تعالي ناقشيني ماهي الاسباب التي تؤدي الى المشاكل الزوجيه؟

بسم الله الرحمن الرحيم
قوه بنات واشلونكم ؟
في موضوع حبيت اعرضه عليكم للنقاش وبذات في ايامنا هذي اللي زادت فيه نسبه الطلاق بسبب كثرة الخلافات الزوجيه بين الزوجين من الزوج والزوجه والعيال والاهل الزوجين اللي دايمن يدخلون في خلافاتهم والنصيبه الاكبر مجتمعنا وزيادة الاسعارمما ادى الى زيادة الطلبات وعلى الزوجين والمصاريف ,,,,
برايج شنو الاسباب اللى تؤدي الى ذلك؟ وطبعا في اسباب كثيره شرايكم نطرحها ونتناقش فيها لحل مشاكلنا ومعرفة نفسنا واغلاطنا والله ااني حابه اناقش هالموضوع وياكم بس عشان نحل بعض مشاكلنا مع ازواجنا بطريقه صحيحه…
واول سبب انا راح اقوله وهو اختلاف الآراء بين الزوجين فرض شخصيه كل واحد على الثاني وياريت تناقشيني وتناقشين البنات بعد طبعا مشاركتهم وادري انكم ماراح اتقصرون

انا اشوف من أسباب المشاكل
1- القناعة : ان طرف من الأطراف او الطرفين مو مقتنعين بالعيشة اللي عايشينها اما لظروف مادية او عاطفية او غيره من الظروف .

2- عدم تقبل شخصية الطرف الثاني : وايد نشوف محاولات من الزوجة انها تغير زوجها مثل ما اهي تتمنى ، ونفس الشي الزوج يسوي يبي يغير زوجته مثل ما يبي ليما يوصلون للصورة اللي يتمنونها بالطرف الثاني واكيد هالشي يولد مشاكل

3- فرض شخصية الزوج انه يامر وينهي بدون سنع بس عشان يقول انا ريال

4 – مشاكل الحمولة : هني نشوف لو الزوجين متوافقين ،، تيي الحمولة تعفس عيشتهم وتسودها

واذا ذكرت شي ايي اقولج

يا حياتي……….مشكوره على مشاركتج
بس القناعه مو فاهمتها….. انا اعرف القناعه اهيا حل لمشاكل الزوجيه يعني اذا الزوجين مقتنعين بعيشتهم عمره ماراح اتصير اي مشاكل بينهم.. انتي قصدج القناعه حل لمشاكل الزوجيه ولا سبب المشاكل الزوجيه؟

انا من رايي من اسباب الطلاق ان عيالنا بسهوله يتزوجون يعني مايدفع دم قلبه ويتمسك فيها

وبناتنا تقريبا عايشين حياة مترفه واهي اللي تقضي امورها وشئونها مو مثل اول الرجال اهو اللي يقوم بكل شي ومو فارقه معاها وجود الزوج من عدمه

هذا رايي بس مو كل الناس جذي

واغلب المشاكل تكون ان الزوج يتمسك برايه والزوجه كذلك

وتدخل الاهل بعد له يد في المشاكل الزوجيه

شوفي حبيبتي

اقصد
طبعا اذا اهم مقتنعين من بعض اوكي
بس اللي اقصده لما ما يكون احد الطرفين قانع بعيشته مع الطرف الثاني
يعني اما وحده تزوجت مغصوبة
او وحده ارسمت صورة لشخص وبعد الزواج اطلعت صورة ثانية
هني اهي ما تحس انها مقتنعة بزوجها او الريال مو مقتنع بزوجته

مثل رفيجة رفيجتي
تزوجت واحد بس مو مرتاحة معاه لانها ما اقنعت بوضعه المادي انه على الله وعلى الوظيفة ،، تطلقت منه وتزوجت واحد غني غني غني وكبير بالخمسينات واهي كانت بالعشرينات وفوق هذا تدري انه ما اييب عيال

عدم قناعتها بزوجها الأول وانها تبي فلوس وبس خلتها تتزوج الثاني

مي
سوري حبيبتي جذيه انتي قصدج بعدم القناعه….. صج عندنا بنات مايقتنعون باي شي وبذات لو كانت عايشه مع اهلها محرومه يعني ماتلبس على راحتها مصروفها يدوب يكفيها ماتطلع ولا تسافر اهنيه انا معاج عدم القناعه صج مشكله بالذات احنا عايشين بمجتمع يحب المظاهر قبل اي شي….وفي رياييل بعد مايقتنع بزوجته.. يطلع فيها الف عيب وعيب ويروح يدور على غيرها واهنيه انسميها الخيانه جنا اهو ملاك ويبي وحده ملاك مثله… والخيانه سبب من الاسباب المشاكل الزوجيه بعد مشكوره على تواجدج وياي

