يا امهات وابهات سهلوا زواج بناتكم اذا تبون لهم الزواج والستر

السلام عليكم ورحمة الله وبركاته

الهمني موضوع وحدة من الخوات بالقسم عن مواصفات الزوجه اللي يبيها اخوج او اي احد تعرفينه وقلت لازم اتكلم بموضوع ولا بنفجر

يا امهات ويا ابهات ليش تكونون سبب في عنوسه بنتكم خنقولكم ليش انا قاعدة اقول جذي

اول شي خنقولكم عاداتنا احنا الحضر والسنة لان لكل مذهب او طائفه او قبيله عادات تختلف عن الباجي بس انا احدد الحضر والسنة لان احنا منهم وبقولكم امثله عن اللي راح شافهم اخوي وخربوا اهلم على بناتهم ..

عاداتنا :
ام الخاطب وبنتها او اختها او ايا كان يدقون على اهل البنت اللي بشوفونها وياخذون منها موعد باليومين القااادمين مو بالشهرين ولا بالاسبوعيين وعقبها يروحون لاهل البنت وفي ناس ياخذون ولدهم معاهم مرة وحدة واحنا منهم علشان اهو اللي بيختار البنت مو امه ولا ايا كان من اهله يعني يشوفها شوفه شرعية ويمكن يوافق ويمكن لا ونفس الشي للبنت .. يعني ما نطوول الموضوع واذا تمت الموافقة ((المبدئية )) من الطرفيين .. يبتدون اهل البنت يسألون عن الولد واخلاقه وحدهم اسبوعين واذا ما عجبهم دقت الام وقالت ماكو نصيب او اذا عجبهم وافقوا ويكون هذا رايهم ((النهائي ))

نيي للموضوع الاساسي :

صارلنا فترة ندور حق اخوي بنت الحلال اللي تناسبه ويناسبها واغلب اللي امي اتصلت عليهم يتكلمون مع امي بنفسية جنه امي تطر منهم يعني المفروض الام تهلي وترحب ان بتيي لبيتها ضيفه ومو معنى ان الام قاطه بنتها بس كتعااامل واحترام لازم ان تهلي وترحب علشان ام الولد تاخذ فكرة طيبة عن الناس اللي بروحون لهم كزيارة لاول مرة وعقب تبتدي ام الولد تسأل ام البنت عن بنتها وام البنت تسأل ام الولد عن ولدها وياخذون معلومات عن اللي متقدم والمعلومات تنحصر هني عن (اسمه وشهادته وعمره ومكان شغله ) وام الولد تاخذ نفس المعلومات عن البنت لان اهي شوووفه بالنهاية مو موافقة على الزواج

خنقولكم نماذج من اللي دقت عليهم امي

وحدة تقول لامي بنتي عندها امتحان باجر واللي عقبه راحه والخميس معزومين واليمعه عندنا زوارة اهلي والسبت عندنا زوارة اهل ابوها .. خلاص على الاسبوع الياي ان شاء الله
تعليقي عليها من صجهااا ولا تتغشمر خو اخوي بيي يشوفها 5 دقايق ونطلع ويمكن يصير نصيب ويمكن لا .. فليش الطواله بالموضوع وشدعوه ما عندهم 5 دقايق للناس يشوفون بنتهم .. اللي يبي يسهل زواجه بنته ما يقول هالكلام

وبعدين االريال ما طلب يتزوج الا اذا كان خلااص عازم النية وما يبي يطول بالزواج واذا ما عجبته ندور غيرها على طول شحقه نطول بالموضووع والزواج قسمه ونصيب

والثانية تقول لامي خناشاور ابوها وارد لكم خبر ودقت علينا ثاني يوم تقول قاعدين نبني بيتنا تعالوا الاسبوع الياي وما حددت لنا يووم وبعدين قالتلها امي ليش مو هالاسبوع يعني قصدها امي ببيت اي احد من اهل البنت مو معقوله ما عندها اهل يعني ما ننطر لين يخلص البيت بنيانه وتأثيثه جان ترد ام البنت بمعنى خل نلقى لنا مكاان بالاول وبعدها باسبوعين دزت لامي مسج حياكم الله
شدعووووه تراها مو خطبة رسميه .. مجرد شووووفه ويمكن تعجب ويمكن لا ولااا شارطه علينا لازم البنت تكمل دراستها .. زين ما حددت موعد العرس بعد .. انزين احنا ما شفنا بنتج ولا شي وهم شارطه قبل .. اي نطري خل يصير عالااااقل موافقة مبدئية بعدين شرطوا على كيفكم وبعديين منو اللي الحين يمنع زوجته من الدراسة .. احنا باي زمن !!

