تعالوا عطوني رايكم مشكلتي مع اخوي المراهق

السلام عليكم

شلونكم بنات ان شاء الله بخير

ماعرفت وين احط الموضوع اهوه مو طفل اللي بتكلم عنه بس بما انه قسم التربيه فقلت خل احط اهني واذا مكان الموضوع غلط اتمنى من المشرفات يعذروني وينقلونه للمكان الصح ..

المهم ..

سالفتي باختصار انه عندي اخوي بسن المراهقه 16 سنه

و صاير يعلي صوته لو ماعجبه شي

و يعاند وايد

اهوه مؤدب يعني لو يتقارن مع شباب الي بسنه حيل مؤدب يعني ميوله رياضيه

و الشي الثاني اللي مسوي المشكله اهوه الكمبيوووووووووتر

مدمن على لعبه من الالعاب اللي هابين فيها هالايام نوعهم virtual world

اللي يبنون و مادري شيسون يحاربون و عفسه

و ادري انه هالالعاب حلوه و الواحد يدمن عليها

بس وصل مرحله انه طول اليوم يا مجابل مباريات

يا مجابل الكمبيوتر و يلعب

اقوله ادرس ماكو فايده

يعني ادمان بشكل مو طبيعي

امي و ابوي مخلينه اهوه اصغر صبي عندنا دلوعنا

وانا اول وحده مخربته

بس ذاك اليوم عصبت عليه

الوقت متأخر و عنده امتحان و اهوه مجابل

فعصبت و قلتله لو ما طفيته بفصل عنك الدي اس ال

قام يراددني

وانا اكره شي عندي احد يراددني

قام يعاند و قالي ماني فاصل

جان اقوم و اشلع واير الكمبيوتر من الكهربه

خربت عليه اللعبه

و سحبت الواير

فأهوه معصب و قام يهدد والله لو شلتي بتشوفين فيج خير يخترب

حسيت نفس المدمن لما يشيلون عنه المخدرات اسم الله عليه لول

بس والله ين

حقرته و دشيت غرفتي

و من يومها ما احاجي كلش

لانه قل ادبه وانا ماتعودت منه هالاسلوب و كله نضرب فيه المثل بأخلاقه

الحين صار العكس

ادري فترة المراهقه الصبي شوي يتغير بس انا ماحب قليلين الادب

اهوه قلبه حيييييييييييييييييييييييييييل طيب

يعني لما يسوي شي على طوووووووول يبين عليه الندم

وانا خرابووووووووووووووووو

بسرعه اسامح و كله اطوف

بس هالمره قلت والله ماراح اطوفله

اشوفه ثاني يوم يساحلني

يعني يحاول يسأل سؤال والكلام لج يا جاره

بس انا احقر ما ارد لانه ما وجهلي الكلام مباشر

و ساعات اكون قاعده عند التلفزيون يدري مثلا انه احب اشوف شي معين يحطه

مع العلم انه لو في مبارات مايحب انه يغير و يصير هواش عالرموت

ليما يروح يشوف بغرفة امي

بس تسنع شافني ما احاجي من صجي

عاد الحين كاسر خاطري

و مادري شسوييييييييييييييي

انا وايد اخرب خواني لانه ادلعهم زياده عن اللزوم و كله اسامح لو غلطوا

و الحين شكلي بخق و برد اسامحه بدون لا يتأسف

فقولوولي شسويييييي

بداية الخراب انه قبل جم يوم دزيتله فلوس ويا اختي الصغيره

انا بين فتره و فتره اعطي زياده على مصروف امي و ابوي

واهوه اي شي يبي ايلي انا مايروح حق امي و ابوي

فأحس انه تشرد بدوني لوووول

و ضايق خلقي فقمت و عطيته عن طريق اختي

قلتلها لا تقولينله انه انا بس اكيد عرف مني

و قبل شوي يالي يقولي تبين اطلبلج شي تاكلين انا بطلب

قلتله مابي مع انه انا وياه كله نطلب ولا مره قلتله لأ

حسيت انه يبي يقيس نبضي و يشوف زعلانه او لأ و بنفس الوقت خفت انه مخلص فلوسه

فقمت عطيت اختي وقلتلها تعطيي

مادري تصرفي صحححححححح ولا غلطططططططط

والله ضايق خلقي ماحب احس انه جذي ناقصه شي .. و ماحب ادقره و احقر

و اهوه مو راضي يتأسف لوول شسوي

لا تقولونلي كلميييييييييييييييييييييه و فهمي لانه المفروض اهوه يفهم انه غلط

مو انا اقوله تأسف و من قبل اخوي اللي اكبر منه محاجي و قايله تأسف وانا ناطره يتأسف بس ماتأسف ليلحيين

