تكفون ساعدوني ولدي بقطع عنه الرضعه والحفاظة

قوه بنات اشلونكم ….

ولدي عمره 3 سنين وماني قادره اقطع عنه الرضعه ولا الحفاضه ولا قادره اخليه يلتزم بالاكل عطيه كاكاو بفك هالخرابيط ياكل بس غير جذي لا

وبنتي عمرها سنه ماني عارفه شنو الاكل المناسب حق هالعمر ؟؟

تكفوووووووووووون ابس مساعده

مرحبا الله يعينج صراحة اشلون يقطع الحفاض وهو يرضع يعني قضية الحفاض متعلقة بالرضاعة طيب هل هو بالليل يرضع وهل الحفاض بالليل ايضا عشان البنات يشاركونا

حبيبتى انا نفس مشكلتج ولدي توه كمل 3 سنوات ماقطع الحفاظه
بس البسه الحفاظه اللي على سروال وكل شوى اوديه الحمام ونتى بكرامه بس ما يتكلم عدل ماتفهمينه مرات والحضانه يساعدوني هم ماكو فايده
انا بعد نفسج احاتى وايد خايفه اطول السالفه وعلى فكره ماعندي غيره ويمكن عشان جذي
بس الله كريم قاعده احاول وانشالله يتغير
وبالنسبه حقج انا المميه قطعتها يوم كان عمره سنتين اتذكر قمت اشربه بس وقت النوم ولما تعود وقطعتها مره وحده
بس الحفاظه مشكله والله يعينه

أختي ملوكه اعانج الله لا تخافي فكل طفل له قدراته أنا طفلي الصغير أبو اربع سنوات في كل شيء ما تأخر الممية والحفاض لكن الكبير زيج الأول تأخر في الممية لالحين يلبس الحفاض الكلوت بالليل وعمره ستة سنوات يعني لكل طفل قدرات خاص به لكن هل هو يعمل الكبيرة والبول معا أو شنو يعمل وهل هو ما يقدر يخرج ألا بالحفاض

السلام عليكم
حبيبتي انا ولدي اربع سنين ويلبس حفاضه بس لما ينام وسويت معاه كل الطرق وما قدرت ..
واهوه مسكين ما يبيها وعلشان اقطعه منها قمت كل شوي اقومه من النوم اوديه الحمام تكرمون لي ما يتعود..
وبالنسبه للميه انا جربت طريقه يا بت انما ايه ميه ميه
روحي الجمعيه اشتري رقيه واخذي الحب الاسود وحطيه بالمميه مع الحليب
وقولي له عوو اهوه عاد ما رح يجيسها بتلوع جبده
او حطي براس المميه كركم او كمون او فلفل اسود << مجرمه
بس والله طريقه ممتازه
انا مره وحده بس سويتها وعافت خاطره منها وشوفي انتي ولدج من شنو تلوع جبده
وحطي داخل المميه بتلاقينه يهدها وبس

قطع الحفاظه والمميـة يبيله طولة بـال وصبــر … أول شئ سوي مثل طريقتي حطي بالمميه مع الحليــب ملـح وإذا شرب أكيد بيتغير عليه الطعـــم فراح يكرها مرة على مرة ماراح يحبها حتى لو بجى يبي حليب لايلين قلبج قولي له مافيه إلا جذي وحاولي تعطينـــه حليب كي دي دي أو حليب بالعسل أو حليب بالموز بقلاص عشان يكره المميه ويتعود على القلاص … وبالليل قبل ماينــام عشيه عدل وشربيه حليب بالككاو أو عصير برتقال أو كوكتيل وخليه ينام وإذا بجى بنص الليل زهبي له حليب أو عصير بقلاص أو بعلبته عادي يشفطه بالشفاط… صدقيني لو إستمريتي على الوضع هذا يومين والله راح يتعود بس حاولي تمنعين البفك والككاو والخرابيط بهالفترة….أما بالنسبه للحفاظه أول مايقعد من النوم قطيها ووديه الحمام وقوليله سوي وراح أعطيك هديه وكل نص ساعه وديه الحمام وحتى قبل النوم وديه حتى لو سواها مرة أو مرتين على نفسه مصيره بيتعود بس ديري بالج لاتطقينــه ولاتخوفينه عشان مايصير عنده حالة نفسيه من هالموضوع… وموفقــــة

