عندج طحين من ايام الطبعه وانتهت مدته وصار حزر وقربت سراوه تطلع منه؟ اعلمج فنتق منه

1-كوب طحين
2-نص كوب ملح
3- نص كوب ماي او اقل
(تقدرون تدوبلون على حسب الكميه)

الطريقه :
تخلطين الملح مع الطحين وبعدين تصبين شوي ماي لما تتماسك (راح ابين لج بالصور) وبعدين ترقينه على سطح
مرشوش عليه طحين علشان ما تلزق وياج

الدرس الاول(هدية أعواد القلوب)

1- نفس طريقة العجينه إللي فوق تقطعينها على شكل قلوب واشكال باحجام مختلفه
2-تحطين قصدير على صينيه وترشين سبراي مانع الالتصاق وتبتدين تصفين الاشكال وتحطين عود خشب
3- لزقي قطعة عجينه لتثبيت العود
4-حطي التركيبات إللي تحبين تنسقينها على ذوووقج ودخليها الفرن
5- بعد ما تصير يابسه لونيها وحطي عليها جليتر
6- صفيها بسله من قش وهذا الشكل النهائي ممكن تقدمينها مع كارد كهديه تصير تحفه حلوه على المكتب
(احسن من ما ينقط الطحين وانتو بالكرامه بالزباله سوينا مننه شي مفيد وحلو وكيوت)

الدرس الثاني (الكعكه الهاربه)

تطبيقي انا ناويه اسوي توزيعات لمناسبه عندي اوكي (ما راح احط صور التوزيعات إلا لما اشوف تفاعلكم)

لكن استخدمت هالتكنيك للتوزيعات

تتذكرون قصة الكعكه الهاربه الله قبل لما كنا صغار ماما تقراها لنا الله يطول بعمرها واحنا سرحانين نبي ناكل هالكعكه

واسمها بالانجليزي the runaway gingerbread man
هذي صورة القصه من مكتبة ليدي بيرد واهيه ترمز للغرور وعاقبة الغرور

المهم هالكعكه صدتها حق إللي احبهم

1- رسمت الرسمه على ورقه عاديه وتالي خطيتها على (كارد التعبئه) لانه مقوى وعليه مثل بلاستيك
2- سويت العجينه نفس الطريقه إللي فوق وجذي يكون قوامها
3- مديتها على لوح خشب مرشوش عليه شوية طحين وحطيت عليه الرسمه وقصيت عله حدوده بسجين حاد
(ما عندي قالب الكعكه الهاربه لو كان عندي كنت بلشت تقطيع على طول)
4- حطيته بصينيه مرشوش عليه طحين(ما عندي سبراي مانع الإلتصاق) اوكي وظلت بالفرن تقريبا 20-30 دقيقه
شكلها يمي بس ما راح تنوكل(ريلي بغى ياكل قطعه على باله اني مسويه بيتي فور)
5- لونته بألوان مائيه بس سوينه ثقيل شوي
6-رسمت الزراير والعيون والإبتسامه (تابع)

7- غلفت كل وحدة بكيس نايلون عدل علشان ما ينفتح
8- لصقته بشمع على كرتون مقوى ابيض (انتي ممكن تستخدمين اي لون لكن انا قاصده اسوي جذي نفس حلاو قبل يكون
بسيط ورخيص نيبه من البقاله وطعمه لذيييذ) وحطيت على الزوايا خرز وردي
9- صوره رقم 9 الازرق للاولاد وحطيت بالاطراف ترتر ازرق
10- كملت التزيين
11- سويت علاق لها علشان لو واحد حاب يزين فيها مكتبه او اي شي
12- شوفو شلون ثبت العلاق ورا الكرتون وكتبت
I catch The gingerbread MAN For you

(ملاحظه مهمه جدا: انا راح اقدم هالتوزيعات لناس مو يهال كلش علشان ما ياكلون العجين فيها الوان وملح او يتنحون
إلا يبون ياكلون الكعكه الجذيبو)

يا رب يكون عجبكم الشغل والحين راح اعرض التطبيقات إللي ممكن تسوونها من هالتكنيك

بليز حياتاتي ما تردون