فقولولي شلون اتصرف معااااه

كاسر خاطري و باط جبدي بنفس الوقت

سووري طولت عليكم بس واثقه بلاقي الاجابه عندكم

وسعي صدرج وهذا اخوج وسامحيه بدون اسف ولاشيء

كلميه عادي لي كلمح ولاتناقشينه بالموضوع لانه فهم الرساله

وترى ها السن يبيله اهتمام وفرض شخصيه وانتي بعد الله يهديج ماكان شلعتي الواير

لو امه اهون بس تظلينه اخته ماراح يرضى تتحكمين فيه
هذا رايي

قهرنييييييي والله قبل ما شاء الله كان شاطر و كله امتياز الحين بالغصب ينجح

و كله ساقط

و بعد عيونه قاعده تروووح من الكمبيوتر و كله سهر و ما ينام

صج والله ادمان

مو عارفين شنسويله و امي و ابوي وايد ساكتين عنه صحته كلها قاعده تروح و درجاته كل مالها و تنزل

مادري شسويله هالصبي

مشكووره عالرد حبيبتي

اولا الشباب بهالفترة وايد عصبين ويبون يبنون شخصيتهم ويفرضونها على الكل

انتي كسبيه ولا تجينه باسلوب الامر سايسيه>>>تدرين انا كنت مثلج وكله مناجر مع اخوي وعدم اتفاق لو يرد الزمن فيني واللله نصير احلى اخوان خصوصا اني احسه الحين وايد اقربلي من خواتي البنات

واااي عورتي قلبي والله وعيوني دمعت حرام عليج كل هذا قاعد يسويه وماسامحتيه للحين
شوفي لو اهومو حاس بغلطه جان مايحاول كلش يتحرش فيج او يسالج اي سؤال بس اهو حاس بغلطه ردي كلميه وقوليله عن الغلط اللي سواه
الله يخليكم ولا يحرمكم من بعض يارب

العيال بفترة المراهقه مايحبون احد يقولهم درسوا واذا قصبتوهم يعاندون مايدرسون
قوليله اذا نجت هالسنه ويبت امتياز او جيد جدا بيب لك هديه اللي تطلبها
او قوليله بحجز شاليه ونسوي لك حفله بالشاليه
واذا معاند قوليله اللعبه مابطير قسم وقتك خلك مسئول تعرف شلون تخلص اشغالك باجر اشلون ادش الجامعه وشراح تشتغل انا ابي افتخر فيك لاني تحديت رفيجتي اهي تقول ان اخوها راح يتفوق عليك وانا قلتها لا اخوي راح يتفوق
لاتفشلني ابي اكسر عينها
حجي تحدي
وتقدرين تساعدينه قعدي ذاكري معاه او ادشي عليه الغرفه وهو قاعده علي الكمبيوتر اخذي كتاب من كتبه وحضري له الدرس قعدي شرحي له وخل اهو يسمعج ليه راح المدرسه بيشارك مع الاستاذ وشوي شوي يرد نفس قبل ان شاءالله

دام انه كلمج خلاص كسري الشر وكلميه
الله لايحرمكم من بعض

أول شي كلميه عادي وبعدين خصصوا وقت لللعب والباجي دراسه

اختي اذاكنتي متزوجه الله يخلي لج ريلج ويسخره لج ويرزقج الذريه الطيبه

واذابعدج بنيه يالله يالله من قلبي واناماعرفج ولاتعرفيني يوفقج بابن الحلال

اللي يسترج ويدللج ويكون بحنية قلبج ،،

بالنسبه لاخوج لاتهدينه بروحه خلج وياه لانه محتاج لج خصوصافي هاي الفتره والمرحله

والله يهديه ويهدي عيالناواخوانناونحن وجميع المسلمين

هههههههههههههه

اسلوبج قصصي يهببل جذبتيني لا خر شي

اقرى واضحك جنج تكلمين عني وعن اخوي بو ستعش

تقربا نفس المواصفاات مؤدب وحبوب

وانا الكبيره ومطيحه الميانه حيل وياه ..مع ان فارق بالعمر

المهم مره كنت معصصصصصصصصبه حدي حدي ونفسيه زفت

والمسكين طاحت الحره فيه

انا متعوده ازفه ويسكت بحكم اني الكبيره<<<<< يااامستبده _03ba:

المهم مدري شقلتله

جان يرد
ووالنار من مستصغر الشرر

صار بينا تتش
هو ماغلط بس رادد ومعصب بعد لووووووول

هني نصدمت

وحقرته وصرت ماكلمه

وقعدت مدده ما اكلمه يمكن فوق الاسبوع
انا نسيت الموضوع بس ماصار حوار بينا بس نظرات لووووول
اثاريه..شايل بقلبه السالفه
ورايح حق اخوي الكبير وقايله
بس هم احس العلاقه مش اوي

اخرها جاني الدار
وتكلمنا وعطيته توجيهات وعلمته الغلط .. وان انا ممكن اكون غلطت بس مهما كان يبقى للكبير احترامه

حسيت انه حرررام متحسف

بس لي الحين يذكر الموقف
وملتزم حدوده

عشان جذي انا اقول حاولي تكونين بمكان بروحج واذا دخل مثلا تشوون تلفزيون او شي

قوليله…

ترى حاز بخاطري اللي صار…وابدي واسلوبج وبينيله انه مؤدب عشان جذي تفاجئتي فيه
وانج الكبيره واللي سويتيه المفروض من نفسه يعرف انه لمصلحته ومن خوفج عليه
وجذي يعني

