زوجي والسهر

والله يابنات اكتب لكم وانا فيني الصيحه قسم بالله مليت
ما ادري وش اسوي

كل يوم على هالحال سواء فيه
دوام والا مافيه سهر برا البيت الى الفجر
لآخر مره امس استانس يوم شافني زعلانه انه يبي يطلع تاخر عن عوايده
يقول زعلانه بالطقاق اسهر وانبسط وانا بالبيت محترقه
وبس حاطه حرتي ببنتي انا ساكنه بعيد عن اهلي ولا لي احد
بالديره اللي انا فيها قسم بالله ما انام الا لما يجي طبعا مو استقبله
لا اكون منسدحه بالسرير واذا سمعت الباب انفتح اعرف انه جا
وانام براحه لما يكون برا اموت خوف وبس اوسوس اقول كل شوي
بيدخل علينا حرامي
واهل زوجي ساكنين بالقصيم وتعالوا شوفوني اذا رحنا ما اشوفه ابد
يطلع من بعد صلاة العشا الى صلاة الفجر هو واخوه
بكيفه اخوه عزوبي وحر بتصرفاته بس انا وشولوه اجي مدامه
يتركني كل هالمده واذا اشتكيت له من احد مضايقني بالبيت
يطنش ولا يعطيني وجه واقعد اصيح لما اقول بس
خواته حليوات معاي بس لابد يطلع منهم تصرف يغثك شوي
مليت يابنات امس يوم جا تلزق ويبي يراضي واجي اصرخ واقول
وخر عني ما ابي كرهتك هو استغرب اول مره اسوي كذا
والى الحين متزاعلين وهو طالع الحين
لا تقولون لي انتي مقصره بحقه لا وربي يشهد علي لا لبس ولا اكل
ولا كل شي جاهز له وبأحسن شي
بس سالفة هالسهر مليت منها وقررت اني ما اكلمه لما يحط حد لسهر
انا ما اقول لايسهر كيفه يروح بس يرجع بدري مو للفجر
طيب يوم لنا ويوم لأخوياه يروح يسهر عندهم
ما ادري وش السواة يا خواتي مليت مليت مليت

انزين كلميه بس مو بزعل يمكن طبيعة زوجج ما يحب اللي تزعل وجذي

شوفي من رايييي روحي كشخيله الحين ونطريه بالليل ليييييييمن يرد وقعدي يمه و مسكي ايده وكلميه بهدوء وكلام معسول قوليله اول شي عن مواضيع بعيده عن هالموضوع مثلا قوليله حبيبي اشتقت لك ومن هالكلام وماتدري اشلون البيت مو شي بدونك وو وو وو عليج بالكلام اللي يطيح الطير من السما

وبعدين قوليله حبيبي اشرايك باجر نطلع مع اليهال نروح نستانس معاهم او نطلع بروحنا نستانس لمن اليهال ينامون (( اذا عندج احد يساعدج يمسك لج اليهال )) وشوفي شنو رايه بالموضوع

خليه يحس شوي مو المقصود انج تقيدينه بروحاته وطلعاته خليه يطلع بس لا تخلينه يسهر وايد

وبعدين قوليله حبيبي انته كل يوم ترد متاخر وانه لمن بنام ودي انام يمك وو وو كثري شوي من هالكلام الحلو

وو هم قوليله حبيبي اطلع متى ما تبي تطلع كيفك اليوم كله لك وو الوقت وقتك بس بالليل وقتي انه وانه متزوجه ابي انام يمي زوجي يلمني والمه احس بحنانه عسى يتاثر شوي ويرد البيت مبجر

اهم شي لا اتييييبينها بطريقه زعل تقولين له انه زعلانه اكيد بيقولج بالطقاق

واذا كلش كلش مافاد دقي عليه وقوليله بنتنا موراضيه تنام مادري شفيها بس تبجي خل نوديها الطبيب ولمن يرد قوليله الحمدلله نامت (( طبعا خل تكون نايمه )) ههههههههههههههه وانتي اهم شي كوني لابسه مو يعني كشخه لا لبسيله لبس يخليه ما يطلع من البيت عرفتي اشلون

يمكن يحس شوي ويتغير وادعيله الله يهديه ان شالله وو صبري قلبج حبوبه ما عليه وايد ريايييل جذي ترى

أختي الغاليه
اقدر شعورج والمج..ولكنهل فكرتي بتغييرطريقتك معه وتتصرفين بطريقه جديدة

