الزوجة العبيطة

تدرون شنو اكثر شي يحرني بالدنيا ؟؟؟ الزوجة الغبية و الله ما اتحمل اشوف وحدة جذي ؟؟؟

انا قاعدة اشوف مواقف من وحدة جدامي و وايد محترة عليها شنو هذا و الله

يعني ليش تخاف من ريلها جذي ؟؟؟ شدعوة بيذحبج ؟؟؟ الصراحة الوحدة لازم تفهم الريال و تخليه يحس انه عندها شخصية . في كلام سمعته من وحده كبيرة و فاهمة قالت لي الريال لو شنو كان مركزه و شهادته و شخصيته و عمره غني و لا فقير متدين و لا عادي لو شنو المرأة لما تفهمه انها لها شخصيتها و كيانتها راح يحترمها و يمشي معاها سيده

شنو يتحكم فيج ريلج ؟؟؟ شنو ما يخليج تطلعين مع رفيجاتج ؟؟ ليش يعني ؟؟؟ و المشكلة انه في بنات عندهم عادي شنو ليش تدفين نفسج وين حياتج ؟؟ لازم يكون لج وقت حقج انتي بروحج من غير ريلج و شنو يعني ما يخليج تروحين عروس و استقبالات و لا توجبين الناس ؟؟؟؟ شنو هذا ؟؟

ليش المرا من تتزوج تلغي نفسها ؟؟ وين احترامج حق نفسج ؟؟ المشكلة عندنا التفكير الرجعي و المتخلف انه الريال يحب المرا اللي تطيع و بس انشالله و انشالله لا حبيبتي لايقصون عليج اذا انتي ما حسستي الريال انه انتي لج رأي و لج كيان و انتي محترمة نفسج و مقدره شخصيتج ما راح يحترمج لو شنو . ترى الريال تعجبه المرأة القوية بس ما يقول لأنه يدري انه راح تكون قادرة انها تتحمل مسؤلية

التفكير اللي لاحظته انه شنو بتسوين له حركات و شنو بتلبسين و شنو بتطبخين ليش ماكو تفكير بشنو راح تتكلمين معاه ؟؟؟ شلون حلكم حق المشاكل و شلون تفهمينه رايج و شلون تناقشون المشاكل ..

خلي حياتج طبيعية لا تعزلين نفسج ترى بينه و بين نفسه راح يقول عنج مينونة . خل يصير عندج حياة اجتماعية عشان يكون فيه شي تتكلمون فيه لما ترجعون البيت

الشهادة و الوظيفة ، دام عندج وظيفة و عندج شهادة راح يحطج على راسه لأنه راح يدري انتي معاه او بدونه راح تعيشين و جذي راح يخاف عليج . اكره اكره المرا اللي تترك دراستها ووظيفتها عشان الزواج فرضا مات ريلج شنو بتغبرين ؟؟؟؟ لا شهادة و لا وظيفة ؟؟؟

و حطي له حدود لا يتمادى عليج فهميه انه امج و ابوج و اخوانج اول شي بحياتج و بعدين اهو و جذي راح يحترمهم و لا يتجرأ انه يغلط عليهم فيه بنات يبيعون اهلهم عشان ريال الحمدالله و الشكر يعني شنو ريلج ما يسلم على ابوج و لا ما يحطله احترام ؟؟؟؟ كل هذا يسويه و هم تعيشين معاه ؟؟؟ لا تقول عيال و لا ستر و لا شي الكرامة اهم شي الزوج موجود و العيال مولودين بس الأهل ما يتعوضون

وايد محترة ووايد منقهرة لأنه اللي قاعدة اشوفه شي يحر يا بنات اصحوا لا تخلون تفكيركم شنو البسله و شلون ازينله و شسويله

فكري بلإحترام و التقدير و الحب بعقل و خل يصير عندج كيان و خليه يفتخر فيج و خليه اهو اللي يخاف يخسرج مو انتي

شوفي عزيزتي من ناحيه الوحده الي تهد دراستها عشان الزواج هاذي اعتبرها غلطانه واذا على الزوج يحرمها من طلعتها مع الرفيجات فهذا من حقه اوكيه توجبهم بالمناسبات مو من حقه يمنع لكن المجمعات والمطاعم بقول من حقي اما بالنسبه لزيارتها حق اهلها مو منحقه انه يمنعها وبتطلع غبيه اذا بطاوعه انا حماتي ضحت باهلها عشان زوجها لدرجه ان منعها تزورهم لفتره واهي راضيه والحين ذالها على الاخر اللهم لا شماته بس ساعات اقول حوبتي لان الي شفته منها مو شويه بس عيالها يكسرون الخاطر مالهم ذنب ولا اهي عساها من هالحاله واردى اللهم لا شماته كما تدين تدان