والثالثة راحولهم وطلعوا مطلعين سيرته الذاتيه كلهاا واصلنا وفصلنا وتسأل امي منو خوالج @@ ولما اخوي دش عند ابو البنت بالصالة الثانية .. الابو ما تكلم بحرف وحاط على المصارعة بالتلفزيون ومجابلها ما ادري اهو تهديد حق اخوي ولا ما يعرف يسولف انزين حتى ولو .. ما في قناه افضل من قناة المصارعة !!
وام البنت شعليها من خوال امي واهم عليهم من امي ما دام انها كويتيه وبنت اصل وفصل سؤالها حده اي شي .. مع ان يقولوون البنت خووووش بنت شكلها بس اهلها مو مضبوطين .. وبعدين المعرووف ان السؤال ايي بعد الموافقة المبدئية .. شحقة يسألون عنه ويمكن اهو ما يعجب البنت من الشووفه وحتى لووووو ما عجبهم الولد عقب ما طلعوا رقم فنيلته الداخلية وحددوا موعد الشوفه .. هل راح يدقون لام الولد ويقولون لها لا ما تييين ما عجبنا ولدج !! هذا من شيم اهل الكرم يطردون ضيوفهم من بيتهم عقب ما يتفقون على موعد .. انا توني متزوجه زوج احمد ربي واشكره عليه ليل ونهار .. قبل لا ايي يشوفني سمعت من ناس ما يبون لي الخير انه موزين وطلعوا عيووب مع ان احنا ما سألناها بس اهي قالتلنا عنه ورحت وقلت لامي ما ابييييييه ولا اييون بيتنا بس امي قالتلي ميخالف حتى لو ما تبيينه لازم تقعدين انا عطيتهم موعد وبزورونا .. عييب ادق عليهم واقولهم لا تييون واهم ضيوف عندنا .. وسكت ولما شفته وسألنا عنه عدددل طلع واايد محترم الحمدلله وخووش ريال

والرابعة ام البنت تقول لامي اسأل ابوها واهلها وارد لج خبر .. خو الشووووفه حلااال وبوجود اهلهم واذا ما عجبكم فيه شي .. تقدرون ترفضون عقب ما يشوفها خو ماكو شي غصب

وللعلم كل اللي شاافهم خووش بنات بس اهاليهم مخربيين عليهم

بالنهاية اقوول اللي يحب بنته ويبي لها السعادة يسهل بتزويجها واكييييد للي يستاهلها
وخنقولكم شي من الواقع .. البنات الحين اللي عمرها 16 ودها تتزوج وتستقر وعموما ما في بنت ما ودها وبنات الحلال واايد يعني مو واقفين على بنتكم بالمعنى الصريح فلا تكونون انتوا سبب في عنوسه بناااتكم

شوفي بالنسبه للي تتشرط على الدراسه او غيره فيمكن تبي تختصر عليكم عشان اذا قلتو لا .. لا تفتح بيتها وتدخل الناس وتالي مايصير نصيب او يصير خلاف على هالنقطه عرفتي ..؟؟
يعني انا قبل لا اتزوج كانو يدقون على امي يسئلون البنت وين تشتغل وجم عمرها وشنو شهادتها بس جم سؤال اهما يعتبرونهم مصيرين عشان اذا ماناسبهم هم مايتعنون ويطقون درب ويدشون بيت الناس وتالي يصير احراج ويكون مافي نصيب
خاصه حق البنت ترى البنت مو نفس الريال يلبس دشداشته وغترة ويدش بيت الناس يشوف البنت
البنت غير كشخي ولبسي وطلعي بدله هذا غير التوتر والاحراج وغير الحلو والجاي والقهوه وبعض الناس يدقون على الخاله او العمه يطلبونها تكون موجوده لان الام يكون ماعندها خبره او تستحي من هالمناسبات بروحها ..
عرفتي ..؟؟
ومعاج حق انا اعرف ناس ياخرون سالفة الشوفه جم يوم عشان لا يقولون مستعيلين وماصدقو يحبون يتعززون شوي ..
وهاذا مايعني انهم مو خوش ناس لا اهما تفكيرهم جذي وهالشي عادي
واعرف ناس مايرضون اي ريال يدش بيتهم لازم يسئلون عنه ويطلعون برنت ويعرفون كل شي عنه قبل لا يدش البيت مادري شنو الهدف بس وايد وايد ناس اعرفهم جذي .. اللي يدش بيتهم هاذا انسان مثالي بدون شك ..!!
بس سالفة النفسيه الخايسه والرد من طرف الخشم هاذي ماتشوف شر وحتى بانزين حرام تحرقونه بالطريج حق بيتهم ..
واللي يشوف مصارعه هاذا شي ثاني حمدالله والشكر من صجه ..!!

