همسه في اذن كل وحده ناطره الفرج من رب العالمين

أول شي أحب ابارك حق كل البنات اللي الله من عليهم بالحمل
عسى الله يثبت اللي بأرحامهم و يصورهم في احسن صوره و يمدهم بالصحه و يجعلهم من الصالحين البارين
و بقول حق باجي البنات لا يضيق خلقكم ثقوا بالله انه الدور يايكم بإذن واحد أحد.

بس عندي جم شغله ودي اوصيكم فيها.

1- لا تجزعون لا تجزعون لا تجزعون
حبايبي لا حظت وايد بنات مشاركاتهم تدل على انهم فاقدين الأمل حبايبي هذا جهاد. كل وحده فينا قاعده تجاهد و أكيد بتتسكر بويها وايد بيبان. كل ما يتسكر بويهج باب قولي الحمدلله و اتجهي حق الخطوة اللي وراها. و حاولي لا تيئسين. سبحانه اللي خلقنا ما ينسانا أهوا احن علينا من كل اهلنا و طوايفنا .

2- احتسبوا الأجر.
قال رسول الله صلى الله عليه و سلم: : { ما يصيب المسلم من نصب، ولا وصب، ولا هم، ولا حزن، ولا أذى، ولا غم، حتى الشوكة يشاكها إلا كفر الله بها من خطاياه }

3- لا تشتكون إلى العباد اللي مالهم حول ولا قوة:
اكثرنا و انا اول وحده فيكم اول مادخلت المنتدى كتبت موضوع طويييل عريض عن معاناتي و نقزات الاهل
و شلون اتشفق لي شفت ياهل ولا لي زرت وحده والده.
كلنا عندنا هموم نقدر نكتب كتب فيها. بس بدال لا انتشكى حق عبيد الله اللي مابيدهم شي.
نجابل سيادتنا و نقول نفس الحجي لرب العالمين. نقدر؟؟ أكيد نقدر.. جربوها يا بنات و بتحسون بشي مو طبيعي والله يابنات راح تنزل على قلوبكم سكينه و الله راح ينزع من قلوبكم الحزن انا مجربتها قمت من السياده جني جذابه.

ديري بالج: اذا شكيتي حق الناس همج, تراج قاعده تشتكين على رب العالمين عند عباده.

4- ارضي بما قسم الله: أكثر شي يسبب ضغوط نفسيه عليج اهو عدم الرضا و السخط.
(ارض بما قسم الله لك تكن اغنى الناس )و قال تعالى: (فخذ ما اتيتك وكن من الشاكرين).

4- فوزي بمنزله الصابرين:
يابخت عينه اللي يفوز بهالمنزله , قال تعالى: ( ولنبلونكم بشيء من الخوف و الجوع و نقص من الأموال و الأنفس و الثمرات و بشر الصابرين الذين إذا أصابتهم مصيبة قالوا إنا لله و إنا إليه راجعون أولئك عليهم صلوات من ربهم و رحمة و اولئك هم المهتدون)
"إنما يوفى الصابرون أجرهم بغير حساب". تخيلوا انتوا.. ياجماعه والله ابليس يبي يخرب علينا و يبي يحرمنا من هالاجر . الله يكتبنا من الصابرين .

5-المولودون في الجنة:
وإذا اشتهى أحد من أهل الجنة الولد ( الإنجاب ) أعطاه الله برحمته كما يشاء وهذه رحمة لمن حرم الإنجاب في الدنيا ولمن يحرمها أيضا إذا شاء .

6- عرفي إن الدنيا دار ابتلاء.
("الذي خلق الموت والحياة ليبلوكم أيكم أحسن عملاً وهو العزيز الغفور". ) شكثر بتعمرين بالدنيا؟ ليش عندنا طول هالامل و نبي كل شي الريل و الوظيفه الزينه و البيت الحلو و الذريه و الفلوس. يا جماعه محنا معمرين بهالدنيا كلها مرحله من حياتنا و اختبار و مهما طولنا فيها مردنا رايحين و ما يظلنا الا عملنا الصالح.
و طول محنا موجودين فيها راح نبتلى طالعي اللي حوالينج في وحده منهم حياتها كامله؟ كل واحد في هالدنيا عنده هم.

7- كثري من الدعاء:
لا يرد القضاء الا الدعاء و عرفي ان اذا الله ما عطاج اللي في بالج راح يآجرج .
و ادعي في اوقات استجابة الدعاء.و لا تنسين تدعين حق خواتج في ظهر الغيب عشان يستجاب لج و لهم.

و أرجوا اني ما اكون طولت عليكم. بس بطلب منكم انكم تدعونلي ان الله يهديلي زوجي و يرزقني معاه بالذرية الصالحة.
أحــــــــــــــــــــــــــبــــــــــــــــــــك ـــــــــــــــــــــم واااااااااااااااااااايــــــــــــــــــــــــــــ ـــــــد