مقصف المدرسة والنصب عيني عينك

صباح الخير لأحلى أمهات ماادري اذا في وحدة منكم صار معاها ومع عيالها اللي بقوله الحين المهم انا بنتي بثالثة ابتدائي ذاك اليوم عطيتها دينار وقلتلها اشتري بنص والابلة راح تردلج فلوس نص ثاني حطيه بمخباتج قالت اي وبنتي تعرفوشاطرة بالعد وانا الصراحة مااحب يشترون من المقصف لان كل اللي عندهم خرابيط ومايسوى ويبيعون اللي بإمية فلس بربع وقلنا مايخالف يبون يترزقون الله بس تعالي يالابلة وقولي حق بنتي ماعندي نص اعطيج إنزين وبعدين ليش ماتعطينها شي بداله حلاو او اي شي وبري ذمتج والله ماعطتها شي ولما ردت بنتي البيت قلتلها وين فلوسج جان تقول الابلة ماعندها نص دينارقلتلها مايخالف روحي باجر وقوليلهاياابلة ماعطيتيني نص امس قلتي ماعندي والله يا اخواتي مو علشان النص دينار بس انا بعرف شتقول . جان تروحلها ثاني يوم ولا الابلة تقولها لا ماكو خلاص انزين شورو علي شسوي انا قلت بنطر للاسبوع الياي وبدق عليهم وبنبه الناظرة على المسؤولين عن المقصف والله مواول مرة وايد لهم مواقف نصب وانا ساكتة من العام حتى مرة خذو نص دينار على برد مايسوى إمية فلس وبلعتها وسكت بس ماراح اسكت الحين حرام ياخذون فلوس البنات الصغار على بنى ما يعرفون يطالبون بحقهم ولااشرايكم؟؟؟

كلمي الناظره او الادراه
وعلمي بنتج تحسب عدل
عشان محد يقص عليها

المشاركة الأصلية كتبت بواسطة q 8 y a t اتصاااال ما ينفع ع ع ع ع ع ع ع روحي وانتي امعصبه من صباح الله خيييير ودخلي على الناظرة وشرشحيها والله العظيم ان ما سويتي جذي بياكلون بنتج وغيرها لانه ما ينفع معاهم الا جذي واذا بنتج اتعرف اسم الابله قوليه للناظرة بس حاولي ما تقولين اسم بنتج لانه دام تاكل الفلوس اكيد ماعندها ذمة ولا ضمير

اي والله صاجة اشياء بالمقصف ما تسوى 50فلس يبيعونها بربع ونص بس بذمتهم وربج مايترك احد شلون يقدرون ياكلون حرام لاحول ولاقوة الا بالله

المشاركة الأصلية كتبت بواسطة *** الشرق@ انا غعودت بنتي تشتري من البقاله وتاخذه معاها المدرسه من الليل تطلب بقاله اذا تبي وتخشه حق الصبح لان الي بالمقصف خرابيط ولو نلغي البقاله بعد ابرك لان الوجبه تكفي وزياده وعالاقل صحيه اما البقاله كلها ضرر واغلب المدارس الخاصه تمنع الاكل الغير صحي. من مقصفها ياليت الحكومه نفس الشي يبيعون اكل صحي مو خرابيطط

المشاركة الأصلية كتبت بواسطة أم@الحلوين اييي والله النصب عيني عينج بذمتهم ؛ والله لو أنا منج أروح أشرشحهم مو عشان النص دينار عشان البوق من هاليهال المساكين أنا عيالي كل شي أشتريلهم أحسن من هالخرابيط الي يبيعونهم ومع هذا يحنون علي كل خميس يقولون عطينا فلوس

شلونكم خواتي اليوم دقيت عالمدرسة جان تطلعي الناظرة واقولها السالفة تقول مو معقولة ترى اللي يداومون بالمقصف كلهم ملتزمات وما اتوقع يسوون جذي قتلها هاذي مو اول مرة ترى من العام بعد حصل نفس لشي وانا مابي اكبر الموضوع وبنتي ترى ما تجذب جان تقول انزين لازم اتيي بنتج وتقولي منو اهي الابلة اللي كانت بالمقصف قلتلها ما اقدر اقولج منو اهي بنتي ولا اسمها وانا مو علشان النص دينار علشان الحلال والحرام يعني اذا يهال يلعبون عليهم وياخذون فلوسهم عالاقل تعطيها شي بدال النص جان تقول ايييييييييي تذكرت لاتكون بنتج اللي من جم يوم قالتلي ان رفيجتها خذت منها نص دينار وماردته حقها قلتلها نعم؟لا ما اتوقع بنتي ولو بنتي جان قالتلي انا عادي عندي تشتري حق رفيجاتها وانا ما دقيت عليكم ثاني يوم انا نطرت خمس ايام عشان اتاكد من بنتي وكل يوم اقولها انتي شريتي حق احد وتقولي وتأكدي ان الابلة ماردت لها النص جان تقولي مومعقولة الابلات مستحيل يدنون نفسهم لنص دينار جان اقولها والله هذا الي صار وانا ماحبيت اايي واسويلكم شو شرة بالمدرسة قلت انبهكم وانتو تتصرفون جان تقول والله انا عندي فلوس طايحين من البنات ومن زمان ماحد خذاهم ولا سأل عنهم خلي بنتج تمرني وتاخذ نص دينار قلتلها انتي ليش رايحة ورادة وتقولين على النص دينار انا مادقيت علشان اطالب فيه انا ابي انبهكم باللي قاعد يصير سواء من الابلات او الفراشات الله اعلم وانتو تصرفو انا بريت ذمتي مو علشان بنتي بس على عشان كل البنات اللي في المدرسة لان حرام ومايجوز يلعبون عليهم هذا اللي صار وابي رايكم بهالكلام ؟؟