اقتباس:

المشاركة الأصلية كتبت بواسطة Patcholli حبيبتي هالامور تصير باغلب العوايل الكويتيه شوفي بالنسبه للي تتشرط على الدراسه او غيره فيمكن تبي تختصر عليكم عشان اذا قلتو لا .. لا تفتح بيتها وتدخل الناس وتالي مايصير نصيب او يصير خلاف على هالنقطه عرفتي ..؟؟ يعني انا قبل لا اتزوج كانو يدقون على امي يسئلون البنت وين تشتغل وجم عمرها وشنو شهادتها بس جم سؤال اهما يعتبرونهم مصيرين عشان اذا ماناسبهم هم مايتعنون ويطقون درب ويدشون بيت الناس وتالي يصير احراج ويكون مافي نصيب خاصه حق البنت ترى البنت مو نفس الريال يلبس دشداشته وغترة ويدش بيت الناس يشوف البنت البنت غير كشخي ولبسي وطلعي بدله هذا غير التوتر والاحراج وغير الحلو والجاي والقهوه وبعض الناس يدقون على الخاله او العمه يطلبونها تكون موجوده لان الام يكون ماعندها خبره او تستحي من هالمناسبات بروحها .. عرفتي ..؟؟ ومعاج حق انا اعرف ناس ياخرون سالفة الشوفه جم يوم عشان لا يقولون مستعيلين وماصدقو يحبون يتعززون شوي .. وهاذا مايعني انهم مو خوش ناس لا اهما تفكيرهم جذي وهالشي عادي واعرف ناس مايرضون اي ريال يدش بيتهم لازم يسئلون عنه ويطلعون برنت ويعرفون كل شي عنه قبل لا يدش البيت مادري شنو الهدف بس وايد وايد ناس اعرفهم جذي .. اللي يدش بيتهم هاذا انسان مثالي بدون شك ..!! بس سالفة النفسيه الخايسه والرد من طرف الخشم هاذي ماتشوف شر وحتى بانزين حرام تحرقونه بالطريج حق بيتهم .. واللي يشوف مصارعه هاذا شي ثاني حمدالله والشكر من صجه ..!!

حبيبتي صح من حقها انها تشرط انها تكمل دراستها وتشرط باللي تبييه .. بس عقب ما تشوف الولد واهو يشوفها اذا في موافقة مبدئية من الطرفين هني تقول الام موافقتها لام الولد وتشرط انها تكمل دراستها واهم بعدهم عالبر

وصح كلامج ان يكون في اسئلة عامة من الطرفين ام البنت وام الولد قبل الزيارة عن الشهادة ومكان الشغل والعمر .. بس انها تشرط تكمل دراستها اوول مرة اسمع وقبل لا تصير الشوفه

وللعلم انا انخطبت وااايد ووايد يو وشافوني من قبل وما صار نصيب سواء مني او منهم ولبست وكشخت ولوويه صح بس هذي البنت .. بسن الزواج تصير فاترينه الكل وده يشوفها والكل يعجب فيها واذا قلتي ان ما يصير كل من يتطمش ويمشي .. اقولج البنات تشوفينهم بالمجمعات والجمعيات وكل مكان يروحون وطماشة للي يسوى وما يسوى بكل مكان وما تقدرين تقولين لهذا ولا ذاك لا تطالع بنتي .. بس هذيلا غير طاقين الباب ويبون يشوفون البنت جدام اهلها وعلى سنة الله ورسوله وهذا ما فيه شي
وعموما احنا ما نرد الولد من البداية اذا سمعنا انه دارس ومتعلم وفيه مواصفات مبدئية خذيناها من الام انه خوش واحد .. والسؤال عن الولد ايي برايي بعد الموافقة المبدئية وهني صج من حقهم يسئلون كل الناس عنه وما يخلون احد ما يسئلونه لان بنتهم غاليه بعد

