مرض الكرون المزمن والحمل

السلام عليكم ورحمه الله وبركاته

شلونكم بنات شخباركم ؟

طبعا هذي اول مشاركه لي بمنتدى الحمل والولاده
قلت ودي اسألكم وانشالله تفيدوني

بنات انا عندي ولدين الحمدلله ( الله يخليهم لي يارب )
واكتشفت انه فيني هالمرض بعد ولدي الثاني صارلي سنه الحين والحمدلله مرتاحه على العلاج
واللي فيهم يعرفون علاجه طبعا ( كورتيزون – اميوران – بنتازا – وفيتامين د )

بس بغيت اسأل اذا وحده فيكم حملت وهي فيها هالمرض ؟ تعبتي وايد ؟؟؟؟ يأثر على البيبي ولالآ ؟؟؟
شلون تاخذين الادويه ولالا ؟
وهل تأثر ولا ماتأثر ؟؟؟
والله هالموضوع وايد شاغل بالي … دكتورتي ( امراض نسا ) تقول دكتور الباطنيه اهو اللي يحدد
ودكتوري يقول مايضر بس بيني وبينكم ماني نرتاحه من كلامه
لانه حتى البندول مو زين

ومشكورين ماقصرتو وادعولي الله يشافيني ويشافي كل مريض ياااارب

شلووونج سووسه

انا عكسج تماما ,, انا حامل الحين وهم فيني كرونز ,,, واول مره بجر يعني ماعندي خبره كلش

ورحت اول شي حق دكتوري مال الكرونز تخسبق مايدري شيقووووووول .. وقالي دكتورتج اهيا تحدد وانا هني خلاص مادري شسوي بس ابجي اخاف ياثر على البيبي وهم انا بعد ان ماخذيت علاجي باكلها …

رحت حق دكتوره خالده المجييبل ماشاءالله تهبل وشاااطره .. وكان عندها حالاات كرونز من قبل من الحوامل .. اول مارحت لها قالتلي التزمي بعلاجج ,, انا اخذ بنتسازا ,, قالتلي اخذييييه وومايسبب تشوه ولا شي .. وقتلها ان بالورقه مالت الدوا مكتوب يفضل عدم استعماله قالت حتى البندول تبطليينه بيكتبوون نفس الشي ,,, قاتلتلي اخذي دوااج وان ما التزمتي احتمال يصيرلج ولاده مبكره ,,, وقالت بعد في بعض الحوامل بنضطر نعطيهم كورتيزون لانهم مايمشون على العلاج خايفييين ياثر على البيبي عرفتي ؟؟؟

قالتلي متى ماصارت صحتج زييينه البيبي بيكون صحته زييينه

انتي لا تحاتييين وقالتلي ان ردلج نشاط بالامعاء تقدرين تروحين طبيبج يشووفج ..

بنات شنو اعراض هالمرض؟

حبيبتي اول شي مبروك عالحمل والصراحه موسامعه عن هالمرض ويارب يشافيج

قولي امين يارب انشالله ماتحسين بشي من اعراض المرض ويكون عليج بردا وسلاما يااارب والله انا حاسه بمعاناتج لاني مجربه الالم يقطع القلب
انا دكتوري قالي ماتضر الادويه بس انتي تاخذين اميوران ؟؟؟؟؟ اهم دوا هذا

