التبول الليلي الا إرادي لأطفال 5 سنوات هل من حل أرجوكم !!

السلام عليكم …

بنتي عمرها الان 5 سنوات الحمد والشكر لله , مشكلتي يا بنات التبول اللا ارادي الليلي رح أعطيكم معلومات واتمني تساعدوني وتجدون حل لمشكلتي أولا :

طول فترة النهار تذهب الي الحمام وتتبول عادي ومرات اذا كنا بالسيارة تقدر تمسك نفسها لين نرجع البيت

المشكلة بليل ادخلها الحمام وتنام اقعد الساعة 1 بليل اوديها وبعدين 3 الفجر اوديها وتقعد المدرسة الصبح ناشفة

مرات اوديها الساعة 1 بليل وتقعد بايلة على نفسها ومرات تاخذ قيلولة الضهر تبول شبة يومي

مشكلت بنتي يا بنات وقت النوم تنام بشكل لا تسمع ولا تحس وانا ضيعت مو عارفة انظم لها وقت التبول

جربت معاها كل الوسائل هدايا ضرب تهديد حرمان اتكلم معاها بلطف اقولها عيب ريحتج بالمدرسة البنات ما يلعبون معاج ولا في فايدة

مو عارفة شنو اسوي بنات يعني هي تقعد كل اليوم اذا فيها تدش الحمام بس وقت النوم مادري شسوي امس نامت عل 12 بليل وديتها ونامت قعدت 8 الصبح بايلة احترت وتعبت جدا جدا
نفسيتي منهارة ارجوكم ساعدوني

وبالنسبة لمراقبة الطعام انا احرمها من الشرب بليل ماي بيبسي عصير بس مو عارفة شنو اسوي اكثر والله عيب صار عمرها 5 وداشة ب 6 ان شاءالله ومافي فايدة فيها

انتظر ردودكم يا أمهات بليز ساعدوني

في مراكز متخصصه بهل السوالف وديها يمكن علاجها بسيط ووانتي تقولين كل الطرق مجربتها معاها لا تضيعين وقت ووديها

نفس مشكلت بنتي واهي بتكمل شهر واحد خمس سنين

ونفس شي جربت معاها كل الطرق وما نفع مره تقوم بروحها تروح تبول ومرات لاا

بوديها عياده التبول لا ارادي بالمستوصف وان شاء الله يفيد معاهاا بس الي احاتيه يعطونها دوا يحبس البول او شي جذي وهذا الي احاتيه /:

انا بنتي هم اعاني من هالمشكله بس خليتها تكبر وتفهم بس احط سفره تحت الكفر اليهال مايحسون بالعمر هاذا
لازم نتحملهم

السلام عليكم

انتوا تشكون من بناتكم اعمارهم ٥ سنين

انا ولدي العود عمره ٩ ونص سنين

وديته طبيب خاص
وديته حكومه

عطيته دوا اللي ينشف السوائل ياخذه قبل لا ينام

سووله سونار عالمثانه
سووله تحليل دم

كل شي تمااااااااااااااااااااام

قالولي الدكاتره الحل اهوا

نطريه يكبر و تروح هالمشكله بروحها

الوصايا اللي وصوني اياها اني ما اعاقبه ولا اطقه ولا اكلمه عن الموضوع اصلا
لانه يأثر على نفسيته
و كل ٩٠ دقيقه ارووح احركه و اوعيه عشان لا يغرق بالنوم و يبول
سوائل قبل النوم ماااااكوووو
بس طبعا بهالعمر ما اقدر اتحكم فيه اسم الله عليه كبير

النواحي السلبيه
١- شخصيته ضعيفه
٢- ماكو ثقه بالنفس
٣- اخوانه الصغار يهددونه اذا ماسويتلنا هالشي ترا بنعلم اليهال انك تبول على نفسك

تعبت وااااايد نفسيا

بس ماكو حل الا العمر

و ان شاء الله تروح منه هالمشكله بسرعه

بس ضرووووري التحاليل والسونار عشان تعرفون وين المشكله

التبول الليلي اللاإرادي عند الأطفال :

التبول الليلي اللاإرادي عند الأطفال :

ü يعتبر التبول الليلي اللاإرادي حالة طبيعية و مؤقتة تزول لوحدها حتى سن الخامسة وهي من المشاكل الشائعة التي لا يكاد يخلو منها بيت فيه أطفال .

ü معظم الأطفال يتوقفون عن التبول أثناء نومهم ما بين سن الرابعة و الخامسة .

ü المحيط النفسي و الاجتماعي ( الدلال الزائد أو القسوة المفرطة الزائدة ) يعمل علي انتشار هذه الظاهرة ، وقد يرث الطفل هذه العادة من بعض افراد الأسرة .

