حبيته و نيتي الستر طلع ماكو شي بعيد عن الله سبحانه !!

الحمد لك يا رب على نعمك اللي مالها اول ولا تالي و ما يحس فيها الا المحروم عسى ربي لا يحرم احد من نعمه

يا رب انك توفق كل شخص بنصيب طيب و طاهر و طيب سواء بنت او ولد …

الحمدلله يا رب على القناعة و نعمة التواضع …

القناعة و التواضع مع شكر رب العالمين يسوي المعاجز …

يمكن مو الكل يتذكرني .. انا بحط سالفتي اهنيي علشان اللي نست تتذكر او اللي ما تعرف السالفة تعرفها

https://q8yat.net/showthread.php?t=352773

https://q8yat.net/showthread.php?t=343250

الحمدلله و الف الحمدلله على رحمته انه وفقني معاه و ملجنا و تزوجنا على سنة الله و رسوله مثل ما كانت نيتي يوم حبيته

… نية ستر و زواج .. بفضل من رب العالمين و فضلكم …

انا بقولكم اشياء اكتشفته خلال تجربتي معاه و خاصة اللي ما تزوجو و هم المتزوجات بعد علشان يحافظون على زواجهم و تظل العشرة دايمه بحب بين الزوجين ….

اهم شي اهو النية … ان تخلص بالنية و تكون نيتها نية خااااالصة للزواج و الستر و رعاية الزوج بدون أي خرابيط و غيره و ان تدعي دايما ان الله يرزقها بالحلال و اذا حست بهالشخص انه مناسب ان تدعي ربها يعطيها الخير معاه ..

اللي بتحب علشان شكل الريال و انه حلو ولا مجسم ما راح تتوفق ااابد لأن الله سبحانه يعوض الريال اللي مو وسيم او حلو او مجسم بشغلات ثانية .. تلقينه حنون ولا طيب .. الحلو غالبا تلقينه مغرور و نفسيته خايسه عكس العادي او المملوح .. … ريلي مملوح بس يبيله رياضة و متختخ بس لانه حنون و طيب و خلوق خلاني اشووفه قمر … كااااافي راحة بالي و اني احس بالامان وياه و يخاف الله فيني انه ما يظلمني او يمد ايده علي …

ثاني شغلة و هي القنااااعه و تركي عنج حجي الناس و حجي بعض البنات لانه اللي بيمشي وراهم يضيع تلقينهم محترين … الرياال الزين عملة نااادره هالايام و لا تطوفينه علشان شغلات نقدر نتنازل عنها …

بقولكم اللي صار معاي … انا الصراحه مالي خلق اجهز و احووس و اسوي عرس و اخرتها ييون الناس و يحشون و يبلعوون و هذا يهون و لا ييونج ناس عينهم حاااره اللهم يا كااافي و مصاريف مالها داااعي و قلت حق خالتي و حماتي و طبعا حبيبي ان ما بسوي عرس لان ما يسوى .. حلاته حفلة ملمومة بينا و ماله داعي الخساير و احنا بأول الزواج .. صج حبيبي ما يقصر بس ليش اكلف عليه ؟! احنا نتهنى احسن .. سفرتنا تكون احلى لان مافي عرس و الفلوس الباجية نضبط فيها الشقة او نخشها ما تدرون الدنيا شلون صايره هالاايااام عسى يبعد عنا الايام السودااا قووولووو اااامين

و حتى بالشبكة اخذت شي حلو و ناعم و كنت اراعي السعر … و صدقووني عقبها ما تدرون شلون طلع اللي سويته بعين حبيبي و اهله …

نسييت اقولكم ان اهله الحمدلله واايد طيبين … خالتي طيييبه و من حريم اول و ماشالله عليها راعية صلاة و قرآن و حماتي بعد حبووبه الله لا يغير علييينا ….

المهم اتصلت علي خالتي و صوتها متأثر … امبيييه انا اول شي خفت قالت لي : يا بنيتي انا كنت دااايما ادعي ربي ان يزوج وليدي حق بنت حلال تخاف الله لان الحمدلله جناتي طيبين مثلج و شروواج و كنت اخاااف ان ولدي اخر العنقود ياخذ وحده يتبهدل وياها و احنا نتبهدل بعد و مالنا شده حق عوار الراس و انتي عارفه بعض بنات هالايام شلون صايرين …….

بس عقب اللي شفناه منج و من اهلج و انكم شارين الريال و ما تبين حتى تزيدين المصاريف عليه و تفكيرج فيه و براحته اول قبل ما تفكرين بالوناسه و الكشخه … حمدت الله اللي سمع دعووتي و انا قبل لا اتصل كنت اقرا قران يوم قريت الاية ( الطيبون للطيبات ) على طول ييتي بباالي قلت خل اتصل و اقولج هالكلمتين اللي بقلبي ….. عسى الله يخليكم لبعض و لا يحرمني من شوفة عيالكم …

امبييييه بناااات عقب ما سكرت التلفوون قمت ابجيييي لان صج صج الكلام طالع من قلبهاااا عسى الله يخليها لي ….