الله يشافيكم يا رب
ويتمم عليكم

حبيبتي هالمرض الله يبعده عنج عباره عن خلل في المناعه للجهاز الهضمي وهو يصيب اي جزء من الجهاز الهضمي من فتحه الفم الى فتحه الشرج ( اجلكم الله ) ممكن يضرب اي مكان وهو عباره عن تقرحات
اهم شي بالمرض انه مزمن مايروح ولا له علاج اما كل الادويه اللي قلتلها قبل شوي يخففون منه او يحاولون يسيطرون على المرض بس اهو بدون سبب وينشط ويخمل بروحه بدون سبب والشي اللي لازم يعرفه كل من يعاني من هالمرض انه الامه مبرحه جدا ( حتى دكتوري يقول رياييل مايقدرون على هلالم )
اعراضه مثل ماقتلج الم حاد في البطن – اسهال ( عزج الله ) – ارتفاع بدرجه الحراره قد تصل الى القشعريره ( مثل اللي صار فيني ) – دم مع الخروج في الحالات المتوسطه الى الشديده – الم في المفاصل – ضعف عام واحساس بالخمول- يخلي الواحد عرضه لالتقاط اي مرض يعني يصير مافي مناعه لانه اهو بالاساس مرض مناعي مثلا الانفلونزا – الاحتقان
وساعات يسبب التهاب العين او الكلى وشي يأدي الى شي
وطبعا اكيد يسبب فقر دم
وهالمرض مايتم تشخيصه الا اذا سوو منظار وخذو عينه وحللوها يعني مو اي احد يعرف
لاني في البدايه وايد عانيت اللي يقولي غازات واللي يقولي نزله معويه
وبسسسسسسسس الله يبعده عنج وادعيلنا

الحمدلله على كل حااااال

حيبتي اختي فيها هالمرض والاعراضه ترجيع واسهال مزمن ياقلبي والله اختي من تحمل يختفي المرض عنها تقول انا ارتاح لمن احمل والحمدلله جابت 3 عقب مرضها ماتعبت كلش كلش ومافيها الا العافيه حتى اميوران كان يشوه الجنين وهي تراجع عند دكتورها الشمالي يقول ان عضو بمريكا مادري بريطانيا وحضرت الندوه والمؤتمر وطلع كلش ما يأثر على البيبي ولا يسبب تشوه وبحمالها الاخير كلته والحمدلله يابت بنووته شحلاتها مافيها شي لاتحاتيتن ياقلبي بس هي لمن الحين تخذ كرتزون والعلاجات للي ذكرتيهم تطمنووو انا عايشه وشايفه نفس حالتكم والا اهي اختي اختي وماتشوفون شر واجر وعافيه والله يعينكم ويشافيكم من هالمرض

الله يشافيكم ان شالله

وان شالله مايضر الجنيين

حبيبتي اشكر مرورج بس انا مو حامل
احاتي اذا حملت شلون بيكون الوضع لانه ادويته وايد هالمرض

توتي وحشمه ماتقصرون على هالدعوه الحلوه فديتكم

يارااا سبحان الله دكتوري قالي هالمعلومه انه في ناس مع الحمل يختفي المرض وناس العكس يزيد عليهم بالحمل ويأذيهم وايد
والحالتين صارت معاي بولدي الاول ماحسيت فيه وبولدي الثاني بغيت اموت فيه تعبت حيل ومرتين دشيت المستشفى بس ماكنت ادري انه فيني كانت فيني كل الاعراض من قبل لا اتزوج وماقلت حق احد انا خوافه بعدين عقب ما اكتشفت هالمرض عرفت انه فيني من زمان لانه اعراضه من زمان فيني
الحمدلله على كل حال وربي يشافي اختج انشالله ومشكوره على الدعوه الحلوه وربي مايجازيج بمثله انشالله

لا ما اخذ اميوراان ,, بس بنتاسااا ,, واانا كنت مسويه عمليه استئصال امعاااء ,, ماكنت فاهمه ان المرض مزمن من شوس اصير زينه افج عنه لييييييييييين خلاص صرت هيكل عظمي ما اكل وان كلييت رجعت واخخرتها رحت مستشفى الامريكي بدبي وقالوللي لازم جرااحه لانه عندي انسدااد وهالسالفه صارلها 4 سنين ومن يوومها الحمدالله حالتي مستقره ولي يومج

منو بعد فيها و حامل تعالو

اخواتي في وحده فيكم كان عندها هالمرض قبل الزواااااج …………. ارجو الرد وجزاكم الله الف خييير