|
|
السلااام عليكم
شخباركم أمهاااات
أناحابه إنكم تساعدوني ولدي الكبير
عمره ثلاث سنوات وثمان أشهر مايعرف يدافع عن نفسه يعني أناعايشه مع حمولتي وعنده أطفال من عمره ياأخذون ألعابه عادي عنده هو وده ياخذهم بس مايقدر
وحتى لمايتهاوشون ينطق ونادرا" يطق أتمنى تفيدوني لأن السنه الجايه أبدخله الروضه إن شاءالله
والله يجزاكم ألف خير
انشالله البنات يفيدونج ماحبيت اطلع وما ارد
مشكوره حبيبتي على الرد
فعلا محتاجين احد يفيدنا بهالخصوص
لا تبخلون بتجاربكم يا اهل الخبرة
وووينكم ياأهل الخبره تعبت وأناأفهمه والله لوتشوفون وجهه صاير خريطه ساعدووووني
ماكو فايدة علمتة وفهمته يطق اللي يطق
بس لما الحين ماتم قبول النداء
انا عن نفسي اذا شفت الموقف جدامي
بسكات اخلي ولدي يطق اللي طقه عشان يتجرأ
ويدافع عن نفسه
بس ما يطقهم حيل بس عشان تبرد جبدة وجبدي شوي
بس والله كريم
هالله هالله بالمساسر
وي فضحت نفسي
وعلمت بالطريقة
لا خل يتعلم شلون يدافع عن نفسة ويتحاشى الطق
مو يطق
واحسن شي يعلم اليهال ان عيب وغلط ومايصير
ويصير عنده قوة شخصية بحيث يحافظ على اغراضة من غير طق وهوااش
===
بدال لا يتنيحس بغراضة واليهال ياخذون الاغراض منه ليش ماتعلمونهم بالمشاركة يلعبون او تنشال اللعبة بكبرهاا
المهم تقول أول ماتبدين تعلمين الطفل تعلمينه قاعده اللي يطقك طقه
عشان يحس انه قوي ويقدر عاللي يعتدون عليه
ولي حسيتي انه تمكن من الدفاع عن نفسه علميه انه يسامح
عشان يحس بقراره نفسه انه اهو يقدر يرد عاللي يغلط عليه بس اهو قرر انه يسامحه
وبجذيه تضربين عصفورين بحجر صار واثق بنفسه ويسامح الناس عن طيب نفس
أما شلون تعلمينه قاعده اللي يطقك طقه
عن طريق الحوار والاقناع
مثلا شالفرق بينك وبين فلان؟
اهو كبرك أو كلكم عندكم ايد وريل ….الخ
واذا كان ولدج يتميز عنه بشي قوليله مثلا انت اكبر او اقوى او اذكى منه تقدر تتغلب عليه بسهوله بس الشيطان مايبيك تفوز عليه
وتقدرين تقولين له هالولد لازم تأدبه اذا انته ما أدبته راح يطقك ويطق غيرك اهوه حسباله ان محد يقدر عليه بس انت ولدي وانه ادري انك تقدر تطقه وتأدبه عشان مايتجرأ عليكم ويحس انكم اقوى منه
أهم شي يحس انج واثقه فيه لانج اهم انسانه بحياته اهني راح يحس بالقوه ويستمدها من شعوره بثقتج فيه
وشي مهم انج ماتنتقدينه جدام الناس بحضوره او بحضور احد من اليهال عشان مايندقر وعشان اهمه مايستقوون عليه
كله مدحيه بس موبشكل يبين انج تمثلين انج تمدحينه لأ خلي كلامج يبين انه المدح جد
مدحيه بحضوره جدام الناس وجدام اليهال خل اليهال يحسون ان وراه ظهر واهو خل يحس انه انسان مميز
مشكلتنا ان نغفل ان احنا نزرع الثقه بعيالنا واذا ييتا نزرعها نبني شي ونهدم أشيا ولاتنسين قبل كل شي الدعااااااااء ان ربي يفتح عليج بتربيتج حق عيالج لان السالفه مو سالفه فلان طقه ولاعضه واهو ما رد عليه
السالفه أكبر من جذيه انتي لج دور في بناء شخصيه رجل أو امرأه في المستقبل ممكن يمسكون منصب مهم من مناصب الدوله والاهم ان هذوله أجال الامه الاسلاميه اليايه فاهمه محتاجين وقفتج معاهم طول ماهم تحت رعايتج وعسى ربي يوفق الجميع
والله ينفع بعلمج