ماني قااادره اتخيل حيااتي من غيره … انا ما صارحته بحبي ذيج الايام الا و انا متاكده اهو شنو معدنه شنو…. و الحمدلله الحين احنا حق بعض عسى الله لا يفرقنا …. الله سبحانه يعطي على قد النية …. ما انام الا و اهو راضي عني و لبست العباية لانه اقنعني فيها من غير ما يغصبني عليها و الحمدلله مرتاااحه فيهاا لان يبيلي الستر …..

و اذا كان ضايق خلقه و تعبان بسبة دوامه اهديه و اقوله كلام حلوو لما يهدى … اذا زوجي حبيبي متضايق بالله منو بيوقف وياه و يطيب خاطره ؟! خلو الريال يحس ان في وحدة توقف معااه و تقدر مشاعره و تسمعله لان الريال ترى نادر ما يفضفض و طبيعتهم جذي .. فلما يفضفض حق وحدة ترى هذا شي مو سهل عندهم …

سبحان الله وايد ريايل مثل البيبي يبون اللي يهديهم و يمسح عليهم …. و اهو فديييته نووعه حساااس ما يحب يزعل احد و ما يحب احد يشيل بخااطره عليه و كثر ما يقدر يحاول يخليني مرتااحه و ما احتاج لشي عسى الله يخليه لي ….

بنااات ابي اذكركم بشي مهم … هالله هالله بالسمعة الطيبة … من خلال تجربه و من كلمة قالها حبيبي ذيج الايام لما صارحته اني احبه و هالكلمة دايما على باالي

قالي : لو كانت سمعتج مو طيبه و انا ما اعرف اخلاقج جان ما قربت صوبج و لا حتى اسمح بنفسي ان افكر فيج… بس لما قلتي لي عن مشاعرج و انا قبلها اعرف اخلاقج و سمعتج عرفت انج صادقه وياي و قررت اني اقدر هالحب و نكمل ويا بعض ….

بنسافر عقب جم يوم و ادعو لي بالتوفيق و عسى ربي يخلي لكل وحدة زوجها و يزيد الحب بينهم و يرزق العزوبيه بولد حلال يسعدها قولو ااامين ….

ابي اصيير طماااعة و عطوو نصااايحكم خاااصة المتزووجااات خل استفيد من خبراااتكم

الله يوفقكم ويتتم عليكم الفرحه ياحي ياقيوم

الله يوفقج و يتمم عليج يا رب

قريت مواضيعج بس ضعت شوية حسيت في شي ناقص !!! انت شنو كنتي دازتله مسج تقولين له انا احبك و بعدين هو دزالج مسج انا شنو بالنسبة لج ؟؟؟؟

و بالمبارك ان شاء الله و بالرفاء و البنبن

الله يووفقج ويهنيج
والف مبرووووك
تستاهلين كل خيررر

الله يوفقكم يارب ويرزقهم كل خير من عنده

وعلى نياتكم ترزقون

الله يتمم لج حبيبتي ويسعدج ولايغيرعليكم يارب

حبييييييييييييييبتي ووالله تووووووني اذكر سالفتج حتى يحليلي رديت عليج بالموضوع الاول .. الثاني توني اشوووفه

والله عيوني دمعت لج بعد عمري والله الله يوفقج ويستر عليييج ويكبر حظج انشاااءلله وخلالالالالالالاص انتى ماقصرتي انا اقول اوقفي لحد اهنى ترا العين حق .. والحمدالله على كل حال والله يحفظج ويخلييه لج يارب موفقه يااااااااااقلبي:*

عسى الله يوفقج ويرزقج بالذية الصالحه قولي آميييين

مشاءالله تبارك الرحمن

واكيد اهم شي النيه ( وعلى نياتكم ترزقون)

والله استانست لج حيل عسى ربي يوفقج معاه ويسعدكم ويرزكم الذريه الصالحه امين

الله يهنيكم يارب ويرزقكم الذريه الصالحه ويبعد عنكم عيال الحرام

وااااي ماتصدقين شكثررررر فرررررررررررحت لج …

عسى الله يوووووفقج ويهنيييج ويكتب لج بكل خيييييير …

الله يهنيكم

قريت كل مواضيعج من طأطأ الى السلامو عليكوم

وفرحت لج الله يهنييييج ويرزقكم بالعيال انشاء الله

الف الف مبرووووك وعسى الله يهنيج
واستانسوا ترا هذي احلى ايام بالعمر واهدي هديه تبقى ذكرى لكم
لان مع الايام بعدين لاشافها بيتذكرج وبيتذكر حبج
وعيشوا حياتكم واستانسوا وبس لاعاد تكتبين شي عنكم
لان العين حق والله يبعد عنج شر النفس والعين

الله يوفقج و يتمم عليج يا ويرزقنا انشاء الله