امى تغيرت علينا والسبب .!!!

سلااام:

خواتى ابي منكم شغلتين ..
1_تقرون القصه كامله لانها طويله وراح تنصدمون ………..!!!
2_لاتردين الا لمن تخيلين نفسج مكانى شنو ردت فعلج واشلون تصرفين ؟؟
انا بالاول بقولكم نبذه عنى وعن اخوانى,,,, انا بدويه مالي عمام بس لي خاله وماعندها بنات ……
الموهم لي خوات متزوجات بالسعوديه وفي منهم بيت اهلي بنوتات …اخوانى متشددين ممنوع سايق_ تكسي _سفر برا الديره من غير محرم <<مو طواعه لا بس اهم جذيه عندهم عيب …..

طبعا اخوي الكبير متزوج وحده بنت حلال ……..حبوبه

اخوي الثاني متزوج وحده امها لبنانيه بس ابوها منا (ولد عم ابوي)…طبعا كانت علاقتنا زينه احنا يالخوات وامى بعد اخوي ماتزوج اللي امها لبنانيه اسميها (امل) من اول يوم دخلت علينا تتكلم عن اهلها انهم :

1- اهلي فري….اخوانى ثقه….احنا نسافر بطياره بروحنا نطلع مع سايق تكسي عادي….<<طبعا لانها شايفه ان احنا غير
طبعا وكل يوم مع امى احنا واحنا واحنا مدددددددددح باهلها واخوانها مع العلم اخوانها 8 كلهم عاطلين عن العمل مالهم خلق يدامون تعطيهم الدوله مبلغ بس مادري جم ؟؟ وعايشين علي هالمبلغ وخواتهم مدرسات يصرفون عليهم ولمن سالتها قالت عين <<لازم تمدح مع انا قبل لاناخذهم كانوا الناس يقولون فاشلين ومو سنعين …..بس اهى رقعتها انها عين صابتهم …

طبعا امى بدات تغير وطارت فيهم وحبتهم وكل ما اخذت شفتيهم يووووووه السنع والدلع والحريه ,,,,اخوانكم ترضون تروحون بطياره بروحكم ؟؟ اخوانكم يرضون تركبون تكاسي والا مع سواقين ؟؟ طبعا امى بدات وتمنت تاخذ واحد من اخوانها لاختى الجامعيه …..وقلت انا وخواتى المتزوجات يمه حرام مو موضفين قالت الله بيرزقهم وليش الغيره والحره بدات علي خواتكم هذيلا يهبلون وحريه والا تبين مثل اخوانج ……..طبعا سكتنا لانها طايره معاها والله يابنات جلسات لصبح سوالف الموهم غيرت نظرت امى وخواتى (اللي مو متزوجات)بعد صاروا معاها بعدها بفتره نويت اولد عند امى ولاحظت انهم حيل معاها جنهم ظلها وجاء واحد من اخوانها وخطب وامى طارت من الفرحه وقلنا لها حرام اختى جامعيه تاخذ عاطل <<<<وتشن امى وخواتى علينا هجوم لانا قلنا هالراي انتم يالغيرانات يالحقودات ماتبون الخير لخواتكم الموهم بدات امل تنتبه ان خواتى وامى تغيروا علينا احنا يالمتزوجات وبدات تصير معاهم ولاحظت التفرقه وامى من غلاهم بدات تعلم مرة اخوي عن ازواجنا ومشاكلنا سابقا وان اختى الكبيره زوجها متزوج عليها وسوالفهم من طق طق لسلام عليكم ….ولمن لاحظت ان خواتى يولدون عند امى بدات تحرش امى ليش مايولدونبيتهم المفروض لو امى مكانج تطردهم خلاص حريم محد يتحملهم انتى مره كبيره <<خايفه علي امى اكثر منا وامى تعالوا شوفوها انتم ماتحسون فينا حتى امل ناس تفهم وتقدر ذبحتونا كل سنه وحده والده عندي مع ان قبل اصلا تزعل اذا ماولدنا عندها ….وخواتى بعد بدوا يطقون عيالي وينرفزونى ……يتبع السالفه طويله

