تقدملي واحد " لسانه ثقيل و ابي نصيحتكم :(

السلام عليكم ورحمه الله وبركاته

شلونكم شخباركم ،

تقدملي واحد الكل يمدحه ويقول محترم بس عنده مشكله ان لسانه ثقيل ويتأتأ بالكلام فمحتاره والله ادري ان هذا مو شي يعيبه و اهم شي الاخلاق بس اخاف ان امل منه و اموت قهر لي شفت واحد اجتماعي ويسولف ويضحك ولي عندي يتأتأ بالكلام وصعب يدبر اموره ويقولون ان كلامه قليل او مايسولف عشان ألي فيه ، شفته انا من بعيد ومملوح الولد

بس متردده عشان المشكله ألي فيه ،

مادري شسوي ابي نصايحكم ؟!!!

مرحبا خيتو يسعدني اكون أول امارتيه ترد عليج الغاليه الريال ما يعيبه شي بس أهم شي يكون على خلق ودين لسانه ترى مب وااااااااااااااايد مهم فحياتكم الزوجيه الاهم انه يكون حنون وطيب ومعاملته لج.

نصيحه مني صلي الاستخاره وشوفي ربج شو يقول وصلي كذا مره.

السموحه الغلا انشاء الله أكون افدتج. الله يوفقج الغاليه

يا قلبي تردينه علشان لسانه ثقيل ؟؟

شدراج باجر ما ايلج واحد لسانه يلوط اذانه ويغربلج بعيد الشر ؟؟

استخيري واذا ما يعيبه شي توكلي على الله

مرحباااااااا,, حبيبتي ترى هذا مو عيب يعني عادي ,, صدقيني اهم شي الاخلاق وانت صلي استخاره وانشا الله الله يوفقج ويسعدج حبيبتي :*

انا اقول مثل ام رشودي

الريال ما يعيبه شي

و صدقيني اذا ارتاح معاج بيسولف و بتشبعين سوالف

انا ريلي لا يتأتأ و لا شي ..بس طبعه هادي و ما يسولف الا معاي و ابيت اهلي و حتى عند اهله ما يتكلم وايد ..بس بالبيت قرقره اسم الله عليه
صلي استخاره و اتكلي على الله

يا قلبي صلي استخاره حبيبتي وشوفي اللي الله كاتبه لج ان كان نصيبج وياه ربج بيسرها وان كان نصيبج مع غيره لو انتي اتوافقين ماراح يتم فانصحج بالاستخاره واللسان مااتوقع يعيب الرجال اهم شي اخلاقه يمكن انه ابرك من واحد السانه ما فيه شي بس اخلاقه زفت والله يكتبلج اللي فيه الخير والصالح

استخيري واذا الريال وعيبه بس انه يتأتأ هذي مب مشكله

بس اذا تحسين عمرج مابتتقبلين هالشي هذا شي ثاني اهم شي انتي شو تبين

والله يوفقج حبووبه

مشكورين صليت بس ماحسيت بشي ،

مو ان مايسولف بس لا يعني لو بيسولف يقعد يكرر الاحرف ويتلعثم وايد !!

موفقه أن شاء الله يا قلبي وقبل كل شي صلي الاستخاره وأذا تبين نصيحتي هذا مو عيب بالعكس يمكن ميزه فيه ويمكن يكووون أحسن من الف واحد لسانه صاحي أنتي فكري عدل والرسول عليه الصلاة والسلام يقوول أن : من رضيتم دينه وخلقه فزوجوه والله يكتب الي فيه الخير يارب ..

يا قلبي انا اشوف هالموضوع عادي شوفي انا اعرف وحدة اهي اللي تأتأ وكاهي ماشالله عليها عندها عيال وليلحين تأتأ بس ما عابها هالشي ولا ريلها شاف ان هالشي عيب في البنت خاصة ان الرياييل ما يعجبهم العجب

هالموضوع عادي مع الوقت والثقة يخف ان شالله صلي مرة ومرتين والله يكتبلج اللي فيه الخير

والله حبيبتي هذا الشي راجعلج انتي وتفكيرج اذا عادي عندج هالمساله ( واتوقع خلي ايدج باديه وعالجيه في اختصاصيين والظاهر مالقى احد يوجهه) راح يتعالج ياذن الله من هالشي ..واذا لا ماتقبلينها هذي حياتج محد من اللي هني بيعيشها ..بس صلي استخاره وفكري وتخيلي شراح تسوين معاه ..انا عن نفسي مافيها مشكله انا اخوي فديته يتاتا بس على العكس اجتماعي مشالله عمره 18 وربعه ترس الدوانيه وغشمره وضحك قبل كان انطوائي بعدين صار مثل العسل وكل اللي يشوفه يموتون عليه الله يخليه لنا ..

صلي استخاره حبيبتي وشووفي
انا اقولج لا تستعيلين وقاعده اكلمج بعيد عن العاطفه
حبوبه انا وحده اعرفها عدل نفس حالتج خذت واحد يتأتأ بالبدايه كل من قالها الريال مافي شي يعيبه بعدين وافقت وعاشت معاه بعد جم شهر ماقدرت تتحمل ونفس كلامج تقول اشوف الباجي واتحسر مع انه وااااااااايد زين
بس هذا زواج ؟ وانسان بتعيشين معاه طول العمر
طبعا الراي الاول والاخير لج وربي يوفقج
وانشالله اذا خير لج يكون من نصيبج بس اذا فيه تعب ومحاتات يوخره عنج :>

يعطيكم العافيه انشاءالله يكتب ألي فيه الخير

ماودي أكدرج أو أاثر على قرارج لكن بقولج شغله التأتأه لها لها علاقه بالوراثه تأكدي من أهلهم هل عندهم حالات ثانيه والا بس اهو .والله يوفقج ويسعدج .

انا ماشوف هذا عيب كبير
بعدين اذا اخلاقه زينه هذا اهم شي
وصدقيني احيانا اذا حبيتي الشخص تشوفين عيوبه مزايا
بعدين يتأتأ احسن من ملسون وقرقه تتمنين ذيك الساعه انه اطرم هههههههههههههههههه
وتذكري قول الرسول عليه الصلاة والسلام في مامعنى الحديث(اذا اتاكم من ترضون دينه وخلقة زوجوه)