كيفية التعامل مع غضب الطفل؟

السلام عليكم ورحمة الله وبركاته خواتي الكويتيات وغير الكويتيات , بناء على كثرة المواضيع اللي تطلب الأم الوسيلة للتخلص من غضب الطفل فقررت علشان خاطر عيونكم انزل لكم هالموضوع وما أبي منكم الا دعوة صالحة لاختكم غزالة
بنتكلم عن الغضب وأنواعه وأسبابه وحلوله, عسى ربي يخليلكم عيالكم وييهدي عيالكم للخير دايما

أولا حبيباتي لالالالالالالالالالالالالا تنسون الدعاء ، ادعى الله ان يهدي عيالج ويخليهم بارين فيج في حياتج وبعد مماتج بعد عمر طويل عالطاعة ,وألحي بالدعاء وبتشوفين العجب العجاب سبحانه يقول للشيء كن فيكون.

خلونا نعرف سلوك الغضب؟
هو حالة انفعالية تبدأ من الغضب البسيط وتنتهي الى الغضب الشديد , يعني يبدا ولدج يبين عليه الضيق والاستثارة البسيطة ويبدأ يكسر ويخرب ويصرخ ويضرب نفسه بالطوفة أو بالارض .

ليش يسوي هذا كله؟ لانه عارف بالنهاية بيحصل على اللي يبيه وبنلبي طلبه خوفا عليه أو اتقاء شره. صح؟
مثل ما اثبتت الدراسات والابحاث السلوكية على الاطفال بان تلبية رغبة الطفل عند الصراخ .. و اعطاءه ما يريد هي السبب الرئيسي لجعل هذا التصرف يستمر …مرة واحدة يفعلها الطفل و تصبح عنده عادة –من شب على شيء شاب عليه- .. فيعلم ان اسهل طريقة لفعل ما يريد هو الصراخ و الغضب .((خواتي هالكلام خطير… ردوا اقروه مرة ثانية وبتعرفون ليش قلت خطير))

لان في هالحاله هذي بنشجعه على الغضب واحنا ما ندري؟ فلازم ما نخضع ونلبي رغباته حتى لو ظل ساعات لالالالالالالالا يا خواتي لازم نحتضنه ونهديه ونعرف شنو يبيي بهدوء لان هالشي بينعكس على مراهقته ماراح تقدرين تسيطرين عليه ومن زرع حصد (( والله يالغاليات ما ودي اخرعكم بس أذكركم وأنبهكم))

أنواع الغضب
فيه نوعين للغضب : 1- غضب ايجابي و 2- غضب سلبي
1- الغضب الايجابي: بتقولون في غضب ايجابي اي بقولكم شلون لان الطفل بالغضب الايجابي ينفس عن غضبة بالصراخ أو الرفس أو كسر الأشياء أو تخريبها
2- الغضب السلبي: عكس الايجابي لانه الطفل يكبت مشاعرة وينطوي على نفسه فنشوفه يرفض الاكل والخروج مع والديه والذهاب للمدرسة وهالحالة تتواجد في الاطفال الانطوائيين
شرايكم؟ نخلي عيالنا يعبرون عن مشاعرهم أو نكبتها؟ بس اهنيه نشوف ذكاء وحكمة الوالدين في التصرف بنتعرف عليها بالحلول.

وبكمل باذن الله عن اسباب الغضب وحلوله بس بشوف تفاعلكم واذا عجبكم الموضوع قولولي وبكمل واذا ازعجكم قولولي وبسكر الموضوع ولالالالالالالا تنسوني بصالح الدعاء

خوش موضوع كملي
ويعطيج العافيه

اشدعوه خواتي 40 وحده دشت ورد واحد على كل حال نورتوا الموضوع واتمنى عجبكم بس صراحة ما تشجعون

حبوبة قطوة وردية حياج الله ونورتينا وبكمل ان شالله ومشكورة على ردج الحلو

كملي ناطرينج حلو الموضوع

من عيوني الحين بكمله واتمنى يعجبكم وشاكرة مرورج

ونرد ونقول يفضل عدم كبت مشاعر الغضب عند الطفل فلازم الام تتقبلها وتفهمها ومن ثم توجه الطفل الى الاساليب المقبوله للتعبير عن المشاعر , وكما قيل وتبقى حالات الغضب هي جزء بناء للغاية في النمو الصحي للطفل.