واللي يطلعون برنت عن الولد قبل الشوفه الصراحة ما عندهم سالفة واحسها عييب لان الولد ما وافق على بنتكم ولا بنتكم وافقت عالولد .. تخيلي ثاني يوم ولدج يقولون له بالدوام ترى واحد يه سأل عن اخلاقك واهو من العايلة الفلانيه .. ويكون الولد ما عجبته البنت ورفضها .. فشله جدام ربعه بالدوام او الديوانية او الييران ان يه وسألوا عنه .. وكل ما راح يخطب ونفس الحالة تتكرر

ومشكورة على ردج

اقتباس:

المشاركة الأصلية كتبت بواسطة ام الدرر ماقصرت باتشولي وحبيت اضيف انه في بيوت ماقط مرت عليهم سوالف الخطبة فمايعرفون يتصرفون والناس اطباع حبوبة مثلا اعرف وحدة ماعليها قاصر وصغيرة وتوها متخرجة بشهادة يالها واحد منفصل عقب زواج استقبلوهم اهل البنت وضيفوهم ورحبو فيهم وهم يدرون ان مافي نصيب

حبيبتي انا طارحه هالموضوع لان ودي الابهات والامهات يتوعوون من هالناحية وحتى اللي توهم صغار يقرون الموضوع ويتعلمون للمستقبل لان اكيد بيوم راح يكبرون وعيالهم يبون يتزوجون

وحبيبتي انا ما اقصد كل واحد يدخل بيتنا عادي حتى لو ما نبيه .. انا اقصد ان تعرفون عنه عالاقل معلومات بسيطه من ام الولد مثلا مطلق عنده عيال موظف او لا وشهادته شنو ووو الخ يعني من الاسئلة المهمة وتكونون موافقين مبدئيا على المعلومات اللي عطتها لكم ام الولد ومن اول اتصااال وقبل ما تعطون للناس موعد تقولون لهم لا والله ماكو نصيب وهالشي مو محرج ولا شي بالعكس احسن ما اييون وترفضونهم عقب

اسعدني ردج .. شكرا

اقتباس:

المشاركة الأصلية كتبت بواسطة مسؤولة تعيين شوفي حبيبتي الحين الزمن يخرع والشبااب صاروا فاهمين الزواج غلط والطلاق على افا من يشيل فمن حق الاهل والبنت يتشرطون ويكتبون شروطهم بالعقد

وانا معاااج باللي قلتيه كله .. بس متى يكون السؤال عن الولد وتحطون الشرووط .. يكون بعد الموافقة المبدئية هذا المفرووض مو قبل الشوفه

اقتباس:

المشاركة الأصلية كتبت بواسطة لمى الهاجري كانج تتكلمين عني والله هلي مصعبين الزواج كل شي ممنوع اذا رجال خليجي من خارج البلد ما يرضون وشروط اهى اهى

الله يهدييهم يا رب ويسهلها عليج وتتزوجين وترزقين بالبنين والبنات اللي يفرحون قلبج

اقتباس:

المشاركة الأصلية كتبت بواسطة معلمة شيسمونه في نقاط ذكرتيها اتفق فيها معاج وفي شغلات ثانيه اشوف انها منطقيه يعني مثلا سالفة طريقة الخطبة هذه طريقة كل اهل الكويـــــــت واللي غير جذي شوفي من وين جايبينها اما بالنسبة للنفسية الخايسة هذه تربيتها مفروض مثل ما قلتي ترحب وتهلي بس يكون مجرد شوفه وتعارف لانه ماكو شي وبالنسبة للمعلومات على قولتج حتى رقم فانيلته الداخليه اقووووولج دامكم عارفين ولدكم ماشي بالسليم شحقه تزعلون حققققققققققققققققققق البنت تسال عن كل التفاصيل .. هذا زواج وعمر مو لازم يكون الموضوع سطحي وخلاص ما اشوف انه الاسئلة الدقيقة تزعل اما موضوع اللي أخرتكم على ما تخلص بنيان بيتها اجلت اسبوعين مثل ما ذكرتي ما فيها شي شوفوا غيرها وان دقت عليكم عقب ردوا لها هم هي معذوره وين بتحطكم هي كانت بتقعدكم بمكان مرتب مو بهذله وما تدري ان كانت الناس تتقبل هالفوضى او لا ؟ ولما دزت رساله عادي احنا نسويها لانه الوضع يكون شوي محرج … انا امي استحت حتى تتصل يعني عادي راعوا هالشي دامكم تبون تخطبون مو اي شي يزعلكم دام محد غلط بحقكم يعني دامج تطلبين التساهيل من صوب اهل البنت لازم انتم بعد تتساهلون معاهم وبالنسبة لشرط الدراسه …. هذا شرطي انا وشرط عايلتي .. اي ما زال ازواج يمنعون زوجاتهم من الدراسه وهي ما تدري شنو تفكير وعقلية ولدكم واللي اوله شرط اخره نور وهذا حق ما يزعل وشكثر اعرف بنات كلهم محرومين من اكمال تعليمهم بسبب الزوج وغيرته !! فلا تستغربين من هالشرط اختي انا شخصيا رفضت شخص لانه يبي يطلعني من الجامعه وانا كنت مخلصة سنتين وباقي لي سنتين علشان هو يكمل دراسته !! ولا تقولين المتعلم غيرررررر تراه يحضر رسالة ا لدكتوراه بالهندسة الكيميائية !! يعني ما عاد العلم يميز شخص عن غيره لكــــــــــن العقل والاخلاق هي اللي تميز وباقي النقاط من تسفيه .. والمصارعه .. وهالشغلات عييييييييييييييييب واجب انه يحترمووونكم ويقدرونكم .. هذه المتعارف عليه وموضوعج حلو كنقطة نقاش فيها وعــــــــــــــي كبير ارجو تتقبلين كلامي بصدر رحب اختي وجزاج الله خير