لا حول الله … بس اظن ان هذي غلطتها لازم تكون شخصيتها اقوي من جذي

انا معاج بكلامج بس عاد مو اللي مره وحده لا البسله و لا اكشخله و لا ما عنده حساب و الطلعات الذا اهوا قاعد مثلاً بروحه اصلن الوحده تحس انه غلط تطلع و تخليه جذيه راح يدور ع الثانيه و العين الزايغه تشتغل اكثر يعني سالفة الطلعات المفروض ان الوحده تنسقها بينها و بين نفسها مو ريلها و ان يمنعها من اهلها عاد اهني توقفه عند حده لانه بهالحركه ما احترمها و لا حطلها كيان

الزواج عمره ما كان حرب ومعركه.. الزواج حب و موده
وصدقيني الي ماتطلع مع رفيجاتها .. اهيه اكيد شايفه ان القعده بالبيت مع الريل ابرك من الطلعه مع رفيجاتها .. وكل زوجه ادرى ابيتها وحالها
وفي ناس اعرفهم كله اتعدرون عن العزايم عشان ريايلهم وهمه ريايلهم ابمخباتهم..

يعطيج العافية

انا اايدج ببعض النقاط
وانا مثلج ما احب احد يقيدني
بس هم انج اتشاورينه حلو

تاكدي ان كل انسانة تختلف شخصيتها عن الثانية

يعني رفيجاتي بالكلية كانو 25 وحدة
كنا على قلب واحد
والحين صفينا 3

ليش ؟؟؟

والسبب رياييلهم

مايخلونهم حتى يزورون

عموما اهم شي ان الانسانة تكون سعيدة بحياتها

عبيطه؟
لأ
ماظن مو هذا التشبيه اللي لازم نتسخدمه
مسكينه يمكن مغلوب علي امرها اي ، شخصيتها ضعيفه ، او الله مبتليها

سؤال اختي انتي متزوجه؟؟؟
لو متزوجه ويا ريلج وقالج لاتطلعين لاتروحين لاتردين طلعه رفيجات مابي بتقوليله موبكيفك عاد بطلع وبروح وانت ماتحرمني واعلا مابخليك اركبه؟ ما أظن!!!!
ومايصير الوحده ماتتزين وتتعدل حق ريلها !!!! اصلا بطبع المره تحب تتجمل وتهتم بنفسها وتطلع بابهي صوره فطره فينا وبزود عند الكويتيات !
تحبين تقابلين الناس او تروحين استقبال ببجاما ام دينار ونص؟ وبطوط وميكي؟؟ ماظن بتلبسين اكشخ شي عندج ومكياج وشعر واكسسورات ، ماظن ان الوحده تكشخ حق الناس وتهد ريلها !!! مو تزوجت خلاص ظمنت كيفه تدبس !
ومو صح ان الوحده ليل نهار تفكر ابي البسله ابي اسويله ابي ابي ابي هذي موصاحيه الشمس مو تشرق وتغرب لاجل الزوج ورضاء الزوج !!!

انتي الحين ابيت اهلج او لما كنتي ابيت اهلج ماكنتي تمشين بشور ابوج؟ ماكنتي تشورينه قبل لاتطلعين او تزورين رفيجاتج او تطلعين وياهم غدا او عشا او كافيه او تسوق او علي الاقل اذا الابو اقشر البنت تاخذ راي امها وتبلغها
احنا عايشين بمجتمع شرقي له عاداته وتقاليده اخلاقياته الله يديمها واهي اللي حافظتنا من الخرابيط اللي قاعده تصير بالغرب
البنت تكون بذمه ابوها لين تتتزوج ومحاسب ومسؤول عن تصرفاتها وتربيتها واخلاقها وتعليمها ومصرفها
ولي تزوجت تنتقل لذمه زوجها ويكون مسؤول عنها ماديا ومحاسب عليها اجتماعيا ، مساله ان تقعد بالبيت او تشتغل هالشي بايدالمره ، واذا الريال سوا مشاكل وقال تقعد بالبيت مسؤول انه يوفر لها مصرف يعادل اللي خسرته او اللي يرحيها ويخليها بنفس مستواها دون تقصير وان ترضا والا لأ يرجع حق بيئه وتربيه البنت نفسها واستعدادها ومو معناه انها قعدت بالبيت صارت ملكيه مختومه وعبده خدومه وشخصيه امينه وسي السيد ! لاوالله احنا بمجتمع ولله الحمد متقدم مو متخلف وبالعكس ياليت الريال يرد ييشيل دوره مثل ماكان ! خل يشلون من المسئوليات اللي علينا مانبي مساواه !! خل يرجع يودي وايب اليهال ويشريلهم من السوق ويجابل بالبيت وكل شي مانبي نصير رياييل وحريم !!!
وترا مانهدت الدنيا اذاماطلعت المره ويا رفيجاتها يقدرون يزورنها بالبيت وتقدر تزورهم ! او في اماكن ممكن يرضا عليها الزوج الحجر

ليش انطيع الزوج؟ هذا امر الله طاعه الزوج واجبه وله القوامه رضينا والا لأ ، هذا الشرع ، اما التمدن يحكم علي الزوج انه يكون عادل للزوجه ومايقصر بحقها ، ويعاملها علي عقليتها ومستواها ، اما اللي لأ لمجرد لأ ماكو اهلج ماكو طلعه اقفل الباب ماكو مصرف هذا مريض نفسي وسادي !