أدري كلكم امهات حكيمات وبتفهمون مشاعر عيالكم واحتياجاتهم, فالطفل في الثانية والثالثة من عمره ما يقدر يعبر عن مشاعره فيشعر بالضيق والغضب ويصرخ , انتي طبعا فطريا – حلوه فطريا – بتاخذينه لفراشه للنوم أو اذا كان يوعان بتوكلينه بالعافية على قلبه

اما اذا كان متضايقا من شيءحاولي تهدئته واطلبي منه ان يشرح لك بهدوء ما يضايقه وحاولي تبينين له فهمك وتعاطفك معه,
مثلا اذا لقى ولدج صعوبه في تركيب لعبه فقولي له بعد فترة انها فعلا صعبة وعرضي عليه مساعدتك واذا ما وافق اكتفي بتشجيعه واذا وجدتي انها صعبة عليه حاولي اقناعه يترك اللعبه من غير ان تظهري له انه محتاج لك حتى لا يتعلم الاعتماد على الاخرين

الغضب عند الامتناع والرفض : فتكون كلمه لا دايما على لسانه فاذا ناديته وقلتيله يله الحين وقت الاكل او الحين بتنام بيرد بلا
لمعالجة هذه الحالة تشير الدراسات النفسية والتربوية الى ان الطفل يتعلم كلمة (لا) قبل قول (نعم) فالطفل يسعى الى التفرد ويحاول ان يجعل لنفسه كيانا مستقلا عن ابويه فلازم تمهدين له قبل الطلب اللي احتمال يرفضه
مثلاقولي له بعد قليل ستذهب لتنام وعطيه مهله يلعب بالعابه بدال ما تقولين له يللله قوم نام بتتعبين معاه

الغضب عند لفت الانتباه : ولدج يحتاج الى لفت انتباهج ويبي هالانتباه الحين يمكن عندج ضيوف ولاهيه اييج ولدج يقولج لعبي وياي
مثلا انتي مو فاضية للعب وياه صج بهالحاله ولدج فاضي ولا عنده سالفة بس لازم تكونين حازمة ولا تستسلمين له طبعا ولدج ماراح يقصر صراخ وبجي وترفس ويالام كوني هادئة اشدد على هااااااااادئه وابتسمي له وقوليله انا احبك ووديه مكان هادي الى ان يهدأ وفهميه وسولفي معاه بهذي الطريقة بيعرف ان اللي سواه وعفس البيت ليس الاسلوب الصحيح للفت الانتباه

فاصل ونواصل

نتابع

الغضب في الاماكن العامة وامام الناس : أعصاب وصراخ وتكسر وعنف فلازم تتدخلين فورا علشان ما يؤذي نفسه ولا اللي حوله
وحسب توصيات المختصين في المجال النفسي فيجب اتباع طريقة (الوقت المستقطع) وهي وضع الطفل لوحده في مكان هادئ (اي دقيقة واحدة فقط لكل سنة من عمر الطفل) مع الاطمئنان بان باب الغرفة مفتوح، اما اذا كنتما في مكان عام فخذيه واخرجي من المكان وعلمي طفلك ان سوء السلوك لن يجد قبولا منك او من الاخرين وانه لن يكافأ ابدا على سوء سلوكه وحاولي الاستماع الى طفلك لمعرفة السبب لغضبه من اجل حل بناء طويل المدى.
اذا صار الموقف صعب على طفلك وصارت اعصابه هايجه وفقد السيطرة على نفسة وبدا بضربك وضرب نفسه فكيف تحتوين غضبه ؟؟؟؟؟؟؟
الشيء المهم الذي تقومين به ان تمسكي طفلك اذا سمح لك بذلك لكن ليس بطريقة عنيفة امسكيه وكأنك تحتضنيه وقولي له (انا سأمسكك حتى تهدأ لكي لا تؤذي نفسك او غيرك) وافعلي ذلك كلما فقد طفلك السيطرة على نفسه
ملاحظه مهمه: وتذكري ان الاطفال احيانا يخافون من قوة غضبهم ويحتاجون الى شخص اخر للسيطرة على الموقف

باقي البارت الاخير بنزله قريبا اذا عندكم تعليق او استفسار او نقد فانا حاضرة

يعطيج العافية موضوع تشكرين عليه

خووووش موضوع متابعين

حياج الله نورتينا يالغلا

يشرفني متابعتكم و بكمل الجزء الاخير باذن الله

يعطيج العاااافيه ع الموضووع القيم

وبانتظار البارت الاخير ^_^

غزال لبريه مشكوره وايدعلي الطرح الجميل والموضوع الهادف
ويعطيج الف عافيه
ومتابعين وناطرين البقيه

مشكووووووووووووووووووره اختي وماقصرتي