدري اقول انا كنت اعوذ بالله مقدمة فيها وسالت الديوان قالي شهادتهم مو ذاك الزود شاكين فيها سحبت وقدمت علي جامعة الكويت وانا الحين اجازة دراسة رحت اعادل مواد كنت ماخذتها ردوني قالوا مو معترف فيها
انا راي استانسي بمعاشج وطلعي واكشخي وبعد ثلاث سنوات عيدي الثانوية ويبي نسبة وقدمي اجازة دراسية ترا الحين هابين فيها
وبالنسبه للجامعه المفتوحه بالعكس رخيصه ومعترفه فيها واهم شئ أن لما تروح الديوان ماراح يقارنون هذا من جامعه الكويت وإلا الخليج وإلا المفتوحه راح يهتمون بالدرجه وتخصصج وأنا 3 من رفايجي خريجين المفتوحه وحده انجليزي والثانيه تربيه والثالثه حاسوب وكلهم موظفين معاشاتهم نفس خريجين الامريكيه والكويت والخليج مافي فررررررق ما قالوا لهم شهاداتكم مو معترف فيها ولا راح نوظفكم بالعكس قبلوهم خصوصا التربيه يقبلونهم فوري
وبالنسبه للعقوبه اللى يجكونهم جنه إذا ماني غلطانه يدفع الرواتب اللى تقاضاه من الوظيفه طول مدة دراسته إذا وظيفته ماعندهم خبر عن دراسته
وبالنسبه للمعادلة الدبلوم يتم معادلة بعض موادهم إذا كانت معتمده من قبل التعليم التطبيقي
وشوفي ردي على الخاص وموفقة حبوبة
انا توني متعينة في وزارة التربية وبنفس الوقت ادرس ماستر
واللي عرفته مثل ما قالوا لج البنات ممنوع تدرسين بدون موافقة جهة عملج
طبعا انا ما يهمني القوانين ، لاني مشيت سيدة ابحياتي وما نفعني ابشي
انا سألت فيها وقالوا لي اذا تخرجت ويبت شهادتي حق وزارتي
راح اتعرض حق الشؤون القانونية وايقاف مؤقت من العمل
على ما يتأكدون من شهادتي وبعدين يعرضوني على لجنه وبطيخ
المهم عقوبتها في النهاية خصم من الراتب لمدة 3 اشهر او اكثر
على حسب رايي اللجنه والخصم احتمال يوصل نص الراتب
اما اذا كنتي في القطاع الخاص ممنوع كلش والفصل من العمل (فصل نهائي)
لازم تاخذين موافقتهم ، ونادر تلقين شركات اتوافق على انج اتكملين دراستج
عندج مثلا بنك التجاري ما يرضون البنوك بشكل عااام ما يرضون الا بعد 3 سنوات
فااا قلت ما كو غير حل واحد بالطقاق خل يعرضوني على لجنة المهم اكمل دراستي
واذا على الخصم الحمدلله خل يخصمون مو ناقصني شي الحمدلله
وحبوبة بس ابي دعواااتج ان الله يوفقني ويشافي ابوي وخالي
وبالتوفيق
السلام عليكم ياجماعه انا بتخرج هالكورس دبلوم هندسه مدنيه وبدش الكورس الثاني ع حسابي وبقدم ع الديوان هل صج ممنوع الجمع بين الدراسه والوظيفه ولازم اذا توظف ابلغ دوامي اني ادرس عشان حزة الامتحانات يطلعوني وله لا ؟