اول حل ولابد انه راح يكون له اثر سريع بس مفتاحه السري اليقيين والاخلاص والتذلل..قيام الليل والدعاء..فقد قال تعالى (فإني قريب)وتلاها (اجيب دعوه الداعي اذا دعا)
ثاني شي حاولي تتجنبين الصراخ والزعل لانج شفتي انه ما منه نتيجه فلابد تحطين لج حلول ثانيه
هل فكرتي في يوم باسلوب المصارحه الهادئه والحوار الذي ينبع من قلب محب صادق
حاولي بتفكيرك المتميز ان تعلمي ما هو الشي الذي يسهر من اجله
مثلا ان كان لعب الورق فاجيدي ذلك وجربيه معه
اشغلي وقته بدهاء النساء
حاولي ان تبعثي له مسج (زوجي العزيز ادعوك اليوم لعشاء فاخر وليله مميزة)

ولا تنسي الحكمه التي تقول كوني له أمه يكن لك عبدا
وكذلك؛
حاولي باشغال نفسك بالاهتمام بها والعنايه بها فانت تستحقين ذلك حاولي التجديدفي ترتيب الاثاث وديكورات منزلك ..
اتمنى اكون قد افدتك ..

وساحاول ابعث لك بعض الافكار على الخاص

والله يا بنات كل شي سويته ما خليت شي ما سويته
بس مافي فايده قلبه ميت
لو اولع كل اصابعي شموع له ما يبين بعينه

غاليتي ,,

حاسه بكل كلمه انتي قلتيها لان الزوجه انسانه حساسه جدااا و ممكن الزوج لايقدر تلك المشاعر لان مجتمعه الرجولي يفرض عليه ذلك ,,,!!!

اولا :انتي جربي هالطريقه اذا طلع رتبي البيت و الغرفه ((طبعا بطريقه خاصه ))مع اضافه الشموع و من هالحركات الحلوه ,,

و انتي لبسي اللون اللي يحبه و اذ جا استقبليه و اذا سأل ليش ما نمتي قوليله ((اشتقتلك و ما احس بالامان الا بوجودك قربي و البيت موحش دامك مو فيه و من هالكلام اللي تعرفينه ,,,,))

لان الرجل يموووووووووووت على هالحجي و حسسيه انه اذا طلع تكونين ميته خووووف ,,

و شووفي رذه فعله ,,

اتمنى لج غاليتي الحياه السعيده ,

و طمنينا عليج

احس محد فاهمني ابد ولا وحده منكم فاهمتني
كل شي سويته واقوله اني اخاف لحالي والبيت ماله طعم من دونك
ومن هالكلام ومن ناحية الغرفه وتزيينها والشموع سويتها
بس مافي فايده ابد
ما اقول الا الله يكون بعوني يارب ياكريم

الله يعينج
اذا تحسين انج غاليه عنده كلميه وتفاهمي معاه
وانا عندي احسن لو تبلغين احد من اهلج حتى ولو بعاد عنج لازم يعرفون
خل يحس انه اهلج معاج يخاف منهم ومن زعلهم

الله يكون بعووونج واغلب الرجال يسهرون وغرامهم يوصلون البيت متأخرين..ولكن لازم يكون التفاهم الزعل مايحل شي

ام كادي الله يعينك انا نفس معاناتك وساكنه بنفس مدينتك بعد وحامل بنفس شهرك بعد شنو تبين هههههههههههه صرت توائمك بس ماعندي اطفال

انزين اذا كلش كلش وصلت السالفه وما قدرتي تحلينها بروحج وانتي متمسكه فيه وتحبينه وتبينه صج وتبين تحافظين على بيتج وعايلتج ..

دخلي احد من اهلج او من اهله يكلمه .. او مثل ما قلت لج جربي اذا كان طالع دقي عليه وقوليله بنتك قاعده من النوم وبس تبجي مادري شفيها تعال نوديها الطبيب ولمن اييي قوليله الحمدلله نامت البنت شكلها بس قاعده مخترعه وووو عاد البنت طبعا خل تكون نايمه بالاساس .. ووو على ما ايييي كوني لابسه شي يغريه ويخليه لمن اييييي مايرد يطلع لمن يشوفج ويقعد معاج ووو بجذي اتوقع راح يحس وراح يعرف انج سويتي جذي عمدا

جربي حبيبتي كل اللي تقدرين عليه علشان تحافظين على بيتج وسعادتج وسعادة زوجج

وبعدين قعدي كلميه قوليله حبيبي انته في شي ماتحبه بالبيت او مضايقك يعني انه وايد ازعل او ازعاج اليهال ولا شنو بالضبط قولي علشان اعرف واهيء لك كل وسائل الراحه اللي اقدر عليها علشان تقعد معاي ومع عيالك ونستانس ونحس بجو العائله