انا ما اقدر اروح لبيتي لانى خلاص واصله وابي اولد ومادري شقول لزوجي اذا برد …..بس فعلا يابنات انضغطت ,,,,تخيلوا يدخلون الدار مع بعض ويسولفون عن تجهيزات الزواج وامل كل شيء شافته حتى السراويل شافتهم ماخلوا شيء كانها اخت العروس وقلت لامى مايصير مو لهدرجه قالت الناس فري ماعندهم تخشخش مع انى اشوف بعيونها الغيره واهم غرقانين وطايرين بالناسل اللي فري …….وامى كل ماطلعت قطت علي كلام يجرح ها ليمتى بتولدين عندي شوفي الناس السنعه ام امل مايولدون عندها قلت مايخالف يمه بس هالمره بعدها بصير نفس هالسنعين وكنت اقول لامي يمه ديري بالج من امل وربي اول مايوقف بطريج اختى اهى وكانت تقول امى مالج شغل غيوره انتى وخواتج علشان طحنا بناس فري حاسدين اختج علشان طاحت عليهم وراح تونس وتسافر لبنان حالها من حالهم والا انتم اهل رزوجج مثل اخوانج <<قلت يمه كل عايله وطبعها ليش احنا نسوي طبع مو طبعنا قالت لا قلت لاتنسين انامها لبنانيه تربيه لها دور قالت اهى اصلا شنو اللي ذابحكم غير ان امها لبنانيه …..بصراحه بنات استغربناها غاسله مخها مرت اخوي ولا مرات وانا قاعده تقول اف احسكم متخلفين شنو هذا لا سفر لاطلعه بتكسي يعني لازم تنطرون اخوانكم والا ابوكم متخلف وامى لوتشوفون عيونها طايره من الفرحه من كلام مرت اخوي….

الموهم ..كل هالفتره تدسدس امى واخواتى عنى وعن خواتى المتزوجات تخيلوا تجهيزاتها ولمن قلنا لامى قالت والله ما ابي تزيد غيرتكم علي اختكم (يا اخوان يوسف ))<<تقصد قصه سيدنا يوف واخوانه اللي غاروا منه !!!!! طبعا انا ولدت من 5 يوم انحشت لبيتي وللعلم امى قامت تقول اذا ولدتى روحى لبيتج خلاص ورانا تجهيزات ومشاوير طبعا انا طلعت من البيت وكنت حالفه ما ادخله لان كانت المعاااامله تجرح كانى مو بنتهم..تزوجت اختى وراحت لبنان شهر عسل ومعاهم امل واخوي ومادرينا الا تلفون البيت يدق تبجى طلعت امل محرشه اخوها ليش حاطه مكياج حرام ومايجوز ومهاوشها ومكفخها …..امى اهنى مع خواتى اللي ماتزوجوا ماتوا قهرررررررر وبدا يتصلون علي يعلمونى <<الحين ماصرت غيوووووره قلت والله مادري خليها تكست عنه ليمن ترد طبعا تشكا منها غارت من اختج قلت ليش اهى مو رفيجتكم وانهم ناس فري وفاهمين <<امى اهنيه ماودها اقول هالكلام ردت اختى ومرت اخوي ماخلتهم كل يوم تحرش اخوها واخوها يسمع لها زارت مرت اخوي امى بعد زواج اختى طبعا امى كرهتها وخواتى بعد لاحظة انهم متغيرين وقومت الدنيا وماقعدتها لانها سابقا مدلله والكل يخدمها وجلسات صباحى سوالف وفضفضه لها راحت لاخوها تبجى الناس بس خذوك تغيروا علي قال والله لربيهم واخليهم يمشون صح <<يحمد ربه زوجناه واهو عاطل وفعلا قام علي اختى وعطاها طرااااقات قال تسنعوا وقفي خواتج لا يطنشون اختى

