دعاء لكل من تدخل عالموضوع

بنات بليز انتظر منكم حل لتأنيب الضمير الي ذابحني مشكلتي..

اهل زوجي صارتلي مواقف وايد معاهم بس ماهمتني كنت دايم استمر بالطيب واصل رحمهم واروح مع زوجي لهم وايدي مو فاضية..

آخر موقف صار اخته تهجمت علي وسبتني جدامه وجدام امه وانا سكت مابي مشاكل لكن اهيا ظلت اتغلط وزوجي ساكت وامه تقوله تفاهم مع اختك تراها تحبك!! وانا قلت لاخته يا فلانة انا شدخلني بينكم تقولي انتي عيالج بيسون فيج مثل ماتسوين فينا قتلها ليش انا شسويت تقول انتي…… كلام مابي اقوله عالعام لان صج قوي..

المهم انا حامل وبهالموقف انهرت وطلعت منهم وانا اعصابي منهاره وجد قررت اتطلق!!بلحظة غضب زوجي قعد يترجاني اهدا ماقدرت وياني طلوق خفيف وانا باول السابع طبعا حزتها قلت بقلبي يارب طالبتك تفرج همي وتلهمني الحل..عقب يوم انا كنت لازلت منهاره واهو يحاول يريحني قتله تبي تريحني قال اي قلت خلاص لا انا اروحلهم ولا انتا تروحلهم وابوك غالي علي حيل لازم ما تقطعه شوفه بره بعيد عنهم وعقبها بمده تعشا الابو عندي وصج يعاملني مثل بنته الله لا يحرمني منه لكن للاسف مرته وبناته مسببيلي مشاكل كثيرة واهو للاسف ما يوقفهم عند حدهم وزوجي نفسه وانا ماعرف اتليسن ولا اعرف ارد كله ساكته تكفووووووووووووووووووووووون انا ضميري يأنبني اخاف القرار الي اتخذته غلط واخاف ارجع اروحلهم وهالمرة يمدون ايدهم لان اخر مره لو ما انحشت اخته قامتلي وخلاص كانت بتمد ايدها..شسوي علموني حدي منهاره 24ساعه افكر فيهم ماانام من التفكير ناطره ردودكم احر من الجمر صج محتاجه وقفتكم معاي وعسى كل وحدة ترد علي لو بدعاء او كلمة وحدة عسى ربي يوفقها دنيا واخره ويسخر لها كل الي حوالينها…

الله يعينج ياقلبي…

حبيبتي انتي بعدي عنهم وعن مشاكلهم بس مايصير تبعدين ريلج عنهم هذولا أهله

أنتي سامحيهم وخلي علاقتج معاهم رسمية يعني سوي الواجب اللي عليج وبس وأبو ريلج واصليه دام أهوه خووش ريال

الله يهديهم انشالله

الله يعينج

ياحبيبتي هدى بالج وريحي اعصابج

عشان ريلج وبيتج استحملي الصبر زين في هالمواقف

وغلط انج تقولين له ماني رايحه بيت اهلك وانت لا تروح

مهما يكون هذول اهله حبيبتي

انا متزوجة صارلي اقل من سنة والله العظيم من اول يوم خطبوني وكله يغلطون وانا اطوف لكن صرت مصخره خلاص ما قامو يحترموني و زوجي خلاص صار بعيني ماله شخصية صج انا مو مرتاحة شسوي

اي و على فكرة اهي ما غلطت علي انا بس غلطت على زوجي و تخوصرتله وقعدت تصرخ عليه جدامي وهانته حيل واهوا كان ساكت حيل طاح من عيني وخلاها تغلط علي ما فكر يوقفها عند حدها وتخيلو قبلها بجم يوم امه ما سلمت علي وانا حبيت راسها وطوفت وقلت مثل امي ما عليه مع انها صدت عني ولفت ويها ما كانت تبي ابوسها بس حبيت راسها واهي قاعده وقعت ارقعلها قتلها اكيد تعبانه حبيبتي مبين عليج واهيا حاقرتني! صج كل ما اذكر مواقفهم تنزل دموعي

لاحولا ولا قوة الا بالله … انت الحين منقهره وشكله اللي صار لج موشويه شوفي اول شي مالج حق تقولي لا تروح لأهله ترى الدنيا دواره باجر الله يبليج بمرة ولد تحرمج منه …. وماظنتي هدا اللي تبينه من داخلج بس الشيطان ينهز هالفرص ويدخل بينكم … انت حاولي هالفتره تريحيين لاتروحين لهم وخلي زوجج يروح عشان ربج يوفقج ويسخرهم لج مثل ماقالوا البنات بس روحي بين فتره وفتره سلمي ولا تطوليين ترا مهما كان هدولا اهل ولدج والقطاعه تقسي القلوب على بعض وخليج انت راعية الطيب والسنعه وصدقيني ادا ضاع عند الناس ماراح يضيع شي عند ربج ودايما رددي هالآيه (( اللهم لاتجعل في قلوبنا غلا للدين آمنو )) والله يسهل عليج ويسخركم لبعض وتدكري كلنا بنموت والدنيا والله ماتسوى

انت لا تروحين لهم ،،، بس هو بالعكس .. لانه ممكن يجي يوم لومك انك السبب في قطاعته لامه

الله يصبرج بس ديري بالج على نفسج انتي حامل واذا على اهله حقريهم يمكن سامعين كلام من احد ومادام العود معاج مالج شغل بالباجي ولا تحرمين زوجج من شوفة امه ترى بر الوالدين واجب

انا مع كلام شاي أخضر

السلام عليكم ..

هدي بالج وتعوذي من ابليس وماكوو شي ماله حل .
شوفي يالغاليه اول شي انتي لاتروحين عندهم خلاص قطعي صلتج فيهم وزوريهم بالمناسبات بس خلج رسميه وسطحيه معاهم .
غيره ريلج لاتحرمينه من اهله خليه يروح انتي لاتروحين معاه ترى هذيل صلة رحمه مهما كان ..
خلي الغلط يطلع منهم مو منج واحتسبي من ربج الاجر ..
والله يقومج بالسلامه ويعوضج الي ببطنج عن هالمشاكل ..

وديري بالج تعيرينه باهله ترى الريال نقطة ضعفه اهله لاتطرينه بالمره بس قوليله انا اعفيني من الروحه لهم
وانت روح الله معاك حافظك ..

والله يسهل امورج ويهدي سرج

خلاص كافي لا تضايقين نفسج اكثر وتضغطين علىاعصابج عشان ناس ما تستاهل حتى تراب ريلج

انتي حامل انبهتي لنفسج واحقريهم وخلهم ينجعلون وادا تكلم ريلج قولي كافي تحملت ظلمهم ظلايمهم ما عاد فيني انت تبي تزوهم زورهم اما انا ابتعد عنهم وعن مشاكلهم

وهما اساسا قاعدين يتمادون عليج لانهم عارفينج ساكتة وبتسكتين دائما يعني يحسونج ضعفية

انصحج لا تعطينهم فرصة اكثر

اسال الله العظيم رب العرش العظيم ان يزيل ما بكي من الهم
حبيبتي لا تخلين ريلج يقطعهم خل يمر امه هم الجنه تحت اقدام المهات
يمرها بس لا يطول عندها
وانتي خلج في نفسج مالي شغل فيهم بس دير بالج على الي في بطنج
وشكو تضيقين خلقج واهم ما درو عنك اهم خلهم يولون
ديري بالج على صحتج وريلج
ودام عمج زين وياج خلاص
والله يوفقج