أنا حأناقش وحدة مشكلة من مشاكل الحياة الزوجية كانت حتوصلني أنا وزوجي للطلاق وهي الغيرة الزائدة عن حدها يعني في الدخلة والخرجة مشاكل ليش طالعت في هذه على إيش لفيت راسك في البيت على التلفزيون ليش حاط هده القناة لا تتفرج على هذا المسلسل الفيلم هذا وسخ تافه مالا داعي تشوفة أنت ما تحترمني اذا تناظر من جدامي عيل وش تسوي من وراي واااااااه والله مسكين ما أدري كيف صبر علي والله الغيرة الزائدة تسوي نكد ومشاكل للحياة الزوجية وأنا أنصح كل البنات كله ولا الغيرة الزائدة تقولي لي ما أقدر غصب عني أغار أقول لك لا تقدرين وأنا كنت أقول نفس هالكلام لاكن الحمد لله قدرت أتغلب على هذه المشكلة والحل هو أولا زيدي ثقتك بنفسك ثم ثقتك بزوجك وأعرفي أنه مهما شاف أو طالع ماراح يلاقي أحسن منك ولا يبغى وحدة غيرك لا تطلعوا في الأماكن المزدحمة كثير حاولي وأنتم تتمشوا على البحر أو تتسوقوا في مول تشغلية بالبيبي مثلا يعني يدف العربية أو أمسكي يدة وتكلموا وأنتم تتسوقوا في أي موضوع سولفوا وأضحكوا وأهم شئ حاولي دائما انك ما تراقبية وتراقبي نظراتة لأن في هذا الوقت الشيطان شاطر حيصور لك انه قاعد يبصبص ثقي فيه انه مو شايف غيرك وان عدت مرة حلوة من جدامكم أو مرة لابسة شورت مثلا انك ما تتنرفزي وتعصبي وتنقهري لا عادي ايش يعني أآنا أقوللك طيب اذا مر مثلا من جدامكم ريال أحلى وأكشخ من زوجك وجات عينك عليه بالغلط خلاص هذا يعني ما تيغي زوجك ولا عاد تحبيه لا طبعا وزوجك نفس الشئ لو شاف وحدة يعني خلاص ما يبغاكي أو شافها أحلى منك لا لو كانت ملكة جمال دامه يحبك والله راح يشوفك أحلى مرة بالدنيا
وااااااااااااااااااو طولت عليكم سوووري بس والله أتمنى كلامي يكون فادكم
والله يبعد عني وعنكم المشاكل ياااارب

صج حببيبتي انتي جذي قصدج عدم الاحساس بالمسؤوليه وانا وياج بهالشغله وبذات بمجتمعنا الواحد اي شي يبيه يحصله بسهوله وبعد ابي اسباب منج لا اتقاطعينا ومشكوره حييييييييل على مشاركتج

الغيره فعلا سبب من الاسباب وانا عاد عكسج انا ما اغار على ريلي مع ان مزيون اهو اللي ذابحني من غيرته حتى من خواتي يغار منهم ……..بس ما سالتي نفسج من شنو؟ حبيبتي واصلي لا اتقاطعين

تعالي ناقشيني….ماهي الاسباب التي تؤدي الى المشاكل الزوجيه؟

أم الزوج من اهم اسباب المشاكل في الحياة الزوجية
مشكورة على الموضوع

برايي :

1- العناد و التمسك بالراي .

2- تدخل الاهل مثلا ام الزوج او ام الزوجه و سماع كلامهم و الاخذ برايهم بكل صغيره و كبيره في هذا الزواج.

3- اختلاف الشخصيات و كل طرف و ماكان يتوقعه يمكن يلاقاه غير .

4- عدم التكافؤ الاجتماعي او التعليمي او المادي او اختلاف بيئة التنشئه او الديانه او المذاهب .

5- التدقيق الزايد في كل الامور .. يعني في بعض الامور لابد الواحد او الوحده تمشيها علشان تمشي الحياة .

اشياء كثيره تكون من اسباب االمشاكل بين الزوجين **********

وهي اختلاف البيئه بين الزوجين يعني كل واحد عايش في بيئه معينه لها عادات ( يعني في الناس معقده ووالناس متفتحين )

وتصير مشاكل تافه علي سبتها

الحموله لها دخل في المشاكل اذا كانت الجنه بنت حلال وفي حاله ولابعضه عوب ويخروع الواحد

الغيره بين الزوجين واذا صار الشك مشكله

عوابة المره ساعات تلعب دور

طمع الزوج يلعب دور في مشاكل اللي تصير

والمشاكل كثيره الله يوفقنا ويوفق كل مسلم

انا برايي من اهم مشاكل الزوجين
الزوجين نفسهم لازم يكونون متفاهمين وحتى الحموله اكيد لها دخل اذا كانو يشيشون الريل وهو من النوع اللي يسمع لهم اكيد يتزيد المشاكل
وبالنهايه مافي احد مرتاح بالدنيا
والحمدالله على كل حال

فعلا ام الزوج فعلا مشكله اذا اهيا شينه مشكله واذا اهيا زينه هم مشكله انا ام ريلي وايد زينه وياي بس مع ريلي كل مشاكل وكل ماصار شي بينهم يت تشتكيلي جنا انا الام والزوجه واي شي يبونه منه يقولولي انا جنا انا اللي امشيه على كيفي
وبريج شنو الحل؟ واصلي عطيني بعد اسباب ومشكوره على مشاركتج

العناد هذا شي لابد منه وبعض المرات من الزوجه بس برايج شنو اهوا لاحل
والتدخل الاهل هذا متوقف على الزوجين نفسهم اهما لازم يحلون مشاكلهم بنفسهم
واختلاف الشخصيات اشلون الحل برايج؟ الطلاق ولا شنو
والتدقيق هذا يسمونه مرض والعياذ بالله لا المره تخلي الريال بحاله ولاريال يخلي مرته بحالها
وبعد ابي اسباب وطرق حل الاسباب هذي خلي غيرنا يستفيد