وشغله اخيره ،اللي تلغي شخصيتها وتخلي شخصيه ريلها مكانها هذي اهي بختيارها واهي حطت حدود العلاقه بينها وبينه جذي واهي رسمتها ، اللي تتزوج اهي تحدد الخطوط وترسم الحياه باللي تقدر عليه في ناس عسرين خلئه بس ماكو شي مع الوقت مايلين لي كسبت قلبه وثقته اميه بالاميه ماراح يقول ولاشي وراح اهو يدور راحتها ورضاها
والزوزاج رحمه وسكن واستقرار وموده مو مصارعه وانا اقوا منك وانت ماتقدر علي احب ان يكون لي زوج يفهمني يشيلني بالوقت اللي احتاج في احد يكون يمي يشاركني حياتي ، واشاركه حياته مو حياتي لي وحياتك للك واتدخل فيها

حبيتبي وسعي بالج مبين ان صاير موقف مكدرج لاتضايقين عمرج

صح لسانج بكل كلمه قلتيها

انا معاج بكل كلمه وكل حرف كتبيتيه

وحبيت اوضح للبنات

بنات ترا هي ماتقصد لا تلبسون لا تكشخون لا بالعكس بس تقصد مو تخلون تفكيركم بهالمحور بس يعني وسعوا عندكم افق التفكير شوي

بنات اخذوا فره بالمنتديات او منتدانا نفسه اغلب البنات يكتبون علاقة الزوجه بزوجها بهالسوالف عن لبس مكياج لوك جديد حق ريلها فناتق بالغرف يعني هالسوالف انا مو ضدها اكرر واقول مو ضدها بالعكس المفروض كل وحدهتسوي جذيه بس مايكون تفكيرها بهالنقطه وخلاص

ولا مره شفت موضوع عن طريقة في الحوار الذرب

طريقة اقناه الزوج

طريقة للتعارف ومعرفة شخصيته بايام الخطوبه

طريقه الاحترام بين الزوجين

كل هذا اشياء اهم ترا

وفعلا الريال ترا مايحب البنت الغبيه اصلا

تطيح من عينه

وكل ريال ترا يهمه بينه وبين نفسه ان تكون زوجته قويه ويعتمد عليها لان لا سمح الله بالله مات ولا سافر شغل مده طويل يكون متطمن على بيته وعياله والله ترعاهم مره عن عشرة ريايل

ولا يصير موقف او اي شي تكون تعرف تتصرف مو تكون غبيه بس تدق عليه وتصيح وبس

انشالله تكون وجهة نظرنا وصلت

واسمحولي على الاطاله يا بنات

المرة ما تسوي كل هالأشياء اللي ذكرتيها علشان الزوج نفسه لأ ..
بل لأن ردة فعله و سعادته بالأمور اللي تسويها سواء اللبس و الكشخة
و الفناتق هذي ترضي غرورها و تونسها .. و هذي فطرة طبيعية بالمرة ..

و انا اتفق معاج حول ضرورة ان يكون للمرة رايها و شخصيتها .. و هذا
مو معناته انها لازم تعارضه بكل شي .. لأ .. المفروض تكون على طبيعتها
وبالأمور و المسائل اللي لها ملاحظة عليها تبدي رايها و وجهة نظرها و
تناقش و تحاور و لا تحسسه انها عديمة شخصية او عديمة خبرة ..
< من جذي المرة لازم تكون واعية و مثقفة ..

رياييل هالوقت الواحد منهم يبي مرة يعتمد عليها .. تعود على الإتكالية ..
و أصلا تشدهم المرة اللي معتمدة على روحها و واثقة من نفسها ..
و كلامج عدل من هالناحية ..

لكن .. كل هذا النقاش و الحوار يدور – او المفروض انه يدور – بتفاهم و
اسلوب راقي لاا بصراخ و لا نجرة و لا هواش ..
كل شي بالتفااهم و التتكتك

و هالله هالله برياييلكم .. رضا الله من رضا أزواجكم عليكم يا بنات ..