وقلت لامى <<مع انى المفروض انسحب عقب الي سوه فيني قلت وقفيه عند حده قالت عناد فيها كل ماهاوش او قال شيء راح نستر عليه ونسكت بس لاتطلع الفضايح والهوشات وتستانس قلت لامى عادي اختى يكفها ويهينها وانتى ساكته قالت اهى تحرشه تمر الايام ويقلبون علي بعض وتخليهم والا اهو يحبها <<تقنع نفسها ومن حبها لهم تستر عليهم………امى بدات تودد لي واستقبال يهبل والا خواتى اللي كانو يكفخون بناتى يضمونهم ويحبونهم <<عقب ما قلبت مرت اخوي عليهم …وامى بعد هدفها انى اجيب لها بضاعه لان امى تاجره بس بالبيت ماتنزل معارض وكانت تجيب بضاعه من الامارات والبحرين وابوي يوديها بس الحين مريض ومايروح وانا نويعيتى اسافر عادي وبدات امىى تستشيرنى وبعد تطلب بضاعه منى ودق علي خواتى المتزوجات تستشيرهن بمرت اخوي اللي قلبت عليهم .

________________________________________
تخيلوا زارت امل بيت اهلى …….وخواتى سوا فيها مثل ماسوا فيني ينادونى وينخشون لسوالف واهى برا يعنى عكس قبل انا اللي كنت برا ….وتدخل علينا وتفتح الباب انتوا تسون فيني مثل اختكم قبل (تقصدنى) والله ما اصير امل اذا ماربيتكم واختكم الخايسه (تقصد مرت اخوها اللي اهى اختى)لاخى اخوي يعطيها بدال الطراق اثنين ……..انا فيني حررره بقوم عليها بس قلت اهم اللي افتحوا لها المجال وعرفت كل صغيره كبيره عنا وحتى لمن يسولفون كانوا يحشون فينا نادتنى وكلمتى علي جنب قالت بصراحه خواتج ماخلوا حش ولا سب عنج وعن خواتج المتزوجات عندي انكم غيرانين وحقودات علشان اختج اخذت اخوي وربي ليومكم هذا ماقلت لامى ولا لاخواتى اللي حشوا فيني قلت لخواتى المتزوجات وكلهم عصبوا وقالوا نبي نواجه قلت تكفون مانبى مشاكل واضحه من قبل ومن كلام امى اهم اللي فتحوا لها المجال وكل اخبار ازواجنا وحتى طرد امى لي وانا نفاس تشوفه غيرت تفكيرهم …..

ما ابي اطولها مع انها حييييييييييييييل طويله ………..الحين شنو اسوي معاهم ……..يعني لو ماقامت مرت اخوي عليهم جان للحين سكارى …..وانا جرحي للحين ينزف اشلون خلتنى وانا نفاس كل ليله ابجى ولا حتى رفعت التلفون علي تطمن لاهيه مع مرت اخوي وكانوا طايرين وحتى التجهيز ماشفناه واهى كانت تجهز معاهم وكل ديره سافرت معاهم ومع ابوي جنها اختهم ….ليمن عطتهم طرااااااااااق سنع صحاهم ………..الحين امى جايه تقول جيبي لي بضاعه وتستشيرني باختى ومشاكلهم مع انى للحين احس فيهم خش ودس عندي اختى صغيره عمرها 15 كانت تشوف بلاوي وحجى بس كانت تقولي بالخش وتقول امانه لاتعلمين علي اخاف يقلبون علي قالت خواتى وامى يحشون بخواتى المتزوجات واهى تمدح خواتها وانا ميته قهرررر بس ساكته…طبعا خواتى الباجيات وامى كانوا بعد يبون اخوانها الباجيين بس اهى قلبت عليهم ,,,,,,,,,,الحين شنو رايكم ابعد عنهم ومالي شغل فيهم البضاعه بصراحه بتهرب من امى لانى فعلا للحين زعلانه بس مو مبينه لها خواتى اللي بسعوديه يقولون اشحقه تروحين لهم كافي تلفون اصلا امى علي كثر ماسوت مرت اخوي واخوها للحين تشوفهم فري ويهبلوووووووون لانها مره قالتها لي قالت يوه ياحلاتهم ناس علي الكيف بس خربتها امل

