|
|
.
.
.
.
.
قوه يابنات …
قبل لا تطلعين من المستشفى .. و تروحين بيت اهلج ..
الزوج لازم يجيب هالأشياء الضروريه للنفاس ويحط أهلج أمام الامر الواقع .. لأن كل ابو و أم .. ما تحب تكلف على زوج بنتها .. بس مايجوز لأن المره مسؤوله من زوجها .. و إذا عندها بعد عيال و خدامات .. هم بتكون حمل ثقيل على أهلها …
و لا تنسون في بنات أبوهم متوفي و في بنات إخوانهم يصرفون عالبيت .. حتى لو الحاله على قولتهم مرتاحه .. لازم يتعود الزوج إنه يصرف على زوجته وعياله .. و هالشي يخلي الزوج يعرف المسؤوليه ولا يعتمد على الزوجه و أهلها بكل شي ..
.. هالأشياء للي أول مره والده ..: و إذا عندها عيال .. يضيف حوايجهم اللي تعرفها المره ..
فوط صحيه كبار للولاده
كلينكس
قطن أذون
صابون أطفال
شامبو اطفال
بودرة اطفال
فازلين
كريم اطفال
رضاعات مقاس 2 و مقاس 4
فرشة غسيل الرضاعات
غوري لغليان ماي البيبي
مطاره لماي البيبي
حليب البيبي
ماي صحه صغار ( لمن تسخنين الماي حطيه مغلي بالمطاره ومتى ما بغى الجاهل يرضع حطي نص حار و النص الثاني ماي صحه بارد ) لأن إذا بتنطرين يبرد بيصيح الجاهل و هالشي مو زين و إذا بطلتي المطاره بتدخل الجراثيم هالطريقه أسهل .
الماجله:
ذبيحه ( يما تخرح الكلمه ) … خروف حلو و صغير عشان يذوب بالمرقوق و القبوط ..
كرتون دجاج ..
خيشة عيش كبيره ..
كيس متوسط ماش حق الشوربه و العيش ترا مفيد يابنات مع الشوربه دايما ضيفو 3 ملاعق أكل ماش يثقل المعده بس ما يقث و لا يزيد الوزن .. و يدفي البطن و ينزل وصخ البطن و هالشي عن تجربه..
6 طحين أبيض و 6 طحين أسمر ..
خيشة شكر متوسطه ..
ملح..
فلفل أسود
كركم
شاي ..
زعتر ( مو مال الفطاير لأ اللي ينشرب )
سمنه إذا إنتي من النوع اللي يفضلها ..
أو زيت زيتون أو زبده و هاذي ضروريه حيل .. لأن الدويات اللنفاس مثل المردود .. لمن ينحط على المرقووق و القبوط لازم معاه دهن ..
بطاط كرتون
طماط كرتون
ثوم كرتون
بصل خيشه
شابوره حق الجوع لأن النفسه لازم ما تحس بالجوع و لا تجوع نفسها .. الشابوره ممتازه تاكلينها ليل نهار ما تخرب نفاسج و لا تترس بطنج يعني ما تشبعج بالمره و لا تخليج ميته من الجوع خصوصا اول 20 يوم
بعد ال25 يوم …
تبلشين سلطات بدون ليمون و خل …
ملح و فلفل ضروري..
الأكل من المطاعم عادي ..
الساندويش كلها عادي ماعدا الأسماك .. و الليمون ..
أهم شي سندويشات الشاورما و المشويات حاولي تخلينهم بخبز الصاج أو لبناني لاتاخذين صمون ينفخ البطن و ينزل الكرش …
الشوربات كلها أوكي ماعدا اللي فيها حوامض ..
القرع ممنوع و الاميه ممنوعه و الموز ممنوع و أي شي فيه لزوه و رخاوه ممنوع لي بعد 50 يوم ( تحديدا بعد وخية النفاس و للي لايتحدثون البدويه أول دوره بعد النفاس )
و بنات الله الله بالمرميه للي تبي تنشف صدرها من الحليب ..
و اللي ترضع تبتعد عنها ترا خطره عالجاهل …
و دوا الغوري شريبه بعد الريوق ..
وبعد العشا …
وإذا إشتهيتي حليب .. لازم مخلوط بشاي …
بنات هالنظام آنا جربته ..
والله ممتاز….
و إذا أبو العيال بيزيد بكرمه فهالشي راح يزيد غلاه بقلب مرته و يكبر قدره بعين أهل زوجته ..
بالتوفيق .
تسلمين اختى
ربي يعطيج العافيه
فعلا موضوع متكامــل
مشكوره علي الموضوع المفيد
احنا نفسكم
بس الغوري ماطاف علينا
وعننا الحسو بعد والقرصان وهالاشياء
والموز عادي ناكله بعد الاربعين
واذا يت اخت نفاس نرد نفاس نفس الشي
والزعتر ماينشال من الطاوله ليل نهار نشربه يطلع الماي الزايد من الجسم
مشكورة وتسلمين عالنصيحة الطيبة
الله يعطيج العافيـــــ ــــه
ماقصرتي
يعطيج العافيه
..
.