اهوه كلامج صح بس ترى الحياة مو بس منو يفرض شخصيته على الثاني
يعني بالسياسه تقدرين اتغيرين تفكيره كله وشخصيتج مثل ما اهيه مالغيها كلش بس لازم يكون تنازلات عشن الحياة تمشي
ومو المفروض ابدي احد على الثاني لا كل واحد وله حقه
وترى مافي بنت اتسوي شي غصب عنها حتى ولو انها رضت بالاول بتحاول اتغير ريلها بالي اهيه تبيه
ومشكوره

و في الكثير من المواقف يكون ضعف المرة قوة لها ..
و مثل ما يقولون تتمسكن لين تتمكن ..
المرة مهما كانت تبقى الأنثى و ما يصير تحط راسها براس الريال ..
طبعا هالأمر يمشي على الريال اللي صج ريال و فيه شهامة أما اذا كان بو طقة و ما فيه رجولة .. فالأمر يختلف

اختي ابريل الكويت شكلج مندقة على الوضع ومعصبة هدي وكلشي على قولت امي حقج اهوة الريال كلة لج مهما سوا روحة سي سيد

انا ما اتفق معاج بوايد من النقاط لأني مرت على اشياء اتعس واكثر وكنت اواجهه بالصبر انا اكتب وكلي فخر بالي قدرت احققه خلال الخمس سنين زواج واشوف روحي عبقرية مو بس ذكية

انا زوجي وقف علي كورس كامل بالبيت قعدت ورجعت كملت وخذيت الشهادة الحمد الله وتوظفت وطلعني من الشغل بس اقولج كنت اتناقش معا بكل قرار اتخذة هذا مستقبلي بس اذا اقنعني اسوي الي يبي وصج وقفت كورس عشان قالي انتي حامل وما ابي البيبي اصير في شي ورحت الطبيب والطبيب قالي قعدي وبعد ما ولدت رجعت كملت دراستي والوظيفة طلعت بعد نقاش طويل وهو انا يبيني اصرف على البيت وهذا ما كان عاجبني فقالي قعدي بالبيت واعطيج مصروف وافقت وقعدت تخيلي الحين اقولي رجعي الشغل وبالشروط الي تبينها لأنة حس بقيمة الوظيفة وحرام فكر فيني على الأقل احصل معش تقاعدي ينفعني والحين قاعدة اسوي اوراقي راح ارجع وانا مو خسرانة شي

بالنسبة حق اهلي قالي مالج الا طلعة وحدة بالأسبوع اتروحين لهم وانا متعودة كنت كل يوم عندهم ناقشتة قالي امج تفر مخج قتلة لاتحط بذمتك بس خلاص ماراح اروح قاموا اهلي كل يوم ايوني البيت خخخخخخخخ
هون الحين اهوة قام اروحلهم ويسال عنهم ويوله عليهم

بالنسبة للصديقات قالي ماكوا بس يوم عرف معدنهم الذهب قمت اطلع معاهم بالأسبوع مرتين

حتى الخدامة قالي مانبي سوي الي تقدرين على والحين اخر مرة اهوه كان احن على متى بتروحين تطلبين؟!! لا وقولي طلبي من اشكناني معنة يعتبر غالي بس شوفي سبحانة اغير ولا يتغير!!

وانا طريقتي اعرف مفاتيح ريلي دايما امدح باهلي ووري اشرولي وشيابوا حق وولدي واهلي كل ماراحوا مكان ايبوله صوغة يعني ترسنى عينة عدل بمعنى الكلمة وهوا حس اني انا مو بحاجتة اهلي بخير ونعمة وشهادتي بايدي وعلى كل هذا اطيعة وسوي الي يبي عشان جذي كان اذا اخذ قرار يتراجع عنة بسرعة

وتخيلي بسلمان ولدي قالي ماكو انفاس وصج ماتنفست الا 20 يوم ورجعت البيت ابنتي الثانية قالي قعدي الفترة كلها

انا صراحة احس الريال الي معدنة طيب مهما تنيحس راح الين وراح احس انة وراج اهل وصج انا اهلي مشا الله عليهم تعاملوا معا بمنتهى الذكاء عشان مايضروني والله جزا الوالدين على الله سبحانة

وانا الحين اعتبر روحي ملكة (ملكتة بذكاء وطيب المعاملة) احنا مو داخلين حرب والشخصية اذا حافظتي عليها محد راح اذلج والطاعة مو معناتة ضعف تذكري قول الله تعالى (ان كيدهن عظيم) والشيطان قال عنة رب العالمين (ان كيد الشيطان لضعيف) معناتة احنى اقوى من ابليس بكبرة مانقدر على ازواجنا خخخخخخخخخخخخخخخخخخخ

هدي اعصابج ودايما شوفي من الي يضحك بالنهاية

عجبتني اراءكم
كفيتوا ووفيتوا