مشكورييين على المرور بس يشرب رضعه لين ينام حتى لو خلصت يبي غيرها مايعرف ينام الا الرضعه بحلجه …. بس ان شاء الله بجرب هالطره وان شاء الله تنفع معاه

السلام عليكمعشان ولدج ثلاث سنوات على ساعه خمس العصر لا تعطينه ولاشي في حلويات او بفك او كاكاو لانه يعطينيه نشاط ما ينام ما يتعشى عدل شوفيه سويله ارزباللبن او سلطة فواكة قطعيلة جزر وعطية تمر على طول جيبيلة صحون خاصة له مثل سبايدر مان او سوبر مان وبنتج بعد خليهم يحطون اكلهم بنفسهم وساعديهم بالاكل شجيعهم راح ياكلون اما ممية انا سويتها بنتي قطيتها ورا الغنفة وجبت زهوي حطيتها يمه قلت ويع ويع خايسة وخليتها اهي تقطها بنفسها ادري حركة قاسية بس الزم عشان صحتها والحفاظة كل ساعه اوديها الحمام حتى لو قالت لا اقول يلا روحي انشالله تستفيدين هاذي تجربتي اي شي انا حاضرة

لخوات ما قصروا اهم شي دربيه ولا تفشلينه جدام احد قعدي معاهاه وسولفي لاتقولين مايفهم يفهم احسن مني ومنج
بس طولي بالج وكل ساع وديه الحمام برحابة صدر

السلام عليكم
ولدج عمره 3 سنين وتقولين عندج بنت عمرها سنه تقريبا
عن تجربه حبيبتي ::
طالما في بيبي في الموضووع صعب وصعب جدا راح يقطع الرضعه والحفاظه
واهو قاعد يشوف اخته الصغيره تعطونها رضعه وتلبسونها حفاظه
بس حاولي تفهمينه انها بيبي وان اهو كبير عالحفاظ

ومتى ما قطع الممية اهني راح يقطع الحفاظه

انا ولدي الصغير تعلم من ولدي الكبير عشان يصير نفسه ان كما يبي يلبس حفاظه

بالنسبه للميمة انا من غيرت نوعيه حليب ولدي كره الحليب
عشان جذيه انا تحسفت لانه للحين عمره 4 سنوات ما يحب الحليب ولا اي منتج من الالبان

فخليه يشرب حليب بس قبل لا ينام مو وقت النووم

اسفه على الاطاله

انا قطعت ابني عن الرضعه خليت فوق الحلمه صبغ اضافر وقلت له عووووع
صج تعبت في الليل ولكن ارتحت

مشكله انه ولدي يقعد على المرحاض ويسوي كل شيء بس بنفس الوقت اذا هديته نص ساعه اشوف هم مسوي بحفاضته كل شيء
مو قادر يتحكم بنفسه ليلحين
وكذا مره خليته بدون حفاظ هم يسوى
انا والحضانه صارلنا 6 شهور تقريبا واحنا اندربه ويلبس السروال اللي على حفاض
بس هم ماكو فايده وحتى كلامه مو مفهوم
مادري شسوي ؟؟

أهلين اعانج الله بالنسبة للحليب فأنا اقول انتبهي لازم ما يترك الحليب بأي طريقة سواء بالكوب أو بالمصاص الي في علبة واذا ما رضي فاقول خليه بالممية احسن ما يترك الحليب لأن هذه المرحلة مرحلة بناء الجسم ويحتاج للكالسيم وهو يختص بالعظام لكي ما يحصل له هشاشة العظام انا ما ابي اخوفج لكن انبهج لاهمية الحليب في هذه المرحلة بخصوص وبالنسبة للحفاض يمكن قدرته على التحكم باعضاؤه لا زالت ضعيفة واقول لج لا تضغطي عليه شوى شوى وانشاء الله يتعلم

انة يا اختى بنسبة للممية من نفسة قطعها بس المشكلة الحين مايشرب الحليب اما البمبرز للحين اعابل معاة

هم انا نفسه مشكلتج انا بنتي عمرها 3 ونص وهل السنه تروح الروضه
تلبس الصروال النايلون تروح الحمام بس ماتحمل ماتلحق وانا خايفه لمن تروح المدرسه بس المميه موراضيه تبجي عليها