الأسباب النفسية و الاجتماعية :

ü الانتقال إلي منزل جديد .
ü افتقاد عضو من أعضاء الأسرة أو شخص محبوب .
ü انفصال الوالدين ، و التهديد والعقاب .
ü وصول طفل جديد آخر ثاني إلي المنزل .
ü الخوف من الظلام أو القصص المرعبة .
ü خوض الطفل تجربة جديدة لم يتعود عليها مثل دخول المدرسة .

العلاج النفسي التشجيعي :

ü الامتناع عن عقاب الطفل و عدم إظهار الغضب من ابتلاله لأنه يؤدي إلي وجود حالة توتر وقلق عند الطفل وبالتالي إلي استمرار حالة التبول .

ü حث الوالدين علي إقناع الطفل بان هذه الحالة ليست شاذة وان كثير غيره عندهم الحالة نفسها وانه سرعنا ما يتغلب عليها .

ü التشجيع بواسطة المكافأت .

العلاج السلوكي :

ü الإقلال من كمية السوائل التي يتناولها الطفل قبل 2-3 ساعات من موعد النوم و خاصة المشروبات التي تحتوي علي مادة الكافين كالمشروبات الغازية ، والشكولاته والشاي .

ü إفراغ المثانة قبل الذهاب للنوم مباشرة .

ü إيقاظ الطفل مرتين إلي ثلاث مرات في الليلة الواحدة للحد من امتلاء مثانته .

ü تدريب الطفل علي حبس البول فترات تزداد طولها تدريجيا أثناء النهار و هكذا تعتاد المثانة علي الاحتفاظ بكميات كبيرة من البول .

ü إن تمضية وقت كاف مع الطفل لمعرفة جوانب التوتر ومصادر القلق لديهم ، يساعد في دعمهم و تقليل مصادر القلق و الخوف لديهم .

تقبلي تحيااااتى
دلال

الله يشفيه

معبوجة عور قلبي ولدج الله يشفيه ويخليه لج

حياتي تسلمين ديانا

اشفيكم بنات طولوا بالكم علي عيالكم لايتعقدووون …..انا تعودت بين 5 سنوات الي 6 سنوات يبتدي يتحكم ويروح للحمام حرام لاتعقدونهم ولاطقونهم بالعكس تزيد المشكله ويصيرون خوافين انا كانت بنتى تبجى اقول عادي ماما روحى الحمام وسبح جسمها وابدل ملابسها وترد تنام ليمن من نفسها تعلمت يعني لي 6سنوات عادي ….

تسلمون بنات ما قصرتوا باخذ بنصايحكم ان شاء الله

لا اطقينها ولا تعاقبينها للحين ياهل

ووديها المستوصف حق قسم التبول الا ارادي

انا سنه من السنين وديت ولدي امريكا كنا اهناك سياحه ..

وبالصدفه وديته الطبيب عشان التبول الا ارادي هذا كان عمره ثلاث سنين تخيلي .. وكان بجري وتلوع جبدي عشان يبول علي نفسه وانتو بكرامه

عطااه الدكتور بخاخ بالعيااده نفسها مره وحده بخ له بختين بخشمه والله وكيلج ولدي الحين عمره 8 اسم الله علي عمره من يوم هالبخاخ لي يومج ما بال علي نفسه كلش

والحين مبتلشه مع خواته التؤام نفس الحاله واعمارهم اربع سنين ونص .. بس اخذت قرار علي نفسي اني اقعد لهم نص الليل واوديهم لحمام

يعني بالعربي قعدي اكثر من مره باليل وشيليها ووديها الحمام . عشان لمن تقعد الصبح ماكو شي .. انا صار لي اسوي هالحركه ست شهور الحمدلله البنات ما قاموا يسوون شي بفراشهم .. طبعا للحين ماكو اراده انها تمسك نفسها او تحس وهي نايمه لكن اشيلهم وادخلهم اكثر من مره

والله ذكرتيني بحالي

تدرين اني كنت البس بامبرز بليل لين عمري ٧ سنوات

بس مره نمت بيت خالتي وخالتي شجعتني قالتلي اشتريلج واشتريلج واشتريلج

وكانت توديني الحمام

لين ما قطيتها

بس ترا والله ما كنت اتعمد اللي اتذكره اني بروحي ابول ع نفسي

واللحين يا حليلي من ام البول لي آم يوسف

لووووووووووووول

غشيت ضحك يا ام يوسف حسبي الله علي بليسج ههههههههههههههههههههه

هههههههاي حلوووه
والله انا صغيره كنت اتبول ع نفسي وطبعا وانا نايمه للين تعوودت استمريت لين جا عمري 9سنين
خلاص الشغله يبييله تحمل شوي