امل حق كل وحده زوجها عنده الحيوانات المنوية منعدمة

السلام عليكم

انا وحده يديده بالمنتدى واول مره انزل موضوع وبصراحه منزلته علشان كل وحده منقطع عنها امل الانجاب ابيها تتفائل وتنطر رحمة رب العالمين , ويارب يرزق كل محرووومه بالذرية الصالحه ويفرح قلبها بضناها , قولوا اميييين..

القصة قصة اخوي… الله يحفظنا وياكم والمسلمين قبل 10 سنين تقريبا كان فيه سرطان بالغدد اللمفاوية وبما ان فحوصات الكويت كلها غلط ودينا اخوي امريكا يعالج علاج كيماوي , لما كان بامريكا ما قالوله ان الكيماوي يسبب عقم ولازم نسويلك تجميد للحيوانات المنوية علشان اذا ييت بتزوج تقدر تييب عيال

تم العلاج هناك 6 شهور انذبح بالكيماوي وردينا الكويت وبدت حالته تتحسن شوي شوي ربي لك الحمد
بعد ما مرت السنين وتوظف وعزم على الزواج خطبناله بنت الحلال الي قلنالها ان كان فيه السرطان وعالج و وافقت بس ما كنا ندري ان ما اييب عيال ولا اهيه تدري!!
هالبنت لو اقولكم عن طيبتها واخلاقها قوة ايمانها ما اوفيها ,عليها نظافة قلب تستاهل عليها كل خير واخوي نسخه عنها بس ريال
ماشاء الله اثنينهم نفس الاطباع هاديين وحنونيين وبارين باهلهم ولا يزعلون احد ابد
اول سنة زواج تنبه اخوي ان ممكن يكون العلاج الكيماوي ماثر عليه للحين لان مرته ما حملت وقاله واحد من ربعه روح افحص احتمال ما تييب عيال وراح فحص قالوله انت عقيم والحيوانات المنويه عندك منعدمة!!
انصعقنا بهالخبر وصكت فينا الدنيا
وصارح زوجته وقالها لج الحق اذا تبين نستمر او لا؟ البنت قالت ابد ما انفصل عنك اذا ربي كاتب لنا جذي انا راضيه المهم اني حبيتك ومابي غيرك وهو نفس الشي يحبها بس ما يبي يظلمها …
ظلوا سنتين ونص واحنا ندعي وامي تدعي ونسعي بالعلاج وانا ما خليت دكتور بره الكويت الا وراسلته وقالوا عن عملية زراعة الخلايا الجذعية كعلاج للعقم بس يبيلها وقت لانها في طور الدراسة
امي ما خلت عسل ولا اعشاب ويابتله..
مرته ماشاء الله عليها ما تخلي لا صلاة فير ولا صلاة عيد ولا عشر اواخر وتصلي السنن وتحفظ قران وتعينه على الصلاة مع انه ما كان ملتزم واهيه بعد مو تتخيلونه متنقبه وعباة لا والله الدين مو بالشكل الدين الاخلاق والمعاملة وبالقلب..
المهم راح عند دكتور نسيت اسمه الي تبيه اسالها عنه واردلها خبر, هالدكتور قاله نسويلك كشف على الخصية عملية تضايق بالنسبة للريال وهو حياتي قال اوكي سواها وقالوله نعطيك علاج تستمر عليه وبعدين نشوف نتيجته لان مافي حيواناااات منويه نهائيا!!
وظل على العلاج جم شهر والله وبالله ان ما كمل حتى فترة العلاج كاملة !!
الي صار ان الشهر الي فات قال مرتي متاخره هليها الدورة واهيه دورتها منتظمة ما تتاخر هالمره تاخرت 6 ايام! انا طرت من الفرحه لان كان احساسي ما ينوصف انها حامل! امي مو مصدقة وماتبي تفرح وتنصدم واخوي ومرته كذلك..
عاد انا عندي فحص حمل عشان لا تاخرت علي الدورة احاتي ما انطر على طول احلل بالبيت
قمت يبته لها وقلتلها اشلون تستخدمه واني انطرها ترد علي على طول, اهمه ساكنين في بيت اهلي وانا شقتي يم بيتنا فا امطيحه بيت اهلي
بنات سوت التحليل ونادتني عشان اقراه وكانت لحظة ماتنوصف صج مابي انصدم واصدمهم!
دشيت حمامها تكرمون وشفت التحليل حتى ما حركته من الخوف وتطلع النتيجه!!!
حـــــــــــــــــــــــــــــــــــــــــــــــــ امل!!
والله بنات حزتها هسترت امي تنطر تحت واخوي ومرته يمي ينطروني اقولهم النتيجه!
وانا حامل وشثقلي من الفرحه ريلي ما شالتني خقيت ولميت اخوي وقام يبجي يا حياتي واهيه نفس الشي لمينا بعضنا ومناااااحه .. واي كشت شعرت ينبي وانا اتذكر الموقف
قعدوني عالقنفه لان خقيت مو قادره امشي وامي اصعدت لنا ركضضضض : هااا قولواا!! شنو!! شافتنا نبجي ونضحك دشت معانا عالخط بجي وصراخ فرحه ومناحه ان صج معجزه
والحين الحمدلله دق على الدكتور ماله مو مصدق قاله تعال افحصك سواله تحليل قاله شي لا يصدق من انعدام الحيوانات المنويه الى نسبة طبيعيه حالك حال اي واحد اييب عيال!!
ربي لك الحمد والمنه على عطاياك
سامحوني طولت بس والله ابي كل وحده ريلها نفس مشكلة اخوي تصبر وتعينه وتعطيه امل واهم شي العبادات لا تخلونها والصدقات وكثرة الاستغفار
وربي يرزقكم بالذرية الصالحة يارب ياكرييييم دعواتكم ربي يتمم عليها على خير ويهون علي انا بعد

