British Nursery School Kuwaitحضانة

السلام عليكم ورحمة الله وبركاته

شلونكم بنات ..

موضوعي عن :
حضانة cascade-kuwait

انا مابي اسوي دعاية للحضانة بس بصراحة وايد ممتازة

ما اقول لكم انهم كل اسبوع يودون الاطفال رحلة او عندهم احدث الالعاب او كشخة او او او …

لأنه مو هالشي اهو المهم .. بالنسبة لي على الأقل ..

اهم شي عندي التعامل مع الطفل لأنه هالشي يحتاج دراسة وخبرة و ( وساعة صدر )

واهم شي تكون المدرسة مبدعة بهالمجال – والمشكلة اللي حاصلة بالكويت مو بس بالكويت لكن

مالي شغل بالدول الثانية .. المشكلة انه اغلب الحضانات تفكر بالربح المادي ( وهالشي مو عيب ) لكن لا

يكون طاغي على الحس بالمسؤولية اتجاه اداءهم والرسالة اللي المفروض يوصلونها للطفل لأنه اصعب

مرحلة تكون اول مرحلة واذا الطفل عاش هالمرحلة بشكل سيء او غير مبالاة راح تعرقل حياته الدراسية

اولا ومن ثم الاجتماعية ..

انا ما اقول هالكلام من عدم .. لكن عشت تجربة ولو انها قصيرة جدا ( ولله الحمد) مع حضانة ولدي الأولى

ماراح اذكر المواقف لكن سيئة لأبعد حد ولو اذكر اسمها راح وايد منكم يعرفها والله يستر عليهم وان شاء الله

تتحسن الحضانة بشكل عام ..

والشكليات اللي الحضانات قاعدين ينافسون بعض فيها كلها ماتهمني نهائيا لأنه انا ابي لولدي الافضل ذهنيا

ونفسيا واجتماعيا ( ومو رايحة اكشخ فيه ) وهذا اللي للأسف حاصل هالأيام ( ولدي في الحضانة الفلانية

وولدي في الحضانة العلانية )

وصارت الحضانة الأغلى اهي الأفضل ( انزين ليش غالية !!) لأنه فيها كيت وكيت ..

المهم ادري اني طولتها واهي قصيرة ..

الحضانة اللي ولدي فيها وان شاء الله بنتي السنة اليايه فيها .. اهي حضانة من الألف للـ ياء انجلش ..

وما قول هذا اللي يميزها – طاقم التدريس اهو اللي يميزها – صاحبة الحضانة عندها اسلوب للتعامل مع

الطفل جدا ممتازة – ولدي مو من النوع اللي يندمج بسرعة وطول 3 سنوات عمره ما فارقني او فارق ابوه

حتى بيت اهلي عمره مانام عندهم ولا مكان .. لازم معاي ادري انه هالشي غلط بس انا اللي مو قادرة مو

اهو وبظرف 3 ايام داومهم بالمدرسة تغير ما قول لكم 100بالـ 100 لكن ما توقعت بهالسرعة وهالشي

قالته لي المدرسة وفعلا كلامها كان صحيح

صاحبة الحضانة كانت مدرسة في NEW ENGLISH SCHOOL حتى لما سجلت ولدي فيها واسئلوا عن

حضانته قلت لهم cascade فقالوا لي اها عند مس جاكلين اهي كانت مدرسة عندنا وممتازة ..

المهم

هذا ربط الحضانة دخلوا عليه وكله بالإنجلش واللي عندها اي استفسار ماراحج ابخل عليها

اهي في منطقة العدان اللي تطل على المسيلة

cascade-kuwait

بالنسة للتوصيل :
في ميني باص للتوصيل وكله مجهز بكراسي خاصة للأطفال الصغار وحتى الكبار مع حزام الأمان

ويستقبلون الأطفال من عمر سنة ..

ويستقبلون الأطفال فترتين صباحية ومسائية واللي تبي يوم كامل ممكن

الفترة الصباحية من :
8صباحا الى الـ 12:30 ظهرا

الفترة المسائية :
من الـ 12:30 الى الـ 5 المغرب

والفترة الكاملة (FULL DAY) :
من 8 صباحا الة الـ 5 المغرب

اسعارها ما تعتبر قليلة لكن بنظري تستاهل ..

قصدهم اذا تبين الولد يداوم لمدة 5 ايام يعني الاسبوع كله يطلع الكورس بـ 455

واذا ماتبين كل يوم يعني يومين او ثلاث او اربع .. يعني مثلا في ناس مايبون عيالهم يروحون كل يوم للحضانة

بس يوم الأثنين والثلاثاء مثلا او من الأحد لغاية الأربعاء والخميس مايبونهم يداومون مثلا يعني