حياتي من حق البنت واهلها وطوايفها يسألون عن الولد بعد وهذا حق البنت علشان ما يقع الطلاق او القرار الغير سليم وماكو شي يزعل اكييد .. بس مو حلووة ان اهل البنت يسألون عن الولد قبل الشوفه واقري ردي على Patcholli علشان تعرفين ليش عيب بنظري .. وانا اسألج .. ليش اهل البنت يسألون عن الولد واااايد ويسببون له احراجات بالدوام ومع المقربين والييران وامام المسيد ووالخ وبالاخير الولد ما يعجب البنت والبنت ما تعجب بالولد !! .. ويكون بالاصل الولد ما قال لاحد انه قاعد يدور له على مره مع امه واخته مثلا

واللي اخرتنا علشان بنيان بيتها .. حبيبتي في بيت اختها او اخوها او عم البنت او او الخ .. ليش يأخرون الولد وامه وليش ام البنت تفوت فرصة على بنتها ويمكن تضيع منها اذا كان الولد لؤطه مثل ما يقولون وخوش ريال واحنا ما زعلنا علشان دزتلنا مسج .. بالعكس عادي عندنا .. بس احنا معارضين على سالفة التأخيير اللي مالها معنى

وبالنسبة للدراسة .. من حق البنت تشرررط اللي تبييه ومحد يعترض بس تدرين متى !! .. التوقيت هني اهو اللي انا معترضه عليه .. المفروض تشرط عقب الموافقة المبدئية مو قبل الشوفه حتى وما يندرى اذا لهم قسمه ونصيب او لا

فحرام الام تضيع اي فرصة على بنتها بحجج ما ادري شلون صايره
انا بنت ومريت بمواقف البنات مع الخطاطييب وايد بس عمري ما شرطت قبل الموافقة المبدئية ولا مر علي وحدة من اهلنا اشرطت قبل الشوفه

اقولج شي .. وحدة قالت لامي قبل الشوفه ترى اذا صار نصيب الملجة بعد شهرين @@ تقول لاني بسافر

وشاكره لج مرورج وردج

بس برايي مو كل اللي قلتيهم غلطانين

بالعكس .. اكو ناس ما تبي تجرح البنت .. تقول لكم شروطها من الاساسيه .. ما يبون اتيون وتتعنون والبنيه تكشخ وتعيش جو .. وبالاخير ماكو نصيب

ويمكن بعد تكون هالبنيه خطبوها وايد .. فا تكره امها انها كل شوي يشوفها الريايل ويقعدون معاها

عادي اختي والله الموضوع اشوفه طبيعي

انا اختي انخطبت ويه شافها .. امي بالاول ما سألت ولا شي بس عقب ما شافو بعض قالوا لأمي يبيها تتنقب واختي رفضت قالت من الاول اهما سائلين وقلنالهم البنت مو منتقبه ولا مستعده … يعني لو قايل من الاو انه شرطه تتنقب او تلبسه جان امي قالت لا والله النبت مو مستعده ويقرر عاد ايي ولا لا

مو حلوه هالسالفه

عرفتي ليش الناس تشرط؟ علشان ما ينحطون بهالمواقف