الله يجزاج خير ممكن اعرف الدكتور

هلا حبوبه
وياج ان شاء الله من عيوني الثنتين اسألج عن اسمه واحطه للاسفاده

الله يعطيج العافيه ويجزاج خير.. بس اختي شنو عطاه الدكتور بالضبط؟ ادويه او ابر .. عطينا تفاصيل اكثر لو سمحتي .

اسم الدكتور / حازم الرميح
موجود بالصباح اذا ماني غلطانه في مركز علاج العقم او شي جذي فترة الصبح
وموجود العصاري بالعياده في مركز الشعب التخصصي
الله يجزيه خير ان شاء الله
+ د/ اسامة صالحة في دار الشفا بعد ممتاز

الله يعطيج العافيه ويجزاج خير.. بس اختي شنو عطاه الدكتور بالضبط؟ ادويه او ابر .. عطينا تفاصيل اكثر لو سمحتي

اهو عطاه حبوب وطبعا لازم اول شي يسوون كشف وفحوصات مثل ما ذكرت بالموضوع
الله يعافيج ويسلمج

وناااااااااااااااااااااااااااسة

الف الف مبروووك الله يتم عليهم ويرزق كل محرومه ياارب ويشفي كل عقيم

الله يبارك فيج حبيبتي تسلميييييييين
امييين يارب العالمين

مبروك حبيبتي

بس بعد اذنج شنو اسم الحبوب؟

وااي صج اتستانست الله يتمم عليهم يارب ويرزقهم اكثر ويرزق كل محرووم

بجيت خخخ

عشت معاج الموقف وعسى الله ايسرهم الخير وتولد بالسلامة وتترسلكم البيت يهال ياااااااااارب

ونفس طلب خواتي شنو الحبوب؟؟

حبايبي مشكوريين والله يبارك فيكم تسلمون على هالردود
بصراحه ماعرف اسم الحبوب والعلاج يكون حسب الحاله طبعا اهوه مثل ما ذكرت العقم كان نتيجة العلاج الكيماوي فأفضل تراجعون الدكتور الرميح وان شاء الله راح بوصف العلاج حسب الحاله وعسى الله يرزق الكل الذرية الصالحة ولا تنسوووون كثرو استغفار وصدقات ودعاء وقيام الليل وما على الله شي جايد

ماشاء الله هذا رزق من الله

الله يتمم عليهم

الاطبه مهما قالوا يبقى الرزق بيده سبحانه

فعلا هذا رزق من الله مو من الدكتور .. الدكاتره هم سبب والرزاق رب العباد.