كلش كلش
حزة نومته واهو رايح في الدار يعني ماراح تشوفينه لباجر
ارسلي مسج باللي فبالج
وانج سامحتيه ومايتكرر هالشي
وبتبدون يوم جديد

الله يصلح مابينكم ومهما كان هذا جاهل
لاتخلين للشيطان عليكم منفذ
في النهايه اهو تأسف من خلال تصرفاته
فلا تكبرين الموضوع
خليج مرنه شوي

والله العالم انه اعتبر من اللي صار

موفقه

انا وياه كل خواني علاقتي وايد اوكي الحمد لله

بس هذا صايرله فتره متغير

ادري سنه خايس و بايخ

و اهوه حييييييييل ولد مطيع زييين

بس ذاك اليوم صدمني عشان جذي عصبت لانه ما احب اشوفه قليل ادب

خصوصا اني ما ارفضلهم طلب و اي شي يبونه اسوي و ابديهم على نفسي

فعشان جذي تضايقت من تصرفه

وانا خايفه علييه

اي شريره موو؟؟؟؟

شسوي انا بسرعه اسامح يعني ساعات شغلات بسيطه ماتصير بينه هواش ولا نجره

بس انا طفارتي انه يهمل دراسته لانه الحين مو عارف مصلحته

لو كبر راح يلومنا يقول انتوا ما مسكتوني

شنو مستفيدين الحين الشباب اللي تركو دراستهم ؟؟

يلومون اهلهم لانه الحين الواحد بدون شهاده بهالزمن العيشه وايد صعبه

خصوصا بالكويت

الواحد معاه دكتوراه و معاشه معاش فراش لوول

ادري ابالغ بس انتوا شايفين الدنيا شلون

و انا مابي بيوم يكون اقل من اي احد او يهمل دراسته و يقعد بدون شهاده

والسبب الدلع

الواحد مايدري شلون يتصرف معاهم بهالسن

وييييي شكثر قعدت انصح

انا دايما ادرس خواني حتى من كانوا صغار

بس الحين ماله خلق

كلما قلتله تعال ادرسك يقولي دارس مادري متى لوول

و المشكله مالت اللعبه بسببي

قلتلكم الدلع يخرب

انا كنت واعدته ايبها له لو تفوق بدراسته

شد حيله و يبتله اللعبه

قلتله وقت دراسه و وقت حق اللعبه

اشوف 24 ساعه يلعب

درجاته صارت بالقاع

يا ساقط يا عالحفه

احس كله مني

بس شسوي كنت ابي اكافئه بشغله عاجبته شايفها عند عيال خوالي و يبيها

وعدته ايبها له لو ياب درجات

قص علي

ياب درجات و من حصل عليها كله ساقط

شسويله بعد مادري اخاف اواعده بشي ثاني يهد المدرسه و يقعد في البيت يجابل الهدايه اللي ايبها

انا خرابووووه شسوي فيه

اليوم كلش شوي و اكلمه بس قلت بنطر اقرا ردودكم يمكن احد ينصحني يقولي شسوي معاه

والله بسرعه اخق لوول ما اعرف اعاقب

بعد عمري مشكوووره الله يخليلج عيالج ان شاء الله و يقر عينج فيهم امين

تسلميين عالدعوه و عالنصيحه ..

انا وايد قريبه من خواني الحمدلله بس ما اتحمل اشوف الغلط منهم ..

هذا اللي يضايقني .. خصوصا لو على مصلحتهم لانه مايعرفون مصلحتهم

يعني هذا باجر بيضحك على نفسه مجابل لعبه و تارك مستقبله

بس راح اطبق نصايحكم و ان شاء الله راح اقولكم النتيجه

اي والله نفسي انا و اخوي

لووول

انا هالمره ماحاجيته لانه ابي ما يتعود على هالحركات

صايرله فتره جذي يعلي صوته مو علي على اي احد يعني لو ماعجبه شي

وانا انصحه

و تشوفينه تقولين خلااااااااااص حفظ الحجي و حطه براسه

اشوف ثاني يوم ولا جني ناصحته

و هالمره بعد راددني فانبطت جبدي

و حقرته

عاد اليوم رايحين زواره بيت يدتي .. و اهوه غايب من المدرسه يقول عندهم يوم مفتوح والله اعلم

فماكو احد يودي الا انا

قلت حق خدامتنا بصوت عالي

يالله انا بروح اللي يبي ايييي خل يلبس بسرعه يعني الكلام لج يا جاره

اشوفه بكل ادب هد اللعبه و قام يلبس و خلص

نزلت لقيته وراي على طول

العاديه مجابل الشاشه ما يتحرك الا بعد نص ساعه هذا اسرع شي يعني

يمكن تأدب من بعد هالشي

خلاص باجر بسامحه عيل

تخيلو لو باجر انطر يساحلني عشان ارد عليه
بالاخير يهوه يحقرني لوووول

بضحك على نفسي ضحك