جربي حبوبه اللي تقدرين عليه

واشرايج باللي يسهر على النت للصبح ويكشت بالدوام وكله خصومات

هذي حالتي معاه واذا كلمته يقول لي شي عادي دوامي مو مهم

شنو اقوله هذا بالله

ودي اساعدج بس هذي مشكلتي مع ريلي هم السهر

حبيبتي والله عورتي قلبي
شوفي في حلين
يا انج تدورين مرااا حق اخوه علشان مايسهر معااه
ويا انج تكلمين اهله او اهلج عنه يوقفووونه عند حده
والله ما اجذب عليج
انا اختى مثل حالتج
هي عندهااا اربع يهااال وكلهم صغار يطلع من اليت ومايرد الا الصبح ومايقعد معااهم ومايطلعهاا
صبرت عليه سنه بس ما تحملت قالت حق ابوي
وابوي كلنم ريلهااا فهماااه
وصج من يوم ما كلماااه وهو مايسهر وكلا يطلع اعيااااله

حبيبتي قولي حق اهلج او اهله يكلمووونه علشان يعرف ان وراااج اهل يسألون عليج وخااافون عليج

أهم شي اهوه شلونه وياك؟ مو مقصر وياك و وي عياله ؟ كل شي تمام مرف رعاية و غيره؟ كتبي قائمة بالاشياء الزينة اللي فيه..و لا اتوقعين انه من جلسه أو شمعة بغير لأ يبي له وقت انتي حطي نفسك مكانه و فكري نفس تفكيرة وطولي بالك و مو كل شي ينحل بالزعل…و الوحدة ما تقدر تغير الريال على شي اهو متعود عليه ..يعتمد على سنوات الزواج..على حبة واهتمامه فيك؟ وايد في أشياء تؤثر في الوضع.

أهم شيء فكري بهدوء بدون بكاء و دموع…وشوي شوي زيدي محبتك في قلبة.زلين تطلعين حب السهر من قلبة.

والدعاء ثم الدعاء ترى مو انتي اللي بتغيرينة ربك وحدة القادر عليه.

الله يعينج ياعمري

مالج إلا الصبر ….صدقيني أغلب الرياييل جذي …هم متعودين من قبل على

السهر والقعدة بالدوانية للفجرأيام العزوبية ..وماحد يحاسبهم

ومايبون يغيرون نمط حياتهم وطبعهم إذا تزوجوا

بس مرده بيمل من الدوانية والسهر …وبيرجع لبيته

بس انتي لاتكدرينه إذا رجع …وحاولي تقعدين بالصالة ولاتنامين بالفراش ..( إذا قدرت على السهر ) يعني مو كل يوم …..صحتج ألزم حبيبتي وراحتج أولى

خل يشوفج كل يوم سهرانة تنطرينه …يمكن ينكسر خاطره عليج ..ويقول بسره ..مسكينة مرتي ماتنام إلا إذا أنا دخلت البيت …إن شاء الله يرأف بحالج ..ويحاول يخفف السهر اليومي

وإذا مافاد ….والسالفة بتطول …لكن مالج إلا الدعاء والصبر ..ومثل ماقلتج مرده بيمل وبيكره السهر

حبيبتي الله يعينج ترا كلنا مرينا بنفس المشكلة بس الوقت راح يحلها ومصيرة بيمل ويزهق من الدوانية والربع بس شوفي متى ، فيه مره مثلي بعد سنين وفيه اللي بسرعه بس خليني اقولج حل وجربيه يمكن يصير مفتاح للمشكلة – بما إنج جربتي كل شي معاه ومانفع ليش ماجربين دهاء حواء وإنج اتسوين تمثيليه واللي إهي إنج لما يروح للسهر مع ربعة يعني بحدود الساعة 12 تتصلين عليه وإنتي تبكين وتسوين نفسج ميته من الخوف واتقولين له تعال بسرعة لاتخليني فيه واحد قاعد يدق الجرس كل شوي موراضي يمشي وأنا خايفة على نفسي لايكسر الباب وزيديها بهارات من عندج ولي جا سوي نفسج ميته من الخوف وتعلقي برقبته وقوليله لاتهدنا مرة ثانية وبعدين ياقلبي ليصار ثاني يوم وراح للدوانية دقي عليه وقوليلة لاتأخر ومثلي عليه إنج خايفة لايصير نفس البارح وكل يوم خليج سهرانه بغرفة النوم ومقفلتها عليج علشان ليجا يشوفج خايفة وموقادرة تنامين قبل لايجي وربج كريم إن شاء الله