كملي..الله المستعان

الصراحة المشكلة انه معقول لهلدرجة امج تخلي وحده اصغر منها اكيد بوايد تأثر عليها ؟ بس بعرف شغلة وحدة شلون أخوج قادر عليها هذي معقول عاطيها الحرية نفس ما اهي عايشة

بس صج الله يعينج ويصبرج على المشكلة وادعي حق امج بالهداية والله لا يغير عليكم بس انا برأيي مو مهم الوحده تتزوج واحد فري شتبي بواحد فري عاطل عن العمل ما يشتغل والمصيبة انها جامعية يعني باجر رح تتضر تصرف عليه شتبي فيه فري

واااي الله يعينكم على هالسوسه
ابصراحه امج الغلطانه كووز اهيا مو صغيره اي احد يسحبها معاه
وثاني شغله انتو بناتها يعني لو شنو يصير ما تقولكم اولدو بره
الله يهديها ان شالله انتي كلميها وكله فاتحيها في الموضوع
كثر الدق يفج اللحام

الصــراحـه

الله يعينج عليهم

و احسن شي ابعد عن الشـر وغني له

ارتفع ضغطي <<<<<<<<<<<< برد على موضوعج بعد ما ينزل ضغطي

الله يعينج ويفرج همج
اختي بكل سجود تسجدينه بكل صلاة ادعي هالدعاء: يا حي يا قيوم برحمتك أستغيث فأصلح لي شأني كله ولا تكلني إلى نفسي طرفة عين
لا انا أقدر أفيدج ولا غيري
اللي خلقج اهو سبحانه وحده القادر
بس عليج بالدعااااااء
"ادعوني أستجب لكم"
"فإني قريب أجيب دعوة الداع إذا دعان"

امج بصراحة عقلية ياهل ومالوم خواتج يسون سوات امج
بس هذه امج مايصير تقطعينا حرام عليج
انت مالج شغل باهلج وبسوالف امج خلج رسمية معاهم سوي الي يرضي ربج لاتقطعينها روحيلها مرة بالاسبوع سلمي عليها وبس
اسرارج لا تقولين لها
والله لو شنو ماطلع سري وسر زوجي برة بيتي
خلج رسمية مع امج لا تطولين عندها ولاتذكرينها بالي مضى
واشتري بيتج وراحت بالج احسن محد بينفعج

انا اقول دام امج ليلحيييييين حابتهم
مالج شغل بولاشيييييي
ليما صج تاخذ منهم درس كلميها
انا ما ودي اقولج جذي لانها امج بس الحين لو مهما حاولتي تصحينها وتفهمينها مارح تفهم ليما تنقرص قرصه عدله
والله يهون عليكم وعلى اختج المسكيييييينه

لاحول ولاقوه إلا بالله

ويت اقري وارد ….

رديت .. شوفي انتي مالج شغل باحد خلهم يولون بس امج يعني مايصير تقطعينها .. وتسمعين كلامها

سوالف النفاس مانفاس يختي خلاص انتي كبرتي يعني جم جاهل عندج الحين ؟؟

ماشالله خلاص كبرتي وتقدرين تشوفين نفسج

الله المستعان

ما لج الا الدعاء

الله يهديهم انشالله

بس لاتزعلين من امج لان مالها ذنب كله من السوسه اللي غيرتها

الام لها قدر كبير ماينزل مهما كانت الاسباب

الله عطانا نعمه وهي النسيان لاتشيلين بقلبج

مهما سوا فيج لازم تسامحين لاتشمتين العذال فيكم

الله يجمعكم انشالله ولا يفرقكم

خواتى اللي بالسعوديه يقولون جذيه امى للحين مهما سوا تحبهم وانهم سنعين بس المشكله بامل اهى اللي غيرتهم …!!